TITUS
Rg-Veda: Rg-Veda-Samhita
Part No. 290
Previous part

Hymn: 56_(290) 
Verse: 1 
Halfverse: a    न ता मि॑नन्ति मा॒यिनो॒ न धीरा॑ व्र॒ता दे॒वाना॑म्प्रथ॒मा ध्रु॒वाणि॑ ।
   न ता मि॑नन्ति मा॒यिनो॒ न धीरा
   न ता मि॑नन्ति मा॒यिनः न धीराः
   न ता मि॑नन्ति मा॒यिनो न धीरा

Halfverse: b    व्र॒ता दे॒वाना॑म्प्रथ॒मा ध्रु॒वाणि॑ ।
   व्र॒ता दे॒वाना॑म् प्रथ॒मा ध्रु॒वाणि ।
   व्र॒ता दे॒वाना॑म् प्रथ॒मा ध्रु॒वाणि ।

Halfverse: c    न रोद॑सी अ॒द्रुहा॑ वे॒द्याभि॒र्न पर्व॑ता नि॒नमे॑ तस्थि॒वांसः॑ ।।
   न रोद॑सी अ॒द्रुहा॑ वे॒द्याभि॑र्
   न रोद॑सी अ॒द्रुहा वे॒द्याभिः
   न रोद॑सी अ॒द्रुहा वेदि॒याभि॑र्

Halfverse: d    न पर्व॑ता नि॒नमे॑ तस्थि॒वांसः॑ ।।
   न पर्व॑ताः नि॒नमे तस्थि॒वांसः ।।
   न पर्व॑ता नि॒नमे तस्थि॒वांसः ।।


Verse: 2 
Halfverse: a    षड्भा॒राँ एको॒ अच॑रन्बिभर्त्यृ॒तं वर्षि॑ष्ठ॒मुप॒ गाव॒ आगुः॑ ।
   षड्भा॒राँ एको॒ अच॑रन्बिभर्त्य्
   षट् भा॒रान् एकः अच॑रन् बिभर्ति
   षड् भा॒राँ एको अच॑रन् बिभर्ति

Halfverse: b    ऋ॒तं वर्षि॑ष्ठ॒मुप॒ गाव॒ आगुः॑ ।
   ऋ॒तम् वर्षि॑ष्ठम् उप गावः आ अ॑गुः ।
   ऋ॒तं वर्षि॑ष्ठम् उप गाव आगुः ।

Halfverse: c    ति॒स्रो म॒हीरुप॑रास्तस्थु॒रत्या॒ गुहा॒ द्वे निहि॑ते॒ दर्श्येका॑ ।।
   ति॒स्रो म॒हीरुप॑रास्तस्थु॒रत्या
   ति॒स्रः म॒हीः उप॑राः तस्थुः अत्याः
   ति॒स्रो म॒हीर् उप॑रास् तस्थुर् अत्या

Halfverse: d    गुहा॒ द्वे निहि॑ते॒ दर्श्येका॑ ।।
   गुहा द्वे निहि॑ते दर्शि एका ।।
   गुहा दु॒वे निहि॑ते दर्शि एका ।।


Verse: 3 
Halfverse: a    त्रि॑पाज॒स्यो वृ॑ष॒भो वि॒श्वरू॑प उ॒त त्र्यु॒धा पु॑रु॒ध प्र॒जावा॑न् ।
   त्रि॑पाज॒स्यो वृ॑ष॒भो वि॒श्वरू॑प
   त्रिपाज॒स्यः वृ॑ष॒भः वि॒श्वरू॑पः
   त्रिपाज॒स्यो वृ॑ष॒भो वि॒श्वरू॑प

Halfverse: b    उ॒त त्र्यु॒धा पु॑रु॒ध प्र॒जावा॑न् ।
   उ॒त त्र्यु॒धा पु॑रु॒ध प्र॒जावा॑न् ।
   उ॒त त्रिउ॒धा पु॑रु॒ध प्र॒जावा॑न् ।

