TITUS
Otfrid von Weissenburg, Evangelienbuch
Part No. 122
Previous part

Chapter: 37  
p. 151r    

XXXVII. MORALITER.


Verse: 1     Oba wír wollen wáhten   \   mit gidráhton filu réhten,
Verse: 2     mit githánkon gúaten   \   thes Krístes grabes húeten:
Verse: 3     Thanne scúlun wir gigáhen,   \   thaz wir iz ánafahen
Verse: 4     mit ánderen girátin   \   thanne thése datin;
Verse: 5     Thaz wír thia wahta irfúllen   \   mit ánderemo wíllen,
Verse: 6     mit ánderemo múate,   \   theiz úns irge zi gúate!
Verse: 7     Wir scúlun dragan wáfan   \   joh lazan sín thaz sláfan,
Verse: 8     joh húggen wí er thaz biwárb,   \   thaz er bi únsih irstarb;
Verse: 9     Thaz sin húgolusti   \   in réhteru kústi,
Verse: 10     gilóuba filu fésti   \   in thínes hérzen brústi;
Verse: 11     Mit thíu si Krist bifángan,   \   ni láz thir nan ingángan,


p. 151v    


Manuscript page: 151v 
Verse: 12     bigín tharazua húggen,   \   ni láz thir nan irzúken;
Verse: 13     Thes síh thaz thu es wáltes,   \   joh wóla nan giháltes
Verse: 14     mit réhtemo líbe,   \   theiz thír irge zi líebe!
Verse: 15     Gilóuba thin si kréftig,   \   thaz thír sin tód si githíg,
Verse: 16     mit sínemo wíhe   \   iz frámmort thir io thíhe;
Verse: 17     Thaz únsih so irlóste   \   ther gótes boto dróste,
Verse: 18     joh únsih iogilícho   \   gilocko líublicho,
Verse: 19     So er zen wíbon thar tho sáh   \   joh líublicho zi ín ouh spráh
Verse: 20     líndemo múate,   \   thaz dét er in zi gúate;
Verse: 21     Thaz uns híar in libe   \   thiu fórahta ni klíbe,
Verse: 22     joh wir sin fástmuate   \   zi állemo guate;
Verse: 23     Tház uns si giwíssi   \   thaz sin irstántnissi,
Verse: 24     thaz sinaz líb niuaz,   \   ther éngil kúndta in tho tház.
Verse: 25     Ni dúemes so thie ríetun   \   thie thie knéhta míattun
Verse: 26     mit scázzu joh mit wórton,   \   thie selbun éwarton,
Verse: 27     Mit spénstin ginúagin,   \   tház sies ni giwúagin,
Verse: 28     théiz ni wurti irfúntan   \   thaz drúhtin was irstántan:
Verse: 29     Suntar fáhemes tharazúa   \   mit gilóubu filu frúa,
Verse: 30     mit érnusti snéllo   \   (thaz dúe uns ther guoto wíllo!);
Verse: 31     Giduemes lútmari   \   ménnisgon in wári,
Verse: 32     thaz worolt wízzi thaz gúat   \   thaz Kríst fon themo grábe irstuant;


p. 152r    


Manuscript page: 152r 
Verse: 33     Joh wír thaz mári bringen   \   then thárazua githíngen,
Verse: 34     joh thén thaz wollen áhton   \   mit réhten gidrahton;
Verse: 35     Thaz síe ouh thes ginénden,   \   mit úns sih saman ménden,
Verse: 36     tház ouh ni bimíden,   \   mit úns sih sáman blíden
Verse: 37     In éwon zi gúate   \   mit héilemo múate,
Verse: 38     mit rehten húgulustin   \   in allen wóroltfristin;
Verse: 39     In thíu sin furdir wónenti   \   joh drúhtin iomer lóbonti,
Verse: 40     joh thánkon io gimálon   \   then sínen ginadon,
Verse: 41     Sinera éregrehti   \   joh sínera mahti,
Verse: 42     ther úns gab thaz gimúati   \   thuruh síno gúati,
Verse: 43     Tház wir sin giwísse   \   fon themo irstántnisse!
Verse: 44     wanta drúhtin ist so gúat,   \   bi thiu éigin íamer fráwaz muat;
Verse: 45     Éigun iamer scóna   \   fréwida gizáma
Verse: 46     thúruh síno mílti   \   ána thiheinig énti! Amen.
   Explicit liber quartus.



Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.