TITUS Texts: Rg-Veda: Rg-Veda-Samhita

TITUS
Rg-Veda: Rg-Veda-Samhita
Part No. 432

Hymn: 78_(432)
Verse: 1
Halfverse: a    अश्वि॑ना॒वेह ग॑छतं॒ नास॑त्या॒ मा वि वे॑नतम् ।
   अश्वि॑ना॒वेह ग॑छतं
   अश्वि॑नौ आ इ॒ह ग॑छतम्
   अश्वि॑नाव् एह ग॑छतं

Halfverse: b    नास॑त्या॒ मा वि वे॑नतम् ।
   नास॑त्या मा वि वे॑नतम् ।
   नास॑त्या मा वि वे॑नतम् ।

Halfverse: c    हँ॒सावि॑व पतत॒मा सु॒ताँ उप॑ ।।
   हँ॒सावि॑व पतत॒मा सु॒ताँ उप॑ ।।
   हं॒सौ इ॑व पततम् आ सु॒तान् उप ।।
   हं॒साव् इव पततम् आ सु॒ताँ उप ।।

Verse: 2
Halfverse: a    अश्वि॑ना हरि॒णावि॑व गौ॒रावि॒वानु॒ यव॑सम् ।
   अश्वि॑ना हरि॒णावि॑व
   अश्वि॑ना हरि॒णौ इ॑व
   अश्वि॑ना हरि॒णाव् इव

Halfverse: b    गौ॒रावि॒वानु॒ यव॑सम् ।
   गौ॒रौ इ॑व अनु यव॑सम् ।
   गौ॒राव् इ॒वानु यव॑सम् ।

Halfverse: c    हँ॒सावि॑व पतत॒मा सु॒ताँ उप॑ ।।
   हँ॒सावि॑व पतत॒मा सु॒ताँ उप॑ ।।
   हं॒सौ इ॑व पततम् आ सु॒तान् उप ।।
   हं॒साव् इव पततम् आ सु॒ताँ उप ।।

Verse: 3
Halfverse: a    अश्वि॑ना वाजिनीवसू जु॒षेथां॑ य॒ज्ञमि॒ष्टये॑ ।
   अश्वि॑ना वाजिनीवसू
   अश्वि॑ना वाजिनीवसू
   अश्वि॑ना वाजिनीवसू

Halfverse: b    जु॒षेथां॑ य॒ज्ञमि॒ष्टये॑ ।
   जु॒षेथा॑म् य॒ज्ञम् इ॒ष्टये ।
   जु॒षेथां य॒ज्ञम् इ॒ष्टये ।

Halfverse: c    हँ॒सावि॑व पतत॒मा सु॒ताँ उप॑ ।।
   हँ॒सावि॑व पतत॒मा सु॒ताँ उप॑ ।।
   हं॒सौ इ॑व पततम् आ सु॒तान् उप ।।
   हं॒साव् इव पततम् आ सु॒ताँ उप ।।

Verse: 4
Halfverse: a    अत्रि॒र्यद्वा॑मव॒रोह॑न्नृ॒बीस॒मजो॑हवी॒न्नाध॑मानेव॒ योषा॑ ।
   अत्रि॒र्यद्वा॑मव॒रोह॑न्नृ॒बीस॑म्
   अत्रिः यत् वाम् अव॒रोह॑न् ऋ॒बीस॑म्
   अत्रि॑र् यद् वाम् अव॒रोह॑न्न् ऋ॒बीस॑म्

Halfverse: b    अजो॑हवी॒न्नाध॑मानेव॒ योषा॑ ।
   अजो॑हवीत् नाध॑माना इव योषा ।
   अजो॑हवीन् नाध॑मानेव योषा ।

Halfverse: c    श्ये॒नस्य॑ चि॒ज्जव॑सा॒ नूत॑ने॒नाग॑छतमश्विना॒ शंत॑मेन ।।
   श्ये॒नस्य॑ चि॒ज्जव॑सा॒ नूत॑नेन
   श्ये॒नस्य चित् जव॑सा नूत॑नेन
   श्ये॒नस्य चिज् जव॑सा नूत॑नेन

Halfverse: d     आग॑छतमश्विना॒ शंत॑मेन ।।
   आ अ॑गछतम् अश्विना शंत॑मेन ।।
   अग॑छतम् अश्विना शंत॑मेन ।।

Verse: 5
Halfverse: a    वि जि॑हीष्व वनस्पते॒ योनिः॒ सूष्य॑न्त्या इव ।
   वि जि॑हीष्व वनस्पते
   वि जि॑हीष्व वनस्पते
   वि जि॑हीष्व वनस्पते

Halfverse: b    योनिः॒ सूष्य॑न्त्या इव ।
   योनिः सूष्य॑न्त्याः इव ।
   योनिः सूष्य॑न्तिया इव ।