Halfverse: c    त्र्य॑नी॒कः प॑त्यते॒ माहि॑नावा॒न्स रे॑तो॒धा वृ॑ष॒भः शश्व॑तीनाम् ।।
   त्र्य॑नी॒कः प॑त्यते॒ माहि॑नावान्
   त्र्यनी॒कः प॑त्यते माहि॑नावान्
   त्रिअनी॒कः प॑त्यते माहि॑नावान्

Halfverse: d    स रे॑तो॒धा वृ॑ष॒भः शश्व॑तीनाम् ।।
   स रे॑तो॒धाः वृ॑ष॒भः शश्व॑तीनाम् ।।
   स रे॑तो॒धा वृ॑ष॒भः शश्व॑तीनाम् ।।


Verse: 4 
Halfverse: a    अ॒भीक॑ आसाम्पद॒वीर॑बोध्यादि॒त्याना॑मह्वे॒ चारु॒ नाम॑ ।
   अ॒भीक॑ आसाम्पद॒वीर॑बोध्य्
   अ॒भीके आसाम् पद॒वीः अ॑बोधि
   अ॒भीक आसाम् पद॒वीर् अबोधि

Halfverse: b    आदि॒त्याना॑मह्वे॒ चारु॒ नाम॑ ।
   आ॑दि॒त्याना॑म् अह्वे चारु नाम ।
   आ॑दि॒त्याना॑म् अहुवे चारु नाम ।

Halfverse: c    आप॑श्चिदस्मा अरमन्त दे॒वीः पृथ॒ग्व्रज॑न्तीः॒ परि॑ षीमवृञ्जन् ।।
   आप॑श्चिदस्मा अरमन्त दे॒वीः
   आपः चित् अस्मै अरमन्त दे॒वीः
   आप॑श् चिद् अस्मा अरमन्त दे॒वीः

Halfverse: d    पृथ॒ग्व्रज॑न्तीः॒ परि॑ षीमवृञ्जन् ।।
   पृथ॑क् व्रज॑न्तीः परि सीम् अवृञ्जन् ।।
   पृथ॑ग् व्रज॑न्तीः परि षीम् अवृञ्जन् ।।


Verse: 5 
Halfverse: a    त्री ष॒धस्था॑ सिन्धव॒स्त्रिः क॑वी॒नामु॒त त्रि॑मा॒ता वि॒दथे॑षु स॒म्राट् ।
   त्री ष॒धस्था॑ सिन्धव॒स्त्रिः क॑वी॒नाम्
   त्री स॒धस्था सिन्धवः त्रिः क॑वी॒नाम्
   त्री ष॒धस्था सिन्धवस् त्रिः क॑वी॒नाम्

Halfverse: b    उ॒त त्रि॑मा॒ता वि॒दथे॑षु स॒म्राट् ।
   उ॒त त्रि॑मा॒ता वि॒दथे॑षु स॒म्राट् ।
   उ॒त त्रि॑मा॒ता वि॒दथे॑षु स॒म्राट् ।

Halfverse: c    ऋ॒ताव॑री॒र्योष॑णास्ति॒स्रो अप्या॒स्त्रिरा दि॒वो वि॒दथे॒ पत्य॑मानाः ।।
   ऋ॒ताव॑री॒र्योष॑णास्ति॒स्रो अप्या॑स्
   ऋ॒ताव॑रीः योष॑णाः ति॒स्रः अप्याः
   ऋ॒ताव॑रीर् योष॑णास् ति॒स्रो अप्या॑स्

Halfverse: d    त्रिरा दि॒वो वि॒दथे॒ पत्य॑मानाः ।।
   त्रिः आ दि॒वः वि॒दथे पत्य॑मानाः ।।
   त्रिर् आ दि॒वो वि॒दथे पत्य॑मानाः ।।


Verse: 6 
Halfverse: a    त्रिरा दि॒वः स॑वित॒र्वार्या॑णि दि॒वेदि॑व॒ आ सु॑व॒ त्रिर्नो॒ अह्नः॑ ।
   त्रिरा दि॒वः स॑वित॒र्वार्या॑णि
   त्रिः आ दि॒वः स॑वितर् वार्या॑णि
   त्रिर् आ दि॒वः स॑वितर् वारि॑याणि

