TITUS
Rg-Veda: Rg-Veda-Samhita
Part No. 492
Previous part

Hymn: 51_(492) 
Verse: 1 
Halfverse: a    उदु॒ त्यच्चक्षु॒र्महि॑ मि॒त्रयो॒राँ एति॑ प्रि॒यं वरु॑णयो॒रद॑ब्धम् ।
   उदु॒ त्यच्चक्षु॒र्महि॑ मि॒त्रयो॒राँ
   उत् उ त्यत् चक्षुः महि मि॒त्रयोः आ
   उद् उ त्यच् चक्षु॑र् महि मि॒त्रयो॑र् आँ

Halfverse: b    एति॑ प्रि॒यं वरु॑णयो॒रद॑ब्धम् ।
   एति प्रि॒यम् वरु॑णयोः अद॑ब्धम् ।
   एति प्रि॒यं वरु॑णयोर् अद॑ब्धम् ।

Halfverse: c    ऋ॒तस्य॒ शुचि॑ दर्श॒तमनी॑कं रु॒क्मो न दि॒व उदि॑ता॒ व्य॑द्यौत् ।।
   ऋ॒तस्य॒ शुचि॑ दर्श॒तमनी॑कं
   ऋ॒तस्य शुचि दर्श॒तम् अनी॑कम्
   ऋ॒तस्य शुचि दर्श॒तम् अनी॑कं

Halfverse: d    रु॒क्मो न दि॒व उदि॑ता॒ व्य॑द्यौत् ।।
   रु॒क्मः न दि॒वः उदि॑ता वि अ॑द्यौत् ।।
   रु॒क्मो न दि॒व उदि॑ता वि अ॑द्यौत् ।।


Verse: 2 
Halfverse: a    वेद॒ यस्त्रीणि॑ वि॒दथा॑न्येषां दे॒वानां॒ जन्म॑ सनु॒तरा च॒ विप्रः॑ ।
   वेद॒ यस्त्रीणि॑ वि॒दथा॑न्येषां
   वेद यः त्रीणि वि॒दथा॑नि एषाम्
   वेद यस् त्रीणि वि॒दथा॑नि एषां

Halfverse: b    दे॒वानां॒ जन्म॑ सनु॒तरा च॒ विप्रः॑ ।
   दे॒वाना॑म् जन्म सनु॒तर् आ च विप्रः ।
   दे॒वानां जन्म सनु॒तर् आ च विप्रः ।

Halfverse: c    ऋ॒जु मर्ते॑षु वृजि॒ना च॒ पश्य॑न्न॒भि च॑ष्टे॒ सूरो॑ अ॒र्य एवा॑न् ।।
   ऋ॒जु मर्ते॑षु वृजि॒ना च॒ पश्य॑न्न्
   ऋ॒जु मर्ते॑षु वृजि॒ना च पश्य॑न्
   ऋ॒जु मर्ते॑षु वृजि॒ना च पश्य॑न्न्

Halfverse: d    अ॒भि च॑ष्टे॒ सूरो॑ अ॒र्य एवा॑न् ।।
   अ॒भि च॑ष्टे सूरः अ॒र्यः एवा॑न् ।।
   अ॒भि च॑ष्टे ? सूरो अ॒र्य एवा॑न् ।।


Verse: 3 
Halfverse: a    स्तु॒ष उ॑ वो म॒ह ऋ॒तस्य॑ गो॒पानदि॑तिम्मि॒त्रं वरु॑णं सुजा॒तान् ।
   स्तु॒ष उ॑ वो म॒ह ऋ॒तस्य॑ गो॒पान्
   स्तु॒षे उ वः म॒हः ऋ॒तस्य गो॒पान्
   स्तु॒ष उ वो म॒ह ऋ॒तस्य गो॒पान्

Halfverse: b    अदि॑तिम्मि॒त्रं वरु॑णं सुजा॒तान् ।
   अदि॑तिम् मि॒त्रम् वरु॑णम् सुजा॒तान् ।
   अदि॑तिम् मि॒त्रं वरु॑णं सुजा॒तान् ।

Halfverse: c    अ॑र्य॒मण॒म्भग॒मद॑ब्धधीती॒नछा॑ वोचे सध॒न्यः॑ पाव॒कान् ।।
   अ॑र्य॒मण॒म्भग॒मद॑ब्धधीतीन्
   अर्य॒मण॑म् भग॑म् अद॑ब्धधीतीन्
   अर्य॒मण॑म् भग॑म् अद॑ब्धधीतीन्

