TITUS
Svan Prose Texts IV (Lashkh)
Part No. 236
Previous part

Text: 236 
Page of edition: 241 
Line of edition: 7 
CCXXXVI. იშგენ ლეზობ-ლეთრე̄ლ


Line of edition: 8       როგი ნა̄ყუნ. როგ მე̄ვარ დო̄სგაშ ლი შვანე გიმჟი. ეჩქად ხვაჲს
Line of edition: 9    ლჷმლა̄შინხ ი ჩი̄ს ხაღვე̄ნა როგ, მარა ლობჲო̄ მეჴდან ჟენკვიდ ამშა
Line of edition: 10    ლილა̄შიდ. ათხე ჲერხიგარ ალა̄ში ი მაგ -- დე̄მა. როგს ჩუ ლჷმჲან
Line of edition: 11    ჟათი̄ჲხ, ჲედ ქა̄ბე̄ნგვეხ ი ჲედ ქა̄კლავიხ ი ეჩჟი აშხვნიხ. ლჷგონ
Line of edition: 12    სიმინდდ, ქერდ, მანა̄შდ ი ფეტვდ როგს ხოშა ხა̄ზ; კვეცნა გო̄ვარდშა̄ლ
Line of edition: 13    ალგონიხ; ამშა ნა̄ყუნს ასყიხ ი უშვრია ლეზობ ლი. ჲეს ძღჷდ
Line of edition: 14    ცხვადშვ აჯბიხ, როფს ხეჩოხ ი დიარი მჷქაფობს იჩო, ეშ იხუ̄ლიხ
Line of edition: 15    დიარულაჲ. როგიშს ანყეხ ღედრა̄ლ დიარალს თაშლჷნჩჷდას, ჲედ --
Line of edition: 16    ქონიშ. ნაკვჲა̄ლუნდი̄ ხოჴდეხ, იმთე̄ჲ ერ ხა̄რხ ლეჲეს. როგს ლიგვეჲჟი
Line of edition: 17    ხვა̄ჲდინ ქერს ხონჩჷდეხ ი დიარდ ანყეხ ი ამღა ხო̄ზხ ლჷგონ
Line of edition: 18    როგიშდ.

Line of edition: 19       ნეცინ ღედერი ნა̄ყუნ. ნეცინ ღედერს ეჩქად ლჷმლა̄შინხ, ათხე
Line of edition: 20    სერ და̄რ ალა̄ში თანაღ ადგილი სოფლარსერ; აშ ხენჩჷდი ქერისა,
Line of edition: 21    მანა̄შისა ნეცინ ღედერი ბარდალ, ოდო დაბარს ძვირდგარ ერ ალა̄შიხ
Line of edition: 22    ამნოვშ; ნა̄ყუნდ ასყიხ, როფს ხეჩოხ ი ლუსურნელ ჯიმს ი ეჲჟი
Line of edition: 23    ხა̄ყიხ. ზჷსყი პარკალსი̄ იზბიხ ამშა, ქა̄სყვი̄რეხ პარკალს ი კაკლე̄ლარს
Line of edition: 24    იზბიხ. ნეცინ ღედერი ბარდალს, ქა ლჷბე̄ნგვას, ღოლჲა̄ქარს
Line of edition: 25    ხა̄ნნეხ ლუნთისა; ღოლჲა̄ქარს მე̄ვარ ხალატხ ამშა ბარდ. ნეცინ
Line of edition: 26    ღედერს ნა̄ყუნჷნქა დე̄მნარდ იჴმარიხ; ამშა დიარალს ღედრა̄ლარშა̄ლ
Line of edition: 27    და̄რ ანყე; ალე სამარხვ ნა̄ყუნ ლი; ამშა ნა̄ყუნს ლუნთისა ასყიხ,
Line of edition: 28    ხოშა ნაღალდ ქრისდე̄ში უჭმისა ი ლინჩა̄ლისა; გემაშ ეზარ ლი ი
Line of edition: 29    ლენა̄ყუნიდ ჩი̄ს ხალატ.

Line of edition: 30       ქირცი ნა̄ყუნ. ქირცი დაბარსი̄ ეჩქად ხოფშირა̄მ ლჷმლა̄შინხ,
Line of edition: 31    ათხე ძვირდ ე̄მე ალა̄შიხ; აშ ნა̄ყუნდ ჩი̄ს ხასჲამ. ამშა ნა̄ყუნსი̄
Line of edition: 32    უჭმისა იჴმარიხ, ლობჲოშა̄ლ აჯბიხ, ლუსურნელ ჯიმს ხეჩოხ, ჭაგვს
Line of edition: 33    ი ნივრას ი ეჩჟი ხა̄ყიხ ფაკნიარისა. ქირცსი̄ ნეცინ ღედერშა̄ლ ბარდალ
Line of edition: 34    ხა̄რ ი კოჭო̄ლ პარკი̄ლარ, მარა ამშა პარკალს ზჷსყიდ და̄რ იზბი;
Page of edition: 242  Line of edition: 1    მურგვალ ნეცინ კაკლე̄ლარ ხა̄რ. ჟი ერ ათჲა̄ლიხ დაბარს, ამშა
Line of edition: 2    ბარდალს მოქვი̄ლარდ აგმა̄ლიხ ი ქა ლჷფრან აგითე ინჭლიხ ი ქა̄ბე̄ნ.
Line of edition: 3    გვეხ; მაფას გვარჲან ხაზნა, ხოჩა ზაჲ ე ეხხვი. ლეზობდ ღედერშა̄ლ
Line of edition: 4    უშვრია ლი. ამშა ნა̄ყუნს მე̄ვარ ხესკვი გიცრულ, ხოჩა გემს ხა̄ვდი
Line of edition: 5    ი ლესჲამე ნა̄ყუნ ხეფსი.

