TITUS
Rg-Veda: Rg-Veda-Samhita
Part No. 761
Previous part

Hymn: 38_(750) 
Verse: 1 
Halfverse: a    ए॒ष उ॒ स्य वृषा॒ रथो ऽव्यो॒ वारे॑भिरर्षति ।
   ए॒ष उ॒ स्य वृषा॒ रथो
   ए॒षः ।!। उ स्य वृषा रथः
   ए॒ष उ स्य वृषा रथो

Halfverse: b    ऽव्यो॒ वारे॑भिरर्षति ।
   अव्यः वारे॑भिः अर्षति ।
   अव्यो वारे॑भिर् अर्षति ।

Halfverse: c    गछ॒न्वाजं॑ सह॒स्रिण॑म् ।।
   गछ॒न्वाजं॑ सह॒स्रिण॑म् ।।
   गछ॑न् वाज॑म् सह॒स्रिण॑म् ।।
   गछ॑न् वाजं सह॒स्रिण॑म् ।।


Verse: 2 
Halfverse: a    ए॒तं त्रि॒तस्य॒ योष॑णो॒ हरिं॑ हिन्व॒न्त्यद्रि॑भिः ।
   ए॒तं त्रि॒तस्य॒ योष॑णो
   ए॒तम् त्रि॒तस्य योष॑णः
   ए॒तं त्रि॒तस्य योष॑णो

Halfverse: b    हरिं॑ हिन्व॒न्त्यद्रि॑भिः ।
   हरि॑म् हिन्वन्ति अद्रि॑भिः ।
   हरिं हिन्वन्ति अद्रि॑भिः ।

Halfverse: c    इन्दु॒मिन्द्रा॑य पी॒तये॑ ।।
   इन्दु॒मिन्द्रा॑य पी॒तये॑ ।।
   इन्दु॑म् इन्द्रा॑य पी॒तये ।।
   इन्दु॑म् इन्द्रा॑य पी॒तये ।।


Verse: 3 
Halfverse: a    ए॒तं त्यं ह॒रितो॒ दश॑ मर्मृ॒ज्यन्ते॑ अप॒स्युवः॑ ।
   ए॒तं त्यं ह॒रितो॒ दश
   ए॒तम् त्यम् ह॒रितः दश
   ए॒तं त्यं ह॒रितो दश

Halfverse: b    मर्मृ॒ज्यन्ते॑ अप॒स्युवः॑ ।
   म॑र्मृ॒ज्यन्ते अप॒स्युवः ।
   म॑र्मृ॒ज्यन्ते अप॒स्युवः ।

Halfverse: c    याभि॒र्मदा॑य॒ शुम्भ॑ते ।।
   याभि॒र्मदा॑य॒ शुम्भ॑ते ।।
   याभिः मदा॑य शुम्भ॑ते ।।
   याभि॑र् मदा॑य शुम्भ॑ते ।।


Verse: 4 
Halfverse: a    ए॒ष स्य मानु॑षी॒ष्वा श्ये॒नो न वि॒क्षु सी॑दति ।
   ए॒ष स्य मानु॑षी॒ष्वा
   ए॒ष स्य मानु॑षीषु आ
   ए॒ष स्य मानु॑षीषु आ

Halfverse: b    श्ये॒नो न वि॒क्षु सी॑दति ।
   श्ये॒नः न वि॒क्षु सी॑दति ।
   श्ये॒नो न वि॒क्षु सी॑दति ।

Halfverse: c    गछ॑ञ्जा॒रो न यो॒षित॑म् ।।
   गछ॑ञ्जा॒रो न यो॒षित॑म् ।।
   गछ॑न् जा॒रः न यो॒षित॑म् ।।
   गछ॑ञ् जा॒रो न यो॒षित॑म् ।।


Verse: 5 
Halfverse: a    ए॒ष स्य मद्यो॒ रसो ऽव॑ चष्टे दि॒वः शिशुः॑ ।
   ए॒ष स्य मद्यो॒ रसो
   ए॒ष स्य मद्यः रसः
   ए॒ष स्य मदि॑यो रसो

Halfverse: b    ऽव चष्टे दि॒वः शिशुः॑ ।
   अव चष्टे दि॒वः शिशुः ।
   अव चष्टे दि॒वः शिशुः ।

Halfverse: c    य इन्दु॒र्वार॒मावि॑शत् ।।
   य इन्दु॒र्वार॒मावि॑शत् ।।
   यः इन्दुः वार॑म् आ अवि॑शत् ।।
   य इन्दु॑र् वार॑म् आवि॑शत् ।।


Verse: 6 
Halfverse: a    ए॒ष स्य पी॒तये॑ सु॒तो हरि॑रर्षति धर्ण॒सिः ।
   ए॒ष स्य पी॒तये॑ सु॒तो
   ए॒ष स्य पी॒तये सु॒तः
   ए॒ष स्य पी॒तये सु॒तो

Halfverse: b    हरि॑रर्षति धर्ण॒सिः ।
   हरिः अर्षति धर्ण॒सिः ।
   हरि॑र् अर्षति धर्ण॒सिः ।

Halfverse: c    क्रन्द॒न्योनि॑म॒भि प्रि॒यम् ।।
   क्रन्द॒न्योनि॑म॒भि प्रि॒यम् ।।
   क्रन्द॑न् योनि॑म् अ॒भि प्रि॒यम् ।।
   क्रन्द॑न् योनि॑म् अ॒भि प्रि॒यम् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.