TITUS Texts: Rg-Veda: Rg-Veda-Samhita

TITUS
Rg-Veda: Rg-Veda-Samhita
Part No. 498

Hymn: 57_(498)
Verse: 1
Halfverse: a    इन्द्रा॒ नु पू॒षणा॑ व॒यं स॒ख्याय॑ स्व॒स्तये॑ ।
   इन्द्रा॒ नु पू॒षणा॑ व॒यं
   इन्द्रा नु पू॒षणा व॒यम्
   इन्द्रा नु पू॒षणा व॒यं

Halfverse: b    स॒ख्याय॑ स्व॒स्तये॑ ।
   स॒ख्याय स्व॒स्तये ।
   स॑खि॒याय सुअ॒स्तये ।

Halfverse: c    हु॒वेम॒ वाज॑सातये ।।
   हु॒वेम॒ वाज॑सातये ।।
   हु॒वेम वाज॑सातये ।।
   हु॒वेम वाज॑सातये ।।

Verse: 2
Halfverse: a    सोम॑म॒न्य उपा॑सद॒त्पात॑वे च॒म्वोः॑ सु॒तम् ।
   सोम॑म॒न्य उपा॑सदत्
   सोम॑म् अ॒न्यः उप असदत्
   सोम॑म् अ॒न्य उपा॑सदत्

Halfverse: b    पात॑वे च॒म्वोः॑ सु॒तम् ।
   पात॑वे च॒म्वोः सु॒तम् ।
   पात॑वे च॒मुवोः सु॒तम् ।

Halfverse: c    क॑र॒म्भम॒न्य इ॑छति ।।
   क॑र॒म्भम॒न्य इ॑छति ।।
   क॑र॒म्भम् अ॒न्यः इ॑छति ।।
   क॑र॒म्भम् अ॒न्य इ॑छति ।।

Verse: 3
Halfverse: a    अ॒जा अ॒न्यस्य॒ वह्न॑यो॒ हरी॑ अ॒न्यस्य॒ सम्भृ॑ता ।
   अ॒जा अ॒न्यस्य॒ वह्न॑यो
   अ॒जाः अ॒न्यस्य वह्न॑यः
   अ॒जा अ॒न्यस्य वह्न॑यो

Halfverse: b    हरी॑ अ॒न्यस्य॒ सम्भृ॑ता ।
   हरी अ॒न्यस्य सम्भृ॑ता ।
   हरी अ॒न्यस्य सम्भृ॑ता ।

Halfverse: c    ताभ्यां॑ वृ॒त्राणि॑ जिघ्नते ।।
   ताभ्यां॑ वृ॒त्राणि॑ जिघ्नते ।।
   ताभ्या॑म् वृ॒त्राणि जिघ्नते ।।
   ताभ्यां वृ॒त्राणि जिघ्नते ।।

Verse: 4
Halfverse: a    यदिन्द्रो॒ अन॑य॒द्रितो॑ म॒हीर॒पो वृष॑न्तमः ।
   यदिन्द्रो॒ अन॑य॒द्रितो
   यत् इन्द्रः अन॑यत् रितः
   यद् इन्द्रो अन॑यद् रितो

Halfverse: b    म॒हीर॒पो वृष॑न्तमः ।
   म॒हीः अ॒पः वृष॑न्तमः ।
   म॒हीर् अ॒पो वृष॑न्तमः ।

Halfverse: c    तत्र॑ पू॒षाभ॑व॒त्सचा॑ ।।
   तत्र॑ पू॒षाभ॑व॒त्सचा॑ ।।
   तत्र पू॒षा अ॑भवत् सचा ।।
   तत्र पू॒षाभ॑वत् सचा ।।

Verse: 5
Halfverse: a    ताम्पू॒ष्णः सु॑म॒तिं व॒यं वृ॒क्षस्य॒ प्र व॒यामि॑व ।
   ताम्पू॒ष्णः सु॑म॒तिं व॒यं
   ताम् पू॒ष्णः सु॑म॒तिम् व॒यम्
   ताम् पू॒ष्णः सु॑म॒तिं व॒यं

Halfverse: b    वृ॒क्षस्य॒ प्र व॒यामि॑व ।
   वृ॒क्षस्य प्र व॒याम् इव ।
   वृ॒क्षस्य प्र व॒याम् इव ।

Halfverse: c    इन्द्र॑स्य॒ चा र॑भामहे ।।
   इन्द्र॑स्य॒ चा र॑भामहे ।।
   इन्द्र॑स्य च आ र॑भामहे ।।
   इन्द्र॑स्य चा र॑भामहे ।।

Verse: 6
Halfverse: a    उत्पू॒षणं॑ युवामहे॒ ऽभीशूँ॑रिव॒ सार॑थिः ।
   उत्पू॒षणं॑ युवामहे
   उत् पू॒षण॑म् युवामहे
   उत् पू॒षणं युवामहे

Halfverse: b    ऽभीशूँ॑रिव॒ सार॑थिः ।
   अ॒भीशू॑न् इव सार॑थिः ।
   अ॒भीशूँ॑र् इव सार॑थिः ।

Halfverse: c    म॒ह्या इन्द्रं॑ स्व॒स्तये॑ ।।
   म॒ह्या इन्द्रं॑ स्व॒स्तये॑ ।।
   म॒ह्यै इन्द्र॑म् स्व॒स्तये ।।
   म॒ह्या इन्द्रं सुअ॒स्तये ।।

This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.