Line of edition: 6       ლობჲო̄ ნა̄ჟუნ. ლობჲო ხვაჲ რიგიშ ლი: წჷრნი, ფარდელ, ჭჷრელ,
Line of edition: 7    თვეთვნე, ხარდნულაჲ, უბეწო ლჷხჷრდან, თვეთვნა ლობჲოს
Line of edition: 8    ხოფშირა̄მინ დიარს ხოჩდიხ, თაშს ხონჩჷდეხ ი ლობჲა̄რალდ ანყა̄ლიხ!
Line of edition: 9    ნაკვჲელუნდი̄ ალე ოსღვახ ფიშრა̄მინ. ნა̄ყუნდ იშგენ ლობჲოს
Line of edition: 10    ასყიხ. ჟი უჟარ ლეზობ მეზგა̄ჲსა ლობჲოგარ ლი. გიცრული
Line of edition: 11    ლიჩომ ლუსურნელ ჯიმცახან ამისი̄ მე̄ვარ ხესკვი. ლობჲო̄ ნა̄ყუნს
Line of edition: 12    ლუფხვისა, პარკალს ერ იჴდე, ზჷსყიდი̄ ხვაჲდინ ასყიხ. ლობჲოს
Line of edition: 13    ანერგავიხ სიმინდი დაბარისა სკო̄რუშ; ჟი ერ იკედხ ფჷრი ლობჲოს
Line of edition: 14    ქა̄ბე̄ნგვეხ ი ნალობჲოს ღოლჲა̄ქარს ხა̄მნეხ. ჩინ ხოფშირა̄მინ
Line of edition: 15    ნა̄ყნუნდ ლობჲოს იჴმარიხ. ლობჲო მო̄ ხუღვა̄ნდეს მეზგას, ეჯკალიბ
Line of edition: 16    და̄რშა̄ლ ხეჩდა, ნაჩდუნდი̄ ეზარ ლი ი ნა̄ყუნდი̄; ლობჲოს კვეცენზუმ
Line of edition: 17    ლჷგონ ხა̄ზ ლაცა̄დუნა̄ჲსა.

Line of edition: 18       მერხელი ნა̄ყუნ. მახა ლუფხვისა, ეშხუ ერ ჟი იბნი მერხელობ,
Line of edition: 19    ეჩანღო ჩი ლადეღ ამის იხვრიხ ი ნა̄ყუნდ ასყიხ ვოდ გამდრვალ
Line of edition: 20    მუჟღორნუნ. უჴნა-ულა̄შა მაჴედ ილი ი უშვრია ლეზობ ი ამღა ხეჯა̄ვჲელხ
Line of edition: 21    მაშე̄ნა̄მდ; ჟაჯბიხ ცხვადისა ი როფს ხეჩოხ, ჯიმსი̄ დე̄მ ხაკვდუნეხ,
Line of edition: 22    პიტნაჲს, მოლოქს ი ჭაგვს ხეჩოხ ი ჩი ნა̄ყუნდ ხოფშირა̄მინ
Line of edition: 23    ლუშნუ მეზგა̄ჲსა მერხელი ნა̄ყუნ ისყი. ლასდილუ̄ნახენ ღოშდ
Line of edition: 24    ნატეხ ზურალე̄ლს ჩი̄ს მერხელ ოხღვა აგითე ნა̄ყუნია̄ქდ, ჲერს
Line of edition: 25    კალათარშვ ი ჲერს კალთაჲს ლჷჭო̄ნე ი ლელე̄თად ასყიხ ამშა ნა̄ყუნს.
Line of edition: 26    სადილდი̄ ხვაიდინ ოსღვახ დაბართე მჷშა̄ჲშვდ მერხელი ნა̄ყუნ
Line of edition: 27    მუჟღორ, ვოდ ჩუ დო ადსორე მერხელს ი ვოდ ჩუ დო იფრი, ეჩქად
Line of edition: 28    იშ იხვრიხ ი ასყიხ ამშა ნა̄ყუნს. მახა ლუფხვს ქუნუშ არის მერხელი
Line of edition: 29    ლიჴედს.

