TITUS
White Yajur-Veda: Brhad-Aranyaka-Upanisad
Part No. 11
Previous part

Paragraph: 5    {= ŚBM 14.5.5}    {= ŚBK 16.4.5}
Verse: MK1 
Sentence: a    इयं॒ पृथिवी स॒र्वेषां भूता॒नां म॒ध्व्,
   इय॒म् पृथिवी स॒र्वेषाम् भूता॒नाम् म॒धु

Sentence: b          अस्यै॒ पृथिव्यै स॒र्वाणि भूता॒नि म॒धु;
         अस्यै पृथिव्यै स॒र्वाणि भूता॒नि म॒धु

Sentence: c       य॒श्चाय॒मस्यां॒ पृथिव्यां॒ तेजोम॒यो ऽमृतम॒यः पु॒रुषो,
      य॒स् च अय॒म् अस्या॒म् पृथिव्या॒म् तेजोम॒यस् अमृतम॒यस् पु॒रुषस्

Sentence: d          य॒स्चाय॒मध्यात्मँ॒ शारीर॒स्तेजोम॒यो ऽमृतम॒यः पु॒रुषो,
         य॒स् च अय॒म् अध्यात्म॒म् शारीर॒स् तेजोम॒यस् अमृतम॒यस् पु॒रुषस्

Sentence: e          ऽय॒मेव स॒ यो ऽय॒मा॒त्मेद॒ममृ॒तम्,
         अय॒म् एव स य॒स् अय॒म् आत्मा इद॒म् अमृ॒तम्

Sentence: f          इदं ब्र॒ह्म,
         इद॒म् ब्र॒ह्म

Sentence: g          इदँ स॒र्वम्.
         इद॒म् स॒र्वम्

Verse: MK2 
Sentence: a    इमा आ॒पः स॒र्वेषां भूता॒नां म॒ध्व्,
   इमा॒स् आ॒पस् स॒र्वेषाम् भूता॒नाम् म॒धु

Sentence: b          आसा॒मपाँ स॒र्वाणि भूता॒नि म॒धु;
         आसा॒म् अपा॒म् स॒र्वाणि भूता॒नि म॒धु

Sentence: c       य॒श्चाय॒मा॒स्वप्सु॒ तेजोम॒यो ऽमृतम॒यः पु॒रुषो,
      य॒स् च अय॒म् आसु अप्सु तेजोम॒यस् अमृतम॒यस् पु॒रुषस्

Sentence: d          य॒श्चाय॒मध्यात्मँ॒ रैतस॒स्तेजोम॒यो ऽमृतम॒यः पु॒रुषो,
         य॒स् च अय॒म् अध्यात्म॒म् रैतस॒स् तेजोम॒यस् अमृतम॒यस् पु॒रुषस्

Sentence: e          ऽय॒मेव स॒ यो ऽय॒मा॒त्मेद॒ममृ॒तम्,
         अय॒म् एव स य॒स् अय॒म् आत्मा इद॒म् अमृ॒तम्

Sentence: f          इदं ब्र॒ह्म,
         इद॒म् ब्र॒ह्म

Sentence: g          इदँ स॒र्वम्.
         इद॒म् स॒र्वम्

Verse: MK3 
Sentence: a    अय॒मग्निः स॒र्वेषां भूता॒नां म॒ध्व्,
   अय॒म् अग्नि॒स् स॒र्वेषाम् भूता॒नाम् म॒धु

Sentence: b          अस्याग्नेः स॒र्वाणि भूता॒नि म॒धु;
         अस्य अग्ने॒स् स॒र्वाणि भूता॒नि म॒धु

Sentence: c       य॒श्चाय॒मस्मि॒न्नग्नौ॒ तेजोम॒यो ऽमृतम॒यः पु॒रुषो,
      य॒स् च अय॒म् अस्मि॒न् अग्नौ तेजोम॒यस् अमृतम॒यस् पु॒रुषस्

Sentence: d          य॒श्चाय॒मध्यात्मं॒ वाङ्म॒यस्तेजोम॒यो ऽमृतम॒यः पु॒रुषो,
         य॒स् च अय॒म् अध्यात्म॒म् वाङ्म॒यस् तेजोम॒यस् अमृतम॒यस् पु॒रुषस्

Sentence: e          ऽय॒मेव स॒ यो ऽय॒मा॒त्मेद॒ममृ॒तम्,
         अय॒म् एव स य॒स् अय॒म् आत्मा इद॒म् अमृ॒तम्

Sentence: f          इदं ब्र॒ह्म,
         इद॒म् ब्र॒ह्म

Sentence: g          इदँ स॒र्वम्.
         इद॒म् स॒र्वम्

Verse: M4/K10 
Sentence: a    अय॒माकाशः स॒र्वेषां भूता॒नां म॒ध्व्,
   अय॒म् आकाश॒स् स॒र्वेषाम् भूता॒नाम् म॒धु

