TITUS
Otfrid von Weissenburg, Evangelienbuch
Part No. 32
Previous part

Chapter: 28  
p. 39v    

XXVIII. SPIRITALITER.


Verse: 1     Mit állen unsen kréftin   \   bíttemes nu drúhtin,
Verse: 2     er únsih uns zi léide   \   fon then gúaten ni giscéide;
Verse: 3     Tház wir fon then blíden   \   mit léidu ni giscéiden,
Verse: 4     wir únsih in then ríuon   \   ni múazin io biscówon;
Verse: 5     Thaz sị uns thiu wíntworfa   \   in themo úrdeile hélfa,


p. 40r    


Manuscript page: 40r 
Verse: 6     iz únsih mit giwélti   \   ni firwáe unz in énti;
Verse: 7     Joh in fíure after thíu   \   thar ni brínnen io so spríu,
Verse: 8     wir mit ginádon sinen   \   then wéwon bimíden;
Verse: 9     Thaz hírta sine uns wárten   \   inti únsih io gihálten
Verse: 10     joh únsih ouh nirwánnon   \   uzar then gótes kornon;
Verse: 11     Wir únsih muazin sámanon   \   zen gotes drútthéganon,
Verse: 12     mit wérkon filu riche   \   zi themo hohen hímilriche,
Verse: 13     In hoho gúallichi,   \   theist avur thaz hímilrichi;
Verse: 14     bimíden theso grúnni   \   thuruh thio éwinigon wunni,
Verse: 15     Joh múazin mit then drúton   \   thes hímilriches níoton,
Verse: 16     then spíhiri iamer súazan   \   mit sálidon níazan,
Verse: 17     Thaz héilega kórnhus,   \   thaz wir ni fáren furdir úz,
Verse: 18     mit sínen unsih fásto   \   fréwen thero résto;
Verse: 19     Joh wir thar múazin untar ín   \   blíde fora góte sin
Verse: 20     fon éwon unz in éwon   \   mit then héilegon sélon! Amen.
   Explicit liber evangeliorum primus theotisce conscriptus.



Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.