TITUS
Otfrid von Weissenburg, Evangelienbuch
Part No. 63
Previous part

Chapter: 5  
p. 77v    

V. MORALITER.


Verse: 1     Hiar múgun wir instántan   \   (thaz éigun wir ouh fúntan),
Verse: 2     thaz quement úmmahti   \   fon súntono suhti.
Verse: 3     Tho er mo firbót thio dáti,   \   thaz er ni súntoti,
Verse: 4     thes giwárteti,   \   thaz wírs imo ni wúrti:
Verse: 5     Tho ríht unsih thiu rédina,   \   thaz wír uns warten thánana,


p. 78r    


Manuscript page: 78r 
Verse: 6     thaz súht ni derre uns méra   \   then lídin joh thera séla.
Verse: 7     Bi súslicho dáti   \   so áhtun sin thie líuti,
Verse: 8     joh íagilih in imo ráh   \   thaz er then sámbazdag firbrah.
Verse: 9     Er wialt thera fíra so iz gizám;   \   thaz iro nihéin ni firnám,
Verse: 10     thaz ér mit sinen máhtin   \   was thes dáges druhtin.
Verse: 11     Sie ahtun óuh bi thiu sin mér,   \   wanta in thaz wás filu sér,
Verse: 12     quádun dati mari,   \   thaz got sin fáter wari,
Verse: 13     Jóh er ío bi nóti   \   sih druhtine ébonoti
Verse: 14     in wérkon io gilíchan   \   noh wergin míssilichan.
Verse: 15     Iz íst so giwísso,   \   thoh sie iz ábahotin só,
Verse: 16     thoh iro múates herti   \   iz émmizigen zúrnti,
Verse: 17     Joh io in ábuh kerti   \   thio drúhtines dati,
Verse: 18     thiu zéichan filu máru;   \   thaz wízist thu zi wáru.
Verse: 19     Giwerdo únsih, druhtin, héilen   \   mit líoben drúton thinen,
Verse: 20     joh úns gidua thu sýazo   \   thio unse thúrfti grozo;
Verse: 21     Thaz uns ni wése thaz zi suár,   \   wir únsih io firdrágen hiar,
Verse: 22     joh scóno untar mánnon   \   io émmizigen minnon!


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.