TITUS
Otfrid von Weissenburg, Evangelienbuch
Part No. 119
Previous part

Chapter: 34  
p. 148v    

XXXIV. TERRA MOTA EST, PETRAE SCISSAE SUNT.


Verse: 1     Érda bíbinota,   \   thiu gótes kraft sies nótta,
Verse: 2     ouh in thía meina   \   so spíaltun sih thie stéina.
Verse: 3     Thiu grébir sih indátun,   \   joh giangun úz thie dótun


p. 149r    


Manuscript page: 149r 
Verse: 4     hera in wóroltrichi,   \   thie sáligun lichi.
Verse: 5     Ih scal thir wúntar redinon:   \   sie gíangun ir then grébiron
Verse: 6     zen líutin in thia búrg in   \   joh iróugtun sih ín,
Verse: 7     Thaz ouh súlih mari   \   únfarholan wári,
Verse: 8     joh állo theso dáti   \   ther selbo líut irknati.
Verse: 9     Ih zellu híar ubarlút:   \   irstúant tho manag gótes drut,
Verse: 10     mit selben drúhtine   \   liebe scálka sine.
Verse: 11     Thaz ward állaz so gidán,   \   tho selbo drúhtin wolta irstán,
Verse: 12     thes wír nu birun blídi;   \   er was thaz frúmikidi.
Verse: 13     Thaz zéllent evangélion   \   al so ih thir rédion;
Verse: 14     iz ságent filu scóno   \   thie selbun búah frono.
Verse: 15     Ther selbo scúldheizo   \   irquám es filu héizo,
Verse: 16     after thésen werkon   \   gistuant er góte thankon.
Verse: 17     Quad wári er ana zuíval   \   thes giwéltig ubar ál,
Verse: 18     joh deta lútmari,   \   er gotes sún wari.
Verse: 19     Thie líuti kertun sáre   \   mit míhilemo sére,
Verse: 20     wuntun héim tho spáto   \   thero ármilichun dáto;
Verse: 21     Thie dáti sie tho rúun   \   joh iro brústi bluun,
Verse: 22     joh giangun sar thés fartes   \   al serag héimortes.
Verse: 23     Stúantun thar tho férron   \   álle sine kúndon
Verse: 24     jámaragemo múate,   \   iz irgíang in thoh zi gúate.


p. 149v    


Manuscript page: 149v 
Verse: 25     Klágetun thó thiu selbun wíb   \   thaz ira éigena lib,
Verse: 26     thiu mit ímo warun,   \   zen óstoron quamun.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.