TITUS
Svan Prose Texts IV (Lashkh)
Part No. 230
Previous part

Text: 230 
Page of edition: 234 
Line of edition: 23 
CCXXX. ლობჲა̄რ, ხევწა̄რ, ქართოფლა̄რ, კუპტა̄რ,
Line of edition: 24 
ყანცლა̄რ ი ცხუნილ


Line of edition: 25       ჲესვა̄ჲ ერე ხოჩა ლა̄შგობ ხა̄რ, ეჯჲარ ლობჲა̄რ დიარალს ხვაჲდინ
Line of edition: 26    ანყა̄ლიხ; ჟაჯბიხ ლობჲოს, ჩვაყლიხ ი ნაჩდუნ ყვა̄ბარდ ასყა̄ლიხ
Line of edition: 27    ი ქა̄მენქა ხატფინეხ ჲედ კვეცნაშ, ჲედ მანა̄შიშ ი ჲედ ქერი ნატფჷნს
Line of edition: 28    ი ქა̄ნყა̄ლიხ კერჲაჲჟი. ლობჲოს ხონჩჷდეხ თაშს ი ჯიმს ჲედ კათარს
Line of edition: 29    ი ქონს ი ხოჩა გემა ლეზობ ხეფსი. ლობჲა̄რ დიარალს აღბიერისა
Line of edition: 30    ხოფშირა̄მინ ანყეხ; ლუფხვისა ლა̄ჲდი̄ დაბართე ხოჴდეხ მჷშჲარს;
Line of edition: 31    ლეზჷზდი̄ იყდა̄ნიხ გზარვთე ლა̄ზჟი. უშრავი̄ნა ლობჲა̄რს ძვირდ
Line of edition: 32    ე̄რ ანყე. ხოჩა ლჷჩი̄დ ლობჲა̄რალე ლიჴდე ხაზნახ ნაკვჲა̄ლუნდ მახა
Line of edition: 33    მესდე ზურა̄ლთე, აქმა̄რათე ი იმთე̄ჲ ერ ხაგადხ ნაკვჲა̄ლუნი ლიჲეს,
Line of edition: 34    მარა ნაკვჲა̄ლუნთე ლეჲეს ლობჲა̄რალ ხოშა თაში მომკერძ ხეკვეს
Page of edition: 235  Line of edition: 1    ლე̄სეხ, ეჯი ხოშა ჟახე ხაბჟახ, ერე მჷთჷლთჷნე ლობჲა̄რალ ლოქ
Line of edition: 2    ოხჴი̄დახ ნაკვჲა̄ლუნდ.

Line of edition: 3       ხევწა̄რ დიარდ ლჷცე̄რვა კვეცნა კაკლარე ფექს ასყიხ; ამის ხონჩჷდეხ
Line of edition: 4    ქონს ლჷ̄ჲნას ი ეჩჟი ანყეხ; ეზარ გემაშ ხეფსი, ლუ̄ლჩხუმუ
Line of edition: 5    ქადიან დიარს ხაჯეშ. ხევწა̄რ დიარალე ლინყე ლუნთისა, აღბიერისა,
Line of edition: 6    ხამთქვახ, შომასი̄ ერ ლაძჲე̄ლ ხაყახ ლჷძჲე ი ქონობ ხა̄რხ. ხევწა̄რ
Line of edition: 7    დიარ ეში̄ ხოჩა გემაშ ლი, ქონ ერ მო̄ ხეჩჷ̄დეს; ალე ნაცე̄რვ ერ ლი,
Line of edition: 8    ეჩა ტარ ლი.

