TITUS
Svan Prose Texts IV (Lashkh)
Part No. 226
Previous part

Text: 226 
Page of edition: 229 
Line of edition: 16 
CCXXVI. ქარ, ფეტვ, ზჷნთხ ი სიმინდ


Line of edition: 17       ქერ მე̄ვარ დო̄სგჷნღო̄შ ლი შვანე გიმჟი, სიმინღი ლიჴდა̄ლდ
Line of edition: 18    ქერგარ ლჷმა̄რ შვანე მჷსელვე. მაჴედ ბარქიან ხოხალ ი ამშა ვოჴ
Line of edition: 19    ი ნანგო̄დ ნაქერან ლა̄ჲდი̄ კუმში მჷჩფე ლი ჯო̄დი ლუნთისა. ნაქერანს
Line of edition: 20    ლაყვრაჟი ნალე̄რშუნდ ლჷმჴჷმრინხ. ქერი ვოჴ ჭემშა̄ლ ლუგვნიან
Line of edition: 21    ლი, მე̄ვარ ხალატ კუმაშს ი ძღჷდ ბარაქს ჴჷდე. ქერია̄ქ დაბ
Line of edition: 22    ხეკვეს მე̄ვარ ლჷ̄ნწე ლე̄სეს ი ეჩქა მაჴედ ხონ კიდბონისა ჯი̄ზდეს.
Line of edition: 23    უ̄ნწა გიმისა დეშ იმარგ ი ჲედ ხვაჲ ხანჲა ნაშომ მო̄დ ი̄რი ქერია̄ქდ
Line of edition: 24    ლეჴნი გიმ. მაჴედხენ ქერიშ ლიგა̄წბულე ძვირდ ე̄სა ლი, ეჯღა
Line of edition: 25    ერე სიმინდშა̄ლ სათუთ მა̄ ლი ი მჷცხის ხოშა ხოგიჭ ი ამღა მჷრე̄ს
Line of edition: 26    ლეხჷრდა̄ნ შვანე გიმს, მარა სიმინდი მეჴდან, დოხდო მანა̄შიშ დო
Line of edition: 27    ლე̄სეს, ქერსი̄ ლჷგონ ეხქი̄ფა̄ნ ხოშა ბარ სოფლარისა ი სიმინდი
Line of edition: 28    ლილა̄შის ლეხცხა̄ნ ქერი მჷქაფ, მარა თანაღი მომკერძ სოფლარისა
Line of edition: 29    ქერუდ ლი ქორა მჷბზე ი მჷსე̄ლვე. ქერს დიარდი̄ ანყეხ კვეცნა
Line of edition: 30    დიარშა̄ლ ჟი მეტხას ი ფეტვიშ ი სიმინდი ნატფჷნდი̄ იჴმარიხ. კვახ
Line of edition: 31    ქერი დიარს ზჷმა̄რ შაფა̄თი̄ლარდ ანყეხ კერჲაჲჟი, კვეცნა დიარშა̄ლ
Line of edition: 32    მაყი̄რიან ლი ი ჲერხის მე̄ვარ ხისჲამ კვახ ქერი დიარ; ამშა ძირ
Line of edition: 33    საფვარისა ხო̄გხ ი ინჯრჟი ქა ირბჲელხ კერჲაჲჟი. უშვრია ლეზობ ლი
Line of edition: 34    ქერი შაფა̄თ. ხვაჲდინ ამშა ლჷტეფ ქუთვარს ი ქართოფილა̄რალს ი
Page of edition: 230  Line of edition: 1    კუპტა̄რალ-ყანცლა̄რალს ანყა̄ლიხ, შომა̄ჲ ერ ლეღვობ ე̄სა ხა̄რხ.
Line of edition: 2    ქერს ლე̄ჲრაყიდი̄ იჴმარიხ ი უშვრია არაყ ხეფსი ქერი არაყს. მანა̄ში
Line of edition: 3    არაყ შურაჲ ლი, თხუმე ლიზგუნე ხაზნი. ქერი არაყ ღვინლა
Line of edition: 4    ნახუმსერ დე̄მ შური ი ხალატი̄ ჩი̄ს მე̄ვარ. ქერშვ ხამარსი̄ ა̄ნშყეხ ი
Line of edition: 5    ლჷდაცმულა კუმაშს ჟასე̄ლვე მჷჯაბ ამშა კაკლარ. ქერ, სიმინდ ი მანა̄შ
Line of edition: 6    მუგვი ლუგვნიშ ლიხ, უშხვა̄რისა აცა̄დუნეხ ნაზჷმჟი. ხოჩა̄მდ
Line of edition: 7    ლჷ̄ზნანა ქერი დიარს ეზარ ხეფსი ი ამშა კვახს კვეცნა დიარშა̄ლ იზბიხ;
Line of edition: 8    ვოდ ლისმინდი ედბინო̄ლ, ქერგარ ლჷმსე̄ლვინ თელდ შვანს,
Line of edition: 9    მარა ლისნინდი̄ ლჷბნან ქერი ლილა̄შის ჟოხკვიდხ ბარ სოფლარდ.

