TITUS
Otfrid von Weissenburg, Evangelienbuch
Part No. 125
Previous part

Chapter: 2  
p. 155r    

II. DE UTILITATE CRUCIS.


Verse: 1     Nu scúlun wir unsih rígilon   \   mit thes krúces ségonon,
Verse: 2     mit Krístes selben wórton   \   widar fíanton.
Verse: 3     Thaz scúlun wir zi wáron   \   in unsen éndin málon,
Verse: 4     in unsemo ánnuzze,   \   thaz uns iz wóla sizze;
Verse: 5     Zi thíu ouh in themo énde,   \   thaz unser múat sih ménde
Verse: 6     súlichera rústi   \   ingegin ákusti.
Verse: 7     Wir duemes tház, ih sagen thir éin,   \   mit unsen fíngoron zuein;
Verse: 8     sint zuéne ouh, nim es góuma,   \   thes selben krúces bóuma.


p. 155v    


Manuscript page: 155v 
Verse: 9     Drag thú, gilóubi thu mir,   \   then gúndfanon anan thír,
Verse: 10     in hóubite inti in brústin,   \   in thines hérzen lústin;
Verse: 11     Nist fíant hiar in ríche   \   nub ér hiar fora intwíche,
Verse: 12     ther diufal sélbo thuruh nót,   \   so ér tharana scówot!
Verse: 13     Mit thiu wúrtun wir giróchan   \   joh kráft sin thuruhstóchan,
Verse: 14     mit thiu wárd er al birédinot,   \   thaz íamer er ni irkóbarot;
Verse: 15     Mit thíu ward filu hárto   \   selb ther wídarwerto
Verse: 16     giwúntot joh firdámnot   \   rumo in éwinigan not!
Verse: 17     Dua theiz in thír scine   \   intiz dragen lídi thine;
Verse: 18     gilóubi mír in war mín:   \   harto scíuhit er thín.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.