TITUS
Rg-Veda: Rg-Veda-Samhita
Part No. 499
Previous part

Hymn: 58_(499) 
Verse: 1 
Halfverse: a    शु॒क्रं ते॑ अ॒न्यद्य॑ज॒तं ते॑ अ॒न्यद्विषु॑रूपे॒ अह॑नी॒ द्यौरि॑वासि ।
   शु॒क्रं ते॑ अ॒न्यद्य॑ज॒तं ते॑ अ॒न्यद्
   शु॒क्रम् ते अ॒न्यत् यज॒तम् ते अ॒न्यत्
   शु॒क्रं ते अ॒न्यद् यज॒तं ते अ॒न्यद्

Halfverse: b    विषु॑रूपे॒ अह॑नी॒ द्यौरि॑वासि ।
   विषु॑रूपे अह॑नी द्यौः इ॑व असि ।
   विषु॑रूपे अह॑नी द्यौर् इवासि ।

Halfverse: c    विश्वा॒ हि मा॒या अव॑सि स्वधावो भ॒द्रा ते॑ पूषन्नि॒ह रा॒तिर॑स्तु ।।
   विश्वा॒ हि मा॒या अव॑सि स्वधावो
   विश्वाः हि मा॒याः अव॑सि स्वधावः
   विश्वा हि मा॒या अव॑सि स्वधावो

Halfverse: d    भ॒द्रा ते॑ पूषन्नि॒ह रा॒तिर॑स्तु ।।
   भ॒द्रा ते पूषन् इ॒ह रा॒तिः अ॑स्तु ।।
   भ॒द्रा ते पूषन्न् इ॒ह रा॒तिर् अस्तु ।।


Verse: 2 
Halfverse: a    अ॒जाश्वः॑ पशु॒पा वाज॑पस्त्यो धियंजि॒न्वो भुव॑ने॒ विश्वे॒ अर्पि॑तः ।
   अ॒जाश्वः॑ पशु॒पा वाज॑पस्त्यो
   अ॒जाश्वः पशु॒पाः वाज॑पस्त्यः
   अ॒जाशु॑वः पशु॒पा वाज॑पस्तियो

Halfverse: b    धियंजि॒न्वो भुव॑ने॒ विश्वे॒ अर्पि॑तः ।
   धि॑यंजि॒न्वः भुव॑ने विश्वे अर्पि॑तः ।
   धि॑यंजि॒न्वो भुव॑ने विश्वे अर्पि॑तः ।

Halfverse: c    अष्ट्रा॑म्पू॒षा शि॑थि॒रामु॒द्वरी॑वृजत्सं॒चक्षा॑णो॒ भुव॑ना दे॒व ई॑यते ।।
   अष्ट्रा॑म्पू॒षा शि॑थि॒रामु॒द्वरी॑वृजत्
   अष्ट्रा॑म् पू॒षा शि॑थि॒राम् उ॒द्वरी॑वृजत्
   अष्ट्रा॑म् पू॒षा शि॑थि॒राम् उ॒द्वरी॑वृजत्

Halfverse: d    सं॒चक्षा॑णो॒ भुव॑ना दे॒व ई॑यते ।।
   सं॒चक्षा॑णः भुव॑ना दे॒वः ई॑यते ।।
   सं॒चक्षा॑णो भुव॑ना दे॒व ई॑यते ।।


Verse: 3 
Halfverse: a    यास्ते॑ पूष॒न्नावो॑ अ॒न्तः स॑मु॒द्रे हि॑र॒ण्ययी॑र॒न्तरि॑क्षे॒ चर॑न्ति ।
   यास्ते॑ पूष॒न्नावो॑ अ॒न्तः स॑मु॒द्रे
   याः ते पूषन् नावः अ॒न्तर् समु॒द्रे
   यास् ते पूषन् नावो अ॒न्तः स॑मु॒द्रे

Halfverse: b    हि॑र॒ण्ययी॑र॒न्तरि॑क्षे॒ चर॑न्ति ।
   हि॑र॒ण्ययीः अ॒न्तरि॑क्षे चर॑न्ति ।
   हि॑र॒ण्ययी॑र् अ॒न्तरि॑क्षे चर॑न्ति ।

Halfverse: c    ताभि॑र्यासि दू॒त्यां सूर्य॑स्य॒ कामे॑न कृत॒ श्रव॑ इ॒छमा॑नः ।।
   ताभि॑र्यासि दू॒त्यां सूर्य॑स्य
   ताभिः यासि दू॒त्याम् सूर्य॑स्य
   ताभि॑र् यासि दूति॒यां सूरि॑यस्य

Halfverse: d    कामे॑न कृत॒ श्रव॑ इ॒छमा॑नः ।।
   कामे॑न कृत श्रवः इ॒छमा॑नः ।।
   कामे॑न कृत श्रव इ॒छमा॑नः ।।


Verse: 4 
Halfverse: a    पू॒षा सु॒बन्धु॑र्दि॒व आ पृ॑थि॒व्या इ॒ळस्पति॑र्म॒घवा॑ द॒स्मव॑र्चाः ।
   पू॒षा सु॒बन्धु॑र्दि॒व आ पृ॑थि॒व्या
   पू॒षा सु॒बन्धुः दि॒वः आ पृ॑थि॒व्याः
   पू॒षा सु॒बन्धु॑र् दि॒व आ पृ॑थि॒व्या

Halfverse: b    इ॒ळस्पति॑र्म॒घवा॑ द॒स्मव॑र्चाः ।
   इ॒ळः पतिः म॒घवा द॒स्मव॑र्चाः ।
   इ॒ळस् पति॑र् म॒घवा द॒स्मव॑र्चाः ।

Halfverse: c    यं दे॒वासो॒ अद॑दुः सू॒र्यायै॒ कामे॑न कृ॒तं त॒वसं॒ स्वञ्च॑म् ।।
   यं दे॒वासो॒ अद॑दुः सू॒र्यायै
   यम् दे॒वासः अद॑दुः सू॒र्यायै
   यं दे॒वासो अद॑दुः सूरि॒यायै

Halfverse: d    कामे॑न कृ॒तं त॒वसं॒ स्वञ्च॑म् ।।
   कामे॑न कृ॒तम् त॒वस॑म् स्वञ्च॑म् ।।
   कामे॑न कृ॒तं त॒वसं सुअञ्च॑म् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.