TITUS
Rg-Veda: Rg-Veda-Samhita
Part No. 427
Previous part

Hymn: 73_(427) 
Verse: 1 
Halfverse: a    यद॒द्य स्थः प॑रा॒वति॒ यद॑र्वा॒वत्य॑श्विना ।
   यद॒द्य स्थः प॑रा॒वति
   यत् अ॒द्य स्थः प॑रा॒वति
   यद् अ॒द्य स्थः प॑रा॒वति

Halfverse: b    यद॑र्वा॒वत्य॑श्विना ।
   यत् अर्वा॒वति अश्विना ।
   यद् अर्वा॒वति अश्विना ।

Halfverse: c    यद्वा॑ पु॒रू पु॑रुभुजा॒ यद॒न्तरि॑क्ष॒ आ ग॑तम् ।।
   यद्वा॑ पु॒रू पु॑रुभुजा
   यत् वा पु॒रु+ पु॑रुभुजा
   यद् वा पु॒रू पु॑रुभुजा

Halfverse: d    यद॒न्तरि॑क्ष॒ आ ग॑तम् ।।
   यत् अ॒न्तरि॑क्षे आ ग॑तम् ।।
   यद् अ॒न्तरि॑क्ष आ ग॑तम् ।।


Verse: 2 
Halfverse: a    इ॒ह त्या पु॑रु॒भूत॑मा पु॒रू दँसाँ॑सि॒ बिभ्र॑ता ।
   इ॒ह त्या पु॑रु॒भूत॑मा
   इ॒ह त्या पु॑रु॒भूत॑मा
   इ॒ह त्या पु॑रु॒भूत॑मा

Halfverse: b    पु॒रू दँसाँ॑सि॒ बिभ्र॑ता ।
   पु॒रु+ दंसां॑सि बिभ्र॑ता ।
   पु॒रू दंसां॑सि बिभ्र॑ता ।

Halfverse: c    व॑र॒स्या या॒म्यध्रि॑गू हु॒वे तु॒विष्ट॑मा भु॒जे ।।
   व॑र॒स्या या॒म्यध्रि॑गू
   वर॒स्या या॑मि अध्रि॑गू
   वर॒स्या या॑मि अध्रि॑गू

Halfverse: d    हु॒वे तु॒विष्ट॑मा भु॒जे ।।
   हु॒वे तु॒विष्ट॑मा भु॒जे ।।
   हु॒वे तु॒विष्ट॑मा भु॒जे ।।


Verse: 3 
Halfverse: a    ई॒र्मान्यद्वपु॑षे॒ वपु॑श्च॒क्रं रथ॑स्य येमथुः ।
   ई॒र्मान्यद्वपु॑षे॒ वपु॑श्
   ई॒र्मा अ॒न्यत् वपु॑षे वपुः
   ई॒र्मान्यद् वपु॑षे वपु॑श्

Halfverse: b    च॒क्रं रथ॑स्य येमथुः ।
   च॒क्रम् रथ॑स्य येमथुः ।
   च॒क्रं रथ॑स्य येमथुः ।

Halfverse: c    पर्य॒न्या नाहु॑षा यु॒गा म॒ह्ना रजाँ॑सि दीयथः ।।
   पर्य॒न्या नाहु॑षा यु॒गा
   परि अ॒न्या नाहु॑षा यु॒गा
   पर्य् अ॒न्या नाहु॑षा यु॒गा

Halfverse: d    म॒ह्ना रजाँ॑सि दीयथः ।।
   म॒ह्ना रजां॑सि दीयथः ।।
   म॒ह्ना रजां॑सि दीयथः ।।


Verse: 4 
Halfverse: a    तदू॒ षु वा॑मे॒ना कृ॒तं विश्वा॒ यद्वा॒मनु॒ ष्टवे॑ ।
   तदू॒ षु वा॑मे॒ना कृ॒तं
   तत् उ+ सु वा॑म् ए॒ना कृ॒तम्
   तद् ऊ षु वा॑म् ए॒ना कृ॒तं