Line of edition: 30       კვახნესვ ი კვახნესვი კაკლარე ნა̄ყუნ. კვახნესვს სიმინდი ლა̄შის
Line of edition: 31    ხონჩჷდეხ ი სიმინდცახან ჴედნი. ჩუ ერ ინჲი. ახკიჩეხ ი ჟაჯბიხ ი ხვაჲდინ
Line of edition: 32    ინჯრი მჷქაფ კვახნესვს ხაგიჭხ, ხოჩა კვახნესვ მე̄ვარ მაყი̄რიან ლი.
Line of edition: 33    ჲესინ ჟატყბიხ კვახნესვს ი ეჩჟი იზბიხ. ხოლა კვახნესვსს ხამარს
Line of edition: 34    ხოშხვნის ნე̄შკაჟი ი ლუნთისა ხა̄მნეხ ი ქუნს ხაცვრეხ ეჯნოვშ. ჲეს ლა̄ნშყა
Line of edition: 35    ხამსი̄ ხიჯბიხ, გატარს ხონჩჷდეხ ი ხა̄მნეხ. კვახნესვი კაკლარს ქა̄ფრეხ
Line of edition: 36    ი აშხვნიხ ლუნთისა̄ ნა̄ყუნდ, ჩვაყლიხ ი ეჩჟი აჯბიხ ი ლატეხ ნა̄ყუნ
Line of edition: 37    ხეფსი. ჲესინ დიარსი̄ ხოჩდიხ ქჷნეშშა̄ლ ი ეზარ ლეზობ ლი.
Page of edition: 243  Line of edition: 1    სიმინდს იმე̄ჲ ალა̄შიხ, კვახნესვი̄ ეჩეგარ არი, ოდო ჲერხი შვანე
Line of edition: 2    სოფლარისა დე̄სა არი კვახნესვ. თანაღ ადგილჟი დეშ იმარგ. ბჷგი
Line of edition: 3    ლჷკან კვახნესვს ხოჩულ გემაშ ხეფსი ი დჷთხელ ლჷკანს -- ყატის --
Line of edition: 4    ხოლა გემაშ ი ლჷლიც. თათრულაჲს ხატუ̄ლიხ ეშხუ წყება კვახნევს
Line of edition: 5    ი ეჯი ზჷ̄სყი̄ჲ ლი ი მაყი̄რიანი̄, გემდი̄ მაჩე̄ნე ლი თათრულაჲ
Line of edition: 6    კვახ-ნესვ.

Line of edition: 7       ტელე̄ფი̄ ნა̄ყუნ. ტელე̄ფის ლუფხვისა იხვრიხ ზურალე̄ლ, ჟასდგვიხ
Line of edition: 8    სდუგვარდ ჯო̄დიარდ, ქა ხორკინეხ ქორა ჭვედს ფაუჟი ი ქა
Line of edition: 9    იფრი; ლუნთისა ჩვაჭკვრიხ თუთუნშა̄ლ ი ნა̄ყუნდ ასყიხ. მჷჯაბჟი
Line of edition: 10    ამისი̄ მე̄ვარ ხესკვი როფ ი ჩიგარ ხეჩოხ. ტელე̄ფი̄ ლახორთე ფიშირ
Line of edition: 11    ზურა̄ლ ღჷრი ეშხუდ ი ნებოზს ხოშა ქაფარს ჴჷდეხ ამშა; ჲედ
Line of edition: 12    ლალა̄შარს აჲესხ ი ჲედ კვიდო̄ლარს, ჟაგვშილეხ ლჷხორ ტელე̄ფივშ
Line of edition: 13    ი ჩუ ჴგდეხ აგითე. ტელე̄ფი̄ ლახორთე ლახვთე ღჷრიხ, ლახვსგარ
Line of edition: 14    ჴედნი ხოჩა ნა̄ყუნია̄ქ ტელე̄ფი, ოდო იშგნა̄გ ნაჴედ დე̄მ იმარგ ლენა̄ყუნიდ.
Line of edition: 15    ტელე̄ფი̄ ნა̄ყუნს ასყიხ ხოფშირა̄მინ ქრისდე̄ში უჭმისა ი
Line of edition: 16    ლინჩა̄ლისა. ჲერხის მე̄ვარ ხალატ ტელე̄ფი̄ ნა̄ყუნ, მარა ჲერხის მა̄მა
Line of edition: 17    ეშჲეში̄, თჷმი ე მო̄დ ხე̄რი ნა̄ყუნურაჲ დიარი ლიზობ. ტე̄ლე̄ფი
Line of edition: 18    სდუგვარ ზაჲმჷზაიერ ხოშხვნახ -- ვოდ მახა ტელე̄ფი̄ ლიჴდა̄ლდ.
Line of edition: 19    ქალაკოდაჲ ი მანჭკვარაჲ. ქალაკოდაჲ ტელე̄ფიშალ ბალახ ლი,
Line of edition: 20    მაშრი ი ჯო̄დი ლჷბალ ი იმჟი̄ ერ ტელე̄ფის, ეჩჟი ასყიხ ნა̄ყუნდ, მარა
Line of edition: 21    ქალაკოდაჲ ხოშა მჷხიმ ლი; იხვრიხ ლუფხვისა ზურალე̄ლ, ჟასდგვიხ
Line of edition: 22    ტელე̄ფიშა̄ლ სდუგვარდ, ქა ხორკინეხ სდუგვარს ფაუჟი ჭვედჟი
Line of edition: 23    ი ლუნთისა ჩუ ლჷჭკორს ჟაჯბიხ ი ნა̄ყუნდ იჴმარიხ.

