TITUS
Rg-Veda: Rg-Veda-Samhita
Part No. 493
Previous part

Hymn: 52_(493) 
Verse: 1 
Halfverse: a    न तद्दि॒वा न पृ॑थि॒व्यानु॑ मन्ये॒ न य॒ज्ञेन॒ नोत शमी॑भिरा॒भिः ।
   न तद्दि॒वा न पृ॑थि॒व्यानु॑ मन्ये
   न तत् दि॒वा न पृ॑थि॒व्या अनु मन्ये
   न तद् दि॒वा न पृ॑थि॒व्यानु मन्ये

Halfverse: b    न य॒ज्ञेन॒ नोत शमी॑भिरा॒भिः ।
   न य॒ज्ञेन न उ॒त शमी॑भिः आ॒भिः ।
   न य॒ज्ञेन नोत शमी॑भिर् आ॒भिः ।

Halfverse: c    उ॒ब्जन्तु॒ तं सु॒भ्वः॒ पर्व॑तासो॒ नि ही॑यतामतिया॒जस्य॑ य॒ष्टा ।।
   उ॒ब्जन्तु॒ तं सु॒भ्वः॒ पर्व॑तासो
   उ॒ब्जन्तु तम् सु॒भ्वः पर्व॑तासः
   उ॒ब्जन्तु तं सु॒भुवः पर्व॑तासो

Halfverse: d    नि ही॑यतामतिया॒जस्य॑ य॒ष्टा ।।
   नि ही॑यताम् अतिया॒जस्य य॒ष्टा ।।
   नि ही॑यताम् अतिया॒जस्य य॒ष्टा ।।


Verse: 2 
Halfverse: a    अति॑ वा॒ यो म॑रुतो॒ मन्य॑ते नो॒ ब्रह्म॑ वा॒ यः क्रि॒यमा॑णं॒ निनि॑त्सात् ।
   अति॑ वा॒ यो म॑रुतो॒ मन्य॑ते नो
   अति वा यः म॑रुतः मन्य॑ते नः
   अति वा यो म॑रुतो मन्य॑ते नो

Halfverse: b    ब्रह्म॑ वा॒ यः क्रि॒यमा॑णं॒ निनि॑त्सात् ।
   ब्रह्म वा यः क्रि॒यमा॑णम् निनि॑त्सात् ।
   ब्रह्म वा यः क्रि॒यमा॑णं निनि॑त्सात् ।

Halfverse: c    तपूं॑षि॒ तस्मै॑ वृजि॒नानि॑ सन्तु ब्रह्म॒द्विष॑म॒भि तं शो॑चतु॒ द्यौः ।।
   तपूं॑षि॒ तस्मै॑ वृजि॒नानि॑ सन्तु
   तपूं॑षि तस्मै वृजि॒नानि सन्तु
   तपूं॑षि तस्मै वृजि॒नानि सन्तु

Halfverse: d    ब्रह्म॒द्विष॑म॒भि तं शो॑चतु॒ द्यौः ।।
   ब्र॑ह्म॒द्विष॑म् अ॒भि तम् शोचतु द्यौः ।।
   ब्र॑ह्म॒द्विष॑म् अ॒भि तं शो॑चतु द्यौः ।।


Verse: 3 
Halfverse: a    किम॒ङ्ग त्वा॒ ब्रह्म॑णः सोम गो॒पां किम॒ङ्ग त्वा॑हुरभिशस्ति॒पां नः॑ ।
   किम॒ङ्ग त्वा॒ ब्रह्म॑णः सोम गो॒पां
   किम् अ॒ङ्ग त्वा ब्रह्म॑णः सोम गो॒पाम्
   किम् अ॒ङ्ग त्वा ब्रह्म॑णः सोम गो॒पां

Halfverse: b    किम॒ङ्ग त्वा॑हुरभिशस्ति॒पां नः॑ ।
   किम् अ॒ङ्ग त्वा आहुः अभिशस्ति॒पाम् नः ।
   किम् अ॒ङ्ग त्वा॑हुर् अभिशस्ति॒पां नः ।

Halfverse: c    किम॒ङ्ग नः॑ पश्यसि नि॒द्यमा॑नान्ब्रह्म॒द्विषे॒ तपु॑षिं हे॒तिम॑स्य ।।
   किम॒ङ्ग नः॑ पश्यसि नि॒द्यमा॑नान्
   किम् अ॒ङ्ग नः पश्यसि नि॒द्यमा॑नान्
   किम् अ॒ङ्ग नः पश्यसि नि॒द्यमा॑नान्