Halfverse: b    विश्वा॒ यद्वा॒मनु॒ ष्टवे॑ ।
   विश्वा यत् वाम् अनु स्तवे ।
   विश्वा यद् वाम् अनु ष्टवे ।

Halfverse: c    नाना॑ जा॒ताव॑रे॒पसा॒ सम॒स्मे बन्धु॒मेय॑थुः ।।
   नाना॑ जा॒ताव॑रे॒पसा
   नाना जा॒तौ अ॑रे॒पसा
   नाना जा॒ताव् अरे॒पसा

Halfverse: d    सम॒स्मे बन्धु॒मेय॑थुः ।।
   सम् अ॒स्मे बन्धु॑म् आ ई॑यथुः ।।
   सम् अ॒स्मे बन्धु॑म् एय॑थुः ।।


Verse: 5 
Halfverse: a    आ यद्वां॑ सू॒र्या रथं॒ तिष्ठ॑द्रघु॒ष्यदं॒ सदा॑ ।
   आ यद्वां॑ सू॒र्या रथं
   आ यत् वाम् सू॒र्या रथ॑म्
   आ यद् वां सूरि॒या रथं

Halfverse: b    तिष्ठ॑द्रघु॒ष्यदं॒ सदा॑ ।
   तिष्ठ॑त् रघु॒ष्यद॑म् सदा ।
   तिष्ठ॑द् रघु॒ष्यदं सदा ।

Halfverse: c    परि॑ वामरु॒षा वयो॑ घृ॒णा व॑रन्त आ॒तपः॑ ।।
   परि॑ वामरु॒षा वयो
   परि वाम् अरु॒षाः वयः
   परि वाम् अरु॒षा वयो

Halfverse: d    घृ॒णा व॑रन्त आ॒तपः॑ ।।
   घृ॒णाः ! व॑रन्ते आ॒तपः ।।
   घृ॒णा व॑रन्त आ॒तपः ।।


Verse: 6 
Halfverse: a    यु॒वोरत्रि॑श्चिकेतति॒ नरा॑ सु॒म्नेन॒ चेत॑सा ।
   यु॒वोरत्रि॑श्चिकेतति
   यु॒वोः अत्रिः चिकेतति
   यु॒वोर् अत्रि॑श् चिकेतति

Halfverse: b    नरा॑ सु॒म्नेन॒ चेत॑सा ।
   नरा सु॒म्नेन चेत॑सा ।
   नरा सु॒म्नेन चेत॑सा ।

Halfverse: c    घ॒र्मं यद्वा॑मरे॒पसं॒ नास॑त्या॒स्ना भु॑र॒ण्यति॑ ।।
   घ॒र्मं यद्वा॑मरे॒पसं
   घ॒र्मम् यत् वाम् अरे॒पस॑म्
   घ॒र्मं यद् वाम् अरे॒पसं

Halfverse: d    नास॑त्या॒स्ना भु॑र॒ण्यति॑ ।।
   नास॑त्या आ॒स्ना भु॑र॒ण्यति ।।
   नास॑त्या॒स्ना भु॑र॒ण्यति ।।


Verse: 7 
Halfverse: a    उ॒ग्रो वां॑ ककु॒हो य॒यिः शृ॒ण्वे यामे॑षु संत॒निः ।
   उ॒ग्रो वां॑ ककु॒हो य॒यिः
   उ॒ग्रः वा॑म् ककु॒हः य॒यिः
   उ॒ग्रो वां ककु॒हो य॒यिः

Halfverse: b    शृ॒ण्वे यामे॑षु संत॒निः ।
   शृ॒ण्वे यामे॑षु संत॒निः ।
   शृ॒ण्वे यामे॑षु संत॒निः ।

