TITUS
Rg-Veda: Rg-Veda-Samhita
Part No. 291
Previous part

Hymn: 57_(291) 
Verse: 1 
Halfverse: a    प्र मे॑ विवि॒क्वाँ अ॑विदन्मनी॒षां धे॒नुं चर॑न्ती॒म्प्रयु॑ता॒मगो॑पाम् ।
   प्र मे॑ विवि॒क्वाँ अ॑विदन्मनी॒षां
   प्र मे विवि॒क्वान् अविदत् मनी॒षाम्
   प्र मे विवि॒क्वाँ अ॑विदन् मनी॒षां

Halfverse: b    धे॒नुं चर॑न्ती॒म्प्रयु॑ता॒मगो॑पाम् ।
   धे॒नुम् चर॑न्तीम् प्रयु॑ताम् अगो॑पाम् ।
   धे॒नुं चर॑न्तीम् प्रयु॑ताम् अगो॑पाम् ।

Halfverse: c    स॒द्यश्चि॒द्या दु॑दु॒हे भूरि॑ धा॒सेरिन्द्र॒स्तद॒ग्निः प॑नि॒तारो॑ अस्याः ।।
   स॒द्यश्चि॒द्या दु॑दु॒हे भूरि॑ धा॒सेर्
   स॒द्यः चि॑त् या दु॑दु॒हे भूरि धा॒सेः
   स॒द्यश् चिद् या दु॑दु॒हे भूरि धा॒सेर्

Halfverse: d    इन्द्र॒स्तद॒ग्निः प॑नि॒तारो॑ अस्याः ।।
   इन्द्रः तत् अ॒ग्निः प॑नि॒तारः अस्याः ।।
   इन्द्र॑स् तद् अ॒ग्निः प॑नि॒तारो अस्याः ।।


Verse: 2 
Halfverse: a    इन्द्रः॒ सु पू॒षा वृष॑णा सु॒हस्ता॑ दि॒वो न प्री॒ताः श॑श॒यं दु॑दुह्रे ।
   इन्द्रः॒ सु पू॒षा वृष॑णा सु॒हस्ता
   इन्द्रः सु पू॒षा वृष॑णा सु॒हस्ता
   इन्द्रः सु पू॒षा वृष॑णा सु॒हस्ता

Halfverse: b    दि॒वो न प्री॒ताः श॑श॒यं दु॑दुह्रे ।
   दि॒वः न प्री॒ताः श॑श॒यम् दुदुह्रे ।
   दि॒वो न प्री॒ताः श॑श॒यं दु॑दुह्रे ।

Halfverse: c    विश्वे॒ यद॑स्यां र॒णय॑न्त दे॒वाः प्र वो ऽत्र॑ वसवः सु॒म्नम॑श्याम् ।।
   विश्वे॒ यद॑स्यां र॒णय॑न्त दे॒वाः
   विश्वे यत् अस्याम् र॒णय॑न्त दे॒वाः
   विश्वे यद् अस्यां र॒णय॑न्त दे॒वाः

Halfverse: d    प्र वो ऽत्र॑ वसवः सु॒म्नम॑श्याम् ।।
   प्र वः अत्र वसवः सु॒म्नम् अश्याम् ।।
   प्र वो अत्र वसवः सु॒म्नम् अश्याम् ।।


Verse: 3 
Halfverse: a    या जा॒मयो॒ वृष्ण॑ इ॒छन्ति॑ श॒क्तिं न॑म॒स्यन्ती॑र्जानते॒ गर्भ॑मस्मिन् ।
   या जा॒मयो॒ वृष्ण॑ इ॒छन्ति॑ श॒क्तिं
   याः जा॒मयः वृष्णे इ॒छन्ति श॒क्तिम्
   या जा॒मयो वृष्ण इ॒छन्ति श॒क्तिं

Halfverse: b    न॑म॒स्यन्ती॑र्जानते॒ गर्भ॑मस्मिन् ।
   न॑म॒स्यन्तीः जानते गर्भ॑म् अस्मिन् ।
   न॑म॒स्यन्ती॑र् जानते गर्भ॑म् अस्मिन् ।

Halfverse: c    अछा॑ पु॒त्रं धे॒नवो॑ वावशा॒ना म॒हश्च॑रन्ति॒ बिभ्र॑तं॒ वपूं॑षि ।।
   अछा॑ पु॒त्रं धे॒नवो॑ वावशा॒ना
   अछ+ पु॒त्रम् धे॒नवः वावशा॒नाः
   अछा पु॒त्रं धे॒नवो वावशा॒ना