Sentence: b          अस्याकाश॒स्य स॒र्वाणि भूता॒नि म॒धु;
         अस्य आकाश॒स्य स॒र्वाणि भूता॒नि म॒धु

Sentence: c       य॒श्चाय॒मस्मि॒न्नाकाशे॒ तेजोम॒यो ऽमृतम॒यः पु॒रुषो,
      य॒स् च अय॒म् अस्मि॒न् आकाशे तेजोम॒यस् अमृतम॒यस् पु॒रुषस्

Sentence: d          य॒श्चाय॒मध्यात्मँ हृ॒द्याकाश॒स्तेजोम॒यो ऽमृतम॒यः पु॒रुषो,
         य॒स् च अय॒म् अध्यात्म॒म् हृ॒दि आकाश॒स् तेजोम॒यस् अमृतम॒यस् पु॒रुषस्

Sentence: e          ऽय॒मेव स॒ यो ऽय॒मा॒त्मेद॒ममृ॒तम्,
         अय॒म् एव स य॒स् अय॒म् आत्मा इद॒म् अमृ॒तम्

Sentence: f          इदं ब्र॒ह्मेदँ स॒र्वम्.
         इद॒म् ब्र॒ह्म इद॒म् स॒र्वम्

Verse: M5/K4 
Sentence: a    अयं॒ वायुः स॒र्वेषां भूता॒नां म॒ध्व्,
   अय॒म् वायु॒स् स॒र्वेषाम् भूता॒नाम् म॒धु

Sentence: b          अस्य वायोः स॒र्वाणि भूता॒नि म॒धु;
         अस्य वायो॒स् स॒र्वाणि भूता॒नि म॒धु

Sentence: c       य॒श्चाय॒मस्मि॒न्वायौ॒ तेजोम॒यो ऽमृतम॒यः पु॒रुषो,
      य॒स् च अय॒म् अस्मि॒न् वायौ तेजोम॒यस् अमृतम॒यस् पु॒रुषस्

Sentence: d          य॒श्चाय॒मध्यात्मं॒ प्राण॒स्तेजोम॒यो ऽमृतम॒यः पु॒रुषो,
         य॒स् च अय॒म् अध्यात्म॒म् प्राण॒स् तेजोम॒यस् अमृतम॒यस् पु॒रुषस्

Sentence: e          ऽय॒मेव स॒ यो ऽय॒मा॒त्मेदं॒ अमृ॒तम्,
         अय॒म् एव स य॒स् अय॒म् आत्मा इद॒म् अमृ॒तम्

Sentence: f          इदं ब्र॒ह्मेदँ स॒र्वम्.
         इद॒म् ब्र॒ह्म इद॒म् स॒र्वम्

Verse: M6/K5 
Sentence: a    अय॒मादित्यः स॒र्वेषां भूता॒नां म॒ध्व्,
   अय॒म् आदित्य॒स् स॒र्वेषाम् भूता॒नाम् म॒धु

Sentence: b          अस्यादित्य॒स्य स॒र्वाणि भूता॒नि म॒धु;
         अस्य आदित्य॒स्य स॒र्वाणि भूता॒नि म॒धु

Sentence: c       य॒श्चाय॒मस्मि॒न्नादित्ये॒ तेजोम॒यो ऽमृतम॒यः पु॒रुषो,
      य॒स् च अय॒म् अस्मि॒न् आदित्ये तेजोम॒यस् अमृतम॒यस् पु॒रुषस्

Sentence: d          य॒श्चाय॒मध्यात्मं॒ चाक्षुष॒स्तेजोम॒यो ऽमृतम॒यः पु॒रुषो,
         य॒स् च अय॒म् अध्यात्म॒म् चाक्षुष॒स् तेजोम॒यस् अमृतम॒यस् पु॒रुषस्

Sentence: e          ऽय॒मेव स॒ यो ऽय॒मा॒त्मेद॒ममृ॒तम्,
         अय॒म् एव स य॒स् अय॒म् आत्मा इद॒म् अमृ॒तम्

Sentence: f          इदं ब्र॒ह्मेदँ स॒र्वम्.
         इद॒म् ब्र॒ह्म इद॒म् स॒र्वम्

Verse: MK7 
Sentence: a    अयं॒ चन्द्रः स॒र्वेषां भूता॒नां म॒ध्व्,
   अय॒म् चन्द्र॒स् स॒र्वेषाम् भूता॒नाम् म॒धु

Sentence: b          अस्य चन्द्र॒स्य स॒र्वाणि भूता॒नि म॒धु;
         अस्य चन्द्र॒स्य स॒र्वाणि भूता॒नि म॒धु

Sentence: c       य॒श्चाय॒मस्मि॒न्चन्द्रे॒ तेजोम॒यो ऽमृतम॒यः पु॒रुषो,
      य॒स् च अय॒म् अस्मि॒न् चन्द्रे तेजोम॒यस् अमृतम॒यस् पु॒रुषस्

