TITUS
Otfrid von Weissenburg, Evangelienbuch
Part No. 121
Previous part

Chapter: 36  
p. 150v    

XXXVI. QUOMODO SACERDOTES SUMMI SIGNAVERUNT SEPULCRUM.


Verse: 1     Ni móhtun noh bilínnen   \   thes ármilichen wíllen
Verse: 2     thie selbun éwarton,   \   thaz óugtun tho mit wórton;
Verse: 3     Fúarun sie tho blíde   \   mit themo álten nide,
Verse: 4     folle bálawes in wár   \   zi themo hérizohen sár.
Verse: 5     "Ni hélen wir", quadun, "nóti   \   thaz thínaz héroti,
Verse: 6     thaz ther firdáno io ságeta   \   thes unser múat nu irhógeta.
Verse: 7     Er zálta mihil wúntar   \   then líutin sus io súntar:
Verse: 8     "ih irstántu", quad er zi ín,   \   "so ih thrítten dages tóter bin."
Verse: 9     Nu heiz thes grábes waltan,   \   fora júngoron sinen háltan,
Verse: 10     thaz sie únsih ni bisuíchen,   \   tharazúa ni firslíchen;
Verse: 11     Tház sie thaz ninthéken,   \   mit stálu nan nirzúcken,
Verse: 12     noh ínan thar githíuben,   \   then líutin sih gilíuben;
Verse: 13     So zéllent sino gúati,   \   thaz er fon tóde irstuanti,
Verse: 14     joh girrent mér thie líuti   \   thanne ouh thérer dati."
Verse: 15     Quad ér tho thaz sie ríetin,   \   wío sie nan gihíaltin;


p. 151r    


Manuscript page: 151r 
Verse: 16     quad síh in thaz giráti   \   fúrdir wiht ni dáti.
Verse: 17     Sie slíumo thes sar zílotun,   \   thaz grab gizéinotun
Verse: 18     sar io in théru fristi   \   mit míhileru fésti,
Verse: 19     Io sar thén gangon   \   mit giwáfniten mánnon,
Verse: 20     thaz mán nan ni firstáli,   \   mit méginu ouh ni námi.
Verse: 21     So síe sin mer tho wíaltun,   \   thaz gráb ouh baz bihíaltun:
Verse: 22     so wír io mer giwísse   \   in themo irstántnisse;
Verse: 23     Wánta tho iz mártun   \   thie then bálo dátun,
Verse: 24     joh thie thar húattun ouh tho sín:   \   tho móhta man es báld sin!


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.