TITUS Texts: Rg-Veda: Rg-Veda-Samhita

TITUS
Rg-Veda: Rg-Veda-Samhita
Part No. 740

Hymn: 17_(729)
Verse: 1
Halfverse: a    प्र नि॒म्नेने॑व॒ सिन्ध॑वो॒ घ्नन्तो॑ वृ॒त्राणि॒ भूर्ण॑यः ।
   प्र नि॒म्नेने॑व॒ सिन्ध॑वो
   प्र नि॒म्नेन इव सिन्ध॑वः
   प्र नि॒म्नेने॑व सिन्ध॑वो

Halfverse: b    घ्नन्तो॑ वृ॒त्राणि॒ भूर्ण॑यः ।
   घ्नन्तः वृ॒त्राणि भूर्ण॑यः ।
   घ्नन्तो वृ॒त्राणि भूर्ण॑यः ।

Halfverse: c    सोमा॑ असृग्रमा॒शवः॑ ।।
   सोमा॑ असृग्रमा॒शवः॑ ।।
   सोमाः असृग्रम् आ॒शवः ।।
   सोमा असृग्रम् आ॒शवः ।।

Verse: 2
Halfverse: a    अ॒भि सु॑वा॒नास॒ इन्द॑वो वृ॒ष्टयः॑ पृथि॒वीमि॑व ।
   अ॒भि सु॑वा॒नास॒ इन्द॑वो
   अ॒भि सु॑वा॒नासः इन्द॑वः
   अ॒भि स्वा॒नास % इन्द॑वो

Halfverse: b    वृ॒ष्टयः॑ पृथि॒वीमि॑व ।
   वृ॒ष्टयः पृथि॒वीम् इव ।
   वृ॒ष्टयः पृथि॒वीम् इव ।

Halfverse: c    इन्द्रं॒ सोमा॑सो अक्षरन् ।।
   इन्द्रं॒ सोमा॑सो अक्षरन् ।।
   इन्द्र॑म् सोमा॑सः अक्षरन् ।।
   इन्द्रं सोमा॑सो अक्षरन् ।।

Verse: 3
Halfverse: a    अत्यू॑र्मिर्मत्स॒रो मदः॒ सोमः॑ प॒वित्रे॑ अर्षति ।
   अत्यू॑र्मिर्मत्स॒रो मदः
   अत्यू॑र्मिः मत्स॒रः मदः
   अत्यू॑र्मिर् मत्स॒रो मदः

Halfverse: b    सोमः॑ प॒वित्रे॑ अर्षति ।
   सोमः प॒वित्रे अर्षति ।
   सोमः प॒वित्रे अर्षति ।

Halfverse: c    वि॒घ्नन्रक्षां॑सि देव॒युः ।।
   वि॒घ्नन्रक्षां॑सि देव॒युः ।।
   वि॒घ्नन् रक्षां॑सि देव॒युः ।।
   वि॒घ्नन् रक्षां॑सि देव॒युः ।।

Verse: 4
Halfverse: a    आ क॒लशे॑षु धावति प॒वित्रे॒ परि॑ षिच्यते ।
   आ क॒लशे॑षु धावति
   आ क॒लशे॑षु धावति
   आ क॒लशे॑षु धावति

Halfverse: b    प॒वित्रे॒ परि॑ षिच्यते ।
   प॒वित्रे परि सिच्यते ।
   प॒वित्रे परि षिच्यते ।

Halfverse: c    उ॒क्थैर्य॒ज्ञेषु॑ वर्धते ।।
   उ॒क्थैर्य॒ज्ञेषु॑ वर्धते ।।
   उ॒क्थैः य॒ज्ञेषु वर्धते ।।
   उ॒क्थैर् य॒ज्ञेषु वर्धते ।।

Verse: 5
Halfverse: a    अति॒ त्री सो॑म रोच॒ना रोह॒न्न भ्रा॑जसे॒ दिव॑म् ।
   अति॒ त्री सो॑म रोच॒ना
   अति त्री सो॑म रोच॒ना
   अति त्री सो॑म रोच॒ना

Halfverse: b    रोह॒न्न भ्रा॑जसे॒ दिव॑म् ।
   रोह॑न् न भ्रा॑जसे दिव॑म् ।
   रोह॑न् न भ्रा॑जसे दिव॑म् ।

Halfverse: c    इ॒ष्णन्सूर्यं॒ न चो॑दयः ।।
   इ॒ष्णन्सूर्यं॒ न चो॑दयः ।।
   इ॒ष्णन् सूर्य॑म् न चो॑दयः ।।
   इ॒ष्णन् सूर्यं न चो॑दयः ।।

Verse: 6
Halfverse: a    अ॒भि विप्रा॑ अनूषत मू॒र्धन्य॒ज्ञस्य॑ का॒रवः॑ ।
   अ॒भि विप्रा॑ अनूषत
   अ॒भि विप्राः अनूषत
   अ॒भि विप्रा अनूषत

Halfverse: b    मू॒र्धन्य॒ज्ञस्य॑ का॒रवः॑ ।
   मू॒र्धन् य॒ज्ञस्य का॒रवः ।
   मू॒र्धन् य॒ज्ञस्य का॒रवः ।

Halfverse: c    दधा॑ना॒श्चक्ष॑सि प्रि॒यम् ।।
   दधा॑ना॒श्चक्ष॑सि प्रि॒यम् ।।
   दधा॑नाः चक्ष॑सि प्रि॒यम् ।।
   दधा॑नाश् चक्ष॑सि प्रि॒यम् ।।

Verse: 7
Halfverse: a    तमु॑ त्वा वा॒जिनं॒ नरो॑ धी॒भिर्विप्रा॑ अव॒स्यवः॑ ।
   तमु॑ त्वा वा॒जिनं॒ नरो
   तम् उ त्वा वा॒जिन॑म् नरः
   तम् उ त्वा वा॒जिनं नरो

Halfverse: b    धी॒भिर्विप्रा॑ अव॒स्यवः॑ ।
   धी॒भिः विप्राः अव॒स्यवः ।
   धी॒भिर् विप्रा अव॒स्यवः ।

Halfverse: c    मृ॒जन्ति॑ दे॒वता॑तये ।।
   मृ॒जन्ति॑ दे॒वता॑तये ।।
   मृ॒जन्ति दे॒वता॑तये ।।
   मृ॒जन्ति दे॒वता॑तये ।।

Verse: 8
Halfverse: a    मधो॒र्धारा॒मनु॑ क्षर ती॒व्रः स॒धस्थ॒मास॑दः ।
   मधो॒र्धारा॒मनु॑ क्षर
   मधोः धारा॑म् अनु क्षर
   मधो॑र् धारा॑म् अनु क्षर

Halfverse: b    ती॒व्रः स॒धस्थ॒मास॑दः ।
   ती॒व्रः स॒धस्थ॑म् आ अ॑सदः ।
   ती॒व्रः स॒धस्थ॑म् आस॑दः ।

Halfverse: c    चारु॑रृ॒ताय॑ पी॒तये॑ ।।
   चारु॑रृ॒ताय॑ पी॒तये॑ ।।
   चारुः ऋ॒ताय पी॒तये ।।
   चारु॑र् ऋ॒ताय पी॒तये ।।

This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.