Line of edition: 9       ანყეხ აჯაღ, ლეღვობ ერ ხა̄რხ ეჩქა, კუპტა̄რ დიარალს; ამთა̄ნ
Line of edition: 10    გემაშ დეხდა ლეზვბო̄რა დიარს ხეფსი. მახა ნაძჲენ კუმში ლეღვს,
Line of edition: 11    ჲედ მანცინიშს ი ჲედ ხამიშს, ნეცინდ ახტუ̄რეხ, ჲესინ ჩვაკეპავიხ,
Line of edition: 12    ხონჩჷდეხ ლუსურნელ ჯიმს, ჲერხი -- პიმპილაჲსი̄ ი ქა ირბჲელხ
Line of edition: 13    კერჲაჲჟი. მახა ლეღვი კუპტა̄რ დიარს სურუ ხოჩა გემაშ ხეფსი;
Line of edition: 14    მეზგას ჩვამყი̄რე ი ჩვაგჷრგილე, ეჲჟი მჷბზე ი გუე მჷგნე ლი. კუპტა̄რ
Line of edition: 15    დიარალს ვო̄ბაშინ ანყეხ, შომა̄ჲ ერ ლეღვ ხეთხიხ. დეშდვე ლეღვსი̄
Line of edition: 16    ანყეხ კუპტა̄რდ ი ხოჩა ხეფსი. ქორწლობარჟი ი კათხ-ტაბგობარჟი
Line of edition: 17    კუპტა̄რალს ანყა̄ლიხ; თვით კუპტა̄რს ხოდესხ ულუფდ მა̄რე̄მი შელდჟი.
Line of edition: 18    ხისჲამხ კუპტა̄რ დიარი ლიზობ ტებდიჟი; ქვე̄რ კუპტა̄რს დემ
Line of edition: 19    იზბიხ, დეშ ლი ტებდითა̄ნ გემაშ ი ეჯღა.

Line of edition: 20       ქართოფილი ლინერგავი ათხე̄ხი̄ ლჷბნე ლი შვანე გიმჟი.
Line of edition: 21    მა̄ჲდობხენ ქართოფილ ლეხშად ჩი̄ს, ეჩქად სიმინდვშ ლჷლა̄შა დაბისაგარ
Line of edition: 22    ანერგავდახ, მარა ათხე მაჩე̄ნე ყო̄რჲა დაბს ანერგავიხ შვანს.
Line of edition: 23    მე̄ვარ ბარქიან მაჴედ ხოხალ ი გიმსი̄ ხოჩა ქართოფილი მაჴედ მჷრ
Line of edition: 24    ხოხალ. ლურუსუ ქართოფილ რუსი ჯარი სგა მეჴდან ანჴიდხ შვანთე
Line of edition: 25    ი ეჩხენ ედფიშრა̄ნ, ხოსკვი̄ მე̄ვარ ი გაცხაჲდ მაჩე̄ნე ლი. ქართოფილს
Line of edition: 26    ლჷმე̄რწვადი̄ ასყიხ ი აში̄ იზბიხ დიარი მჷქაფ. ანყეხ ამშა თაშლგნჩჷდა
Line of edition: 27    ქართოფლა̄რ დიარალს, ხატფინეხ ქა̄მენქა კვეცნაშ, ქერიშ ი
Line of edition: 28    მანა̄ში ნატფჷნს ი ეზარ ლეზობ ლი.

Line of edition: 29       ყანცლა̄რ დიარალს ანყა̄ლიხ, ქონ ერ ემშა ხუღვახ, კუპტა̄რ
Line of edition: 30    დიარალშა̄ლ ი მე̄ვარ ამყი̄რე მჷზობს. ყანცლა̄რ დიარალს ქონი
Line of edition: 31    ნაქვცვარსგარ ხოჩდიხ. ჲერხის ხალატ მე̄ვარ ამშა დიარ; ჩუ ხოჩა
Line of edition: 32    მახა ლაძჲა̄ ქონი ყანცლა̄რალ; ხატფინეხ ნატფჷნს ქერიშ, კვეცნაშ
Line of edition: 33    ი მანა̄შიშს, აშ სიმინდი ნატფჷნსი̄ ჩუ ხაყა ნატფჷნდ.

Line of edition: 34       ცხუნილს ანყეხ ხოფშირა̄მინ ეჩხე̄ შვანს კათხ-ტაბგობჟი; ნაჯგრუნდე
Line of edition: 35    ხვაჲდინ ანყახ; ქა მჷნაყ თაშა̄რ დიარს ხოცვენიხ ჟიქა̄ნქა
Line of edition: 36    თაშმჷჯაბს ი ამის ხა̄ჲშხა ცხუნილ. ამხე̄ შვანს ეჩქად ხახლე̄ნახ, ათხე
Line of edition: 37    ძვირდ ე̄რ ანყეხ ცხუნილარს, ლეზობ ხოჩა ლი თაშა̄რშა̄ლ.



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.