Halfverse: d    अछा॑ वोचे सध॒न्यः॑ पाव॒कान् ।।
   अछ+ वोचे सध॒न्यः पाव॒कान् ।।
   अछा वोचे सध॒नियः पवा॒कान् ।।


Verse: 4 
Halfverse: a    रि॒शाद॑सः॒ सत्प॑तीँ॒रद॑ब्धान्म॒हो राज्ञः॑ सुवस॒नस्य॑ दा॒तॄन् ।
   रि॒शाद॑सः॒ सत्प॑तीँ॒रद॑ब्धान्
   रि॒शाद॑सः सत्प॑तीन् अद॑ब्धान्
   रि॒शाद॑सः ? सत्प॑तीँर् अद॑ब्धान्

Halfverse: b    म॒हो राज्ञः॑ सुवस॒नस्य॑ दा॒तॄन् ।
   म॒हः राज्ञः सुवस॒नस्य दा॒तॄन् ।
   म॒हो राज्ञः सुवस॒नस्य दा॒तॄन् ।

Halfverse: c    यूनः॑ सुक्ष॒त्रान्क्षय॑तो दि॒वो नॄना॑दि॒त्यान्या॒म्यदि॑तिं दुवो॒यु ।।
   यूनः॑ सुक्ष॒त्रान्क्षय॑तो दि॒वो नॄन्
   यूनः सुक्ष॒त्रान् क्षय॑तः दि॒वः नॄन्
   यूनः सुक्ष॒त्रान् क्षय॑तो दि॒वो नॄन्

Halfverse: d    आदि॒त्यान्या॒म्यदि॑तिं दुवो॒यु ।।
   आ॑दि॒त्यान् यामि अदि॑तिम् दुवो॒यु ।।
   आ॑दि॒त्यान् यामि अदि॑तिं दुवो॒यु ।।


Verse: 5 
Halfverse: a    द्यौ॒ष्पितः॒ पृथि॑वि॒ मात॒रध्रु॒गग्ने॑ भ्रातर्वसवो मृ॒ळता॑ नः ।
   द्यौ॒ष्पितः॒ पृथि॑वि॒ मात॒रध्रु॑ग्
   द्यौः पित॑र् पृथि॑वि मात॑र् अध्रु॑क्
   दियौ॑ष् पितः पृथि॑वि मात॑र् अध्रु॑ग्

Halfverse: b    अग्ने॑ भ्रातर्वसवो मृ॒ळता॑ नः ।
   अग्ने भ्रातर् वसवः मृ॒ळत+ नः ।
   अग्ने भ्रातर् वसवो मृ॒ळता नः ।

Halfverse: c    विश्व॑ आदित्या अदिते स॒जोषा॑ अ॒स्मभ्यं॒ शर्म॑ बहु॒लं वि य॑न्त ।।
   विश्व॑ आदित्या अदिते स॒जोषा
   विश्वे आदित्याः अदिते स॒जोषाः
   विश्व आदित्या अदिते स॒जोषा

Halfverse: d    अ॒स्मभ्यं॒ शर्म॑ बहु॒लं वि य॑न्त ।।
   अ॒स्मभ्य॑म् शर्म बहु॒लम् वि य॑न्त ।।
   अ॒स्मभ्यं शर्म बहु॒लं वि य॑न्त ।।


Verse: 6 
Halfverse: a    मा नो॒ वृका॑य वृ॒क्ये॑ समस्मा अघाय॒ते री॑रधता यजत्राः ।
   मा नो॒ वृका॑य वृ॒क्ये॑ समस्मा
   मा नः वृका॑य वृ॒क्ये समस्मै
   मा नो वृका॑य वृ॒किये समस्मा

Halfverse: b    अघाय॒ते री॑रधता यजत्राः ।
   अ॑घाय॒ते री॑रधत+ यजत्राः ।
   अ॑घाय॒ते री॑रधता यजत्राः ।

Halfverse: c    यू॒यं हि ष्ठा र॒थ्यो॑ नस्त॒नूनां॑ यू॒यं दक्ष॑स्य॒ वच॑सो बभू॒व ।।
   यू॒यं हि ष्ठा र॒थ्यो॑ नस्त॒नूनां
   यू॒यम् हि स्थ+ र॒थ्यः नः त॒नूना॑म्
   यू॒यं हि ष्ठा र॒थियो नस् त॒नूनां

