TITUS
Otfrid von Weissenburg, Evangelienbuch
Part No. 127
Previous part

Chapter: 4  
p. 156r    

IV. DE RESURRECTIONE DOMINI VESPERE SABBATI.


Verse: 1     Thuruh thes krúces kréfti   \   joh selben Krístes mahti
Verse: 2     so quéme mir frámmort nu in múat,   \   wí er fon themo grábe irstuant;
Verse: 3     Joh wío nan fríuntilih gisáh,   \   ouh mit then júngoron sprah,
Verse: 4     wio hárto er thie gifréwita   \   joh gúatilih in ságeta!
Verse: 5     Al thiz úngirati   \   joh thie égislichun dáti,
Verse: 6     thaz wir hiar fóra quatun,   \   in fríadag sie iz dátun.
Verse: 7     In mórgan was in wára   \   thero óstorono fíra,
Verse: 8     was ouh thes dáges diuri   \   thar hárto filu mári.
Verse: 9     Thes súnnun abandes sár   \   irhúabun sih thiu wíb in war,
Verse: 10     ni dátun sies tho bítun,   \   zi themo grábe se iltun.


p. 156v    


Manuscript page: 156v 
Verse: 11     Wanu íagilih tho ílti   \   thuruh thio spatun zíti;
Verse: 12     thaz thiu fíra irduálta,   \   thiu mínna iz in irfúlta.
Verse: 13     Drúagun se iro sálbun   \   mit in sar thía warbun,
Verse: 14     líobemo mánne,   \   Krist zi sálbonne;
Verse: 15     Joh giangun áhtonti,   \   thaz wésan thaz ni móhti,
Verse: 16     thaz síe thes steines búrdin   \   fon themo grábe irwullin;
Verse: 17     Sie tháhtun thaz sie erbátin   \   thie mán thie thaz gidátin;
Verse: 18     was íro kraft zi nídiri   \   ingegin thes stéines hébigi.
Verse: 19     Thes gánges sie iltun gáhun   \   joh thaz gráb gisáhun,
Verse: 20     in míhilan únwan   \   thaz ketti fúndun indan.
Verse: 21     Tho ward sar thía wila   \   mihil érdbiba,
Verse: 22     hárto mihil égiso,   \   bi thiu hintarquámun se só.
Verse: 23     Sih scútita iogilícho   \   thiu erda kráftlicho,
Verse: 24     joh si slíumo thar irgáb   \   thaz dréso thaz in íru lag.
Verse: 25     Quam éngil ein in gáhi   \   fon hímilriches hóhi,
Verse: 26     er walzta thána sar then stéin,   \   so er nan érist biréin.
Verse: 27     (Ni thaz er thara giílti,   \   thaz er then wég girumti,
Verse: 28     suntar man irknáti   \   thio séltsano dáti,
Verse: 29     Joh ouh mán thaz wéstin   \   thaz Kríst stuant ir then réstin;
Verse: 30     gisiunes árumi er gáb   \   in thaz ítala gráb.)
Verse: 31     Gisíuni sin was, wúnna!   \   so scónaz io so súnna;


p. 157r    


Manuscript page: 157r 
Verse: 32     in wizes snéwen farawi   \   so wás al sin gigárawi.
Verse: 33     Tho híntarquamun * nóti   \   thár in alathráti,
Verse: 34     joh fórahtun in tho gáhun   \   thie thes grábes sahun;
Verse: 35     Sie wúrtun selb so dóte   \   in thémo selben nóte.
Verse: 36     ther éngil bi einen líbon   \   spráh tho sar zen wíbon:
Verse: 37     "Wib, ih spríchu thara zi íu:   \   wiht ni fórehtet ir iu!
Verse: 38     drof nintwérfet iuer múat;   \   ir quamut héra thuruh gúat.
Verse: 39     Wio mag wésan thaz io só   \   thaz únser iuih égiso?
Verse: 40     ja bírun wir in wára   \   iu éigene gibúra.
Verse: 41     Ih weiz iua hérafart:   \   ir súechet unsan héilant,
Verse: 42     then these líuti irslúagun   \   joh híar nan ouh bigrúabun;
Verse: 43     Thén sie hiar gidóttun,   \   mit kruce mártolotun,
Verse: 44     in thémo sie sih ráchun,   \   mit iro spéron stachun.
Verse: 45     Ir ni thúrfut in wár,   \   ni éigut ir sin wíht hiar;
Verse: 46     er wihtes úngidan ni líaz,   \   soso er sélbo gihiaz;
Verse: 47     Er ist fon héllu irwúntan   \   joh úf fon tóde irstantan,
Verse: 48     ni thúrfut ir nan ríazan;   \   ja wás iuz er gihéizan.
Verse: 49     Er nam in tódes riche   \   sigi kráftliche,
Verse: 50     mit ímo er mer ni fíhtit   \   joh fúrdir sih ni irríhtit.
Verse: 51     Ih zéllu iu ouh scono líubi:   \   thar nám er sin giróubi,
Verse: 52     sid er nan thár ubarwánt,   \   joh leitta in ánderaz lant,


p. 157v    


Manuscript page: 157v 
Verse: 53     In himilgúallichi,   \   sines sélbes richi,
Verse: 54     kráftlicho filu frám,   \   so imo sélben gizam;
Verse: 55     So imo sélben gizam,   \   al thaz er tóde ginam;
Verse: 56     giloubet wórtes mines:   \   ni liaz wíht er thar thes sínes.
Verse: 57     Íagilih hiar séhan mag   \   war ther líchamo lag,
Verse: 58     war ínan ouh gibúrgun   \   thie mán thie thaz biwúrbun.
Verse: 59     Nu scúlut ir sar io giílen   \   zi then júngoron sínen,
Verse: 60     mit blídlichemo wíllen   \   thiu minu wórt in zellen.
Verse: 61     Ni due ouh Pétrus nu thaz mín,   \   ni er sih fúage thara zi ín;
Verse: 62     gifrewet állen in thaz múat,   \   want er fon tóde hiutu irstúant;
Verse: 63     In múat in iz ni lázen,   \   ouh wíht inan ni ríazen;
Verse: 64     ni thúrfun sie in war mín,   \   er sprichit scíoro mit in."


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.