Line of edition: 24       მანჭკვარაჲ სოკ ლი ი ამისი̄ ლუფხვისა იხვრიხ, მეგმარჟი ჴედნი
Line of edition: 25    ძირმჷყქა, აგითე ჴჷდეხ, ქა̄ფრეხ ლჷკერე̄ლჟი ი ჩვაშხვნიხ, ლუნთისა
Line of edition: 26    ჩვაკე პავიხ, ჟაჯბიხ ი ნა̄ყუნდ იჴმარიხ. ალე ეზარ ლეზობ ლი ი უშვრია
Line of edition: 27    ლი; ამისი̄ როფ ხესკვი ი ლჷროფდ ასყიხ. ლიჯბა̄ლნუნ ხოჩა̄მდ
Line of edition: 28    ათშო̄რეხ ი ეჩანღო ჟაჯბიხ. ამისი̄ სამარხვ ნა̄ყუნდ იჴმარიხ. ლუფხვისა
Line of edition: 29    მახა მანჭკვარიჲს ხსნილისაი̄ იზბიხ ნა̄ყუნდ.
Line of edition: 30    გვრიმბ ი გონწიხ. გვრიმბს ჴჷდეხ მახა ლუფხვისა, ვოდ მახე-
Line of edition: 31    მახე მეჴდე ლი; მახა მეჴდაჟიგარ ხაყა ნა̄ყუნდ, ოდო ჩუ ერ იმჩი,
Line of edition: 32    ეჩანღო ბჷგი ლი ი ლენა̄ყუნიდ მა̄მ იმარგ; ჟაჯბიხ, ჯიმს ხეჩოხ ი
Line of edition: 33    ნა̄ყუნია̄ქ ხა̄რხ. გვრიმბ ცხეკარისა ითხი ი ეჩხენ ოხღვახ. ჩუ და̄რ
Line of edition: 34    აშხვნი ამის ლელუნთად, მახა ლილფხვა̄ლთეგარ იზბიხ. ლჷგაკ
Line of edition: 35    ეზარ ლი, მარა გაკ ჩი̄ს მა̄ ხეთხი.

Line of edition: 36       გოწხირ ჩჲა̄გ არი ჭალჲარისა, ლიცე პილარლეჟა ი ხვაჲს იშნე
Line of edition: 37    კოტო̄ლ ტევანე̄ლარს. მჷიჟი ჩუ იწრანიხ ამშა ტევანე̄ლარ ი ეჩქა
Page of edition: 244  Line of edition: 1    იხვრიხ ი ჩვაშხვნიხ ლელუნთად. ამშა კაკლე̄ლარს კეპლარს ხონჩჷდეხ
Line of edition: 2    ნამხიმი̄ გუ̄ნღა; მე̄ვარ მჷხიმ ლი ი ჲესვა̄ჲ მჷხიმ ხალატ, ამშა წვე̄ნას
Line of edition: 3    ხონჩჷდეხ ნა̄ყუნს. გოწხირ ლჷცაგ ჩირგალდ ხაზვიბ ი ეჯჲარ იშნეხ
Line of edition: 4    ტევანე̄ლარს. გოწხირი ბალარსი̄ იზბიხ მახა მეჴდას ბობშარ; ალე̄ჲ
Line of edition: 5    ჟავა̄რა ლი გოწხირშა̄ლ.

Line of edition: 6       უღვ, ინღა, ცინყა ი მჷნცხარ. უღვი გუ̄ნღა ჯო̄დია ცხეკართე
Line of edition: 7    ღჷრიხ, შომასი̄ ერე მჷი ხამგჷნახ; ჲერ აშ იზბი ი ჲერ უღვი ქაქს
Line of edition: 8    ასყი ი ეჩის იზბიხ. უღვ ჩჲა̄გ მასარდ ითხი, ზურალე̄ლს ხოჩა̄მდ
Line of edition: 9    ხოცჷხხ ლავუღვ დეც ი გიმ; ამის ხილი მჷქაფ იჴმარიხ.

Line of edition: 10       ინღა მე̄ვარ ხისჲამხ ხილდ ი შომასი̄ ერ ინღო̄ბ ლი, მე̄ვარ იმა̄ჯიხ
Line of edition: 11    კალათარშვ ი ბობშარ -- სპიროე̄ლშვ, აგი̄ ქორამა̄რასი̄ ხვაჲს ხა̄მნეხ
Line of edition: 12    ი მინი̄ მასარდ იზბიხ.

Line of edition: 13       ცინყა ლა̄ჲდი̄ ხვაჲ არი ცხეკარისა ი ხვაჲს ჴჷდეხ აგითე. ცინყა̄
Line of edition: 14    ლახორჟი ხვაჲდინ დეშდვარს ხეთხნიხ ი ლჷფარილე ტეხნიხ აგითე,
Line of edition: 15    ამის არჩხლარდი̄ აკშუ̄რეხ ი ეჲჟი ოხღვახ ი იზბიხ.

Line of edition: 16       მჷნცხარ ყურძენი ტევანი მაჯო̄ნ ტევანე̄ლარს იშნე, მარა ჟავ
Line of edition: 17    ლი მე̄ვარ ი ჲესვა̄ჲ ჟავო̄რა ხასჲამ, ჴჷდეხ ი იზბიხ. ცინყაშა̄ლ ხვაჲ
Line of edition: 18    მა̄დ ითხი მჷნცხარ, ჲერხიაგისგარ ხამთქვა ცხეკისა.

