TITUS
Svan Prose Texts IV (Lashkh)
Part No. 224
Previous part

Text: 224 
Page of edition: 226 
Line of edition: 1 
V. საჭმელ-სასმელი
Line of edition: 2 
CCXXIV. კვეცნა დიარ


Line of edition: 3       კვეცნა დიარს ი კვეცენს ეჩხე̄ შვანს წყჷლჲან ხატუ̄ლიხ.
Line of edition: 4    კვეცენ მე̄ვარ დო̄სგჷნღო ლჷმარდ შვანე გომჟი, სიმინდშა̄ლ მახე ნაჴედ
Line of edition: 5    მა̄ ლი შვანთე. კვეცენს ალა̄შიხ მანჟღორს ი მალფხვს, მარა ჲერხიაგის
Line of edition: 6    მანჟღორ კვეცნა ლილა̄ში მა̄ ხა̄რხ წეს, მჷგდა̄ მო̄ ხოშიდხ, ამჟი
Line of edition: 7    ხაბჟახ. ეშჲეში̄ ხვაჲ დაბრე ლილა̄ში კვეცენდ მა̄მ ხაზნახ. ხულუგვ
Line of edition: 8    კვეცენს მერხელდგარ ე̄რ ალა̄ში, დეშდვარ ხათილხ ი ამღა. მალფხვს,
Line of edition: 9    ახალთესლს, ალა̄შიხ ი მაფასი̄ ხოჩა ხა̄რ. კვეცენს მე̄ვარ ლუგვნიანდ
Line of edition: 10    ხოგდურიხ. ჲესვა̄ჲ კვეცენ ხოშხვნა ჯვინელ, ეჯი ხოჩა ბერძეგენ
Line of edition: 11    მეზგათე იშჷლდანი სოფელ-ქვეყანა̄ჲსა. სადაგ ლადღარჟი კვეცნა
Line of edition: 12    დიარს და̄რ იჴმარი. ჭირჟი, ხინჟი ი ღჷნჲემურჟიგარ იჴმარიხ ი
Line of edition: 13    გზა̄ვრთე ლა̄ზჟი. ღერთალე ნადდებუნ ტაბლარდ კვეცნა დიარსგარ
Line of edition: 14    ანყჷდახ, იშგენ მა̄ ლას წეს. მჷწჷხჟი კვეცენღა მაგ თეს ხეთხი მჷწხა̄რს,
Line of edition: 15    კუმაშ ხეკვდია̄, იშგენ მა̄ლე. კვეცენღა მაგ თეს იცხკე, ეჲჟი ხეთხე̄ლი
Line of edition: 16    მაგ. ქა ლჷკლავან კვეცენს ქა̄შყვდიხ, ქა̄ფრეხ ლჷკე̄რე̄ლჟი ი
Line of edition: 17    კიდბონარისა საწუთრო̄ლდ ჩვაშხვნიხ. ფურ ჲედ ჴან მო̄ ხეწხი̄ მეზგას,
Line of edition: 18    ეჯურ მასრა კვეცენს ქა და̄რ ვოდი. მუჟღორ ქა̄გვეჲხ ლუნთისა̄ სამწჷხ
Line of edition: 19    კვეცენს დგვირცახან ი ლუშხუნ ხუღვახ მჷწჷხჟი̄ნაშდ. დაგრა
Line of edition: 20    უქად ლი ჩი̄მიშდ ი ლჷმა̄რად მო̄ ხეღვე̄ნიხ კვეცნა ფექ, ეჩქა იმხენ
Line of edition: 21    ანსახთიხ, ლუნთისა ლეგვე̄რალ ლუკვრემე ლიხ. ლა̄ჲრაკდ არი, ერე
Line of edition: 22    "ლაკჩხე̄რი კიდბონ ლოქ ხო̄გ კვეცენშვ გოში", ეჩთა̄ნ მეზგე ლოქ
Line of edition: 23    ლი. წყჷლჲან კვეცნა დიარს ანყეხ განგალ ლადღარჟიგარ -- თანაფს,
Line of edition: 24    ზომხას, ლაგვნობჟი ი ლეჯგრი-ლეფა̄ნად, ოდო ჲენურდ ლეზობდ
Line of edition: 25    და̄რ ისრე. ანყეხ ღჷნჲე̄რუჟი შოთარდ ი ღერთა ნამზჷრუნ
Line of edition: 26    ტაბლარდ, ლაგვნობჟი -- სეფსკვრალდ ი ჲესვა̄ჲ ხოსერ ჯვინელ კვეცენ
Line of edition: 27    ლეჴმარიდ, აგნეხ საფვარისა ი იჴმარიხ ნატფჷნდ ი გზა̄რვთე ლეზჷზია̄ქდ.