Halfverse: b    दि॒वेदि॑व॒ आ सु॑व॒ त्रिर्नो॒ अह्नः॑ ।
   दि॒वेदि॑वे आ सु॑व त्रिः नः अह्नः ।
   दि॒वेदि॑व आ सु॑व त्रिर् नो अह्नः ।

Halfverse: c    त्रि॒धातु॑ रा॒य आ सु॑वा॒ वसू॑नि॒ भग॑ त्रातर्धिषणे सा॒तये॑ धाः ।।
   त्रि॒धातु॑ रा॒य आ सु॑वा॒ वसू॑नि
   त्रि॒धातु रा॒यः आ सु॑व+ वसू॑नि
   त्रि॒धातु रा॒य आ सु॑वा वसू॑नि

Halfverse: d    भग॑ त्रातर्धिषणे सा॒तये॑ धाः ।।
   भग त्रातर् धिषणे सा॒तये धाः ।।
   भग त्रातर् धिषणे सा॒तये धाः ।।


Verse: 7 
Halfverse: a    त्रिरा दि॒वः स॑वि॒ता सो॑षवीति॒ राजा॑ना मि॒त्रावरु॑णा सुपा॒णी ।
   त्रिरा दि॒वः स॑वि॒ता सो॑षवीति
   त्रिः आ दि॒वः स॑वि॒ता सो॑षवीति
   त्रिर् आ दि॒वः स॑वि॒ता सो॑षवीति

Halfverse: b    राजा॑ना मि॒त्रावरु॑णा सुपा॒णी ।
   राजा॑ना मि॒त्रावरु॑णा सुपा॒णी ।
   राजा॑ना मि॒त्रावरु॑णा सुपा॒णी ।

Halfverse: c    आप॑श्चिदस्य॒ रोद॑सी चिदु॒र्वी रत्न॑म्भिक्षन्त सवि॒तुः स॒वाय॑ ।।
   आप॑श्चिदस्य॒ रोद॑सी चिदु॒र्वी
   आपः चित् अस्य रोद॑सी चित् उ॒र्वी
   आप॑श् चिद् अस्य रोद॑सी चिद् उ॒र्वी

Halfverse: d    रत्न॑म्भिक्षन्त सवि॒तुः स॒वाय॑ ।।
   रत्न॑म् भिक्षन्त सवि॒तुः स॒वाय ।।
   रत्न॑म् भिक्षन्त सवि॒तुः स॒वाय ।।


Verse: 8 
Halfverse: a    त्रिरु॑त्त॒मा दू॒णशा॑ रोच॒नानि॒ त्रयो॑ राज॒न्त्यसु॑रस्य वी॒राः ।
   त्रिरु॑त्त॒मा दू॒णशा॑ रोच॒नानि
   त्रिः उ॑त्त॒मा दू॒णशा रोच॒नानि
   त्रिर् उत्त॒मा दू॒णशा रोच॒नानि

Halfverse: b    त्रयो॑ राज॒न्त्यसु॑रस्य वी॒राः ।
   त्रयः राजन्ति असु॑रस्य वी॒राः ।
   त्रयो राजन्ति असु॑रस्य वी॒राः ।

Halfverse: c    ऋ॒तावा॑न इषि॒रा दू॒ळभा॑स॒स्त्रिरा दि॒वो वि॒दथे॑ सन्तु दे॒वाः ।।
   ऋ॒तावा॑न इषि॒रा दू॒ळभा॑सस्
   ऋ॒तावा॑नः इषि॒राः दू॒ळभा॑सः
   ऋ॒तावा॑न इषि॒रा दू॒ळभा॑सस्

Halfverse: d    त्रिरा दि॒वो वि॒दथे॑ सन्तु दे॒वाः ।।
   त्रिः आ दि॒वः वि॒दथे सन्तु दे॒वाः ।।
   त्रिर् आ दि॒वो वि॒दथे सन्तु दे॒वाः ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.