Halfverse: d    यू॒यं दक्ष॑स्य॒ वच॑सो बभू॒व ।।
   यू॒यम् दक्ष॑स्य वच॑सः बभू॒व ।।
   यू॒यं दक्ष॑स्य वच॑सो बभू॒व ।।


Verse: 7 
Halfverse: a    मा व॒ एनो॑ अ॒न्यकृ॑तम्भुजेम॒ मा तत्क॑र्म वसवो॒ यच्चय॑ध्वे ।
   मा व॒ एनो॑ अ॒न्यकृ॑तम्भुजेम
   मा वः एनः अ॒न्यकृ॑तम् भुजेम
   मा व एनो अ॒न्यकृ॑तम् भुजेम

Halfverse: b    मा तत्क॑र्म वसवो॒ यच्चय॑ध्वे ।
   मा तत् कर्म वसवः यत् चय॑ध्वे ।
   मा तत् कर्म वसवो यच् चय॑ध्वे ।

Halfverse: c    विश्व॑स्य॒ हि क्षय॑थ विश्वदेवाः स्व॒यं रि॒पुस्त॒न्वं॑ रीरिषीष्ट ।।
   विश्व॑स्य॒ हि क्षय॑थ विश्वदेवाः
   विश्व॑स्य हि क्षय॑थ विश्वदेवाः
   विश्व॑स्य हि क्षय॑थ विश्वदेवाः

Halfverse: d    स्व॒यं रि॒पुस्त॒न्वं॑ रीरिषीष्ट ।।
   स्व॒यम् रि॒पुः त॒न्व॑म् रीरिषीष्ट ।।
   स्व॒यं रि॒पुस् त॒नुवं रीरिषीष्ट ।।


Verse: 8 
Halfverse: a    नम॒ इदु॒ग्रं नम॒ आ वि॑वासे॒ नमो॑ दाधार पृथि॒वीमु॒त द्याम् ।
   नम॒ इदु॒ग्रं नम॒ आ वि॑वासे
   नमः इत् उ॒ग्रम् नमः आ वि॑वासे
   नम इद् उ॒ग्रं नम आ वि॑वासे

Halfverse: b    नमो॑ दाधार पृथि॒वीमु॒त द्याम् ।
   नमः दाधार पृथि॒वीम् उ॒त द्याम् ।
   नमो दाधार पृथि॒वीम् उ॒त द्याम् ।

Halfverse: c    नमो॑ दे॒वेभ्यो॒ नम॑ ईश एषां कृ॒तं चि॒देनो॒ नम॒सा वि॑वासे ।।
   नमो॑ दे॒वेभ्यो॒ नम॑ ईश एषां
   नमः दे॒वेभ्यः नमः ईशे एषाम्
   नमो दे॒वेभ्यो नम ईश एषां

Halfverse: d    कृ॒तं चि॒देनो॒ नम॒सा वि॑वासे ।।
   कृ॒तम् चित् एनः नम॑सा आ वि॑वासे ।।
   कृ॒तं चि॑द् एनो नम॒सा वि॑वासे ।।


Verse: 9 
Halfverse: a    ऋ॒तस्य॑ वो र॒थ्यः॑ पू॒तद॑क्षानृ॒तस्य॑ पस्त्य॒सदो॒ अद॑ब्धान् ।
   ऋ॒तस्य॑ वो र॒थ्यः॑ पू॒तद॑क्षान्
   ऋ॒तस्य वः र॒थ्यः पू॒तद॑क्षान्
   ऋ॒तस्य वो र॒थियः पू॒तद॑क्षान्

Halfverse: b    ऋ॒तस्य॑ पस्त्य॒सदो॒ अद॑ब्धान् ।
   ऋ॒तस्य पस्त्य॒सदः अद॑ब्धान् ।
   ऋ॒तस्य पस्तिय॒सदो अद॑ब्धान् ।

Halfverse: c    ताँ आ नमो॑भिरुरु॒चक्ष॑सो॒ नॄन्विश्वा॑न्व॒ आ न॑मे म॒हो य॑जत्राः ।।
   ताँ आ नमो॑भिरुरु॒चक्ष॑सो॒ नॄन्
   तान् आ नमो॑भिः उरु॒चक्ष॑सः नॄन्
   ताँ आ नमो॑भिर् उरु॒चक्ष॑सो नॄन्

Halfverse: d    विश्वा॑न्व॒ आ न॑मे म॒हो य॑जत्राः ।।
   विश्वा॑न् वः आ न॑मे म॒हः य॑जत्राः ।।
   विश्वा॑न् व आ न॑मे म॒हो य॑जत्राः ।।