Halfverse: d    म॒हश्च॑रन्ति॒ बिभ्र॑तं॒ वपूं॑षि ।।
   म॒हः च॑रन्ति बिभ्र॑तम् वपूं॑षि ।।
   म॒हश् चरन्ति बिभ्र॑तं वपूं॑षि ।।


Verse: 4 
Halfverse: a    अछा॑ विवक्मि॒ रोद॑सी सु॒मेके॒ ग्राव्णो॑ युजा॒नो अ॑ध्व॒रे म॑नी॒षा ।
   अछा॑ विवक्मि॒ रोद॑सी सु॒मेके
   अछ+ विवक्मि रोद॑सी सु॒मेके
   अछा विवक्मि रोद॑सी सु॒मेके

Halfverse: b    ग्राव्णो॑ युजा॒नो अ॑ध्व॒रे म॑नी॒षा ।
   ग्राव्णः युजा॒नः अ॑ध्व॒रे म॑नी॒षा ।
   ग्राव्णो युजा॒नो अ॑ध्व॒रे म॑नी॒षा ।

Halfverse: c    इ॒मा उ॑ ते॒ मन॑वे॒ भूरि॑वारा ऊ॒र्ध्वा भ॑वन्ति दर्श॒ता यज॑त्राः ।।
   इ॒मा उ॑ ते॒ मन॑वे॒ भूरि॑वारा
   इ॒माः उ ते मन॑वे भूरि॑वाराः
   इ॒मा उ ते मन॑वे भूरि॑वारा

Halfverse: d    ऊ॒र्ध्वा भ॑वन्ति दर्श॒ता यज॑त्राः ।।
   ऊ॒र्ध्वाः भ॑वन्ति दर्श॒ताः यज॑त्राः ।।
   ऊ॒र्ध्वा भ॑वन्ति दर्श॒ता यज॑त्राः ।।


Verse: 5 
Halfverse: a    या ते॑ जि॒ह्वा मधु॑मती सुमे॒धा अग्ने॑ दे॒वेषू॒च्यत॑ उरू॒ची ।
   या ते॑ जि॒ह्वा मधु॑मती सुमे॒धा
   या ते जि॒ह्वा मधु॑मती सुमे॒धाः
   या ते जि॒ह्वा मधु॑मती सुमे॒धा

Halfverse: b    अग्ने॑ दे॒वेषू॒च्यत॑ उरू॒ची ।
   अग्ने दे॒वेषु उ॒च्यते उरू॒ची ।
   अग्ने दे॒वेषु उ॒च्यत उरू॒ची ।

Halfverse: c    तये॒ह विश्वाँ॒ अव॑से॒ यज॑त्रा॒ना सा॑दय पा॒यया॑ चा॒ मधू॑नि ।।
   तये॒ह विश्वाँ॒ अव॑से॒ यज॑त्रान्
   तया इ॒ह विश्वा॑न् अव॑से यज॑त्रान्
   तये॒ह विश्वाँ अव॑से यज॑त्रान्

Halfverse: d    आ सा॑दय पा॒यया॑ चा॒ मधू॑नि ।।
   आ सा॑दय पा॒यय+ च+ मधू॑नि ।।
   आ सा॑दय पा॒यया चा मधू॑नि ।।


Verse: 6 
Halfverse: a    या ते॑ अग्ने॒ पर्व॑तस्येव॒ धारास॑श्चन्ती पी॒पय॑द्देव चि॒त्रा ।
   या ते॑ अग्ने॒ पर्व॑तस्येव॒ धारा
   या ते अग्ने पर्व॑तस्य इव धारा
   या ते अग्ने पर्व॑तस्येव धारा

Halfverse: b     अस॑श्चन्ती पी॒पय॑द्देव चि॒त्रा ।
   अस॑श्चन्ती पी॒पय॑त् देव चि॒त्रा ।
   अस॑श्चन्ती पी॒पय॑द् देव चि॒त्रा ।

Halfverse: c    ताम॒स्मभ्य॒म्प्रम॑तिं जातवेदो॒ वसो॒ रास्व॑ सुम॒तिं वि॒श्वज॑न्याम् ।।
   ताम॒स्मभ्य॒म्प्रम॑तिं जातवेदो
   ताम् अ॒स्मभ्य॑म् प्रम॑तिम् जातवेदः
   ताम् अ॒स्मभ्य॑म् प्रम॑तिं जातवेदो

Halfverse: d    वसो॒ रास्व॑ सुम॒तिं वि॒श्वज॑न्याम् ।।
   वसो रास्व सुम॒तिम् वि॒श्वज॑न्याम् ।।
   वसो रास्व सुम॒तिं वि॒श्वज॑न्याम् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.