Sentence: d          य॒श्चाय॒मध्यात्मं॒ मानस॒स्तेजोम॒यो ऽमृतम॒यः पु॒रुषो,
         य॒स् च अय॒म् अध्यात्म॒म् मानस॒स् तेजोम॒यस् अमृतम॒यस् पु॒रुषस्

Sentence: e          ऽय॒मेव स॒ यो ऽय॒मा॒त्मेद॒ममृ॒तम्,
         अय॒म् एव स य॒स् अय॒म् आत्मा इद॒म् अमृ॒तम्

Sentence: f          इदं ब्र॒ह्मेदँ स॒र्वम्.
         इद॒म् ब्र॒ह्म इद॒म् स॒र्वम्

Verse: M8/K6 
Sentence: a    इमा दि॒शः स॒र्वेषां भूता॒नां म॒ध्व्,
   इमा॒स् दि॒शस् स॒र्वेषाम् भूता॒नाम् म॒धु

Sentence: b          आसां॒ दिशाँ स॒र्वाणि भूता॒नि म॒धु;
         आसा॒म् दिशा॒म् स॒र्वाणि भूता॒नि म॒धु

Sentence: c       य॒श्चाय॒मासु॒ दिक्षु॒ तेजोम॒यो ऽमृतम॒यः पु॒रुषो,
      य॒स् च अय॒म् आसु दिक्षु तेजोम॒यस् अमृतम॒यस् पु॒रुषस्

Sentence: d          य॒श्चाय॒मध्यात्मँ॒ श्रौत्रः॒ प्रातिश्रुत्क॒स्तेजोम॒यो ऽमृतम॒यः पु॒रुषो,
         य॒स् च अय॒म् अध्यात्म॒म् श्रौत्र॒स् प्रातिश्रुत्क॒स् तेजोम॒यस् अमृतम॒यस् पु॒रुषस्

Sentence: e          ऽय॒मेव स॒ यो ऽय॒मा॒त्मेद॒ममृ॒तम्,
         अय॒म् एव स य॒स् अय॒म् आत्मा इद॒म् अमृ॒तम्

Sentence: f          इदं ब्र॒ह्मेदँ स॒र्वम्.
         इद॒म् ब्र॒ह्म इद॒म् स॒र्वम्

Verse: M9/K8 
Sentence: a    इयं॒ विद्युत्स॒र्वेषां भूता॒नं म॒ध्व्,
   इय॒म् विद्यु॒त् स॒र्वेषाम् भूता॒नम् म॒धु

Sentence: b          अस्यै॒ विद्यु॒तः स॒र्वाणि भूता॒नि म॒धु;
         अस्यै विद्यु॒तस् स॒र्वाणि भूता॒नि म॒धु

Sentence: c       य॒श्चाय॒मस्यां॒ विद्यु॒ति तेजोम॒यो ऽमृतम॒यः पु॒रुषो,
      य॒स् च अय॒म् अस्या॒म् विद्यु॒ति तेजोम॒यस् अमृतम॒यस् पु॒रुषस्

Sentence: d          य॒श्चाय॒मध्यात्मं॒ तैजस॒स्तेजोम॒यो ऽमृतम॒यः पु॒रुषो,
         य॒स् च अय॒म् अध्यात्म॒म् तैजस॒स् तेजोम॒यस् अमृतम॒यस् पु॒रुषस्

Sentence: e          ऽय॒मेव स॒ यो ऽय॒मा॒त्मेद॒ममृ॒तम्,
         अय॒म् एव स य॒स् अय॒म् आत्मा इद॒म् अमृ॒तम्

Sentence: f          इदं ब्र॒ह्मेदँ स॒र्वम्.
         इद॒म् ब्र॒ह्म इद॒म् स॒र्वम्

Verse: M10/K9 
Sentence: a    अयँ॒ स्तनयित्नुः स॒र्वेषां भुता॒नां म॒ध्व्,
   अय॒म् स्तनयित्नु॒स् स॒र्वेषाम् भुता॒नाम् म॒धु

Sentence: b          अस्य स्तनयित्नोः स॒र्वाणि भूता॒नि म॒धु;
         अस्य स्तनयित्नो॒स् स॒र्वाणि भूता॒नि म॒धु

Sentence: c       य॒श्चाय॒मस्मि॒न्त्स्तनयित्नौ॒ तेजोम॒यो ऽमृतम॒यः पु॒रुषो,
      य॒स् च अय॒म् अस्मि॒न् स्तनयित्नौ तेजोम॒यस् अमृतम॒यस् पु॒रुषस्

Sentence: d          य॒श्चाय॒मध्यात्मँ॒ शाब्दः॒ सौवर॒स्तेजोम॒यो ऽमृतम॒यः पु॒रुषो,
         य॒स् च अय॒म् अध्यात्म॒म् शाब्द॒स् सौवर॒स् तेजोम॒यस् अमृतम॒यस् पु॒रुषस्