Line of edition: 19       არაყ ნათხუმ ი ნასიპ. არაყ ჯვინელდჷ̄რან ლჷმარდ ი ათხე̄ჲ
Line of edition: 20    მაგ ა̄ჲრაყი, ჲესვა̄ჲ კელდ ე̄სამა ხენთლება ი მეზგე̄მი ჩქიმ ე̄მა ხა̄გ.
Line of edition: 21    ჭირჟი ი ხინჟი არაყს დეშ ხოსიდხ. მალტუ̄რი̄ აშ ლიხ არაყიშ, ერე
Line of edition: 22    შუმ მა̄მ ხა̄რ; ჩუ ე ხეთხიხ ფარცაგდ ლეთრად, ღო ჟი ხეწდო̄რიხ,
Line of edition: 23    ეჯიმაგს ითრეხ. ბეცხობჟი ი კათხ-ტაბგობჟი ი ჲედ ლაგვნობჟი ტაბგარჟი
Line of edition: 24    ცხაჲ ხვაჲს ითრეხ, ჩუ̄ჲ იშდმიხ, მარა ქა̄მ, ჲეზვისა, ერ საყე̄ნს
Line of edition: 25    იგემხ გობშვ, ეჩეჩუ̄ჲ დე̄მ ხაყიჩხ უთრად. მაგ ნავბედრი შვანისა
Line of edition: 26    მაშდმა̄რჟი იჩმი̄ნი, მახმა̄რჟი ძვირდ ე̄სა იჩმი̄ნი მა̄ლე ნავბედრი,
Line of edition: 27    ალე მაგ იჩმი̄ნი მაშდმა̄რჟი. ლეჲრაყიდ ცხაჲ ეჯიმაგ კეთილ იხჷრჯავი,
Line of edition: 28    ერე ლა̄ჲყრას ხაგნე მეზგას, ზაჲა როჭიკს ამე̄ჲსა ახჷრჯავიხ ი
Line of edition: 29    ამშა ქა ლიყეჩს ეში̄ დე̄სამა ლეხშად. უშხვარე მჷქარისა ა̄ჲრაყა̄ლიხ.
Line of edition: 30    დო̄ჲდო ხილო̄რა̄ არაყსგარ ერ ა̄ჲრაყდეხ, მარა ნამშავი არაყს
Line of edition: 31    ერ ა̄ჲრაყიხ, ალე აღრიბე მეზგას. არაყ ხოცხახ ჩიგარ, ხა̄ლმოშ ლჷჴმაშ
Line of edition: 32    ი̄რი, ეჯკალიბ. მანკვი, ლა̄ჲრაყჟი, ტაბლარცახან სოლომი კათხს
Line of edition: 33    ერ ხამზჷრიხ, ეჩქა ლჷჴმაშ არაყი ლიმურჯეს ხეშგოხ არყი ღე̄რბათ
Line of edition: 34    სოლომს. შა̄რდი არაყ დე̄მნარდ ხაბჟახ ი ქა უსპად დე̄მ ხაყიჩხ.
Line of edition: 35    ქორწლობჟი ნასიპ არაყ მო̄ ხეღვე̄ნიხ, ეჯურ დე̄მ იგნიხ. ლა̄ჲრაყჟი
Line of edition: 36    ნათხუმს ქა ხოკედხ ი საწუთრ მუშგვრი̄ ლეთვნად აზა̄რეხ. არაყს
Line of edition: 37    აფი̄ნეხ იცხიშს, უსკვიშს, განჭვიშს, ქერიშს, მანა̄შიშს ი სიმინდიშს,
Page of edition: 245  Line of edition: 1    მანა̄ში არაყ თხუმე ზიგვნაჲდ ხოთრახ; უშვრიად ქერი არაყ ხოთრახ
Line of edition: 2    ი განჭვი არაყ ქარალე მაზგა̄რს ლოქ ხა̄რ ხოჩა. ხო̄ჲრაყა ჲერხის
Line of edition: 3    გოგლანდი არაყი̄. ეშხუ ლი̄ჲრაყიჟი ვო̄შთხვ-ვოხუშდ ცხვადიშს ეში̄
Line of edition: 4    მაგ ქა̄ჲრაყი ი ამის ცხაჲ ვო̄ბა კეთილ ხაწჷხ.

