TITUS
Svan Prose Texts IV (Lashkh)
Part No. 231
Previous part

Text: 231 
Page of edition: 236 
Line of edition: 1 
CCXXXI. კეპილ, ქუნჩაფ ი ნალძიო̄რი


Line of edition: 2       შომასი̄ ერ ხამს აძჲენიხ ლეზო̄მახდ ი ჲედ ლემე̄ჲსარდ, ეჩა
Line of edition: 3    წიკა̄ნტარეშს ასყა̄ლიხ კეპლარს. ჟაჯბიხ წიკა̄ნტარს, გულჩონჩხს ი
Line of edition: 4    ფაშს, ეჩანღო ჩვაჭკვრიხ ნეცინ ნახვიტუ̄ლარდ, ლუსურნელ ჯიმს
Line of edition: 5    ხეჩოხ, ხვაჲდინ ნამხიმი̄ გუ̄ნღა გოწხირი კაკლარსი̄ ხონჩჷდეხ ი
Line of edition: 6    ამჟი ლჷჭკორს სგა̄კი̄მბეხ წიკა̄ნტთეჲსა, ქა ხოკე̄ნეხ თხუმუ̄ლს ქიპშვ
Line of edition: 7    ქანაშ ი ამკალიბარს ფიშირღე̄თს ჩვაშხვნიხ ი ეშხუ-ჲერუ ნაგზი
Line of edition: 8    იჴმარიხ ჟი მჷტყაბს; ლუქვე̄ლას ჟი უტყბად ი უ̄ჲთვად ეში̄ მა̄ ხა̄რ
Line of edition: 9    გემ ი ამღა ატყბიხ. ლაძჲა შომა̄ჲ ჩუ იძი̄ ქორისა, კეპილურ დე̄მ იგნიხ.
Line of edition: 10    ქა ლეწედდ კეპილ კალბასი მაჯო̄ნ ლი. მუშგვრი ერ ოხჴედნიხ,
Line of edition: 11    უცეფო̄ლდაშ ჟესფხიჭნეხ ეშხუ კეპილს, ქა ლოხსვემხ შამფურს
Line of edition: 12    ი ჟესხელნეხ ლემესს, ერე ქა̄მე ტეფ, წიკა̄ნტ, ენტყაბე̄ნდეს, ოდო
Line of edition: 13    სგა̄ნ მჷჯაბ სგა̄შურა ხასყა ჩუ ლჷჭკორ ი ხვაჲ ლიტყბი მა̄მ ხაწჷხ,
Line of edition: 14    ჩუ ლი̄ჲთვეგარ ქა ხა̄რ ი უცეფო̄ლდ ხაჲა̄ლვნეხ მუშგვრის ხევსდ
Line of edition: 15    მჷტყაბ კეპილს. კეპლარს ზურალე̄ლ ასყა̄ლიხ, ამხა̄ვ ღვაჟარ მა̄მ
Line of edition: 16    ხენჩჷდა̄ლხ.

Line of edition: 17       ქუნჩაფდ ასყიხ მჷჯაბ სგა̄შურას ჩუ ლჷჭკორს; ამისი̄ კეპილშა̄ლ
Line of edition: 18    ხეჩოხ ლუსურნელ ჯიმს, მარა ქუნჩაფ ჲეშდ კეპილზუმ ჩუ ღო̄თ ლი.
Line of edition: 19    გულჩონჩხე ხეკვეს სგა ხეჩედეს მჷჯაბ წიკა̄ნტარს ი ეჩჟი სგა ხასყიხ
Line of edition: 20    ჩი̄ს ჩუ ლჷჭკორს ნეცინდ ლაძჲა̄ ფაშთე̄ჲსა. ქუნჩაფს ჲედ ეჩქა
Line of edition: 21    იზბიხ მახა ნასყეჲს, ჲედ ჩვაშხვნიხ ი, შომა̄ჲ ხაკუხ, ეჩქა იზბიხ, აშ
Line of edition: 22    ხვაჲ ხანს ლეშხვნიდ მა̄მ ხაყა. ჟი ლიტყბი მიმ ხაწჷხ ქუნჩაფს, აშ
Line of edition: 23    ქვერიდა̄ ჩუ ხაყა ლეზობდ. ხოფშირა̄მინ ქუნჩაფდ ასყიხ ღუნი სგა̄-
Line of edition: 24    შურას, დაჴლაშ ი ღოლჲა̄ქაშ ი ჲესინ ფურიშსი̄. კეპლარდ ხამი
Line of edition: 25    სგა̄შურასგარ ასყიხ ი ქუნჩაფდ ხოშა ძვირდ.

Line of edition: 26       ნალძიო̄რიდ ასყიხ ჴანი მენგრა წიკა̄ნტს; ჩვახტუ̄რეხ ლეღვს,
Line of edition: 27    ჩვაჯმიხ ი სგა̄კი̄მბეხ მენგრა წიკა̄ნტთე̄ჲსა ი ეჯჟი აშხვნიხ;
Line of edition: 28    ნალძიო̄რის ზვა̄ჲხანს ლეშხვნიდ ხაყა; ქა ხორკინეხ ლორალცახან ი,
Line of edition: 29    შომა̄ჲ ხაწჷხხ, ქა, ხაქვცეხ, ჟაჯბიხ ი იზბიხ. ჲერხიაგის მენგრა
Line of edition: 30    წიკა̄ნტთე̄ჲსა იდე̄სხ მახა ლაძჲა̄ ზისხს ი ეჩანღო კეპილშა̄ლ იზბიხ, მარა
Line of edition: 31    ათხე და̄რ ასყი ზისხი ნალძიო̄რის, ეჩქადგარ ლჷმსყეინხ. ნალძიო̄რის
Line of edition: 32    ასყიხ ჴანიშ ი ფური ლეღვარეშს ი ზისხიშს, აშ მანცინიშს
Line of edition: 33    ხონძვრა̄მდ. ნალძიო̄რე ლისყი ხოშა ნაღალდ ეჩხე̄ შვანს ხაზნე̄ნახ,
Line of edition: 34    ჲერხის ათხე̄ჲ ხაზნა, ამხე̄ შვანს ჯვინელდგარ ლჷმსყეინხ ი ათხე
Line of edition: 35    ძვირდ ე̄რ ესა ასყი. ზისხი ნალძიო̄რი ჲერხისგარ ხალატ, ოდო ჲერხი
Page of edition: 237  Line of edition: 1    ჲადურდ დე̄მ იზბი. ლეღვშ მჷსყა ნალძიო̄რის მაგ იზბი, ეჯღა ერე
Line of edition: 2    ლჷჯიმ ლეღვ ხასყა ი ლორშა̄ლ ლეზობ ლი; ზისხშვ მჷსყე ეშ მჷრ
Line of edition: 3    ხავშედ ჲერხის ი ეჯღა დე̄მ იზბიხ.


ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.