TITUS
Svan Prose Texts IV (Lashkh)
Part No. 237
Previous part

Text: 237 
Page of edition: 248 
Line of edition: 1 
VI. მისტიკური არსებანი
Line of edition: 2 
CCXXXVII. დალ


Line of edition: 3       დალ ზურა̄ლ ლოქ ლი, მარა მე̄ვარ მუსგვენდ ლოქ ხეწვე̄ნი
Line of edition: 4    მა̄რას, ხოშა ნაღალდ მოთხვიარ მა̄რას ხედრა̄ლ ი ჩუ̄ჲ ლოქ აქდუნე
Line of edition: 5    მიჩაცახან მელყურდ, ჲერხის ღო ჩუ̄ჲ ასო̄ყე, თელდ ქა̄ჲეს ცხეკთე,
Line of edition: 6    ჲერხის ხაბჟახ დალ ნათხვიარე̄ლე მუფსვნი ღერთლე ნაწოლ, მარა
Line of edition: 7    ხოფშირა ა̄მბვიხ, ერე დალ ქაჯრე ნაწოლ ლოქ ლი ი მა̄დე წყჷლჲან
Line of edition: 8    ქუნეშ; ჲერვა̄ჲს ლოქ მიჩაცახან მელყურდ ჩვაქდუნე დალ, ეჩის
Line of edition: 9    ლოქ ლითხვიარი სოჲს ხა̄ვდი, ჲერხი ამჟი ა̄მბვიხ დალი ამბავს. აშ
Line of edition: 10    დალ ლჷცხეკს ლოქ ხაფსვნა ი მა̄დე შიშველს. შიშველ ზაგრალს
Line of edition: 11    ბერშიშველ ლოქ ხაფსვნა ი კვიცრე̄ლეშ ი ჲერსკნი ჯოგარ მაგ ბერშიშველი
Line of edition: 12    ლემხოშ ლოქ ლიხ. დალ კოჯისა ი ცხეკისა ლოქ ხასდგომა ი ქა
Line of edition: 13    ლიწედს მეთხვიარ მევარ ხენთხლა̄ლ ი ხაყლუ̄ნი̄ ა̄დვ. მაშედდ და̄რ
Line of edition: 14    ანჭინ დალს ი დეთა̄ჲ ე̄რ ხემზჷრ დალს, ერე ლემეშდ ლოქ. ლიღრა̄ლისა̄ჲ
Line of edition: 15    ხეჩდა, ერე "დალჷდ ლოქ კოჯას ხელღვაჟალე". ურწყულდ
Line of edition: 16    ლი̄ზის ლათხვიართე ეჯღა დეშერ აბდავიხ მოთხვიარა, ერე ჲედ და̄ვ
Line of edition: 17    ი ჲედ დალ დო̄სა ლეხწვე̄ნე̄ნდეხ ი დო̄სა ეთგა̄წბულე̄ნდეხ ლითხვიარ
Line of edition: 18    ი ნაწილი̄ ამღა ხამკახ ჩი̄ს ცხეკარისა მოზელა̄ლს. ლჷცხეკარისა
Line of edition: 19    ლა̄ზლამჩედჟი "ყეთა ანგლოზს" არშვნიხ ი ხეჴჷ̄რა̄ლხ, ერე ეთქა̄ბვნე̄ნდეხ
Line of edition: 20    ქაჯ-ჲეშმაჲ ი ლითხვიარ ეთმურჯე̄ნდეხ, მაჩე̄ნა̄მდ ე̄ს ხამურჯე̄ნა,
Line of edition: 21    ეჲჟი მინსი̄. ხოჩა თვეთვნა, მჷკი̄ვა ლერქვალშვ ლჷრექვ ლოქ
Line of edition: 22    ხეწვე̄ნიხ დალ ლუზვრა̄ლუდ ი ჲეს ლოქ ჩუ იბა̄ქი ი ჲეს ლოქ ქა იწვე̄ნი.
Line of edition: 23    ლიკი̄ლი ლოქ ხაზნა დალს ეჯკალიბ, ერე ჩუ ლოქ ანა̄გე ჩი̄ს ი
Line of edition: 24    მაყალსი̄ ლოქ ხაშდე ამსვა̄ლდს ეჩა ლიკი̄ლი̄ ლი̄ვნარი, ეჩა სგა ლითხნე
Line of edition: 25    ლა̄ჲდი̄ შორსა̄ვ ლი ი ვორგულდ ღალ ესჴიდ.


ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.