Halfverse: d    ब्रह्म॒द्विषे॒ तपु॑षिं हे॒तिम॑स्य ।।
   ब्र॑ह्म॒द्विषे तपु॑षिम् हे॒तिम् अस्य ।।
   ब्र॑ह्म॒द्विषे तपु॑षिं हे॒तिम् अस्य ।।


Verse: 4 
Halfverse: a    अव॑न्तु॒ मामु॒षसो॒ जाय॑माना॒ अव॑न्तु मा॒ सिन्ध॑वः॒ पिन्व॑मानाः ।
   अव॑न्तु॒ मामु॒षसो॒ जाय॑माना
   अव॑न्तु माम् उ॒षसः जाय॑मानाः
   अव॑न्तु माम् उ॒षसो जाय॑माना

Halfverse: b    अव॑न्तु मा॒ सिन्ध॑वः॒ पिन्व॑मानाः ।
   अव॑न्तु मा सिन्ध॑वः पिन्व॑मानाः ।
   अव॑न्तु मा सिन्ध॑वः पिन्व॑मानाः ।

Halfverse: c    अव॑न्तु मा॒ पर्व॑तासो ध्रु॒वासो ऽव॑न्तु मा पि॒तरो॑ दे॒वहू॑तौ ।।
   अव॑न्तु मा॒ पर्व॑तासो ध्रु॒वासो
   अव॑न्तु मा पर्व॑तासः ध्रु॒वासः
   अव॑न्तु मा पर्व॑तासो ध्रु॒वासो

Halfverse: d    ऽवन्तु मा पि॒तरो॑ दे॒वहू॑तौ ।।
   अव॑न्तु मा पि॒तरः दे॒वहू॑तौ ।।
   अव॑न्तु मा पि॒तरो दे॒वहू॑तौ ।।


Verse: 5 
Halfverse: a    वि॑श्व॒दानीं॑ सु॒मन॑सः स्याम॒ पश्ये॑म॒ नु सूर्य॑मु॒च्चर॑न्तम् ।
   वि॑श्व॒दानीं॑ सु॒मन॑सः स्याम
   विश्व॒दानी॑म् सु॒मन॑सः स्याम
   विश्व॒दानीं सु॒मन॑सः सियाम

Halfverse: b    पश्ये॑म॒ नु सूर्य॑मु॒च्चर॑न्तम् ।
   पश्ये॑म नु सूर्य॑म् उ॒च्चर॑न्तम् ।
   पश्ये॑म नु सूरि॑यम् उ॒च्चर॑न्तम् ।

Halfverse: c    तथा॑ कर॒द्वसु॑पति॒र्वसू॑नां दे॒वाँ ओहा॒नो ऽव॒साग॑मिष्ठः ।।
   तथा॑ कर॒द्वसु॑पति॒र्वसू॑नां
   तथा करत् वसु॑पतिः वसू॑नाम्
   तथा करद् वसु॑पतिर् वसू॑नां

Halfverse: d    दे॒वाँ ओहा॒नो ऽव॒साग॑मिष्ठः ।।
   दे॒वान् ओहा॑नः अव॑सा आग॑मिष्ठः ।।
   दे॒वाँ ओहा॑नो अव॒साग॑मिष्ठः ।।


Verse: 6 
Halfverse: a    इन्द्रो॒ नेदि॑ष्ठ॒मव॒साग॑मिष्ठः॒ सर॑स्वती॒ सिन्धु॑भिः॒ पिन्व॑माना ।
   इन्द्रो॒ नेदि॑ष्ठ॒मव॒साग॑मिष्ठः
   इन्द्रः नेदि॑ष्ठम् अव॑सा आग॑मिष्ठः
   इन्द्रो नेदि॑ष्ठम् अव॒साग॑मिष्ठः

Halfverse: b    सर॑स्वती॒ सिन्धु॑भिः॒ पिन्व॑माना ।
   सर॑स्वती सिन्धु॑भिः पिन्व॑माना ।
   सर॑स्वती सिन्धु॑भिः पिन्व॑माना ।

Halfverse: c    प॒र्जन्यो॑ न॒ ओष॑धीभिर्मयो॒भुर॒ग्निः सु॒शंसः॑ सु॒हवः॑ पि॒तेव॑ ।।
   प॒र्जन्यो॑ न॒ ओष॑धीभिर्मयो॒भुर्
   प॒र्जन्यः नः ओष॑धीभिः मयो॒भुः
   प॒र्जन्यो न ओष॑धीभिर् मयो॒भुर्

