TITUS
Rg-Veda: Rg-Veda-Samhita
Part No. 307
Previous part

Hymn: 11_(307) 
Verse: 1 
Halfverse: a    भ॒द्रं ते॑ अग्ने सहसि॒न्ननी॑कमुपा॒क आ रो॑चते॒ सूर्य॑स्य ।
   भ॒द्रं ते॑ अग्ने सहसि॒न्ननी॑कम्
   भ॒द्रम् ते अग्ने सहसिन् अनी॑कम्
   भ॒द्रं ते अग्ने सहसिन्न् अनी॑कम्

Halfverse: b    उपा॒क आ रो॑चते॒ सूर्य॑स्य ।
   उ॑पा॒के आ रो॑चते सूर्य॑स्य ।
   उ॑पा॒क आ रो॑चते सूरि॑यस्य ।

Halfverse: c    रुश॑द्दृ॒शे द॑दृशे नक्त॒या चि॒दरू॑क्षितं दृ॒श आ रू॒पे अन्न॑म् ।।
   रुश॑द्दृ॒शे द॑दृशे नक्त॒या चि॑द्
   रुश॑त् दृ॒शे द॑दृशे नक्त॒या चि॑त्
   रुश॑द् दृ॒शे द॑दृशे नक्त॒या चि॑द्

Halfverse: d    अरू॑क्षितं दृ॒श आ रू॒पे अन्न॑म् ।।
   अरू॑क्षितम् दृ॒शे आ रू॒पे अन्न॑म् ।।
   अरू॑क्षितं दृ॒श आ रू॒पे अन्न॑म् ।।


Verse: 2 
Halfverse: a    वि षा॑ह्यग्ने गृण॒ते म॑नी॒षां खं वेप॑सा तुविजात॒ स्तवा॑नः ।
   वि षा॑ह्यग्ने गृण॒ते म॑नी॒षां
   वि सा॑हि अग्ने गृण॒ते म॑नी॒षाम्
   वि षा॑हि अग्ने गृण॒ते म॑नी॒षां

Halfverse: b    खं वेप॑सा तुविजात॒ स्तवा॑नः ।
   खम् वेप॑सा तुविजात स्तवा॑नः ।
   खं वेप॑सा तुविजात स्तवा॑नः ।

Halfverse: c    विश्वे॑भि॒र्यद्वा॒वनः॑ शुक्र दे॒वैस्तन्नो॑ रास्व सुमहो॒ भूरि॒ मन्म॑ ।।
   विश्वे॑भि॒र्यद्वा॒वनः॑ शुक्र दे॒वैस्
   विश्वे॑भिः यत् वा॒वनः शुक्र दे॒वैः
   विश्वे॑भिर् यद् वा॒वनः शुक्र दे॒वैस्

Halfverse: d    तन्नो॑ रास्व सुमहो॒ भूरि॒ मन्म॑ ।।
   तत् नः रास्व सुमहः भूरि मन्म ।।
   तन् नो रास्व सुमहो भूरि मन्म ।।


Verse: 3 
Halfverse: a    त्वद॑ग्ने॒ काव्या॒ त्वन्म॑नी॒षास्त्वदु॒क्था जा॑यन्ते॒ राध्या॑नि ।
   त्वद॑ग्ने॒ काव्या॒ त्वन्म॑नी॒षास्
   त्वत् अग्ने काव्या त्वत् मनी॒षाः
   तु॒वद् अग्ने कावि॑या त्वन् मनी॒षास्

Halfverse: b    त्वदु॒क्था जा॑यन्ते॒ राध्या॑नि ।
   त्वत् उ॒क्था जा॑यन्ते राध्या॑नि ।
   तु॒वद् उ॒क्था जा॑यन्ते राधि॑यानि ।

Halfverse: c    त्वदे॑ति॒ द्रवि॑णं वी॒रपे॑शा इ॒त्थाधि॑ये दा॒शुषे॒ मर्त्या॑य ।।
   त्वदे॑ति॒ द्रवि॑णं वी॒रपे॑शा
   त्वत् एति द्रवि॑णम् वी॒रपे॑शाः
   तु॒वद् एति द्रवि॑णं वी॒रपे॑शा

Halfverse: d    इ॒त्थाधि॑ये दा॒शुषे॒ मर्त्या॑य ।।
   इ॒त्थाधि॑ये दा॒शुषे मर्त्या॑य ।।
   इ॒त्थाधि॑ये दा॒शुषे मर्ति॑याय ।।


