| Ms. line: 13 | Ganganti náh themo sevvu |
| Ms. line: 14 | Galileę gisáh zuuene bruoder, |
| Ms. line: 15 | Simonem, thie giheizan ist Petrus, |
| Ms. line: 16 | inti Andream sinan bruoder, |
| Ms. line: 17 | sententi iro nezzi in séo, |
| Ms. line: 18 | uuanta sie uuarun fiscara. |
| Ms. line: 19 | Inti quad hér ín: quemet after mír, |
| Ms. line: 20 | inti íh tuon ívvuih úuesan |
| Ms. line: 21 | manno fiscara; |
| Ms. line: 22 | sie thó sliumo fórlázenen nezzin |
| Ms. line: 23 | folgetun imo. |
| Ms. line: 24 | Thanan tho furdir ganganti |
| Ms. line: 25 | gisah andare zuene bruoder, |
| Ms. line: 26 | Iacobum Zebedeoen sún, |
| Ms. line: 27 | inti Iohannem sinan bruoder |
| Ms. line: 28 | in skeffe mít Zebedeoén iro fater, |
| Ms. line: 29 | rihtenti iro nezi, inti gihalota sie; |
| Ms. line: 30 | sie sliumo forlazzanen nezin |
| Ms. line: 31 | inti fater folgetun imo. |
| Ms. line: 32 | Vuard thó gitán, |
| Ms. line: 1 | mít thiu thie menigi ánafielun in inan, |
| Ms. line: 2 | thaz sie gihórtin gotes uuort, |
| Ms. line: 3 | stuont hér náh themo uuage |
| Ms. line: 4 | Genesareth, inti gisah zuei skef |
| Ms. line: 5 | stantantu náh themo uuage; |
| Ms. line: 6 | thie fiscara stigun nidar, |
| Ms. line: 7 | thaz sie fleuuitin iro nezzi. |
| Ms. line: 8 | Ársteig hér thó in einaz skef |
| Ms. line: 9 | thaz thar uuas Simones, |
| Ms. line: 10 | bát hér inan, thaz her íz fon erdu |
| Ms. line: 11 | arleitti ein luzzil, inti sizzenti |
| Ms. line: 12 | lérta fon themo skeffe thie menigi. |
| Ms. line: 13 | So hér thó bilan zi sprehhanne, |
| Ms. line: 14 | tho quad her zí Simone: |
| Ms. line: 15 | scalt thaz skef in tiufi, |
| Ms. line: 16 | inti zilazet iuuuaru nezziu |
| Ms. line: 17 | zi fahenne. Thó antuurtita Simon |
| Ms. line: 18 | inti quad imo: meistar, alla thesa náht |
| Ms. line: 19 | arbeitente niouuiht ni gifiengumes, |
| Ms. line: 20 | in thinemo uuorte íntlazu ih thaz nezzi. |
| Ms. line: 21 | Mit thiu sie thó thaz tátun, |
| Ms. line: 22 | bifiengun fisco ginuhtsama menigi, |
| Ms. line: 23 | brast thaz iro nezzi. |
| Ms. line: 24 | Bouhnitun iro ginozun |
| Ms. line: 25 | thie thár uuarun in andaremo skeffe, |
| Ms. line: 26 | thaz sie quamin inti ín hulphin. |
| Ms. line: 27 | Quamun sie thó inti gifultun |
| Ms. line: 28 | beidu thiu skef só thaz siu suffun. |
| Ms. line: 29 | Mit thiu thaz thó gisah Simon Petrus, |
| Ms. line: 30 | fiel zi thés heilantes knevvun inti quad: |
| Ms. line: 31 | argang fon mír, uuanta íh suntig man bin, |
| Ms. line: 32 | truhtin. Forhta bifieng inan |
| Ms. line: 1 | inti alle thie mit imo uuarun |
| Ms. line: 2 | in thero fisco fahungu |
| Ms. line: 3 | thie sie thó gifiengun, |
| Ms. line: 4 | samasó Iacobum inti Iohannem |
| Ms. line: 5 | Zebedeoen suni, |
| Ms. line: 6 | bithiu sie uuarun Simones ginoza. |
| Ms. line: 7 | Thó quad thér heilant zi Simone: |
| Ms. line: 8 | ni curi thír forhten, |
| Ms. line: 9 | fon hinan giu fahistu man. |
| Ms. line: 10 | Giloubtun in inan thó sine iungiron |
| Ms. line: 11 | inti árleitten fon erdu skeffun |
| Ms. line: 12 | forlazenen allen folgetun imo. |