Halfverse: c    श्रु॒तम्मे॑ अश्विना॒ हवं॑ स॒प्तव॑ध्रिं च मुञ्चतम् ।।
   श्रु॒तम्मे॑ अश्विना॒ हवं
   श्रु॒तम् मे अश्विना हव॑म्
   श्रु॒तम् मे अश्विना हवं

Halfverse: d    स॒प्तव॑ध्रिं च मुञ्चतम् ।।
   स॒प्तव॑ध्रिम् च मुञ्चतम् ।।
   स॒प्तव॑ध्रिं च मुञ्चतम् ।।

Verse: 6
Halfverse: a    भी॒ताय॒ नाध॑मानाय॒ ऋष॑ये स॒प्तव॑ध्रये ।
   भी॒ताय॒ नाध॑मानाय
   भी॒ताय नाध॑मानाय
   भी॒ताय नाध॑मानाय

Halfverse: b    ऋष॑ये स॒प्तव॑ध्रये ।
   ऋष॑ये स॒प्तव॑ध्रये ।
   ऋष॑ये स॒प्तव॑ध्रये ।

Halfverse: c    मा॒याभि॑रश्विना यु॒वं वृ॒क्षं सं च॒ वि चा॑चथः ।।
   मा॒याभि॑रश्विना यु॒वं
   मा॒याभिः अश्विना यु॒वम्
   मा॒याभि॑र् अश्विना यु॒वं

Halfverse: d    वृ॒क्षं सं च॒ वि चा॑चथः ।।
   वृ॒क्षम् सम् च वि च अचथः ।।
   वृ॒क्षं सं च वि चा॑चथः ।।

Verse: 7
Halfverse: a    यथा॒ वातः॑ पुष्क॒रिणीं॑ समि॒ङ्गय॑ति स॒र्वतः॑ ।
   यथा॒ वातः॑ पुष्क॒रिणीं
   यथा वातः पुष्क॒रिणी॑म्
   यथा वातः पुष्क॒रिणीं

Halfverse: b    समि॒ङ्गय॑ति स॒र्वतः॑ ।
   स॑मि॒ङ्गय॑ति स॒र्वतः ।
   स॑मि॒ङ्गय॑ति स॒र्वतः ।

Halfverse: c    ए॒वा ते॒ गर्भ॑ एजतु नि॒रैतु॒ दश॑मास्यः ।।
   ए॒वा ते॒ गर्भ॑ एजतु
   ए॒व+ ते गर्भः एजतु
   ए॒वा ते गर्भ एजतु

Halfverse: d    नि॒रैतु॒ दश॑मास्यः ।।
   नि॒रैतु दश॑मास्यः ।।
   नि॒रैतु दश॑मासियः ।।

Verse: 8
Halfverse: a    यथा॒ वातो॒ यथा॒ वनं॒ यथा॑ समु॒द्र एज॑ति ।
   यथा॒ वातो॒ यथा॒ वनं
   यथा वातः यथा वन॑म्
   यथा वातो यथा वनं

Halfverse: b    यथा॑ समु॒द्र एज॑ति ।
   यथा समु॒द्रः एज॑ति ।
   यथा समु॒द्र एज॑ति ।

Halfverse: c    ए॒वा त्वं द॑शमास्य स॒हावे॑हि ज॒रायु॑णा ।।
   ए॒वा त्वं द॑शमास्य
   ए॒व+ त्वम् दशमास्य
   ए॒वा त्वं द॑शमासिय

Halfverse: d    स॒हावे॑हि ज॒रायु॑णा ।।
   स॒ह अव इहि ज॒रायु॑णा ।।
   स॒हावे॑हि ज॒रायु॑णा ।।

Verse: 9
Halfverse: a    दश॒ मासा॑ञ्छशया॒नः कु॑मा॒रो अधि॑ मा॒तरि॑ ।
   दश॒ मासा॑ञ्छशया॒नः
   दश मासा॑न् शशया॒नः
   दश मासा॑ञ् छशया॒नः

Halfverse: b    कु॑मा॒रो अधि॑ मा॒तरि॑ ।
   कु॑मा॒रः अधि मा॒तरि ।
   कु॑मा॒रो अधि मा॒तरि ।

Halfverse: c    नि॒रैतु॑ जी॒वो अक्ष॑तो जी॒वो जीव॑न्त्या॒ अधि॑ ।।
   नि॒रैतु॑ जी॒वो अक्ष॑तो
   नि॒रैतु जी॒वः अक्ष॑तः
   नि॒रैतु जी॒वो अक्ष॑तो

Halfverse: d    जी॒वो जीव॑न्त्या॒ अधि॑ ।।
   जी॒वः जीव॑न्त्याः अधि ।।
   जी॒वो जीव॑न्तिया अधि ।।

This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.