Sentence: e          ऽय॒मेव स॒ यो ऽय॒मा॒त्मेद॒ममृ॒तम्,
         अय॒म् एव स य॒स् अय॒म् आत्मा इद॒म् अमृ॒तम्

Sentence: f          इदं ब्र॒ह्मेदँ स॒र्वम्.
         इद॒म् ब्र॒ह्म इद॒म् स॒र्वम्

Verse: MK11 
Sentence: a    अयं॒ धर्मः स॒र्वेषां भूता॒नां म॒ध्व्,
   अय॒म् धर्म॒स् स॒र्वेषाम् भूता॒नाम् म॒धु

Sentence: b          अस्य धर्म॒स्य स॒र्वाणि भूता॒नि म॒धु;
         अस्य धर्म॒स्य स॒र्वाणि भूता॒नि म॒धु

Sentence: c       य॒श्चाय॒मस्मि॒न्धर्मे॒ तेजोम॒यो ऽमृतम॒यः पु॒रुषो,
      य॒स् च अय॒म् अस्मि॒न् धर्मे तेजोम॒यस् अमृतम॒यस् पु॒रुषस्

Sentence: d          य॒श्चाय॒मध्यात्मं॒ धार्म॒स्तेजोम॒यो ऽमृतम॒यः पु॒रुषो,
         य॒स् च अय॒म् अध्यात्म॒म् धार्म॒स् तेजोम॒यस् अमृतम॒यस् पु॒रुषस्

Sentence: e          ऽय॒मेव स॒ यो ऽय॒मा॒त्मेद॒ममृ॒तम्,
         अय॒म् एव स य॒स् अय॒म् आत्मा इद॒म् अमृ॒तम्

Sentence: f          इदं ब्र॒ह्मेदँ स॒र्वम्.
         इद॒म् ब्र॒ह्म इद॒म् स॒र्वम्

Verse: MK12 
Sentence: a    इदँ॒ सत्यँ स॒र्वेषां भूता॒नां म॒ध्व्,
   इद॒म् सत्य॒म् स॒र्वेषाम् भूता॒नाम् म॒धु

Sentence: b          अस्य सत्य॒स्य स॒र्वाणि भूता॒नि म॒धु;
         अस्य सत्य॒स्य स॒र्वाणि भूता॒नि म॒धु

Sentence: c       य॒श्चाय॒मस्मि॒न्त्सत्ये॒ तेजोम॒यो ऽमृतम॒यः पु॒रुषो,
      य॒स् च अय॒म् अस्मि॒न् सत्ये तेजोम॒यस् अमृतम॒यस् पु॒रुषस्

Sentence: d          य॒श्चाय॒मध्यात्मँ॒ सात्य॒स्तेजोम॒यो ऽमृतम॒यः पु॒रुषो,
         य॒स् च अय॒म् अध्यात्म॒म् सात्य॒स् तेजोम॒यस् अमृतम॒यस् पु॒रुषस्

Sentence: e          ऽय॒मेव स॒ यो ऽय॒मा॒त्मेद॒ममृ॒तम्,
         अय॒म् एव स य॒स् अय॒म् आत्मा इद॒म् अमृ॒तम्

Sentence: f          इदं ब्र॒ह्मेदँ स॒र्वम्.
         इद॒म् ब्र॒ह्म इद॒म् स॒र्वम्

Verse: MK13 
Sentence: a    इदं॒ मानुषँ स॒र्वेषां भूता॒नां म॒ध्व्,
   इद॒म् मानुष॒म् स॒र्वेषाम् भूता॒नाम् म॒धु

Sentence: b          अस्य मानुष॒स्य स॒र्वाणि भूता॒नि म॒धु;
         अस्य मानुष॒स्य स॒र्वाणि भूता॒नि म॒धु

Sentence: c       य॒श्चाय॒मस्मि॒न्मानुषे॒ तेजोम॒यो ऽमृतम॒यः पु॒रुषो,
      य॒स् च अय॒म् अस्मि॒न् मानुषे तेजोम॒यस् अमृतम॒यस् पु॒रुषस्

Sentence: d          य॒श्चाय॒मध्यात्मं॒ मानुष॒स्तेजोम॒यो ऽमृतम॒यः पु॒रुषो,
         य॒स् च अय॒म् अध्यात्म॒म् मानुष॒स् तेजोम॒यस् अमृतम॒यस् पु॒रुषस्

Sentence: e          ऽय॒मेव स॒ यो ऽय॒मा॒त्मेद॒ममृ॒तम्,
         अय॒म् एव स य॒स् अय॒म् आत्मा इद॒म् अमृ॒तम्

Sentence: f          इदं ब्र॒ह्मेदँ स॒र्वम्.
         इद॒म् ब्र॒ह्म इद॒म् स॒र्वम्