Halfverse: d    अ॒ग्निः सु॒शंसः॑ सु॒हवः॑ पि॒तेव॑ ।।
   अ॒ग्निः सु॒शंसः सु॒हवः पि॒ता इ॑व ।।
   अ॒ग्निः सु॒शंसः सु॒हवः पि॒तेव ।।


Verse: 7 
Halfverse: a    विश्वे॑ देवास॒ आ ग॑त शृणु॒ता म॑ इ॒मं हव॑म् ।
   विश्वे॑ देवास॒ आ ग॑त
   विश्वे देवासः आ ग॑त
   विश्वे देवास आ ग॑त

Halfverse: b    शृणु॒ता म॑ इ॒मं हव॑म् ।
   शृ॑णु॒त+ मे इ॒मम् हव॑म् ।
   शृ॑णु॒ता म इ॒मं हव॑म् ।

Halfverse: c    एदम्ब॒र्हिर्नि षी॑दत ।।
   एदम्ब॒र्हिर्नि षी॑दत ।।
   आ इ॒दम् ब॒र्हिः नि सी॑दत ।।
   एदम् ब॒र्हिर् नि षी॑दत ।।


Verse: 8 
Halfverse: a    यो वो॑ देवा घृ॒तस्नु॑ना ह॒व्येन॑ प्रति॒भूष॑ति ।
   यो वो॑ देवा घृ॒तस्नु॑ना
   यः वः देवाः घृ॒तस्नु॑ना
   यो वो देवा घृ॒तस्नु॑ना

Halfverse: b    ह॒व्येन॑ प्रति॒भूष॑ति ।
   ह॒व्येन प्रति॒भूष॑ति ।
   ह॒व्येन प्रति॒भूष॑ति ।

Halfverse: c    तं विश्व॒ उप॑ गछथ ।।
   तं विश्व॒ उप॑ गछथ ।।
   तम् विश्वे उप गछथ ।।
   तं विश्व उप गछथ ।।


Verse: 9 
Halfverse: a    उप॑ नः सू॒नवो॒ गिरः॑ शृ॒ण्वन्त्व॒मृत॑स्य॒ ये ।
   उप॑ नः सू॒नवो॒ गिरः
   उप नः सू॒नवः गिरः
   उप नः सू॒नवो गिरः

Halfverse: b    शृ॒ण्वन्त्व॒मृत॑स्य॒ ये ।
   शृ॒ण्वन्तु अ॒मृत॑स्य ये ।
   शृ॒ण्वन्तु अ॒मृत॑स्य ये ।

Halfverse: c    सु॑मृळी॒का भ॑वन्तु नः ।।
   सु॑मृळी॒का भ॑वन्तु नः ।।
   सु॑मृळी॒काः भ॑वन्तु नः ।।
   सु॑मृळी॒का भ॑वन्तु नः ।।


Verse: 10 
Halfverse: a    विश्वे॑ दे वाऋता॒वृध॑ ऋ॒तुभि॑र्हवन॒श्रुतः॑ ।
   विश्वे॑ दे॒वा ऋ॑ता॒वृध
   विश्वे दे॒वाः ऋ॑ता॒वृधः
   विश्वे दे॒वा ऋ॑ता॒वृध

Halfverse: b    ऋ॒तुभि॑र्हवन॒श्रुतः॑ ।
   ऋ॒तुभिः हवन॒श्रुतः ।
   ऋ॒तुभि॑र् हवन॒श्रुतः ।

Halfverse: c    जु॒षन्तां॒ युज्य॒म्पयः॑ ।।
   जु॒षन्तां॒ युज्य॒म्पयः॑ ।।
   जु॒षन्ता॑म् युज्य॑म् पयः ।।
   जु॒षन्तां युजि॑यम् पयः ।।


Verse: 11 
Halfverse: a    स्तो॒त्रमिन्द्रो॑ म॒रुद्ग॑ण॒स्त्वष्टृ॑मान्मि॒त्रो अ॑र्य॒मा ।
   स्तो॒त्रमिन्द्रो॑ म॒रुद्ग॑णस्
   स्तो॒त्रम् इन्द्रः म॒रुद्ग॑णः
   स्तो॒त्रम् इन्द्रो म॒रुद्ग॑णस्

Halfverse: b    त्वष्टृ॑मान्मि॒त्रो अ॑र्य॒मा ।
   त्वष्टृ॑मान् मि॒त्रः अ॑र्य॒मा ।
   त्वष्टृ॑मान् मि॒त्रो अ॑र्य॒मा ।

