| Ms. line: 19 | Quad tho: sum man |
| Ms. line: 20 | habata zuuene suni. |
| Ms. line: 21 | Quad tho der iungoro |
| Ms. line: 22 | fon then themo fater: fater, gib mir |
| Ms. line: 23 | teil thero hehti |
| Ms. line: 24 | thiu mir gibure. |
| Ms. line: 25 | Her tho teilta thia héht. |
| Ms. line: 26 | Nalles after manegen tagon |
| Ms. line: 27 | gisamonoten allen |
| Ms. line: 28 | ther iungoro sun |
| Ms. line: 29 | elilentes fuor |
| Ms. line: 30 | in uerra lantscaf |
| Ms. line: 31 | inti dar ziuuarf sina héht |
| Ms. line: 1 | lebento uirnlustigo. |
| Ms. line: 2 | Inti after thiu her iz al uorlós, |
| Ms. line: 3 | uuard hungar strengi |
| Ms. line: 4 | in thero lantscefi; her bigonda tho |
| Ms. line: 5 | armen. Inti gieng inti zuoclebeta |
| Ms. line: 6 | einemo thero burgliuto |
| Ms. line: 7 | thero lantscefi, inti santa inan |
| Ms. line: 8 | in sin thorf, thaz her fuotriti suuin. |
| Ms. line: 9 | Inti girdinota gifullen sina uuamba |
| Ms. line: 10 | fon siliquis theo thiu suuin azzun, |
| Ms. line: 11 | inti nioman imo ni gab. |
| Ms. line: 12 | Her tho in sih giuuorban quad: |
| Ms. line: 13 | vvuo manege asnere mines fater |
| Ms. line: 14 | ginuht habent brotes, |
| Ms. line: 15 | ih uoruuirdu hier hungere! |
| Ms. line: 16 | Arstantu inti faru zi minemo fater |
| Ms. line: 17 | inti quidu imo: fater, ih suntota |
| Ms. line: 18 | in himil inti fora thir, |
| Ms. line: 19 | inti ni bim iu uuirdig |
| Ms. line: 20 | ginemnit uuesan thin sun: |
| Ms. line: 21 | tuo mih so einan |
| Ms. line: 22 | fon thinen asnerin. |
| Ms. line: 23 | Inti arstantanti quam zi sinemo fater. |
| Ms. line: 24 | Mittiu thanne noh ferro uuas, |
| Ms. line: 25 | gisah inan sin fater, |
| Ms. line: 26 | inti miltida giruorit uuard |
| Ms. line: 27 | inti ingegin louffenti fiel |
| Ms. line: 28 | ubar sinan hals inti custa inan. |
| Ms. line: 29 | Tho quad imo der sun: |
| Ms. line: 30 | fater, ih suntota in himil |
| Ms. line: 31 | inti fora thir: iu ni bim |
| Ms. line: 1 | uuirdig ginemnit uuesan thin sun. |
| Ms. line: 2 | Tho quad ther fater zi sinen scalcun: |
| Ms. line: 3 | sliumo bringet thaz erira giuuati |
| Ms. line: 4 | inti giuuatet inan inti gebet fingirin |
| Ms. line: 5 | in sina hant inti giscuohiu in fuozi, |
| Ms. line: 6 | inti leitet gifuotrit calb |
| Ms. line: 7 | inti arslahet, inti ezzemes |
| Ms. line: 8 | inti goumumes, uuanta theser min sun |
| Ms. line: 9 | tóot uuas inti arqueketa, |
| Ms. line: 10 | foruuard inti funtan uuard. |
| Ms. line: 11 | Bigondun tho goumon. |
| Ms. line: 12 | Uuas sin sun altero |
| Ms. line: 13 | in achre, inti mittiu tho quam |
| Ms. line: 14 | inti nalichota themo húse, |
| Ms. line: 15 | gihorta gistimmi sang inti chor. |
| Ms. line: 16 | Inti gruozta einan fon then scalcun |
| Ms. line: 17 | inti frageta uuaz thiu uuarin. |
| Ms. line: 18 | Ther tho quad imo: |
| Ms. line: 19 | thin bruoder quam, inti arsluog |
| Ms. line: 20 | thin fater gifuotrit calb, |
| Ms. line: 21 | bithiu inan heilan intfieng. |
| Ms. line: 22 | Unuuerdota her thaz inti ni uuolta |
| Ms. line: 23 | ingangan. Sin fater |
| Ms. line: 24 | uzgangenti bigonda tho fragen inan. |
| Ms. line: 25 | Her tho antuurtenti quad sinemo fater: |
| Ms. line: 26 | senu so manigiu iar theonon thir |
| Ms. line: 27 | inti neo in altre thin bibot |
| Ms. line: 28 | ni ubargeng, inti neo in altre |
| Ms. line: 29 | ni gabi mir zikin, |
| Ms. line: 30 | thaz ih minen friuntun goumti; |
| Ms. line: 31 | ouh after thiu theser thin sun |
| Ms. line: 1 | ther dar fraz alla sina heht |
| Ms. line: 2 | mit huorun quam, |
| Ms. line: 3 | arsluogi imo gifuotrit calb. |
| Ms. line: 4 | Her tho quad imo: |
| Ms. line: 5 | kind, thu bis simblum mit mir, |
| Ms. line: 6 | inti alliu minu thinu sint: |
| Ms. line: 7 | goumon inti gifehan thir |
| Ms. line: 8 | gilampf, uuanta theser thin bruoder |
| Ms. line: 9 | tót uuas inti arqueketa, |
| Ms. line: 10 | foruuard inti funtan uuard. |