Verse: MK14 
Sentence: a    अय॒मात्मा स॒र्वेषां भूता॒नां म॒ध्व्,
   अय॒म् आत्मा स॒र्वेषाम् भूता॒नाम् म॒धु

Sentence: b          अस्यात्म॒नः स॒र्वाणि भूता॒नि म॒धु;
         अस्य आत्म॒नस् स॒र्वाणि भूता॒नि म॒धु

Sentence: c       य॒श्चाय॒मस्मि॒न्नात्म॒नि तेजोम॒यो ऽमृतम॒यः पु॒रुषो,
      य॒स् च अय॒म् अस्मि॒न् आत्म॒नि तेजोम॒यस् अमृतम॒यस् पु॒रुषस्

Sentence: d          य॒श्चाय॒मात्मा॒ तेजोम॒यो ऽमृतम॒यः पु॒रुषो,
         य॒स् च अय॒म् आत्मा तेजोम॒यस् अमृतम॒यस् पु॒रुषस्

Sentence: e          ऽय॒मेव स॒ यो ऽय॒मा॒त्मेद॒ममृ॒तम्,
         अय॒म् एव स य॒स् अय॒म् आत्मा इद॒म् अमृ॒तम्

Sentence: f          इदं ब्र॒ह्मेदँ स॒र्वम्.
         इद॒म् ब्र॒ह्म इद॒म् स॒र्वम्

Verse: MK15 
Sentence: a    स वा॒ अय॒मात्मा स॒र्वेषां अ॒धिपतिः,
   स वै अय॒म् आत्मा स॒र्वेषाम् अ॒धिपतिस्

Sentence: b          स॒र्वेषां भूता॒नाँ रा॒जा.
         स॒र्वेषाम् भूता॒नाम् रा॒जा

Sentence: c    तद्य॒था रथनाभौ॒ च रथनेमौ चा॒राः स॒र्वे स॒मर्पिता,
   त॒द् य॒था रथनाभौ च रथनेमौ च अ॒रास् स॒र्वे स॒मर्पितास्

Sentence: d          एव॒मे॒वास्मि॒न्नात्म॒नि स॒र्वाणि भूता॒नि स॒र्वे देवाः स॒र्वे लोकाः स॒र्वे प्राणाः स॒र्व एत॒ आत्मा॒नः स॒मर्पिताः.
         एव॒म् एव अस्मि॒न् आत्म॒नि स॒र्वाणि भूता॒नि स॒र्वे देवा॒स् स॒र्वे लोका॒स् स॒र्वे प्राणा॒स् स॒र्वे एते आत्मा॒नस् स॒मर्पितास्

Verse: MK16 
Sentence: a    इदं वै तन्म॒धु दध्य॒ङ्ङाथर्व॒णो ऽश्वि॒भ्यामुवाच.
   इद॒म् वै त॒द् म॒धु दध्य॒ङ् आथर्वण॒स् अश्वि॒भ्याम् उवाच

Sentence: b    त॒देतदृ॒षिः प॒श्यन्नवोचत् {R̥V 1.116.12}:
   त॒द् एत॒द् ऋ॒षिस् प॒श्यन् अवोचत्

Sentence: c    त॒द्वां,
   त॒द् वाम्

Sentence: d          नरा,
         नरा

Sentence: e          सन॒ये दँ॒स उग्र॒म्
         सन॒ये दँ॒सस् उग्र॒म्

Sentence: f    आवि॒ष्कृणोमि,
   आवि॒स् कृणोमि

Sentence: g          तन्यतुर्न॒ वृष्टिं,
         तन्यतु॒स् न वृष्टि॒म्

Sentence: h    दध्य॒ङ्ह यन्म॒ध्वाथर्वणो॒ वाम्
   दध्य॒ङ् ह य॒द् म॒धु आथर्वण॒स् वाम्

Sentence: i    अ॒श्वस्य शीर्ष्णा प्र य॒दीमुवाचे॒ति.
   अ॒श्वस्य शीर्ष्णा प्र य॒द् ईम् उवा॒च इ॒ति

Verse: MK17 
Sentence: a    इदं वै तन्म॒धु दध्य॒ङ्ङाथर्व॒णो ऽश्वि॒भ्यामुवाच.
   इद॒म् वै त॒द् म॒धु दध्य॒ङ् आथर्वण॒स् अश्वि॒भ्याम् उवाच

Sentence: b    त॒देतदृ॒षिः प॒श्यन्नवोचत् {R̥V 1.117.22}:
   त॒द् एत॒द् ऋ॒षिस् प॒श्यन् अवोचत्

Sentence: c    आथर्वणा॒याश्विना दधीचे॒ ऽश्व्यँ शि॒रः प्र॒त्ऐरयतं;
   आथर्वणा॒य अश्विना दधीचे अ॒श्व्यम् शि॒रस् प्र॒ति ऐरयतम्

