TITUS
Otfrid von Weissenburg, Evangelienbuch
Part No. 120
Previous part

Chapter: 35  
p. 149v    

XXXV. QUOMODO JOSEPH ET NICHODEMUS SEPELIERUNT JESUM.


Verse: 1     Tho quam ein édiles man   \   baldlícho, so imo zám,
Verse: 2     er theso dáti zurnta,   \   so gúat thegan scólta.
Verse: 3     Ni máchotạ er thio dáti   \   noh sélbaz thaz giráti,
Verse: 4     ni wás in themo wíllen,   \   er súlih wolti irfúllen.
Verse: 5     Giang er báldo tho fon ín   \   zi themo hérizohen ín,
Verse: 6     bat man gábi imo then mán   \   thóh tho so bilíbanan,
Verse: 7     Thaz múasi er thara wísen,   \   then líchamon lósen,
Verse: 8     thárazua ouh húggen,   \   in thaz gráb leggen.
Verse: 9     Pilátus quad er dáti   \   sóso er selbo báti;
Verse: 10     híaz er imo irgéban sar   \   then selbon líchamon thár.
Verse: 11     Lis allo búah thio the sín:   \   ni fíndist iz, in wár min,
Verse: 12     thaz mán io thaz gidáti,   \   so diuran scáz irbati;
Verse: 13     Thaz ér ioman in wórolti   \   súlih dreso légiti
Verse: 14     in ré odo in bára,   \   thaz ságen ih thir in wára;
Verse: 15     Thaz was éngilo wérd   \   joh hímilriches álles,
Verse: 16     érdun joh thes séwes,   \   thoh sie so dátin lewes!
Verse: 17     Nichódemus ther gúato,   \   er quám thar tho gimúato,
Verse: 18     unz ér nan tho thána nam,   \   ther náhtes er ju zi ímo quam;


p. 150r    


Manuscript page: 150r 
Verse: 19     Ther bráng mit imo in wára   \   sálbun filu díura,
Verse: 20     Krist zi sálbonne,   \   so thar was sítu thanne.
Verse: 21     Lóstun nan tho thánana   \   thie zuéne richun thégana,
Verse: 22     thie drúhtines gidríuon   \   joh sélben Krístes líubon.
Verse: 23     Thiu wíb gifuaro stuantun,   \   thiz allaz scóuotun,
Verse: 24     siẹ wárun wártenti   \   wára man nan légiti;
Verse: 25     Tház siu thes gifártin,   \   oba sie nan thána fuartin,
Verse: 26     ódo thaz gisítotin,   \   gifúaro thar gilégitin;
Verse: 27     Thaz síe nan muasin fúaren,   \   gisuáslicho birúaren,
Verse: 28     joh in álahalbon   \   then líaban man gisálbon;
Verse: 29     Joh múasin thes giflízan,   \   gisuáslicho biríazan,
Verse: 30     ouh in then árumen   \   gisuáslicho bichúmen.
Verse: 31     Biwúntun sie tho scóno   \   thia selbun líh frono
Verse: 32     mit líninemo dúache   \   joh sórglichemo rúache;
Verse: 33     Mit líninemo sábane,   \   thár tho zi bigrábanne,
Verse: 34     mit dúachon filu kléinen   \   joh harto filu réinen.
Verse: 35     Légita nan tho ther éino   \   in sínaz grab réino,
Verse: 36     óuh in alaníuaz,   \   in félison irgrábanaz.
Verse: 37     Wúllun se, ér se fuarin héim,   \   tharafúri míhilan stéin,
Verse: 38     thaz dréso thar gibúrgun   \   joh héimortes wúrbun.
Verse: 39     Thiu wíb sar thés fartes   \   giangun héimortes,


p. 150v    


Manuscript page: 150v 
Verse: 40     ouh zi thén rachon   \   sálbun iro máchon.
Verse: 41     Érda híalt uns tho in wár   \   scazzo díuroston thár,
Verse: 42     dréso thar gibórgan   \   unz súnnun dag in mórgan;
Verse: 43     Tho gíang uns úf wunna,   \   thiu éwinigu súnna,
Verse: 44     joh ouh sálida ubar ál,   \   so mán hiar fora ságen scal!


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.