TITUS
Svan Prose Texts IV (Lashkh)
Part No. 235
Previous part

Text: 235 
Page of edition: 240 
Line of edition: 11 
CCXXXV. ტაფოულ, ხუ̄ლფუ, კათარ ი ჭანტი


Line of edition: 12       ჲესვა̄ჲ ქათლარ ხაყა, ახვრჲელეხ ლჷგრალს ი ტაფოულდ ასყიხ.
Line of edition: 13    ნაჯგრუნ-ნაფა̄ნუნდ ხოფშირა̄მინ იჴმარდახ ტაფოულს, ოდო
Line of edition: 14    აგის ლეზობდ ძვირდგარ. ყველჲერისა ე̄სა ანსყე̄ჲნეხ, ოდო აშ მა̄მ
Line of edition: 15    ხეჯა̄ვჲელხ ტაფოული ლისყის ხვაჲდინ. ლჷგრალს იმკახდახ
Line of edition: 16    ლეჯგრიჟი̄ნაშდ კამარა̄ჲა̄ქდ; ტაბაგს ამსგვენე ლჷგრალშვ ლჷსკო̄რთე
Line of edition: 17    კამარაჲ ი თამფიერალჟი ხისჲამხ წჷრნიდ ლჷღაფ ლჷგრალ.
Line of edition: 18    საკურთხდ აჲესდახ წჷრნი ლჷგრალს. ტაფოულს ქონს ხონჩჷდეხ ი
Line of edition: 19    ეჩჟი ახრაკავიხ ტაფაჲჟი. ჲესი-ჲეს, იშგენ ლახ დო̄სამა ხუღვახ მუშგვრი̄
Line of edition: 20    ლე̄მნე ნა̄ყუნ, ეჩქა ანაშტრაშდ ასყიხ ტაფოულს ი ჩვადჲარვნეხ
Line of edition: 21    მუშგვრის. ტაფოულს ღჷნჲე̄რუჟი ლენტხე̄ლ ხოფშირა̄მინ
Line of edition: 22    ასყიხ ი სკართე̄ჲ აჲესხ. სკართე წგრნი ლჷგრალსი̄ აჲესხ ტაბგი ჩქიმი
Line of edition: 23    მუვდიდ. ლეზობდ მა̄მ ხეჯა̄ვჲელხ ლჷგრალს ეშჲეში̄.

Line of edition: 24       ხუ̄ლფუს ასყიხ ქა ლჷჯე̄ბა ქერი კაკლარე წვე̄ნად; აჯბიხ ქერი
Line of edition: 25    კაკლარს ი ეჩა წვე̄ნას ითრეხ ჴვეშმაზგა̄რუ ი ლიჴშუნეს აშა̄რდე
Line of edition: 26    მევარ; აშ ნა̄ყუნდ ი ლეზობდ და̄რ იჴმარი.

Line of edition: 27       კათარ ხა̄ჲშხა ლუშხუნ ქონს. ეჩქად ქონს ჴანიშ ჲედ ხამიშს ქა
Line of edition: 28    და̄რ ა̄ჲნა ესრენ, ქა ხაჭო̄ნნახ წვარისა ი ჩუ ხარკინნახ ჭვედჟი ლაკვა̄მა
Line of edition: 29    აგის ლორალცახან ი ქონ ჩუ იყვთელო̄ლ ესრენ. ჯიმს ჲედ ხაჩმინახ
Line of edition: 30    ი ჲედ -- დე̄მა; ალეს იჴმარდახ ლუკვნა დიარი ლენჩჷდად ი
Line of edition: 31    ტაფოულიშდი̄. ჲერხის ხასჲამ ლჷკთარე ქონი ნანჩჷდ, მარა ჲერხი
Line of edition: 32    დე̄მ იზბი.

Line of edition: 33       ბა̄ნტის ასყიხ ქრისდე̄ში სგობნე ლადღიშდ, ალ ლადეღს
Line of edition: 34    ჭა̄ნტილობს ხატუ̄ლიხ. ქა ლჷჯე̄ბა კვეცნა კაკლარს აჯბიხ ნებოზნუნ ი,
Page of edition: 241  Line of edition: 1    ჟი ერ ინსგლი, გობთეჟი აგვშეხ, ლუსურნელ ჯიმს ხეჩოხ, ჟი ხამზჷრდახ
Line of edition: 2    ათხად მაჴედხენ ი ვახშამდ ჩუ იზბიხ. აშ ხებზიხ ჭა̄ნტის,
Line of edition: 3    ერე ლიქთუნა̄ლ გარჯ ხა̄რხ; ვოდ ჟი დო ხამზჷრდახ ლევახშამდ ჭა̄ნტის,
Line of edition: 4    ეჩქად ლიზობ მა̄ ხოშდჷ̄ნხ. ჭა̄ნტის ასყიხ ლითო̄დრის ი ნაჯგრუნნაფა̄ნუნდი̄
Line of edition: 5    ხვაჲდინ, ხოშა ნაღალდ უჭმისა ი ლინჩა̄ლისა. ჭა̄ნტილობლე̄თი
Line of edition: 6    ლიგნე მე̄ვარ ხახჲადხ ბობშარს.


ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.