TITUS
Otfrid von Weissenburg, Evangelienbuch
Part No. 84
Previous part

Chapter: 26  
p. 110r    

XXVI. MORALITER.


Verse: 1     Nu Kríst in therera rédinu   \   zéichan duit so ménigu,
Verse: 2     so thịẹ éwarton quátun,   \   iz al in úbil datun:
Verse: 3     Nu duemes wír thaz zuíval   \   thana sár ubar ál,
Verse: 4     gilóubemes thero dáto;   \   iz sízit uns so thráto;
Verse: 5     Kéremes in múate   \   uns sélben io zi gúate
Verse: 6     frámmortes thia gotes dát,   \   só siu thar giscríban stat:
Verse: 7     Sie ríetun was sies wóltin,   \   joh was sies dúan scoltin,
Verse: 8     hárto ginóto,   \   therạ selbun gótes dato;
Verse: 9     Thoh ni spráchun sie in wár,   \   thaz sie gilóubtin gote sár,
Verse: 10     thaz siẹ ịro hérza iz lértin   \   joh frámmortes iz gikértin.
Verse: 11     Wir scúlun unsih sámanon   \   zi réhteren rédinon,
Verse: 12     wir unsih góte líuben   \   joh réhtor gilóuben;


p. 110v    


Manuscript page: 110v 
Verse: 13     Joh quédemes in ríhti,   \   thaz iz lóbosamaz sí,
Verse: 14     állo sino dáti,   \   thoh sị ín si únthrati.
Verse: 15     Sie quádun thes ginúagi,   \   óba man nan nirslúagi,
Verse: 16     tház sie mit giwélti   \   wurtin élilenti
Verse: 17     Joh thárbetin thes síndes   \   thes iro héiminges,
Verse: 18     sar io thés fartes   \   thes éigenen lántes.
Verse: 19     Wir scúlun avur áhton,   \   wir wóla iz ni bidráhton,
Verse: 20     thaz wir thiu wérk éren,   \   in múat uns siu gikéren --
Verse: 21     Tház wir ana énti   \   werden élilenti,
Verse: 22     tharben scónes riches,   \   thes hohen hímilriches,
Verse: 23     Joh birun mórnente   \   in * suaremo élilente,
Verse: 24     in githuíngnisse;   \   thes sín wir io giwísse!
Verse: 25     Thénkemes zi gúate   \   ouh héilemo múate,
Verse: 26     joh frámmortes iz kéren   \   thaz Cáiphas wolta léren.
Verse: 27     Er ríat thaz man biwúrbi,   \   thaz ther man éino irstúrbi,
Verse: 28     thaz sin éinen dóti   \   al then líut gihíalti,
Verse: 29     Joh thuruh sínan einan dólk   \   warị al giháltan ther fólk;
Verse: 30     mámmonto sázi,   \   sid er thaz líb firliazi.
Verse: 31     Giwisso wízun wir tház   \   thaz úns iz harto wóla saz,
Verse: 32     joh uns iz théh filu frám   \   thaz drúhtin hera in wórolt quam;
Verse: 33     Er bi únsih wolta stérban   \   joh éino thaz biwérban,
Verse: 34     thaz wir nirwúrtin furdir ál   \   thuruh then sínan einan fál;


p. 111r    


Manuscript page: 111r 
Verse: 35     Joh únsih thiu sin gúati   \   al gisámanoti,
Verse: 36     wir io írri fuarun,   \   zispréitite warun.
Verse: 37     Thaz ist nu wúntarlichaz thíng   \   úbar thesan wóroltring,
Verse: 38     ubar állo dáti   \   wúntarlih giráti.
Verse: 39     Thanne wóroltkuninga   \   stérbent bi ịro thégena,
Verse: 40     in wíge iogilícho   \   dowent théganlicho:
Verse: 41     So sint se álle gírrit,   \   thes wíges gimérrit,
Verse: 42     thér in thera nóti   \   thar imo fólgeti;
Verse: 43     Joh fállent sie ginóton   \   fora iro fíanton,
Verse: 44     úntar iro hánton   \   spéron joh mit suérton;
Verse: 45     Sie sint in álathrati   \   flúhtig thera dáti,
Verse: 46     irquéman thero wérko   \   flúhtigero githánko.
Verse: 47     Starb afur thérer noti,   \   er unsih sámanoti,
Verse: 48     joh sines tóthes guati   \   zisámane gifúagti;
Verse: 49     Joh thuruh sína smerza   \   wir hábetin baldaz hérza,
Verse: 50     fíanton io thánne   \   zi widarstántanne;
Verse: 51     Thaz wir fró thes tóthes   \   faren héimortes
Verse: 52     in éiginaz githíngi   \   sid thera góringi.
Verse: 53     Síd man nan bifálta,   \   so Cáiphas uns zálta,
Verse: 54     jóh man nan gidótta,   \   so er thar rédinota:
Verse: 55     Nu birun fró in múate   \   bi sínemo einen gúate;
Verse: 56     mit sínemo einen fálle   \   so irlóst er unsih álle!


p. 111v    


Manuscript page: 111v 
Verse: 57     Nu buwen báldo thuruh tház   \   kúningrichi sínaz,
Verse: 58     blíde in giríhti   \   in síneru gisíhti.
Verse: 59     Thaz selba mámmunti   \   thaz dúit uns thiu sin gúati,
Verse: 60     want er éino thaz biwárb   \   thaz er bi únsih irstárb.
Verse: 61     Nu ílemes thes thenken   \   joh émmizigen wírken,
Verse: 62     thaz imo ío liche   \   zemo hóhen hímilriche,
Verse: 63     Joh unsih thára io alle   \   bi námen druhtin zélle,
Verse: 64     álle io bi mánne   \   er unsih thára nenne;
Verse: 65     Thaz sin tód ubar ál   \   ni wése in uns so ídal
Verse: 66     thúruh unsero úbili   \   joh mánagfalto frávili;
Verse: 67     Suntar thés ginénden,   \   mit sínen iamer ménden,
Verse: 68     mit sínen íamer blíden   \   jóh iz ni bimíden! *
Verse: 69     Tház ist in giféstit   \   tház in es mer ni brístit;
Verse: 70     so síz ouh úns allen   \   mit Krístes selbes wíllen! Amen.
   Explicit liber tertius.



Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.