Sentence: d    स॒ वां म॒धु प्र॒ वोचदृताय॒न्
   स वाम् म॒धु प्र वोचत् ऋताय॒न्

Sentence: e    त्वाष्ट्रं य॒द्,
   त्वाष्ट्र॒म् य॒द्

Sentence: f          दस्राव्,
         दस्रौ

Sentence: g          अपिक॒क्ष्यं वामि॒ति.
         अपिक॒क्ष्यम् वाम् इ॒ति

Verse: MK18 
Sentence: a    इदं वै तन्म॒धु दध्य॒ङ्ङाथर्व॒णो ऽश्वि॒भ्यामुवाच.
   इद॒म् वै त॒द् म॒धु दध्य॒ङ् आथर्वण॒स् अश्वि॒भ्याम् उवाच

Sentence: b    त॒देतदृ॒षिः प॒श्यन्नवोचत्:
   त॒द् एत॒द् ऋ॒षिस् प॒श्यन् अवोचत्

Sentence: c       पु॒रश्चक्रे द्विप॒दः,
      पु॒रस् चक्रे द्विप॒दस्

Sentence: d          पु॒रश्चक्रे च॒तुष्पदः;
         पु॒रस् चक्रे च॒तुष्पदस्

Sentence: e    पु॒रः स,
   पु॒रस् स

Sentence: f          पक्षी॒ भुत्वा,
         पक्षी भुत्वा

Sentence: g          पु॒रः पु॒रुष आ॒विशदि॒ति.
         पु॒रस् पु॒रुषस् आ॒विशत् इ॒ति

Sentence: h    स वा॒ अयं पु॒रुषः स॒र्वासु पूर्षु॒ पुरिशयो;
   स वै अय॒म् पु॒रुषस् स॒र्वासु पूर्षु पुरिशय॒स्

Sentence: i       नैनेन किं॒ चना॒नावृतं,
      न एनेन कि॒म् चन अ॒नावृतम्

Sentence: j          नैनेन किं॒ चना॒सम्वृतम्.
         न एनेन कि॒म् चन अ॒सम्वृतम्

Verse: MK19 
Sentence: a    इदं वै तन्म॒धु दध्य॒ङ्ङाथर्व॒णो ऽश्वि॒भ्यामुवाच.
   इद॒म् वै त॒द् म॒धु दध्य॒ङ् आथर्वण॒स् अश्वि॒भ्याम् उवाच

Sentence: b    त॒देतदृ॒षिः प॒श्यन्नवोचत् {R̥V 6.47.18}:
   त॒द् एत॒द् ऋ॒षिस् प॒श्यन् अवोचत्

Sentence: c    रूपँ॒रूपं प्र॒तिरूपो बभूव,
   रूपँ॒रूपम् प्र॒तिरूपस् बभूव

Sentence: d    त॒दस्य रूपं॒ प्रतिच॒क्षणाये
   त॒द् अस्य रूप॒म् प्रतिच॒क्षणाय

Sentence: e    न्द्रो माया॒भिः पुरुरू॒प ईयते,
   इ॒न्द्रस् माया॒भिस् पुरुरू॒पस् ईयते

Sentence: f    युक्ता॒ ह्यस्य ह॒रयः शता दशे॒त्य्.
   युक्ता॒स् हि अस्य ह॒रयस् शता द॒श इ॒ति

Sentence: g    अयं वै ह॒रयो,
   अय॒म् वै ह॒रयस्

Sentence: h          ऽयं वै॒ दश च सह॒स्रणि बहू॒नि चानन्ता॒नि च.
         अय॒म् वै द॒श च सह॒स्रणि बहू॒नि च अनन्ता॒नि च

Sentence: i    त॒देतद्ब्र॒ह्मापूर्व॒मनपर॒मनन्तर॒मबाह्य॒म्,
   त॒द् एत॒द् ब्र॒ह्म अपूर्व॒म् अनपर॒म् अनन्तर॒म् अबाह्य॒म्

Sentence: j          अय॒मात्मा ब्र॒ह्म स॒र्वानुभूर्.
         अय॒म् आत्मा ब्र॒ह्म स॒र्वानुभूस्

Sentence: k    इ॒त्यनुशा॒सनम्.
   इ॒ति अनुशा॒सनम्


Verse: M20  [pro M 5,20-22 scribit K 6; vide infra]
Sentence: a    अ॒थ वँश॒स्.
   अ॒थ वँश॒स्

Sentence: b    त॒दिदं॒ वयँ
   त॒द् इद॒म् वय॒म्

Sentence: c          शौ॒र्पणाय्याच्,
         शौ॒र्पणाय्याद्

Sentence: d    छौ॒र्पणय्यो   गौ॒तमाद्,
   शौ॒र्पणय्यस्   गौ॒तमाद्

Sentence: e    गौ॒तमो   व॒त्स्याद्,
   गौ॒तमस्   व॒त्स्याद्

Sentence: f    व॒त्स्यो   वा॒त्स्याच्च पाराशर्या॒च्च,
   व॒त्स्यस्   वा॒त्स्याद् च पाराशर्या॒द् च