Line of edition: 10       ფეტვრა̄ლ დიარ, ეშჲეში̄ თჷმი მო̄დ ი̄რი, მა̄მა ეს ხასჲამ, მარა
Line of edition: 11    თჷმიჟი იზბიხ ფეტვრა̄ლ დიარსი̄. ამშა დიარს მეშხე ხეფსი ი ბჷგი,
Line of edition: 12    მარა თაში ლჷნჩჷდე, ლუკვნე ფეტვრა̄ლ ტებდიჟი ეზარ ლეზობ ლი.
Line of edition: 13    ქა უტფჷნად ფეტვრა̄ლ დიარ მა̄მ ინყი, ფოშოშ ლი ი ლეგ ლენყე ლი,
Line of edition: 14    მარა ქა ხატფინეხ ჲედ მანა̄ში დიარს ი ჲედ ქერიშს. ლჷმე̄რწვა ქაქდი̄
Line of edition: 15    ხვაჲდინ ასყიხ ფეტვს. აშ წიწლარე ლე̄მნად ეზარ ლი ი ხვაჲ ხა̄მნე.
Line of edition: 16    მაჴედ ბარქიან ხაზნა ი ნაშომ გიმისა ხოჩა ჴედნი; ლეკლავი ხოჩა
Line of edition: 17    ლი ი კუმაშს მე̄ვარ ხასჲამ ლეზობდ ნაფტუშ, ჭემშა̄ლ იზბიხ. ჯვინელდ
Line of edition: 18    ხვაჲს ლჷმლა̄შინხ ფეტვს, მარა ათხე̄ დროჲჟი ხოშა ძვირდ
Line of edition: 19    ე̄რ ალა̄ში.