Halfverse: c    इ॒मा ह॒व्या जु॑षन्त नः ।।
   इ॒मा ह॒व्या जु॑षन्त नः ।।
   इ॒मा ह॒व्या जु॑षन्त नः ।।
   इ॒मा ह॒व्या जु॑षन्त नः ।।


Verse: 12 
Halfverse: a    इ॒मं नो॑ अग्ने अध्व॒रं होत॑र्वयुन॒शो य॑ज ।
   इ॒मं नो॑ अग्ने अध्व॒रं
   इ॒मम् नः अग्ने अध्व॒रम्
   इ॒मं नो अग्ने अध्व॒रं

Halfverse: b    होत॑र्वयुन॒शो य॑ज ।
   होत॑र् वयुन॒शः य॑ज ।
   होत॑र् वयुन॒शो य॑ज ।

Halfverse: c    चि॑कि॒त्वान्दैव्यं॒ जन॑म् ।।
   चि॑कि॒त्वान्दैव्यं॒ जन॑म् ।।
   चि॑कि॒त्वान् दैव्य॑म् जन॑म् ।।
   चि॑कि॒त्वान् दैवि॑यं जन॑म् ।।


Verse: 13 
Halfverse: a    विश्वे॑ देवाः शृणु॒तेमं हव॑म्मे॒ ये अ॒न्तरि॑क्षे॒ य उप॒ द्यवि॒ ष्ठ ।
   विश्वे॑ देवाः शृणु॒तेमं हव॑म्मे
   विश्वे देवाः शृणु॒त इ॒मम् हव॑म् मे
   विश्वे देवाः शृणु॒तेमं हव॑म् मे

Halfverse: b    ये अ॒न्तरि॑क्षे॒ य उप॒ द्यवि॒ ष्ठ ।
   ये अ॒न्तरि॑क्षे ये उप द्यवि स्थ ।
   ये अ॒न्तरि॑क्षे य उप द्यवि ष्ठ ।

Halfverse: c    ये अ॑ग्निजि॒ह्वा उ॒त वा॒ यज॑त्रा आ॒सद्या॒स्मिन्ब॒र्हिषि॑ मादयध्वम् ।।
   ये अ॑ग्निजि॒ह्वा उ॒त वा॒ यज॑त्रा
   ये अ॑ग्निजि॒ह्वाः उ॒त वा यज॑त्राः
   ये अ॑ग्निजि॒ह्वा उ॒त वा यज॑त्रा

Halfverse: d    आ॒सद्या॒स्मिन्ब॒र्हिषि॑ मादयध्वम् ।।
   आ॒सद्य अ॒स्मिन् ब॒र्हिषि मादयध्वम् ।।
   आ॒सद्या॒स्मिन् ब॒र्हिषि मादयध्वम् ।।


Verse: 14 
Halfverse: a    विश्वे॑ दे॒वा मम॑ शृण्वन्तु य॒ज्ञिया॑ उ॒भे रोद॑सी अ॒पां नपा॑च्च॒ मन्म॑ ।
   विश्वे॑ दे॒वा मम॑ शृण्वन्तु य॒ज्ञिया
   विश्वे दे॒वाः मम शृण्वन्तु य॒ज्ञियाः
   विश्वे दे॒वा मम शृण्वन्तु य॒ज्ञिया

Halfverse: b    उ॒भे रोद॑सी अ॒पां नपा॑च्च॒ मन्म॑ ।
   उ॒भे रोद॑सी अ॒पाम् नपा॑त् च मन्म ।
   उ॒भे रोद॑सी अ॒पां नपा॑च् च मन्म ।

Halfverse: c    मा वो॒ वचां॑सि परि॒चक्ष्या॑णि वोचं सु॒म्नेष्विद्वो॒ अन्त॑मा मदेम ।।
   मा वो॒ वचां॑सि परि॒चक्ष्या॑णि वोचं
   मा वः वचां॑सि परि॒चक्ष्या॑णि वोचम्
   मा वो वचां॑सि परि॒चक्ष्या॑णि वोचं

Halfverse: d    सु॒म्नेष्विद्वो॒ अन्त॑मा मदेम ।।
   सु॒म्नेषु इत् वः अन्त॑माः मदेम ।।
   सु॒म्नेषु इद् वो अन्त॑मा मदेम ।।