Line of edition: 28    აგის ლეჴმარის და̄რ ამერდიმე, გზა̄რვთე ლეჲესს ი ქა̄მავ ლეჲესს
Line of edition: 29    უმერდიმად დე̄მ ხაყიჩხ, ხოშა თვეთვნე დიარ ლოქ ეხფასი ი ეჯი
Page of edition: 227  Line of edition: 1    ხოშა ხაჟახხ სოფელ-ქვეყანაცახან ლეწვე̄ნად. კვეცნა ჴიცს, ჲეს
Line of edition: 2    ჭუ̄რუს ი ჲეს ხოჩა̄მდ ჟი ლჷტი̄ხს, ხატფინეხ ქა̄მენქა ჲეს თაშს, ჲეს
Line of edition: 3    ქართოფილს, ჲეს ლობჲოს, ჲეს ღედერს ი ანყეხ კერჲაჟი. თაშს,
Line of edition: 4    კვეცენშვ ლჷტეფს, "თაშა̄რს" ხატუ̄ლიხ, ჲედ "ქუთს", ქართოფილს
Line of edition: 5    ლჷტეფს -- "ქართოფლა̄რს", ღედერს -- "ღედრა̄ლს", ლობჲოს --
Line of edition: 6    "ლობჲა̄რს" ი სიმინდი ფექიშ ი თაში ლჷნჩჷდა დიარს, კვეცენშვ ლჷტეფს,
Line of edition: 7    "ლუკვნა დიარს" ხატუ̄ლიხ. ჲესვა̄ჲ მასრა კვეცენ ხუღვა,
Line of edition: 8    ამკალიბ დიარალს ფიშრა̄მინ ანყეხ ზაისა ღჷნჲემურულ, მარა ჲესვა̄ჲ
Line of edition: 9    კვეცენ დოშ ხუღვა მასრად, ეჯჲარ მანა̄ში ჴიცს ხატფინეხ სადაგ
Line of edition: 10    ლადღარჟი ლეჴმარი დიარალს. ჯვინელდ კვეცენს თვით დაბო̄ლსგარ
Line of edition: 11    ლჷმლა̄შინხ ი ამშა მაჴედ ლამა̄რდგარ ხაღვე̄ნახ, ქა̄მავ ლეთნად,
Line of edition: 12    აგის დეშ ლჷმსერინხ ლეჴმარიდ, მარა ათხე̄ დროჲჟი ხოშა ლეხცხა̄ნ
Line of edition: 13    აგის ლიჴმარის კვეცნაშ, ეჯღა ერე ათხე ლეყდიდ ხეთხიხ ყჷრმა
Line of edition: 14    ფექ ი ამნე̄მ ანჲეფე კვეცნა დიარ შვანისა, ოდო ათხად მე̄ვარ
Line of edition: 15    ძოძო-კოკოდ ღალ ხეჭამხ კვეცნა დიარი ლიჴმარის. ეჩქადა დროჲჟი
Line of edition: 16    კვეცნა დიარშვ ჴადი ლიბზე მე̄ვარ გარჯ ლჷმა̄რ ქორწილურ ი კათხტბგურ
Line of edition: 17    ი შომასი̄ ქორწილს ი̄რდო̄ლ მუშვან, ეშუ ჯა̄რ ღერთა ჟჷრ,
Line of edition: 18    ეჯი გულჲანო̄ლდ ესბიზო̄ლ. ეშხუ მუჩკუ̄ლდ ლე̄ქვ, ერე "ჲერხი ლოქ
Line of edition: 19    ლაჷვნობჟი ჲეშდჲერუ სეფსკვერს ი ჩხარა ფაკან ლობჲო̄ ნა̄ყურს იზბი, ალე
Line of edition: 20    ლოქ მა̄მ იკაფ, იშგვიდ-არა სეფსკვერს ი ვოხუშდ-უსგვა ფაკან ლობჲოს
