Page of ms. P: _ Page of ms. L: 626V ძმათმოყუარებაჲ ეგენ;
სტუმრისმოყუარებასა ნუ დაივიწყებთ, რაჲთა მისგან მერმეცა არავე უწყოდეს და ანგელოზნი ისტუმრნენ.
მოიჴსენენით კრულნი, ვითარცა თქუენ მათ თანავე კრულ ხართ, ძუირისხილულნი იგი, რამეთუ თქუენცა ჴორცნივე გასხენ.
პატიოსან არს ქორწილი ყოვლითავე და საწოლი მათი შეუგინებელ; ხოლო მეძავნი და მომრუშენი საჯნეს ღმერთმან.
ვეცხლისუყუარულ იყვენით, სახითა კმა-იყავნ, რომელი-იგი გაქუნდეს. Page of ms. L: 627R რამეთუ თავადმან თქუა: არა დაგიტეო შენ, არცა დაგაგდო შენ.
აწ უკუე საკადრებელ არს ესე თქუმად: უფალი არს მწე ჩემდა, არა შემეშინოს: რაჲ მიყოს მე კაცმან?
Page of ms. L: _ Page of ms. P: 380R მოიჴსენენით წინამძღუარნი თქუენნი, რომელნი გეტყოდეს თქუენ სიტყუათა მათ ღმრთისათა და ხედევდით გამოსლვასა ცხორებისა მათისასა და ჰბაძევდით სარწმუნოებასა მათსა.
იესუ ქრისტჱ გუშინ და დღეს და იგი თავადი არს უკუნისადმდე.
მოძღურებასა მრავალსახესა და უცხოსა ნუ შეიწყნარებთ, რამეთუ კეთილად მადლითა განმტკიცებულ ხართ გულითა, რომლითა ვერარაჲ ირგეს, რომელნი ვიდოდეს მას შინა.
მაქუს ჩუენ საკურთხეველი, რომლისაგან ჭამად ვერ ჴელეწიფების, რომელნი-იგი ტაძარსა მას მსახურებენ.
რომლითაჲ-იგი შეიწირვის საცხოვართა სისხლი ცოდვათათჳს სიწმიდესა Page of ms. P: 380V მას შინა მღდელთმოძღურისა მიერ, ამათნი ჴორცნი დაიწუებოდეს გარეშე ბანაკსა მას.
ამისთჳსცა იესუ, რაჲთა წმიდა-ყოს თჳსითა სისხლითა ერი, გარეშე ბჭეთა ივნო.
აწ უკუე განვიდეთ გარეშე მისა ბანაკსა მას და ყუედრებაჲ იგი მისი მოვიღოთ.
რამეთუ არა მაქუს ჩუენ აქა საყოფელად ქალაქი, არამედ მერმესა მას ვეძიებთ.
ამისთჳს შევსწირავთ მსხუერპლსა ქებისასა მარადის ღმრთისა. ესე იგი არს ნაყოფსა ბაგეთასა და აღსაარებასა სახელისა მისისასა.
ხოლო კეთილისა საქმესა და ზიარებასა ნუ დაივიწყებთ, რამეთუ ესევითარი მსხუერპლნი სათნო არიან ღმრთისა.
Page of ms. P: 300V დაემორჩილენით წინამძღუართა თქუენთა, დაემორჩილენით მათ, რომელნი იღჳძებენ სულთა თქუენთათჳს, ვითარცა-იგი სიტყუაჲ მისცენ Page of ms. P: 301R მათ; რაჲთა სიხარულით ამას ჰყოფდენ და არა სულთ-ითქუმიდენ, რამეთუ არა ადვილ არს ესე თქუენდა.
ილოცევდით ჩუენთჳსცა, გურწამს, რამეთუ კეთილი გონებაჲ გაქუს და კეთილად გნებავს სლვაჲ.
უმეტესადღა გლოცავ ამას ყოფად, რაჲთა ადრე მოვიდე თქუენდა.
ხოლო ღმერთმან მშჳდობისამან, რომელმან აღმოიყვანა მკუდრეთით მწყემსი იგი ცხოვართაჲ დიდითა სისხლითა მით აღთქუმისაჲთა საუკუნოჲთა -- უფალი ჩუენი იესუ,
და განმტკიცენინ თქუენ ყოვლითა კეთილითა ყოფად ნებისა მისისა, რომელმან ყვის ყოველი სათნოებაჲ მისი წინაშე მისსა ქრისტე იესუჲს მიერ ჩუენ შორის; მისა დიდებაჲ უკუნითი უკუნისამდე. ამენ.
Page of ms. P: 291V გლოცავ თქუენ, ძმანო, თავს-იდევით სიტყუაჲ ესე ვედრებისაჲ, დაღაცათუ მცირედ მივწერე თქუენდა.
იცით ტიმოთე, ძმაჲ ჩუენი, რომელი მოვავლინე თქუენდა, რომლისა თანა, ადრე თუ მოვიდეს, გიხილნე თქუენ.
კითხვაჲ არქუთ ყოველთა წინამძღუართა თქუენთა და ყოველთა წმიდათა. გიკითხვენ თქუენ, რომელნი-იგი არიან იტალიაჲთ.
მადლი უფლისა ჩუენისა იესუ ქრისტჱსი თქუენ ყოველთა თანა. ამენ.