Line of edition: 5       რანგ. ჲერვა̄ჲას ლაღობ ხო̄გ, ეჯი ასყი რანგს; ჲერუ ნაზჷმ ლიცს
Line of edition: 6    ხეჩოხ ი მესმა ნა̄თის თუს ი ძირდ ჲედ თხჷლას ხეჩოხ ი ჲედ ქერი
Line of edition: 7    ლჷტი̄ხ საფუვარს ი ჟი ერ ტეხნი რანგ, ეჩთა̄ნ ლეთრე ხეფსი, ერე
Line of edition: 8    თელდ შამპანიურს ხაჯეშ ი შდჷმაჲ მე̄ვარ ლი, სერთხი̄ თხჷლავშ
Line of edition: 9    ლჷტი̄ხ. თუ შვანისა მაჩე̄ნე ხოხალ, ბალხო̄რა̄ მუღვჲარს ხემშაჲხ
Line of edition: 10    ლაღვბა ბუზუ̄ლარ ი თვეთვნე მჷყჷ̄ჩე თუს ასყიხ. შვანე ლაღვბა
Line of edition: 11    ბუზუ̄ლ ამერიკათე ადჲეხ ლაწვე̄ნად, ჩი ლაღვბა ბუზზზუ̄ლდ ხოჯვდა
Line of edition: 12    ჩონჩხ ხა̄რა ესრენ შვანჲა ბუზუ̄ლს ი მუღვჲარს ხოჩა̄მდ ხეწგვან.
Line of edition: 13    ლჷრანგ მეზგახენქა ღჷნჲერუჟი მეზვბელარ ჟი იცა̄დიხ ნამშავღა რანგს
Line of edition: 14    ი ითრეხ. ჩუ მუმჭხვად ხვაჲდინ რანგს არაყს ხონჩჷდეხ ი ჲეს რანგთე
Line of edition: 15    ხანჩჷდეხ არაყს, ხოშა შდჷმაჲ ლოქ ი̄რი.

Line of edition: 16       ღვინჟლ. ღვინელ მე̄ვარ ხას ჲამხ შვანარს ი მა̄ჲ ლათჲა̄ლ ხა̄რხ,
Line of edition: 17    იმა̄ჯდახ ი ათხეჲ იმა̄ჯიხ ლეჩხუმხენ. ჲერხის მამვლარ ხაღვე̄ნახ
Line of edition: 18    ლეჩხუმს ი სგა ხაბრიე̄ნახ მასძელარდ ვენახ ლე̄ზნანიდ. მუჟღორ
Line of edition: 19    ანჴდენო̄ლხ, ენხორნახ ყურძენს ი მაჭარდ ქა ლჷმჲესინხ ჟაჴარშვ აგითე.
Line of edition: 20    ჲერხიაგის ეჯმუზ კეცარ ცვირხ ღვინლა შედდ შვანს, ერე აშირ
Line of edition: 21    ლაგორ ი̄რიხ; ალ კეცარ ხეკვეს ლეჩხუმხენ ლაგვრანუშ ნაჴიდ ლესეხ
Line of edition: 22    ოდო შვანს ნასყეჲ მა̄ ლიხ. ეჩქადა დროჲჟი ლიჩრი ხახლე̄ნახ ი
Line of edition: 23    ხვაჲ ღვინელს ლჷმჴიდინხ. ათხე, შუკვ ი ზჷზ ერ აფაშგ, ლეჩხვმარს
Line of edition: 24    ოხღვახ ი ვოდიხ; მინს მა̄მ ხა̄რხ ლეჩრი ი ლეძაღლავა̄ლ, ყო̄რთეჟი
Line of edition: 25    ხოჴდენიხ ხოჩა ღვინელ. ჩუ მჷშდმად მუშვან მა̄რე ხვაჲ ღვინელს
Line of edition: 26    იმკვედე. არყი ნათუნ მა̄რას აშ ალა̄ლა ღვინელ დეშ აშდმე, თელდ
Line of edition: 27    ხვაჲს ე დო̄მ ლეჲთრე; ვენახ დე̄მე არი შვანე გიმჟი ლენტხანქა ი
Line of edition: 28    ლახმჷლდჷნქა. ალ სოფლარ ბარ ლიხ ი ადესა̄ჲ ვენახ ჟი ხოჴდენიხ,
Line of edition: 29    მარა ვოდი̄შიშ ი ლეჩხვმა ადესაჲთა̄ნ დეშ ლი. ღვინლა უჴი̄დად ეჩქადა
Line of edition: 30    დროჲჟი დეშერ ლჷმგნო̄ლინ; მინს ერ მო̄ ხაკვდე̄ნხ, ზედაშიჲა̄ქდ
Line of edition: 31    ეში̄ ლეჴდე ხა̄რახ. ლჷდგარს ლაგვნობჟი ღვინელშვ ჲერვა̄ჲ
Line of edition: 32    ალგვანი, ეჯი ხოშა ჟახე ხაბჟახ ი ლჷდგარა ქუნარე ხოშა მაკახ;
Line of edition: 33    ნაჯგრუნდი̄ ღვინლა ლიჯგრი-ლიფა̄ნე ხოშა მადილ ხაბჟე̄ნახ
Line of edition: 34    ლჷდგარაშდ. ათხეი̄, ჩუ ლას ე̄რ იდგარი, ლელგვან ღვინელს ლეჩხუმხენ
Line of edition: 35    ჴჷდეხ, ჴანს აჲესხ ღვინელღა ლეცა̄დიდ; ჴჷდეხ ლაგვან ლადღიშვდ
Line of edition: 36    ფიშირღე̄თ ლა̄ბ ღვინელს ი ხათრეხ ლაგვანთე მეჴედ სოფელს.
Line of edition: 37    ლჷდგარა პატრონს ხახჲად, ერე ხვაჲ მა̄რე ლოქ ოსშჷნდობნე მიჩა
Page of edition: 246  Line of edition: 1    ლჷდგარს. ნაჴიდ ღვინელს კოტო̄ლუ̄ლს ჩვაშხვნიხ ვორაყვიჟჟი̄ნა
Line of edition: 2    ნაჯგრუნდ. ჯვინელ დროჲჟი ლარგავ ხახლე̄ნახ ი თვით კვარტ ხა̄რახ
Line of edition: 3    ლერგავი მა̄რე̄მი ქუნე შელდჟი სოფლიშდ, მარა ალ წეს, ლეღერთია̄ნიდ,
Line of edition: 4    დო̄სგ აშყად ი ლარგავს და̄რ იჩო ათხე, მარა ლაგვანი ხარჯი̄ ლა̄ჲყრას
Line of edition: 5    ხაგნე ჲერხი მეზგას. მუჟღვრა პილთე ღვინლა ლათრად ი
Line of edition: 6    მაჭარიშ, გვეშ ერ მო̄მა ხეჭკჷ̄რე̄ნდეს, ეში̄ ღჷრიხ ლეჩხუმთე ი მაჭრობჟი,
Line of edition: 7    იმთე̄ჲ ქე̄თსგიდნი, ჩჲა̄გ მუშვან მა̄რე ფჷ̄ნცლე̄ვი. ჲეკენობი̄ ეჩქა
Line of edition: 8    ხეხვი, შომა̄ჲ ერ მაჭრობ ლი ი ქა გოში ლი მუშვანშვ თელდ ლეჩხუმ;
Line of edition: 9    თვით მასძელ ჩი̄ს ხაყა ლეჩხუმისა ი ითრეხ ღვინელს
Line of edition: 10    ეჯჲარმჷყ.