Verse: 10 
Halfverse: a    ते हि श्रेष्ठ॑वर्चस॒स्त उ॑ नस्ति॒रो विश्वा॑नि दुरि॒ता नय॑न्ति ।
   ते हि श्रेष्ठ॑वर्चस॒स्त उ॑ नस्
   ते हि श्रेष्ठ॑वर्चसः ते उ नः
   ते हि श्रयि॑ष्ठवर्चसस् त उ नस्

Halfverse: b    ति॒रो विश्वा॑नि दुरि॒ता नय॑न्ति ।
   ति॒रः विश्वा॑नि दुरि॒ता नय॑न्ति ।
   ति॒रो विश्वा॑नि दुरि॒ता नय॑न्ति ।

Halfverse: c    सु॑क्ष॒त्रासो॒ वरु॑णो मि॒त्रो अ॒ग्निरृ॒तधी॑तयो वक्म॒राज॑सत्याः ।।
   सु॑क्ष॒त्रासो॒ वरु॑णो मि॒त्रो अ॒ग्निर्
   सुक्ष॒त्रासः वरु॑णः मि॒त्रः अ॒ग्निः
   सु॑क्ष॒त्रासो वरु॑णो मि॒त्रो अ॒ग्निर्

Halfverse: d    ऋ॒तधी॑तयो वक्म॒राज॑सत्याः ।।
   ऋ॒तधी॑तयः वक्म॒राज॑सत्याः ।।
   ऋ॒तधी॑तयो वक्म॒राज॑सत्याः ।।


Verse: 11 
Halfverse: a    ते न॒ इन्द्रः॑ पृथि॒वी क्षाम॑ वर्धन्पू॒षा भगो॒ अदि॑तिः॒ पञ्च॒ जनाः॑ ।
   ते न॒ इन्द्रः॑ पृथि॒वी क्षाम॑ वर्धन्
   ते नः इन्द्रः पृथि॒वी क्षाम वर्धन्
   ते न इन्द्रः पृथि॒वी क्षाम वर्धन्

Halfverse: b    पू॒षा भगो॒ अदि॑तिः॒ पञ्च॒ जनाः॑ ।
   पू॒षा भगः अदि॑तिः पञ्च जनाः ।
   पू॒षा भगो अदि॑तिः पञ्च जनाः ।

Halfverse: c    सु॒शर्मा॑णः॒ स्वव॑सः सुनी॒था भव॑न्तु नः सुत्रा॒त्रासः॑ सुगो॒पाः ।।
   सु॒शर्मा॑णः॒ स्वव॑सः सुनी॒था
   सु॒शर्मा॑णः स्वव॑सः सुनी॒थाः
   सु॒शर्मा॑णः सुअव॑सः सुनी॒था

Halfverse: d    भव॑न्तु नः सुत्रा॒त्रासः॑ सुगो॒पाः ।।
   भव॑न्तु नः सुत्रा॒त्रासः सुगो॒पाः ।।
   भव॑न्तु नः सुत्रा॒त्रासः सुगो॒पाः ।।


Verse: 12 
Halfverse: a    नू स॒द्मानं॑ दि॒व्यं नंशि॑ देवा॒ भार॑द्वाजः सुम॒तिं या॑ति॒ होता॑ ।
   नू स॒द्मानं॑ दि॒व्यं नंशि॑ देवा
   नु+ स॒द्मान॑म् दि॒व्यम् नंशि देवाः
   नू स॒द्मानं दिवि॒यं नंशि देवा

Halfverse: b    भार॑द्वाजः सुम॒तिं या॑ति॒ होता॑ ।
   भार॑द्वाजः सुम॒तिम् याति होता ।
   भार॑द्वाजः सुम॒तिं या॑ति होता ।

Halfverse: c    आ॑सा॒नेभि॒र्यज॑मानो मि॒येधै॑र्दे॒वानां॒ जन्म॑ वसू॒युर्व॑वन्द ।।
   आ॑सा॒नेभि॒र्यज॑मानो मि॒येधै॑र्
   आसा॒नेभिः यज॑मानः मि॒येधैः
   आसा॒नेभि॑र् यज॑मानो मि॒येधै॑र्

Halfverse: d    दे॒वानां॒ जन्म॑ वसू॒युर्व॑वन्द ।।
   दे॒वाना॑म् जन्म वसू॒युः व॑वन्द ।।
   दे॒वानां जन्म वसू॒युर् ववन्द ।।


