TITUS
Svan Prose Texts IV (Lashkh)
Part No. 229
Previous part

Text: 229 
Page of edition: 233 
Line of edition: 1 
CCXXIX. ლეღვ, ბატკ, ლორ, წვად, ხარჩვ ი
Line of edition: 2 
ქათალ


Line of edition: 3       ლეღვო̄რა̄ჲსა მუშვან მა̄რას მაჩე̄ნე ხაბჟა კვიცრა̄ ლეღვ ი ჩი
Line of edition: 4    ლეღვდ ხოშა̄ჲ ეჯი ხასჲამ ლეზობდ; ეჩჷნ ჩუბოვ ლუგვნიან ლი
Line of edition: 5    ჲერსკნიშ ი ილვი ლეღვ, სერთხი̄ მუჟღვრა პილთე მევარ ლუგვარ ლი,
Line of edition: 6    ამჟი ერე ლაზობჟი ჴარჴს აკფხე, ეჲჟი ლუგვარ ლი. ნა̄რგილ კუმშიშ
Line of edition: 7    ი მანცინი ლეღვარისა მაჩე̄ნე ხაბჟახ ღუნიშ ი ბატკი ლეღვარ; ხვაჲ
Line of edition: 8    ღუნ იძი̄ თამფიერალჟი ი ხვაჲ ბატკ იტყბი ლუნთისა აღბიერალისა,
Line of edition: 9    ბატკურ ქორწილ მა̄დ იჩმი̄ნი ი დე კათხ-ტაბაგს ხა̄გ ჩქიმ ბატკურაჲ.
Line of edition: 10    ლებტკრიდ თომრიალ ხაყახ ნანეშყ. ალჲარჷნღო ხასჲამხ ღოლჲა̄ქა
Line of edition: 11    ლეღვ. ხაზნახ ლიბტკი ჟინღარეშ ი ნეღშტარეში̄, მარა თომური
Line of edition: 12    ბატკთა̄ნ დეხდა ხაბჟახ. მე̄ვარ ხასჲამხ აჯაღ ათვი-ათვი ფური
Line of edition: 13    ლეღვ, მარა მანგრა ლეღვისა სხაპი ლეღვს ხაცხე̄ნეხ ჩი̄ს ი სათბილარს.
Line of edition: 14    ჴანი ლეღვ დეშ ხაბჟახ ფური ლეღვთა̄ნ ი დე დაჴლაშ. ხამი
Line of edition: 15    ლეღვი̄ მე̄ვარ მოწონებულ ლი, სერთხი̄ შიყრა̄შ ი ყელშერქა̄შ.
Line of edition: 16    მაჩე̄ნე ლაგაფ ხაბჟახ ბატკი ყელშერ, ფური სხაპ ი სათბილარ. ლეღვს
Line of edition: 17    ნალგვარი მო̄ ხე̄რი, ეჯკალიბ დე̄მნარდ ხაბჟახ. ლეღვიშ წვად ხასჲამხ.
Line of edition: 18    წვადდ ატყბიხ ხოფშირა̄მინ მანცინიშ ი ხამი კელვერს ი
Line of edition: 19    გულჩონჩხს. წვადვარ მო̄დ ენტყაბე̄ნდეხ, ეჯჟი დე̄სამა ხინ იჩმი̄ნი.
Line of edition: 20    ხოფშირა̄მინ სუკი წვადვარს ატყბა̄ლიხ. ლეღვი ლაზობს, ჩუ ე ხეღვე̄ნი
Line of edition: 21    მასარდ ლეზობდ, მუშვან მა̄რე აყრს დე̄სა ჴედნი; გუს ხოგნე ლეღვო̄რა̄ჲსა
Line of edition: 22    ლორი ლეღვ, ლუგვარქა̄შ. ხამი ლორს ლუფხვისა იჴმარის
Line of edition: 23    ხა̄ლ ხინისა, ეჲჟი ლამშაჲჟი ი ეჯნოვშგარ იგნეხ ლეღვი გუმა̄რას.
Line of edition: 24    ლეღვშ ლჷბზანღო ხარჩვი ლიხუ̄ლი ხისჲამხ; ჲერხი ჲერუ-სემი ფაკან
Line of edition: 25    ხარჩვს ჩუ იხუ̄ლი ათვი-ათვის; ჩინ მაშე̄ნა̄მდ ნათხვიარე̄მიშ ი
Line of edition: 26    კვიცრა̄ ლეღვარე ხარჩვ ხალატხ. ლეღვი ლი̄ზნანი ღვაჟარე გვეშ
Line of edition: 27    ლი, ამხა̄ვ ზურა̄ლ დე̄მ ხენჩჷდა̄ლ; ზურალა გვეშ თაშო̄რა̄ მოხელობ
Line of edition: 28    ლი. ლეღვარს მენგრა-მენგრა ლაგფარდ აჭკვრა̄ლიხ ი ეჯჟი აჯბა̄ლიხ.
Line of edition: 29    დეშდვე ლეღვსი̄ იზბიხ ი მულგვარი ხაბჟახ ამშა ლიზობ. თხე̄რე̄მი
Line of edition: 30    ლეღვს და̄რ იზბი ჟეღიშ ი ციცვი ლეღვი ნახუმსერ, მარა ნა̄ნღველს