Line of edition: 11       ჭაგვ. ლელჷრტამისა ჭაგვ ხუღვახ ჩინ მაფშირა ლეჴმარიდ;
Line of edition: 12    ჭაგვს იჴმარიხ ხახვი მჷქაფ, ბალარ ხახვდ ხოჯეშ, მარა ძირს დე̄მ
Line of edition: 13    ისყი, ქო̄ლბ-ქო̄ლბდ ხოხალ ლიჴედ ი მახან დე ლილა̄ში ხაწჷხ ი
Line of edition: 14    დე ლინერგავი, ხახვდ ხოშა მუსტუნ ლი, ჩი ნა̄ყუნს ამის ხაჭკვრიხ,
Line of edition: 15    იმვა̄ჲ ერე ხახვ ხესკვი, ეჩის: ლობჲოს, მერხელს, მანჭკვარაჲს ი
Line of edition: 16    იშგენ ნა̄ყუნვარს ჩი̄ს. ჲეს-ჲეს, შომა̄ჲ ერ ნა̄ყუნ მო̄დ არი, ეჩქა დიარს
Line of edition: 17    ჭაგვს ხა̄ყიხ ლჷჯიმდ, ხახვშა̄ლ. ათხე̄ დროჲჟი ჟენბინა̄ნ ხახვი
Line of edition: 18    ლინერგავი, მარა ეჩქად დე̄სა ლჷმარდ ხახვ ი ეჩა მჷქაფ ჭაგვ ხაღვე̄ნახ
Line of edition: 19    ი ათხე̄ჲ ხუღვახ ლარტმალისა ჲერხის. ლარტამდ კოჭო̄ლ გიმი
Line of edition: 20    ნაქვიცუ̄ლს ცურეხ ქორა ნაფდიას ი ჩიგარ ეშხუ აგის ხა̄რხ ლარტამ
Line of edition: 21    გიმი უცა̄დუნად. ჭაგვ ხეკვეს ველურ ხახვ ლე̄სეს.

Line of edition: 22       მოლიქ ი პიტნაჲ. მოლოქს დე ლილა̄ში ხაწჷხ ი დე ლინერგავი;
Line of edition: 23    ამჟი ხაზჷიბ ჩჲა̄გ, ველურ ბალახ ლი, მარა მერხელი ნა̄ყუნს ეჯურ
Line of edition: 24    მა̄ ხაყა ლესყიდ ი ჩიგარ მერხელი ლახორჟი მოლოქსი̄ იხვრიხ, ეშხუდ
Line of edition: 25    აჯბიხ ი ხოჩა გემაშ ხეფსი მერხელი ნა̄ყუნს.

Line of edition: 26       პიტნაჲ ლა̄ჲდი̄ ველურ ბალახ ლი ი ნა̄ყუნს ხანჩჷდეხ, ხოჩა
Line of edition: 27    ქუნმაჴნა̄რ ბალახ ლი; ჲესი-ჲეს თოთ თაშს ხაჭკვრიხ, ჲესვა̄ჲ ხასჲამ
Line of edition: 28    ლჷპიტნაჲ თაში ლიზობ. მერხელი ნა̄ყუნსი̄ ხაჭკვრიხ ჲერხი
Line of edition: 29    პიტნაჲს. ლარტმალისა ჲერხი ჩუ̄ჲ ანერგავი პიტნაჲს; ჲერხი ჯიმს
Line of edition: 30    ხა̄ყი ი ამჟი იზბი ვოხრახუშშა̄ლ პიტნაჲს, ჲესვა̄ჲ ხასჲამ, ჲერხის
Line of edition: 31    მა̄მ ხალატ ი დე̄მ იზბი.