Halfverse: c    यद्वां॒ दँसो॑भिरश्वि॒नात्रि॑र्नराव॒वर्त॑ति ।।
   यद्वां॒ दँसो॑भिरश्विना
   यत् वाम् दंसो॑भिः अश्विना
   यद् वां दंसो॑भिर् अश्विना

Halfverse: d     अत्रि॑र्नराव॒वर्त॑ति ।।
   अत्रिः नरा आव॒वर्त॑ति ।।
   अत्रि॑र् नराव॒वर्त॑ति ।।


Verse: 8 
Halfverse: a    मध्व॑ ऊ॒ षु म॑धूयुवा॒ रुद्रा॒ सिष॑क्ति पि॒प्युषी॑ ।
   मध्व॑ ऊ॒ षु म॑धूयुवा
   मध्वः उ+ सु म॑धूयुवा
   मध्व ऊ षु म॑धूयुवा

Halfverse: b    रुद्रा॒ सिष॑क्ति पि॒प्युषी॑ ।
   रुद्रा सिष॑क्ति पि॒प्युषी ।
   रुद्रा सिष॑क्ति पि॒प्युषी ।

Halfverse: c    यत्स॑मु॒द्राति॒ पर्ष॑थः प॒क्वाः पृक्षो॑ भरन्त वाम् ।।
   यत्स॑मु॒द्राति॒ पर्ष॑थः
   यत् समु॒द्रा अति पर्ष॑थः
   यत् समु॒द्राति पर्ष॑थः

Halfverse: d    प॒क्वाः पृक्षो॑ भरन्त वाम् ।।
   प॒क्वाः पृक्षः भरन्त वाम् ।।
   प॒क्वाः पृक्षो भरन्त वाम् ।।


Verse: 9 
Halfverse: a    स॒त्यमिद्वा उ॑ अश्विना यु॒वामा॑हुर्मयो॒भुवा॑ ।
   स॒त्यमिद्वा उ॑ अश्विना
   स॒त्यम् इत् वै उ अश्विना
   स॒त्यम् इद् वा उ अश्विना

Halfverse: b    यु॒वामा॑हुर्मयो॒भुवा॑ ।
   यु॒वाम् आहुः मयो॒भुवा ।
   यु॒वाम् आहुर् मयो॒भुवा ।

Halfverse: c    ता याम॑न्याम॒हूत॑मा॒ याम॒न्ना मृ॑ळ॒यत्त॑मा ।।
   ता याम॑न्याम॒हूत॑मा
   ता याम॑न् याम॒हूत॑मा
   ता याम॑न् याम॒हूत॑मा

Halfverse: d    याम॒न्ना मृ॑ळ॒यत्त॑मा ।।
   याम॑न् आ मृ॑ळ॒यत्त॑मा ।।
   याम॑न्न् आ मृ॑ळ॒यत्त॑मा ।।


Verse: 10 
Halfverse: a    इ॒मा ब्रह्मा॑णि॒ वर्ध॑ना॒श्विभ्यां॑ सन्तु॒ शंत॑मा ।
   इ॒मा ब्रह्मा॑णि॒ वर्ध॑ना
   इ॒मा ब्रह्मा॑णि वर्ध॑ना
   इ॒मा ब्रह्मा॑णि वर्ध॑ना

Halfverse: b     अ॒श्विभ्यां॑ सन्तु॒ शंत॑मा ।
   अ॒श्विभ्या॑म् सन्तु शंत॑मा ।
   अ॒श्विभ्यां सन्तु शंत॑मा ।

Halfverse: c    या तक्षा॑म॒ रथाँ॑ इ॒वावो॑चाम बृ॒हन्नमः॑ ।।
   या तक्षा॑म॒ रथाँ॑ इव
   या तक्षा॑म रथा॑न् इव
   या तक्षा॑म रथाँ इव

Halfverse: d     अवो॑चाम बृ॒हन्नमः॑ ।।
   अवो॑चाम बृ॒हत् नमः ।।
   अवो॑चाम बृ॒हन् नमः ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.