Line of edition: 31    ჟაგნაჟგუნდ იჴმარიხ. ჯვინელდ ხოფშირა ლჷმარდ ნადირ ი ლათხვიარდი̄
Line of edition: 32    ხოშა ხაჟბე̄ნა ჩი̄ს ი ხვაჲდინ ხაღვე̄ნახ ლეღვ ლეზობდ, მარა
Line of edition: 33    ათხე ეჩშელდ მა̄დ არი ნათხვიარე. ჟი ერ აჯბიხ ლეღვს მენგრა
Line of edition: 34    ლაგფარდ ლჷჭკორს, ეჩანღო გობჟი ჲედ ფიჩქჟი ჯიმს ხაპჲო̄სეხ
Line of edition: 35    ჟიქა̄ნქა ი ეჲჟი არგავიხ ი იზბიხ. ნეცინდ ლაჭკორს ი ლაბო̄ცა̄ლს მა̄მ
Line of edition: 36    ხა̄რხ, სგა̄ვჲა ქვეყნარს ერ ხამთქვახ ნეცინდ ლიჭკვრი ი ლიხრაკავა̄ლი.
Line of edition: 37    მახა ლჷდჷარა პატრონ ეშხუ ზაჲ ი აჯაღ ხოში̄ლ ხანს ივჭმუდა
Page of edition: 234  Line of edition: 1    ლიშრავი̄ნა̄ლნუნ ი ეჯჲარ ცხაჲ დე̄მ ხეთლენო̄ლხ ვოხდრისო̄ლას.
Line of edition: 2    ჯვინელდ ნეპრ მერხელდგარ ხაყე̄ნახ; ჯო̄დი ლუნთისა ლეზობურ დეშ
Line of edition: 3    ლუმშხუნინხ ი ლეზობ, ნეპრიშდ მა̄დე̄ჲ, მინეშდი̄ ხაკლიე̄ნახ. ათხე̄ხი
Line of edition: 4    ხაყახ ქათლარ ჲერხის, მარა ცხეკვარხენ ლიხ ლეგ ლელჩე ლჷწწილ
Line of edition: 5    დედვარ. ჲერხიაგის ეჩჷნ-ამჷნ ბატი̄ლარი̄ ხაყახ ჲერხის;
Line of edition: 6    იშგენ ნეპრ დე̄სამა ქუთან შვანე გიმჟი ნა̄რგილ ნეპრი გვარიშ. ყვიჩი
Line of edition: 7    ლამკახა̄ლს ირდვნეხ ხოშა ნაღალდ ქათლარს, ოდო აშ მა̄მა ეშჲეში̄.
Line of edition: 8    ეშხუ ქათალ იკაფ ლუშნუ წესშვ ეშხუ მა̄რე̄მიშდ ჩუ ლეზობდ. ქათალს
Line of edition: 9    ჟი ძვირდგარ ე̄რ აჯბი, შამფურჟი მჷტყაბ ხასჲამხ ლეზობდ.
Line of edition: 10    ქათლაშ ი ბატი ბუნტყულშვ ბალშარს ასყა̄ლიხ ათხე ზურალე̄ლ.
Line of edition: 11    ლეშგუ̄რა̄ლ მუშგვრალს ქათალშვგარ დეშ იმშგვა̄ნეხ ხონგრა ლაძჲაურ
Line of edition: 12    ი ამღა მა̄ ხაყე̄ნახ ეჩქად ქათლარ ი ბატარ. ქათალშვ მუშგვრალე
Line of edition: 13    ლიმშგვა̄ნეს ი ქორა მა̄რე̄მი ლიბზეს ლეჩხვმარს ხოვზი̄ნეხ,
Line of edition: 14    ოდო მინ ცხაჲ დე̄მ ლჷმჩომინხ ათხად, მარა ათხე ჲერხიაგის ჟენბინეხ
Line of edition: 15    ლჷწვენდ ქათლა ლისყი. ქორწლობარჟი ი ლეჯგრიალჟი
Line of edition: 16    მტყაბ ქათლარ ხუღვახ; ალეს აშ, ლეღვშ ლჷბზან, სამხევდგარ
Line of edition: 17    იზბიხ, ოდო მჷბზად აშ იშგენ ქუნლჷმჷნე̄მი ლეღვს ი ხარჩვს ხებზიხ.
Line of edition: 18    ეჩა ლი̄ქვი̄ს ეშ ხასკვრელხ, ერე ქათალდ მა̄რე ადბიზას ლეღვშვ.
Line of edition: 19    ჲერხიაგის ქათლა ლატყაბჟი ზურალე̄ლ გაროს ხაწრუნეხ ფაკანთეჟი
Line of edition: 20    ჲედ საინთეჟი ი მჷტყაბ ქათალს ლუ̄ჲსუ̄რას სგა̄სყიხ გარო̄
Line of edition: 21    ლარდა ფაკანთე̄ჲსა ი ლუსურნელ ჯიმს ხაპჲო̄სეხ. ლენტხე̄ლს ლჷპიმპილაჲ
Line of edition: 22    ხასჲამხ მაგ ლეღვო̄რა̄ წვენე, იმშა̄ჲ დო ი̄რი.


ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.