TITUS
Otfrid von Weissenburg, Evangelienbuch
Part No. 126
Previous part

Chapter: 3  
p. 155v    

III. SIGNACULUM CRUCIS.


Verse: 1     Gib, druhtin, ségan sinan   \   in líchamon mínan,
Verse: 2     joh theiz io híar in libe   \   minera séla klibe!
Verse: 3     Si, drúhtin, io ther ségan sin   \   in allon ánahalbon mín,
Verse: 4     thaz fíant io zi wáre   \   min wérgin ni gifáre;
Verse: 5     Thaz ih mit thémo thuruh Kríst   \   si úmbikirg biféstit
Verse: 6     in líchamen joh múate   \   zi allemo ánaguate;
Verse: 7     Biscírmen sino súazi   \   óugun joh thie fúazi,
Verse: 8     min hérza ouh mir biwérre,   \   thaz fíant mir ni dérre!
Verse: 9     Mit thíu sin mino brústi   \   giségonot in fésti,
Verse: 10     hóubit joh thio hénti,   \   thie lídi al unz in énti;


p. 156r    


Manuscript page: 156r 
Verse: 11     Bifángan si ih mit réino,   \   thanne ih in mír iz zeino,
Verse: 12     sar io thía warba   \   in alla ánahalba;
Verse: 13     Thaz scírme mih in brústin   \   fon ármalichen lústin,
Verse: 14     in hérzen joh in dátin,   \   fon úbilen githáhtin!
Verse: 15     Mit thiu si ih ío thuruh nót   \   al úmbizirg biséganot,
Verse: 16     thaz fíant sih ni ménde,   \   er stát in mir io fínde;
Verse: 17     Mit thiu si ih ío bifangan   \   joh fíanton ingángan,
Verse: 18     bifólahan sinen séganon   \   joh allen gótes theganon;
Verse: 19     Thaz mih mit sínu nide   \   ther fíant io bimíde,
Verse: 20     joh mir híar zi libe   \   gúatalih io klíbe!


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.