Verse: 13 
Halfverse: a    अप॒ त्यं वृ॑जि॒नं रि॒पुं स्ते॒नम॑ग्ने दुरा॒ध्य॑म् ।
   अप॒ त्यं वृ॑जि॒नं रि॒पुं
   अप त्यम् वृजि॒नम् रि॒पुम्
   अप त्यं वृ॑जि॒नं रि॒पुं

Halfverse: b    स्ते॒नम॑ग्ने दुरा॒ध्य॑म् ।
   स्ते॒नम् अग्ने दुरा॒ध्य॑म् ।
   स्ते॒नम् अग्ने दुरा॒धिय॑म् ।

Halfverse: c    द॑वि॒ष्ठम॑स्य सत्पते कृ॒धी सु॒गम् ।।
   द॑वि॒ष्ठम॑स्य सत्पते
   दवि॒ष्ठम् अस्य सत्पते
   दवि॒ष्ठम् अस्य सत्पते

Halfverse: d    कृ॒धी सु॒गम् ।।
   कृ॒धि+ सु॒गम् ।।
   कृ॒धी सु॒गम् ।।


Verse: 14 
Halfverse: a    ग्रावा॑णः सोम नो॒ हि कं॑ सखित्व॒नाय॑ वाव॒शुः ।
   ग्रावा॑णः सोम नो॒ हि कं
   ग्रावा॑णः सोम नः हि क॑म्
   ग्रावा॑णः सोम नो हि कं

Halfverse: b    सखित्व॒नाय॑ वाव॒शुः ।
   स॑खित्व॒नाय वाव॒शुः ।
   स॑खित्व॒नाय वाव॒शुः ।

Halfverse: c    ज॒ही न्य॒त्रिण॑म्प॒णिं वृको॒ हि षः ।।
   ज॒ही न्य॒त्रिण॑म्प॒णिं
   ज॒हि+ नि अ॒त्रिण॑म् प॒णिम्
   ज॒ही नि अ॒त्रिण॑म् प॒णिं

Halfverse: d    वृको॒ हि षः ।।
   वृकः हि सः ।।
   वृको हि षः ।।


Verse: 15 
Halfverse: a    यू॒यं हि ष्ठा सु॑दानव॒ इन्द्र॑ज्येष्ठा अ॒भिद्य॑वः ।
   यू॒यं हि ष्ठा सु॑दानव
   यू॒यम् हि स्थ+ सु॑दानवः
   यू॒यं हि ष्ठा सु॑दानव

Halfverse: b    इन्द्र॑ज्येष्ठा अ॒भिद्य॑वः ।
   इन्द्र॑ज्येष्ठाः अ॒भिद्य॑वः ।
   इन्द्र॑ज्येष्ठा अ॒भिद्य॑वः ।

Halfverse: c    कर्ता॑ नो॒ अध्व॒न्ना सु॒गं गो॒पा अ॒मा ।।
   कर्ता॑ नो॒ अध्व॒न्ना सु॒गं
   कर्त+ नः अध्व॑न् आ सु॒गम्
   कर्ता नो अध्व॑न्न् आ सु॒गं

Halfverse: d    गो॒पा अ॒मा ।।
   गो॒पाः अ॒मा ।।
   गो॒पा अ॒मा ।।


Verse: 16 
Halfverse: a    अपि॒ पन्था॑मगन्महि स्वस्ति॒गाम॑ने॒हस॑म् ।
   अपि॒ पन्था॑मगन्महि
   अपि पन्था॑म् अगन्महि
   अपि पन्था॑म् अगन्महि

Halfverse: b    स्वस्ति॒गाम॑ने॒हस॑म् ।
   स्व॑स्ति॒गाम् अने॒हस॑म् ।
   सुअ॑स्ति॒गाम् अने॒हस॑म् ।

Halfverse: c    येन॒ विश्वाः॒ परि॒ द्विषो॑ वृ॒णक्ति॑ वि॒न्दते॒ वसु॑ ।।
   येन॒ विश्वाः॒ परि॒ द्विषो
   येन विश्वाः परि द्विषः
   येन विश्वाः परि द्विषो

Halfverse: d    वृ॒णक्ति॑ वि॒न्दते॒ वसु॑ ।।
   वृ॒णक्ति वि॒न्दते वसु ।।
   वृ॒णक्ति वि॒न्दते वसु ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.