TITUS
Svan Prose Texts IV (Lashkh)
Part No. 225
Previous part

Text: 225 
Page of edition: 228 
Line of edition: 4 
CCXXV. მანა̄ში ნატფჷნ


Line of edition: 5       მანა̄ში დიარს ძვირდგარ ე̄რ ანყე, ალეს იჴმარიხ სიმინდიშ ი
Line of edition: 6    ფეტვი ნატფჷნდ. საფვარისა ჩიგარ მანა̄ში ჴიცს იტხეხ ეჯზუმს, ერე
Line of edition: 7    ეშხუ ინჯრჟი ქა ხა̄დეხ ქორა მა̄რას ი მე̄რმა ინჯრჟი̄ნაშდ მახან შჷდეხ
Line of edition: 8    ლაფექო̄ლშვ მანა̄ში ფექს, ჟაჩდი̄ნეხ საფვარისა ჩოგანშვ ი სადილდ
Line of edition: 9    ჲედ ვახშამდ ქა ხატფინეხ სიმინდი ყვა̄ბარს ქა̄მენქა, ჲედ
Line of edition: 10    ფეტვიშს ი ამჟი ირბჲელხ ლესდილ ჲედ ლევახშამ დიარალს. მანა̄შსუდ
Line of edition: 11    ხატფინეხ ლუკვნა დიარალსი̄. ღჷნჲემურულ ი განგალ ლადღარულაჲ
Line of edition: 12    მანა̄ში დიარს დეშერ ხოსიდ, სადაგ ლადღარჟი მეჲად ამშა
Line of edition: 13    ტეფ ხატფა დიარალს. ამის ჭუ̄რუდ და̄რ იჴმარი, ჩიგარ ჟი მეტხე
Line of edition: 14    ხოცხახ. არყი ლაფი̄ნაჟი მანა̄ში ზად ხუღვახ ჩიგარ, ჲერვა̄ჲს მო̄
Line of edition: 15    ხეღვე̄ნი მანა̄შ, ეჯკალიბ ჟი იცა̄დი მეზვბელხენ ჲედ ქერღა ი ჲედ
Line of edition: 16    სიმინდღა ი ამშა ზადს აბქვე ლე̄ჲრაყი̄ჲა̄ქდ. კუპტა̄რ დიარალს ხვა̄ჲდინ
Line of edition: 17    ხატფინეხ მანა̄ში ჴიცს, შომასი̄ ერე მუშგვრალურაჲ აგის ლეჴმარიდ
Line of edition: 18    ე̄სა ესწჷხახ. ამშა დიარს დე მუშგვრის ე̄რ მოშ ხაშგდე, მეშხე
Line of edition: 19    დიარ ხეფსი ი მეტჷ̄ნტყა̄ლ ი ამღა მა̄ ხასჲამხ მანა̄ში დიარ. მანა̄შს
Line of edition: 20    ქა და̄რ აკლავი, აშ ასვე̄ტეხ ი წვარ კირვალეშ ი კარპნალე ნა̄ნშგუნ
Line of edition: 21    ხა̄რხ. ლუფხვისა წვარს ხვაჲდინ კუმაშს ხა̄მნეხ მჷწგხჟი ი თჷმიჟი,
Line of edition: 22    ოდო აშ მაშედ მა̄მ ხა̄რ მანა̄ში წვარი ლი̄მნე კუმაშს. დო̄ჲდო ხოჩი̄ლ
Line of edition: 23    ლეზობ ხა̄რ კუმაშს მანჟღორ მანა̄ში წვარ. ჩაჩბარსი̄ მანა̄ში
Line of edition: 24    წვარშვ ასყა̄ლიხ. ჩი მაჴედდ მანკვი მანა̄ში მაჴედ ჴედნი ლუფხვისა.
Line of edition: 25    მანჟღორ მანა̄შ მე̄ვარ დო̄სგ ლი ლათჲა̄შ ი ჲერვა̄ჲს მაჴედი კვედობ
Line of edition: 26    ხა̄რ ლილფხვა̄ლთე, ეჩის ბე̄წუშ ხეჲა̄ლ მანა̄ში მაჴედ, უცეფო̄ლდაშ