Verse: 4 
Halfverse: a    त्वद्वा॒जी वा॑जम्भ॒रो विहा॑या अभिष्टि॒कृज्जा॑यते स॒त्यशु॑ष्मः ।
   त्वद्वा॒जी वा॑जम्भ॒रो विहा॑या
   त्वत् वा॒जी वा॑जम्भ॒रः विहा॑याः
   तु॒वद् वा॒जी वा॑जम्भ॒रो विहा॑या

Halfverse: b    अभिष्टि॒कृज्जा॑यते स॒त्यशु॑ष्मः ।
   अ॑भिष्टि॒कृत् जायते स॒त्यशु॑ष्मः ।
   अ॑भिष्टि॒कृज् जायते स॒त्यशु॑ष्मः ।

Halfverse: c    त्वद्र॒यिर्दे॒वजू॑तो मयो॒भुस्त्वदा॒शुर्जू॑जु॒वाँ अ॑ग्ने॒ अर्वा॑ ।।
   त्वद्र॒यिर्दे॒वजू॑तो मयो॒भुस्
   त्वत् र॒यिः दे॒वजू॑तः मयो॒भुः
   तु॒वद् र॒यिर् दे॒वजू॑तो मयो॒भुस्

Halfverse: d    त्वदा॒शुर्जू॑जु॒वाँ अ॑ग्ने॒ अर्वा॑ ।।
   त्वत् आ॒शुः जू॑जु॒वान् अग्ने अर्वा ।।
   तु॒वद् आ॒शुर् जूजु॒वाँ अ॑ग्ने अर्वा ।।


Verse: 5 
Halfverse: a    त्वाम॑ग्ने प्रथ॒मं दे॑व॒यन्तो॑ दे॒वम्मर्ता॑ अमृत म॒न्द्रजि॑ह्वम् ।
   त्वाम॑ग्ने प्रथ॒मं दे॑व॒यन्तो
   त्वाम् अग्ने प्रथ॒मम् देव॒यन्तः
   तु॒वाम् अग्ने प्रथ॒मं दे॑व॒यन्तो

Halfverse: b    दे॒वम्मर्ता॑ अमृत म॒न्द्रजि॑ह्वम् ।
   दे॒वम् मर्ताः अमृत म॒न्द्रजि॑ह्वम् ।
   दे॒वम् मर्ता अमृत म॒न्द्रजि॑ह्वम् ।

Halfverse: c    द्वे॑षो॒युत॒मा वि॑वासन्ति धी॒भिर्दमू॑नसं गृ॒हप॑ति॒ममू॑रम् ।।
   द्वे॑षो॒युत॒मा वि॑वासन्ति धी॒भिर्
   द्वेषो॒युत॑म् आ वि॑वासन्ति धी॒भिः
   द्वे॑षो॒युत॑म् आ वि॑वासन्ति धी॒भिर्

Halfverse: d    दमू॑नसं गृ॒हप॑ति॒ममू॑रम् ।।
   दमू॑नसम् गृ॒हप॑तिम् अमू॑रम् ।।
   दमू॑नसं गृ॒हप॑तिम् अमू॑रम् ।।


Verse: 6 
Halfverse: a    आ॒रे अ॒स्मदम॑तिमा॒रे अँह॑ आ॒रे विश्वां॑ दुर्म॒तिं यन्नि॒पासि॑ ।
   आ॒रे अ॒स्मदम॑तिमा॒रे अँह
   आ॒रे अ॒स्मत् अम॑तिम् आ॒रे अंहः
   आ॒रे अ॒स्मद् अम॑तिम् आ॒रे अंह

Halfverse: b    आ॒रे विश्वां॑ दुर्म॒तिं यन्नि॒पासि॑ ।
   आ॒रे विश्वा॑म् दुर्म॒तिम् यत् नि॒पासि ।
   आ॒रे विश्वां दुर्म॒तिं यन् नि॒पासि ।

Halfverse: c    दो॒षा शि॒वः स॑हसः सूनो अग्ने॒ यं दे॒व आ चि॒त्सच॑से स्व॒स्ति ।।
   दो॒षा शि॒वः स॑हसः सूनो अग्ने
   दो॒षा शि॒वः स॑हसः सूनो अग्ने
   दो॒षा शि॒वः स॑हसः सूनो अग्ने

Halfverse: d    यं दे॒व आ चि॒त्सच॑से स्व॒स्ति ।।
   यम् दे॒वः आ चि॑त् सच॑से स्व॒स्ति ।।
   यं दे॒व आ चि॑त् सच॑से सुअ॒स्ति ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.