Sentence: g    पा॒राशर्यः   सां॒क्त्याच्च भा॒रद्वाजाच्च,
   पा॒राशर्यस्   सां॒क्त्याद् च भा॒रद्वाजाद् च

Sentence: h    भा॒रद्वाज   अौदावहे॒श्च शा॒ण्डिल्याच्च,
   भा॒रद्वाजस्   अौदावहे॒स् च शा॒ण्डिल्याद् च

Sentence: i    शा॒ण्डिल्यो   वै॒जवापाच्च गौतमा॒च्च,
   शा॒ण्डिल्यस्   वै॒जवापाद् च गौतमा॒द् च

Sentence: j    गौ॒तमो   वै॒जवापायनाच्च वैष्टपुरेया॒च्च,
   गौ॒तमस्   वै॒जवापायनाद् च वैष्टपुरेया॒द् च

Sentence: k    वै॒ष्टपुरेयः   शा॒ण्डिल्याच्च रौहिणायना॒च्च,
   वै॒ष्टपुरेयस्   शा॒ण्डिल्याद् च रौहिणायना॒द् च

Sentence: l    रौ॒हिणायनः   शौ॒नकाच्चात्रेया॒च्च रैभ्या॒च्च,
   रौ॒हिणायनस्   शौ॒नकाद् च आत्रेया॒द् च रैभ्या॒द् च

Sentence: m    रै॒भ्यः   पौ॒तिमाष्यायणाच्च कौण्डिन्यायना॒च्च,
   रै॒भ्यस्   पौ॒तिमाष्यायणाद् च कौण्डिन्यायना॒द् च

Sentence: n    कौ॒ण्डिन्यायनः   कौ॒ण्डिन्यात्,
   कौ॒ण्डिन्यायनस्   कौ॒ण्डिन्याद्

Sentence: o    कौ॒ण्डिन्यः   कौ॒ण्डिन्यात्,
   कौ॒ण्डिन्यस्   कौ॒ण्डिन्याद्

Sentence: p    कौ॒ण्डिन्यः   कौण्डिन्या॒च्चाग्निवेश्या॒च्च,
   कौ॒ण्डिन्यस्   कौण्डिन्या॒द् च आग्निवेश्या॒द् च

Verse: M21  [pro M 5,20-22 scribit K 6; vide infra],
Sentence: a    आग्निवेश्यः   सौ॒तवात्,
   आग्निवेश्य॒स्   सौ॒तवाद्

Sentence: b    सौ॒तवः   पा॒राशर्यात्,
   सौ॒तवस्   पा॒राशर्याद्

Sentence: c    पा॒राशर्यः   जा॒तुकर्ण्याज्,
   पा॒राशर्यस्   जा॒तुकर्ण्याद्

Sentence: d    जा॒तुकर्ण्यो   भा॒रद्वाजाद्,
   जा॒तुकर्ण्यस्   भा॒रद्वाजाद्

Sentence: e    भा॒रद्वाजो   भारद्वाजा॒च्चासुरायणा॒च्च गौतमा॒च्च,
   भा॒रद्वाजस्   भारद्वाजा॒द् च आसुरायणा॒द् च गौतमा॒द् च

Sentence: f    गौ॒तमो   भा॒रद्वाजाद्,
   गौ॒तमस्   भा॒रद्वाजाद्

Sentence: g    भा॒रद्वाजो   वैजवापायना॒च्,
   भा॒रद्वाजस्   वैजवापायना॒द्

Sentence: h    वै॒जवापायनः   कशिकायनेः,
   वै॒जवापायनस्   कशिकायने॒स्

Sentence: i    कशिकायनि॒र्   घृतकौशिका॒द्,
   कशिकायनि॒स्   घृतकौशिका॒द्

Sentence: j    घृतकौशिकः   पा॒राशर्यात्,
   घृतकौशिक॒स्   पा॒राशर्याद्

Sentence: k    पा॒राशर्यः   पा॒राशर्यात्,
   पा॒राशर्यस्   पा॒राशर्याद्

Sentence: l    पा॒राशर्यः   जा॒तुकर्ण्याज्,
   पा॒राशर्यस्   जा॒तुकर्ण्याद्

Sentence: m    जा॒तुकर्ण्यो   भा॒रद्वाजाद्,
   जा॒तुकर्ण्यस्   भा॒रद्वाजाद्

Sentence: n    भा॒रद्वाजो   भारद्वाजा॒च्चासुरायणा॒च्यस्का॒च्च,
   भा॒रद्वाजस्   भारद्वाजा॒द् च आसुरायणा॒द् यस्का॒द् च