Line of edition: 21    ლოქ ხეკვეს ჟესგეჭე მა̄რე". ჯვინელ დროჲჟი მაჴედ ხოხრა
Line of edition: 22    ხაჴდენო̄ლნახ, აჷის მიჩა ულუფდ ხა̄რა ჟი ლეგეჭ, ხონ ქა̄ხა̄რე̄ნ ი
Line of edition: 23    ხონ მო̄მა ი ხოშა ნაღალდ ლჷმტამინხ, ჴადს დეშ ლჷმბიზინხ, ჟეღდი̄ მინე
Line of edition: 24    ნა̄თი დიარხენქა ხა̄რახ ლევდი ბოჯ ი ამჟი ნატამ მა̄რე ლეზობიშ,
Line of edition: 25    მაჲ საკვრელ ლი, ერე იშგნა̄გ, ქორწილჟი ჲედ კათხ-ტაბგობჟი,
Line of edition: 26    აყრს დე̄სა ჴედნო̄ლნი ი ხვაჲს იზბჷნი. ჲერხი ქორწლობჟი სემი
Line of edition: 27    ლადეღ აშგარ იზბი, სერთხი̄ მჷთი̄ტა კვეცნა შვეთარს ი თაშა̄რალს ერ
Line of edition: 28    ხოგფენიხ სგობინჩუ. მაჴედი ლაჴდა ეჩქად დე̄მხენ ხა̄დახ ნავშუკუროშ
Line of edition: 29    ი თანაღი პილთე მოზგა̄ლ ხოში̄ლ ლეზობ-ლეთრას იმკვედე
Line of edition: 30    ი ამღა ხეფსო̄ლ ი ხეფსი ხოში̄ლ ზობაჲ სგა̄ვჲა ბარი ჴევი მოზგა̄ლ
Line of edition: 31    მა̄რან. ათხე ერ ანჴად ყჷრმა ფექ ი ლაჴდა̄ჲ ჟეხსყა̄ნ, ხოშა ლეხცხა̄ნ
Line of edition: 32    ლეზობი ლიჴმარის ი გუ ლჷმყი̄რე ხა̄რ ჩი̄ს, კვედად ი მა̄ჲდობდ მა̄მ
Line of edition: 33    ხაყლუ̄ნიხ ი გაცხაჲდ, იმჟი̄ჲ წეს ლი, ეჲჟი ლიდჲარა̄ლ ენბინა̄ნ.
Line of edition: 34    ლეზვბო̄რა̄ ძოძო-კოკოდ ლიჭემსი̄ ჟეხკვი̄და̄ნ, მაჲ საკვრელ ლი. ეჩქად
Line of edition: 35    ალო̄ თხუმჟიგარ ე̄სა ლჷმმჷში̄ნხ, ოდო ლინყავა̄ლ, სუმრა ი
Line of edition: 36    ამკალიბ ლაშდრა̄ლ ხოშა ხალტე̄ნახ. ათხე ლიმშაჲეს ხოშა ლოხგუ̄შეხ
Line of edition: 37    ქორს ი ქა̄მავ ი ლეზობი ლიჴმარისი̄ ლეხცხა̄ნ ამშა ბედშვ. თვით
Line of edition: 38    დაბო̄ლს ე̄სა ადჴანნახ კვეცენდ, ეჯი̄ჲ ძღჷდ ხაბჟე̄ნახ, მარა ათხე
Page of edition: 228  Line of edition: 1    მახე მოლარ ლოხქიმხ ფიშირ აგის ი მაჴედი ლიჴედდი̄ ჟი ლეჲცხე
Line of edition: 2    კვეცნაშ ი იშგენ მაკვცო̄რა̄შ ი კვეცნა დიარი̄ ხოფშირა̄მინ ინყი ფიშირ
Line of edition: 3    მეზგე̄ლისა.


ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.