Line of edition: 27    ქა̄სვე̄ტეხ ი ჟი იჲა̄ლვნეხ ლეზობდ. მანა̄ში სგა ლიჴდა̄ლე, ლითჲა̄ლე,
Line of edition: 28    მი̄შს პუშუ̄ლდაში მი̄შს ხატუ̄ლიხ. მანა̄ში ნალა̄შუნ გიმს
Line of edition: 29    ლი̄ნწე მა̄მ ხაწჷხ, ხოშა ქოხ გიმჟი̄ჲ ჴედნი ი ამღა ლი, ერე მანა̄ში
Line of edition: 30    ულა̄შად მეზგე ძვირდგარ ე̄რ იგნი. მაყი̄რიან მანა̄ში დიარ კვეცნა
Line of edition: 31    დიარშა̄ლ ლი. სიმინდი კაკლარ ი მანა̄ში კაკლარ მუგვიდ ილგონიხ,
Line of edition: 32    ალჲარ უშხვა̄რე ლაცა̄დუნად ხუღვახ ქემა-ქუმაურ. ნაჯგრუნ-ნაფა̄ნუნდ
Line of edition: 33    ი ლექორწილდ მანა̄ში დიარს და̄რ იჴმარი ი დე ნატფჷნდ
Line of edition: 34    ე̄რ ხატფინე დიარალს, ალე აგი̄ ლეჴმარიდ ხუღვახ ქორა მა̄რე̄მი
Page of edition: 229  Line of edition: 1    მჷბზად, მჷმყი̄რად ი მჷგჷრგილად. ამშა ლჷტეფ თაშა̄რალს ჲედ
Line of edition: 2    ლუკვნე̄ლს ქორა მა̄რე̄მიშდ იმჷრგი̄ნეხ, ლამშგვარდ ხოშა ნაღალდ
Line of edition: 3    კვეცნა დიარ ხოცხახ, მა̄დე̄ჲ -- მანა̄შიშ, მარა, ნა̄ქვი̄ს ლი, ერე "თჷმი
Line of edition: 4    ლოქ ზჷსყის აკლავი" ი ჲერვა̄ჲს იშგნა̄გთე დასამწ დო̄მთე ხა̄რ, ეჩქა,
Line of edition: 5    ხი̄დარი̄, მანა̄ში დიარს იჴმარი ჩი̄ნარ კვეცნაშ ი სიმინდი მჷქაფ.
Line of edition: 6    ჯვინელდ ხოფშირა დაბარ ხაღვე̄ნახ მანა̄ში ნაჴან-ნალა̄შ, ეჯღა ერე
Line of edition: 7    ამნარდ უ̄ნწა, ყა̄ლდი ი ქოხ გიმ იმარგ ი ღო ლი აჯაღუდ ხოშა
Line of edition: 8    ლემკახე ლუფხვისა დო̄სგა̄რა სგა ლიჴედ მაჴედიშ მანა̄შიშ ი ქუნუშ ხეჲა
Line of edition: 9    მჷწხა̄რ, ლეზობი კვედვა̄რ მეზგას. ათხე̄ დროჲჟი მანა̄ში მჷქაფ
Line of edition: 10    ითჲა̄ლხ, ერე სიმინდ ადლა̄შახ ხოშა. კვედობდ ლემყალ ჲესვა̄ჲ ხა̄რ
Line of edition: 11    მაჴედიშ, ეჯი კვეცნა ფექს იკჷრქე ყჷრმაშს, მა̄ჲდობდ ერ მო̄ ხა̄რ ლემყალ,
Line of edition: 12    ეჯი ჩუ ხოხალ ი სამწჷხდ ხოში̄ლს დე̄მამ აჴნი ი ალა̄ში მანა̄ში
Line of edition: 13    კაკლარს. ამჟი ერე ყჷრმა ფექი მეჴდან ი შუკვიშ ი ზჷზი ლჷფი̄შგან
Line of edition: 14    ლჷგონ ეხქი̄ფა̄ნ მანა̄ში დიარს ი ეჩა ლიჴნი-ლილა̄შისი̄ ეჲჟი ლჷგონ
Line of edition: 15    მა̄ ხაზ, ეჩქად ერ ხა̄ზდა ლიმა̄ჲდუ̄ნედ ლჷყა̄ლვა ხალხხენქა.


ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.