TITUS
Otfrid von Weissenburg, Evangelienbuch
Part No. 124
Previous part

Chapter: 1  
p. 154r    

Manuscript page: 154r 
I. CUR DOMINUS IGNOMINIAM CRUCIS ET NON ALIAM PRO NOBIS MORTEM PERTULERIT.


Verse: 1     Ist fílu manno wúntar,   \   thaz zéllu ih hiar nu súntar,
Verse: 2     ziu drúhtin hiar in wórolti   \   thes krúzes tod irwéliti,
Verse: 3     Tho er únsih hiar so nérita,   \   fon fíanton irrétita,
Verse: 4     nam uzar hérten banton,   \   fon fíanto hánton;
Verse: 5     Thaz sínes selben gúati   \   thaz éina was gimúati,
Verse: 6     in súlicheru nóti   \   er uns ginádoti.
Verse: 7     Wir wizun ana zwíval   \   thaz er thes wíalt ubar ál,
Verse: 8     er bi unsih tod thulti,   \   so wío so er selbo wólti;
Verse: 9     Ob ávur wir iz áhton,   \   joh wóla iz al bidráhton,
Verse: 10     thanne íst uns ouh thaz wúntar   \   ein gináda suntar.
Verse: 11     Mit fíuru sie nan brántin,   \   mit wázaru ouh irquáltin,
Verse: 12     odo óuh mit stéinonne:   \   mit wiu ségenotis thu thih thánne?
Verse: 13     Uns ist frúma in thiu gizált   \   joh ségan filu mánagfalt,
Verse: 14     sálida zi líbe,   \   thaz scádo uns hiar ni klíbe.
Verse: 15     Íst uns thaz girústi,   \   brúnia alafésti,


p. 154v    


Manuscript page: 154v 
Verse: 16     joh ist uns hélm ouh ubar tház   \   joh wáfan alawássaz.
Verse: 17     Nist wíht in themo bóume   \   thaz fríuntilih gilóube,
Verse: 18     thes mánnilih giwís si,   \   thaz thar úbbigaz si.
Verse: 19     Thes krúces horn thar óbana   \   thaz zéigot uf in hímila;
Verse: 20     thie árma joh thie hénti   \   thie zeigont wóroltenti;
Verse: 21     Ther selbo míttilo bóum   \   ther scówot thesan wóroltfloum
Verse: 22     (es ist zi zéllenne ginúag),   \   ther then líchamon druag.
Verse: 23     Nist wíht in themo bóume   \   thaz fríuntilih gilóube,
Verse: 24     thes mánnilih giwís si,   \   thaz thar úbbiges si.
Verse: 25     Thaz sih es thára wentit,   \   theiz innan érdu stentit --
Verse: 26     nim góuma waz thaz méinit,   \   theiz untar érda zeinit:
Verse: 27     Mit thíu ist thar bizéinit,   \   theiz ímo ist al giméinit
Verse: 28     in érdu joh in hímile   \   inti in ábgrunte ouh hiar nídare.
Verse: 29     Bi thiu níst in themo bóume   \   thaz mánnilih gilóube,
Verse: 30     thes fríuntilih giwís si,   \   thaz thar úbbiges si.
Verse: 31     Leg iz nídarhaldaz --   \   iz zeigot ímo iz allaz,
Verse: 32     fíar hálbun umbiríng   \   állan thesan wóroltring;
Verse: 33     Ellu, zéllu ih thir, thiu thíng   \   (theist ávur therer wóroltring),
Verse: 34     ist íawiht mera ouh fúrdir --   \   theist sin, gilóubi thu mir.
Verse: 35     Nist ávur in themo bóume   \   thaz fríuntilih gilóube,
Verse: 36     thes mánnilih giwís si,   \   thaz thar úbbiges si.


p. 155r    


Manuscript page: 155r 
Verse: 37     Líggez, ságen ih thir tház,   \   odo ist iz úfhaldaz:
Verse: 38     giwisso wízist thu tház,   \   io zeigot ímo iz allaz;
Verse: 39     Éllu thisu wúntar   \   zeigot ímo iz suntar,
Verse: 40     iz rihtit wóroltenti   \   zi sínes selbes hénti.
Verse: 41     Bi thiu níst in themo bóume   \   thaz mánnilih gilóube,
Verse: 42     thes fríuntilih giwís si,   \   thaz thar úbbiges si.
Verse: 43     Wara thénkistu, lés!   \   wio még iz wesan álles?
Verse: 44     then rúarta mit theru líchi   \   ther rihtit hímilrichi;
Verse: 45     Bigóz inan zi gúate   \   mit sínes selbes blúate,
Verse: 46     er sálta (weist es méra!)   \   in thémo sina séla.
Verse: 47     Bi thiu níst in themo bóume   \   thes mánnilih gilóube,
Verse: 48     thes fríuntilih giwís si,   \   thaz thar úbbiges si.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.