Line of edition: 20       სიმინდა̄რ დიარ ლი ათხე̄ დროჲჟი შვანე მჷსე̄ლვე. ჲერ ქა ლჷტეფს
Line of edition: 21    ანყე სიმინდს ი ჲერ უტფინად -- კვა̄შიდ. ამშა ლუკვნე ჩი̄ს ხალატ
Line of edition: 22    ი ლუფურ მეზგა̄ჲსა ხვაჲდინ ინყი. ანყეხ სიმინდიშს ჭიშდვარალს,
Line of edition: 23    თაშლჷნჩჷდას, ი თაშა̄რს ხახვჩი̄ნეხ, ეჲჟი ხოჩა გემაშ ლი. ლჷმე̄რწვა
Line of edition: 24    ქაქდი̄ ასყიხ ი მაჩე̄ნე ლეზობ ხაბჟახ; ლჷცფექდ ლა̄ჲდი̄ სიმინდ
Line of edition: 25    ისყი. სიმინდი ლილა̄ში ათხე̄ხიგარ ალბინე̄ლი. ბერჟი ბერგალ მა̄მ
Line of edition: 26    ხაღვე̄ნახ ეჩქად ი მეგმი თოხი̄ლარშვ ლჷმჟჷგნინხ სიმინდს დაბარისა.
Line of edition: 27    თვით დაბსგარ ლჷმლა̄შინხ ეჩქად ი სკამუ̄ლარჟი ლუსგურ
Line of edition: 28    ლჷმჟჷგნინხ სიმინდს. ჲერხიაგის ათხე̄ჲ დე̄მ ალა̄შიხ ეშხუ დაბსერ
Line of edition: 29    სიმინდს, მარა სგა̄ვჲა ბარი ქვეყნარშა̄ლ დეშ ხო̄ზნანიხ, სგელა̄რად
Line of edition: 30    ცურეხ -- ლალქანაშა̄ლ -- ი ნეცინ ტარვალსგარ იჴდე. ჲერხი ათხე ხემთქვა̄ლ
Line of edition: 31    სიმინდი ლი̄ზნანის. ლჷსმინდ დაბისა ლობჲოი̄ ხონერგავახ,
Line of edition: 32    კვახნესვ ი ქართოფილი̄ ი მენგრა ტარვალს ამღა დეშ იჴდე ლუშნუ
Line of edition: 33    სიმინდ. ეჩქად ლჷმლა̄შინხ ნა̄რგილ დამბალ სიმინდს ი ხოშა ხონკვი
Line of edition: 34    ლჷმა̄რ ლაქჩა̄შ, მარა სურუ ნეცინ, ზჷმა̄რ, ტარო̄ლარსგარ იჴდე
Line of edition: 35    ნა̄რგილ სიმინდ ი დაბხენქა ხვაჲ მა̄მ ხეფსი. ათხე̄ხი ჟენბინეხ გრანცულაჲ
Line of edition: 36    ი ადესაჲ სიმინდი ლილა̄ში ი ხოჩა ზაჲობჟი ეზარ მაჴედს ვოდი,
Line of edition: 37    მარა გვალიობჟი ი მჷცხიე̄რუჟი დეშ ხოჩშე ლიმჲეს ი ხვაჲდინ
Page of edition: 231  Line of edition: 1    ჩუ იდა̄ვშიხ სიმინდარ ი ხოლა სიმინდობ ლი ეჯკალიბ ზაისა. ლესმინდ
Line of edition: 2    დაბს უ̄ნწად დე̄მ ცურეხ. ლჷ̄ნწა̄ჲსა ხოჩა სიმინდ ხეფსი; დო̄სგმუჟღორ
Line of edition: 3    ხეკვეს ენქაჩე̄ნდეს, ქა̄ტარავიხ ი ჭყანტ ტარვალს ცხვენთეჟი
Line of edition: 4    შჷდეხ ი ლემესშვ აფრეხ; ნაცხვენ სიმინდს მეშხე დიარ ხეფსი.
Line of edition: 5    მჷი ტარვალს ნალჲე̄ლისა აშხვნიხ ლელფხვად ი ლუფხვისა ქა̄ცე̄ხვეხ
Line of edition: 6    ი ქა̄გვეჲხ. სიმინდი ფექს ლა̄ნყა ხამარსი̄ ხობურდი̄ნეხ ი მეკვშდა
Line of edition: 7    ხანისა ანე̄შყე ლე̄ნშყე̄ლს. ათხად უტფინად კვა̄შის ძვირდგარ
Line of edition: 8    ე̄რ ანყა, მარა ათხე კვა̄შიდი̄ ანყა̄ლიხ ჲერხი. სიმინდი ლაშხუნ ნალჲე̄ლე
Line of edition: 9    ლისყი ათხე̄ხიგარ ენბინა̄ნ, ეჩქად მაგ ცხვენჟი ხა̄რახ ლეფრე.
Line of edition: 10    ნაცხვენ სიმინდს ლუნთისა ჩი̄ს ქა̄გვეჲხ, ჲერხის მინ იზბიხ ლუნთისა
Line of edition: 11    ი ჲერხის ლა̄ნშყა ხამარს ხა̄მნეხ ი ჲერხის ლე̄ჲრაყიდ იჴმარიხ. ნანალიაჲ
Line of edition: 12    სიმინდს ხამარეშდ ი ლე̄ჲრაყიდ ძვირდგარ ე̄რ ისრე. ხოჩა
Line of edition: 13    სიმინდ მინე ლეზობდ ხოცხახ ლუფხვისა. სიმინდი ლაცე̄ხვაჟი
Line of edition: 14    ქორხენქა საციქვი ლივდი მა̄ შიდჷ̄ნ, დო̄ვე ლოქ ში ე̄ს ათყა̄და ი ბარაქ
Line of edition: 15    მო̄დ ხა̄დეს მაფასიშ ლჷცე̄ხვა სიმინდს.

Line of edition: 16       ზჷნთხს ეჩქად ლჷმჲარყინხ, ოდო ლეზობდ და̄რ ლჷმჴჷმრინ;
Line of edition: 17    ათხე და̄რ ალა̄ში ზჷნთხს, კა̄ლარსგარ ხეზნა̄ნხ, მარა ათხე ეჯჲარი̄
Line of edition: 18    დემ ალა̄შიხ.


ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.