TITUS Texts: Rg-Veda: Rg-Veda-Samhita

TITUS
Rg-Veda: Rg-Veda-Samhita
Part No. 421

Hymn: 67_(421)
Verse: 1
Halfverse: a    बळि॒त्था दे॑व निष्कृ॒तमादि॑त्या यज॒तम्बृ॒हत् ।
   बळि॒त्था दे॑व निष्कृ॒तम्
   बट् इ॒त्था दे॑वा निष्कृ॒तम्
   बळ् इ॒त्था दे॑व निष्कृ॒तम्

Halfverse: b    आदि॑त्या यज॒तम्बृ॒हत् ।
   आदि॑त्या यज॒तम् बृ॒हत् ।
   आदि॑त्या यज॒तम् बृ॒हत् ।

Halfverse: c    वरु॑ण॒ मित्रार्य॑म॒न्वर्षि॑ष्ठं क्ष॒त्रमा॑शाथे ।।
   वरु॑ण॒ मित्रार्य॑मन्
   वरु॑ण मित्र अर्य॑मन्
   वरु॑ण मित्र अर्य॑मन्

Halfverse: d    वर्षि॑ष्ठं क्ष॒त्रमा॑शाथे ।।
   वर्षि॑ष्ठम् क्ष॒त्रम् आशाथे ।।
   वर्षि॑ष्ठं क्ष॒त्रम् आशथे % ।।

Verse: 2
Halfverse: a    आ यद्योनिं॑ हिर॒ण्ययं॒ वरु॑ण॒ मित्र॒ सद॑थः ।
   आ यद्योनिं॑ हिर॒ण्ययं
   आ यत् योनि॑म् हिर॒ण्यय॑म्
   आ यद् योनिं हिर॒ण्ययं

Halfverse: b    वरु॑ण॒ मित्र॒ सद॑थः ।
   वरु॑ण मित्र सद॑थः ।
   वरु॑ण मित्र सद॑थः ।

Halfverse: c    ध॒र्तारा॑ चर्षणी॒नां य॒न्तं सु॒म्नं रि॑शादसा ।।
   ध॒र्तारा॑ चर्षणी॒नां
   ध॒र्तारा चर्षणी॒नाम्
   ध॒र्तारा चर्षणी॒नाअं

Halfverse: d    य॒न्तं सु॒म्नं रि॑शादसा ।।
   य॒न्तम् सु॒म्नम् रिशादसा ।।
   य॒न्तं सु॒म्नं रि॑शादसा ।।

Verse: 3
Halfverse: a    विश्वे॒ हि वि॒श्ववे॑दसो॒ वरु॑णो मि॒त्रो अ॑र्य॒मा ।
   विश्वे॒ हि वि॒श्ववे॑दसो
   विश्वे हि वि॒श्ववे॑दसः
   विश्वे हि वि॒श्ववे॑दसो

Halfverse: b    वरु॑णो मि॒त्रो अ॑र्य॒मा ।
   वरु॑णः मि॒त्रः अ॑र्य॒मा ।
   वरु॑णो मि॒त्रो अ॑र्य॒मा ।

Halfverse: c    व्र॒ता प॒देव॑ सश्चिरे॒ पान्ति॒ मर्त्यं॑ रि॒षः ।।
   व्र॒ता प॒देव॑ सश्चिरे
   व्र॒ता प॒दा इ॑व सश्चिरे
   व्र॒ता प॒देव सश्चिरे

Halfverse: d    पान्ति॒ मर्त्यं॑ रि॒षः ।।
   पान्ति मर्त्य॑म् रि॒षः ।।
   पाअन्ति मर्ति॑यं रि॒षः ।।

Verse: 4
Halfverse: a    ते हि स॒त्या ऋ॑त॒स्पृश॑ ऋ॒तावा॑नो॒ जने॑जने ।
   ते हि स॒त्या ऋ॑त॒स्पृश
   ते हि स॒त्याः ऋ॑त॒स्पृशः
   ते हि स॒त्या ऋ॑त॒स्पृश

Halfverse: b    ऋ॒तावा॑नो॒ जने॑जने ।
   ऋ॒तावा॑नः जने॑जने ।
   ऋ॒तावा॑नो जने॑जने ।

Halfverse: c    सु॑नी॒थासः॑ सु॒दान॑वो ऽँ॒होश्चि॑दुरु॒चक्र॑यः ।।
   सु॑नी॒थासः॑ सु॒दान॑वो
   सुनी॒थासः सु॒दान॑वः
   सुनी॒थासः सु॒दान॑वो

Halfverse: d    ऽँ॒होश्चि॑दुरु॒चक्र॑यः ।।
   अं॒होः चि॑त् उरु॒चक्र॑यः ।।
   अं॒होश् चिद् उरु॒चक्र॑यः ।।

Verse: 5
Halfverse: a    को नु वा॑म्मि॒त्रास्तु॑तो॒ वरु॑णो वा त॒नूना॑म् ।
   को नु वा॑म्मि॒त्रास्तु॑तो
   कः नु वा॑म् मित्र अस्तु॑तः
   को नु वा॑म् मित्र अस्तु॑तो

Halfverse: b    वरु॑णो वा त॒नूना॑म् ।
   वरु॑णः वा त॒नूना॑म् ।
   वरु॑णो वा त॒नूनाअ॑म् ।

Halfverse: c    तत्सु वा॒मेष॑ते म॒तिरत्रि॑भ्य॒ एष॑ते म॒तिः ।।
   तत्सु वा॒मेष॑ते म॒तिर्
   तत् सु वा॑म् आ ई॑षते म॒तिः
   तत् सु वा॑म् एष॑ते म॒तिर्

Halfverse: d    अत्रि॑भ्य॒ एष॑ते म॒तिः ।।
   अत्रि॑भ्यः आ ई॑षते म॒तिः ।।
   अत्रि॑भ्य एष॑ते म॒तिः ।।

This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.