Line of edition: 32       ბოლოკ ი ნივრა. რედისკა ბოლოკს ათხეგარ ალა̄შიხ, ათხად
Line of edition: 33    მა̄მ ლჷმლა̄შინხ, მარა აშ თვეთვნა ბოლოკს დო̄სგანღო ალა̄შიხ; მენგრე
Line of edition: 34    ძირალს ისყი ჲერხი̄ ლარტმალისა ი ლელუნთად აშხვნიხ ლჷშთხარ
Line of edition: 35    ვორისა, ლუფხვისა̄ჲ იზბიხ, ჯიმს ხა̄ყიხ.

Line of edition: 36       ნივრა დო̄სგა ლელარტამ ლი, ი ჩი̄ს ხონერგავა; ნა̄ყუნვარე ნასყუნდ
Line of edition: 37    იჴმარიხ ი ჲერხი ლეღვსი̄ ხა̄ყი. ნივრა ჴადარე მაზიგი ჟაგარ ხაბჟახ
Page of edition: 247  Line of edition: 1    ი მე̄ვარ ხალატხ ალე ლარტამისა; ჟი ეზარ ჴედნი ი ლელუნთად
Line of edition: 2    აშხვნიხ ნა̄ყუნი ნასყუნდ. ათხე̄ხი ენბინეხ ჭარხალიშ, ლახანა̄ჲშ,
Line of edition: 3    პრასიშ ი კომბოსტო̄ ლილა̄ში. ლა̄შიარს ქუთა̄შხენ ჴჷდეხ, კინჯალაჲ
Line of edition: 4    თუთუნსი̄ ალა̄შიხ ლარტმალისა ი მე̄ვარ ბჷგი ლეთრე თუთუნ ხეფსი.
Line of edition: 5    თუთუნ მაჩე̄ნე ხაბჟახ ბითლიზიშ ი ღო თათრულაჲ. კინჯალაჲს
Line of edition: 6    მჷყა̄ლჲონიარგარ ითრეხ, ოდო იშგენ დეშ.

Line of edition: 7       ღეჲ, ჩიჩვლა, ლეცი̄რი, მედგვა, ღვა̄ნჭი, ბუ̄რღუ ი იშგენ ხვაჲ
Line of edition: 8    შუმი ლეზობ ბალხო̄რა. ღეჲზუმ დე̄სამა ნაქა̄მ ბალახ ხალატხ, ამშა
Line of edition: 9    ღე̄რალს აცი̄რეხ ი ეჲჟი იზბიხ. ღეჲ ჟაგარ ხაბჟახ, ხოჩა ლოქ ხა̄რ
Line of edition: 10    მა̄რას. ლაღეჲთე სოფლობშვ ღჷრიხ ი ნებოზს ოხღვახ ღეი ქაფარ.
Line of edition: 11    ღეჲჟი არაკს ა̄მბვიჟ, ერე ჲერუ მეთხვიარ ლოქ ემჩედე̄ლიხ ი ეშხვს
Line of edition: 12    ლოქ ჩვათგე̄დნე̄ნა, ლავჟაჟი ვიჯ ლოქ ათგვეწა ჴარჴლექვა ი ამჩიქა
Line of edition: 13    მე̄რმე მეთხვიარ ასჲე̄ნა ი ქა ხაწდა ვიჯს; ქა ერ ემჲეცხ, ჴადარ
Line of edition: 14    ხაზგო̄ლნა ი მეთხვიარს ღეჲ ლოქ ხო̄მნა ხვაჲ; ღეჲს ჩუ ლოქ ოთჭკორა
Line of edition: 15    ჴადისა ვიჯ ი ჟოხტიხვნა ი ჟოხსე̄ლვა აფხნიკ; ამთა̄ნ ხილ ხაბჟახ
Line of edition: 16    ღეჲ. იზბიჟ ლჷცი̄რა ჩიჩვლასი̄, მარა ალე ჩვაჩჩველე, იმვა̄ჲ
Line of edition: 17    ლეხფედი ი მეკვბად იზბიხ. ლეცი̄რი ლა̄ჲდი̄ ლეცი̄რე ბალახ ლი
Line of edition: 18    ლჷლიც ი უშვრია ლეზობ ლი. მედგვას წიწმარიტი მჷქაფ იზბიხ,
Line of edition: 19    დაბარისა ჴედნი. ღვა̄ნჭი̄ ძირალს ლაჴანჟი ხელკიხ ი ეჩქა იზბიხ.
Line of edition: 20    ბუ̄რღუ̄ ქაფარს ღეი ქაფარშა̄ლ იმა̄ჯიხ ლახვარხენ, ჩვაცი̄რეხ ამშა
Line of edition: 21    კელარს ი იზბიხ; უშკვს ამშხე, მარა ხილდ ლეზობდ ეში̄ ხალხინხ.
Line of edition: 22    იშგენ ხვაჲ რიგი ბალხო̄რას იჴმარიხ ლეზობდ. მაბჟა, ერე ქვეყანაჟი
Line of edition: 23    დო̄რ იზბჷდეს ეჯიმაგ ნაქა̄მ ბალხარს, მა̄ჲზუმსვა̄ჲ შვანარ თერხ ი
Line of edition: 24    იზბიხ, ჟახე̄ლი̄ ხვაჲ ლეზობ ბალხარეშ ხოხალხ.


ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.