Sentence: o    आसुरायण॒स्   त्रै॒वणेस्,
   आसुरायण॒स्   त्रै॒वणेस्

Sentence: p    त्रै॒वणिर्   अौ॒पजन्धनेर्,
   त्रै॒वणिस्   अौ॒पजन्धनेस्

Sentence: q    अौ॒पजन्धनिर्   आ॒सुरेर्,
   अौ॒पजन्धनिस्   आ॒सुरेस्

Sentence: r    आ॒सुरिर्   भा॒रद्वाजाद्,
   आ॒सुरिस्   भा॒रद्वाजाद्

Sentence: s    भा॒रद्वाजो   आत्रेया॒त्,
   भा॒रद्वाजस्   आत्रेया॒द्

Verse: M22  [pro M 5,20-22 scribit K 6; vide infra],
Sentence: a    आत्रेयो   मा॒ण्टेः,
   आत्रेय॒स्   मा॒ण्टेस्

Sentence: b    मा॒ण्टिर्   गौ॒तमाद्,
   मा॒ण्टिस्   गौ॒तमाद्

Sentence: c    गौ॒तमो   गौ॒तमाद्,
   गौ॒तमस्   गौ॒तमाद्

Sentence: d    गौ॒तमो   वा॒त्स्याद्,
   गौ॒तमस्   वा॒त्स्याद्

Sentence: e    वा॒त्स्यः   शा॒ण्डिल्याच्,
   वा॒त्स्यस्   शा॒ण्डिल्याद्

Sentence: f    छा॒ण्डिल्यः   कै॒शोर्यात्का॒प्यात्,
   शा॒ण्डिल्यस्   कै॒शोर्याद् का॒प्याद्

Sentence: g    कै॒शोर्यः का॒प्यः   कुमारहरिता॒त्,
   कै॒शोर्यस्   का॒प्यस् कुमारहरिता॒द्

Sentence: h    कुमारहरितो   गालवा॒द्,
   कुमारहरित॒स्   गालवा॒द्

Sentence: i    गालवो   विदर्भीकौण्डिन्या॒द्,
   गालव॒स्   विदर्भीकौण्डिन्या॒द्

Sentence: j    विदर्भीकौण्डिन्यो   बा॒भवाद्वत्सनपा॒द्,
   विदर्भीकौण्डिन्य॒स्   बा॒भवाद् वत्सनपा॒द्

Sentence: k    बा॒भवः   पथः सौ॒भरात्,
   बा॒भवस्   पथ॒स् सौ॒भराद्

Sentence: l    प॒न्थाः सौ॒भरो   ऽया॒स्यादाङ्गिरसा॒द्,
   प॒न्थास्   सौ॒भरस् अया॒स्याद् आङ्गिरसा॒द्

Sentence: m    अया॒स्यो आङ्गिरस   आ॒भुतेस्त्वा॒ष्ट्राद्,
   अया॒स्यस्   आङ्गिरस॒स् आ॒भुतेस् त्वा॒ष्ट्राद्

Sentence: n    आ॒भुतिः त्वा॒ष्ट्रो   विश्व॒रूपाद्त्वा॒ष्ट्राद्,
   आ॒भुतिस्   त्वा॒ष्ट्रस् विश्व॒रूपाद् त्वा॒ष्ट्राद्

Sentence: o    विश्व॒रूपस्त्वा॒ष्ट्रो   ऽश्वि॒भ्याम्,
   विश्व॒रूपस्   त्वा॒ष्ट्रस् अश्वि॒भ्याम्

Sentence: p    अश्वि॒नौ   दधि॒च आथर्वना॒द्,
   अश्वि॒नौ   दधि॒चस् आथर्वना॒द्

Sentence: q    दध्य॒ङ्ङाथर्वनो   ऽथर्वनो दै॒वाद्,
   दध्य॒ङ्   आथर्वन॒स् अ॒थर्वनस् दै॒वाद्

Sentence: r    अ॒थर्वा दै॒व   मृत्योः॒ प्राद्धँ॒सनान्,
   अ॒थर्वा   दै॒वस् मृत्यो॒स् प्राद्धँ॒सनाद्

Sentence: s    मृत्युः॒ प्राद्धँ॒सनः   स॒नगात्,
   मृत्यु॒स्   प्राद्धँ॒सनस् स॒नगाद्

Sentence: t    स॒नगः   परेष्टि॒णः
   स॒नगस्   परेष्टि॒णस्

Sentence: u    परेष्टी   ब्र॒ह्मनो
   परेष्टी   ब्र॒ह्मनस्

Sentence: v    ब्र॒ह्म स्व॒यंभु,
   ब्र॒ह्म स्व॒यंभु,

Sentence: w          ब्र॒ह्मणे न॒मः.
         ब्र॒ह्मणे न॒मस्

Next part


This text is part of the TITUS edition of White Yajur-Veda: Brhad-Aranyaka-Upanisad.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.