Verse: 15 
Halfverse: a    ये के च॒ ज्मा म॒हिनो॒ अहि॑माया दि॒वो ज॑ज्ञि॒रे अ॒पां स॒धस्थे॑ ।
   ये के च॒ ज्मा म॒हिनो॒ अहि॑माया
   ये के च ज्मा म॒हिनः अहि॑मायाः
   ये के च ज्मा म॒हिनो अहि॑माया

Halfverse: b    दि॒वो ज॑ज्ञि॒रे अ॒पां स॒धस्थे॑ ।
   दि॒वः ज॑ज्ञि॒रे अ॒पाम् स॒धस्थे ।
   दि॒वो ज॑ज्ञि॒रे अ॒पाअं स॒धस्थे ।

Halfverse: c    ते अ॒स्मभ्य॑मि॒षये॒ विश्व॒मायुः॒ क्षप॑ उ॒स्रा व॑रिवस्यन्तु दे॒वाः ।।
   ते अ॒स्मभ्य॑मि॒षये॒ विश्व॒मायुः
   ते अ॒स्मभ्य॑म् इ॒षये विश्व॑म् आयुः
   ते अ॒स्मभ्य॑म् इ॒षये विश्व॑म् आयुः

Halfverse: d    क्षप॑ उ॒स्रा व॑रिवस्यन्तु दे॒वाः ।।
   क्षपः उ॒स्राः व॑रिवस्यन्तु दे॒वाः ।।
   क्षप उ॒स्रा व॑रिवस्यन्तु दे॒वाः ।।


Verse: 16 
Halfverse: a    अग्नी॑पर्जन्या॒वव॑तं॒ धिय॑म्मे॒ ऽस्मिन्हवे॑ सुहवा सुष्टु॒तिं नः॑ ।
   अग्नी॑पर्जन्या॒वव॑तं॒ धिय॑म्मे
   अग्नी॑पर्जन्यौ अव॑तम् धिय॑म् मे
   अग्नी॑पर्जन्याव् अव॑तं धिय॑म् मे

Halfverse: b    ऽस्मिन्हवे॑ सुहवा सुष्टु॒तिं नः॑ ।
   अ॒स्मिन् हवे सुहवा सुष्टु॒तिम् नः ।
   अ॒स्मिन् हवे सुहवा सुष्टु॒तिं नः ।

Halfverse: c    इळा॑म॒न्यो ज॒नय॒द्गर्भ॑म॒न्यः प्र॒जाव॑ती॒रिष॒ आ ध॑त्तम॒स्मे ।।
   इळा॑म॒न्यो ज॒नय॒द्गर्भ॑म॒न्यः
   इळा॑म् अ॒न्यः ज॒नय॑त् गर्भ॑म् अ॒न्यः
   इळा॑म् अ॒न्यो ज॒नय॑द् गर्भ॑म् अ॒न्यः

Halfverse: d    प्र॒जाव॑ती॒रिष॒ आ ध॑त्तम॒स्मे ।।
   प्र॒जाव॑तीः इषः आ ध॑त्तम् अ॒स्मे ।।
   प्र॒जाव॑तीर् इष आ ध॑त्तम् अ॒स्मे ।।


Verse: 17 
Halfverse: a    स्ती॒र्णे ब॒र्हिषि॑ समिधा॒ने अ॒ग्नौ सू॒क्तेन॑ म॒हा नम॒सा वि॑वासे ।
   स्ती॒र्णे ब॒र्हिषि॑ समिधा॒ने अ॒ग्नौ
   स्ती॒र्णे ब॒र्हिषि समिधा॒ने अ॒ग्नौ
   स्ती॒र्णे ब॒र्हिषि समिधा॒ने अ॒ग्नौ

Halfverse: b    सू॒क्तेन॑ म॒हा नम॒सा वि॑वासे ।
   सू॒क्तेन म॒हा नम॑सा आ वि॑वासे ।
   सू॒क्तेन म॒हा नम॒सा वि॑वासे ।

Halfverse: c    अ॒स्मिन्नो॑ अ॒द्य वि॒दथे॑ यजत्रा॒ विश्वे॑ देवा ह॒विषि॑ मादयध्वम् ।।
   अ॒स्मिन्नो॑ अ॒द्य वि॒दथे॑ यजत्रा
   अ॒स्मिन् नः अ॒द्य वि॒दथे यजत्राः
   अ॒स्मिन् नो अ॒द्य वि॒दथे यजत्रा

Halfverse: d    विश्वे॑ देवा ह॒विषि॑ मादयध्वम् ।।
   विश्वे देवाः ह॒विषि मादयध्वम् ।।
   विश्वे देवा ह॒विषि मादयध्वम् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.