TITUS
Edda
Part No. 7
Previous part

Song: Hrbl. 
Strophe: 0 
(HÁRBARÐZLIÓÐ)


Verse: 1    Þórr fór ór austrvegi ok kom at sundi eino. Ǫðrom
Verse: 2    megom sundzins var feriokarlinn með scipit. Þórr kallaði:

Strophe: 1 
Verse: 1    "Hverr er sá sveinn sveina, er stendr fyr sundit
Verse: 2    handan?"

Verse: 3    Hann svaraði:
Strophe: 2 
Verse: 1    "Hverr er sá karl karla, er kallar um váginn?"

Verse: 2    Þórr qvað:
Strophe: 3 
Verse: 1    "Ferðu mic um sundit, foði ec þic á morgon, "
Verse: 2    meis hefi ec á baki, verðra matrinn betri;
Verse: 3    át ec í hvíld, áðr ec heiman fór,
Verse: 4    síldr oc hafra, saðr em ec enn þess."

Verse: 5    Feriokarlinn qvað:
Strophe: 4 
Verse: 1    "Árligom vercom hrósar þú verðinom;
Verse: 2    veiztattu fyrir gorla: "
Verse: 3    dǫpr ero þín heimkynni, dauð hygg ec at þín
Verse: 4    móðir sé."

Verse: 5    Þórr qvað:
Strophe: 5 
Verse: 1    "Þat segir þú nú, er hveriom þiccir
Verse: 2    mest at vita, at mín móðir dauð sé."

Verse: 3    Feriokarlinn qvað:
Strophe: 6 
Verse: 1    "Þeygi er, sem þú þriú bú góð eigir;
Verse: 2    berbeinn þú stendr, oc hefir brautinga gervi,
Verse: 3    þatki, at þú hafir brocr þínar."

Verse: 4    Þórr qvað:
Strophe: 7 
Verse: 1    "Stýrðu hingat eikionni! ec mun þér stǫðna
Verse: 2    kenna,
Verse: 3    eða hverr á scipit, er þú heldr við landit?"

Verse: 4    Feriokarlinn qvað:
Strophe: 8 
Verse: 1    "Hildólfr sá heitir, er mic halda bað,
Verse: 2    reccr inn ráðsvinni, er býr í Ráðseyiarsundi;
Verse: 3    baðat hann hlennimenn flytia eða hrossa þiófa,
Verse: 4    góða eina, oc þá er ec gerva kunna;
Verse: 5    segðu til nafns þíns, ef þú vill um sundit fara!"

Verse: 6    Þórr qvað:
Strophe: 9 
Verse: 1    "Segia mun ec til nafns míns, þótt ec secr siác,
Verse: 2    oc til allz øðlis: ec em Óðins sonr,
Verse: 3    Meila bróðir, enn Magna faðir,
Verse: 4    þrúðvaldr goða; við Þór knáttu hér doma.
Verse: 5    Hins vil ec nú spyria, hvat þú heitir."

Verse: 6    Feriokarlinn qvað:
Strophe: 10 
Verse: 1    "Hárbarðr ec heiti, hylc um nafn sialdan."

Verse: 2    Þórr qvað:
Strophe: 11 
Verse: 1    "Hvat scaltu of nafn hylia, nema þú sacar eigir?"

Verse: 2    Hárbarðr qvað:
Strophe: 12 
Verse: 1    "Enn þótt ec sacar eiga, fyr slícom, sem þú ert,
Verse: 2    þá mun ec forða fiorvi míno, nema ec feigr sé."

Verse: 3    Þórr qvað:
Strophe: 13 
Verse: 1    "Harm liótan mér þiccir í því,
Verse: 2    at vaða um váginn til þín oc væta ǫgur minn;
Verse: 3    scylda ec launa kǫgursveini þínom
Verse: 4    kanginyrði, ef ec komomc yfir sundit."

Verse: 5    Hárbarðr qvað:
Strophe: 14 
Verse: 1    "Hér mun ec standa oc þín heðan bíða;
Verse: 2    fanntaðu mann inn harðara at Hrungni dauðan."

Verse: 3    Þórr qvað:
Strophe: 15 
Verse: 1    "Hins viltu nú geta, er við Hrungnir deildom,
Verse: 2    sá inn stórúðgi iotunn, er ór steini var hǫfuðit á;
Verse: 3    þó lét ec hann falla oc fyrir hníga.
Verse: 4    Hvat vanntu þá meðan, Hárbarðr?"

Verse: 5    Hárbarðr qvað:
Strophe: 16 
Verse: 1    "Var ec með Fiolvari fimm vetr alla,
Verse: 2    í ey þeiri, er Algron heitir;
Verse: 3    vega vér þar knáttom oc val fella,
Verse: 4    margs at freista, mans at kosta."

Verse: 5    Þórr qvað:
Strophe: 17 
Verse: 1    "Hverso snúnoðo yðr konor yðrar?"

Verse: 2    Hárbarðr qvað:
Strophe: 18 
Verse: 1    "Sparcar átto vér konor, ef oss at spǫcom yrði,
Verse: 2    horscar átto vér konor, ef oss hollar væri;
Verse: 3    þær ór sandi síma undo
Verse: 4    oc ór dali diúpom
Verse: 5    grund um grófo;
Verse: 6    varð ec þeim einn ǫllom efri at ráðom,
Verse: 7    hvílda ec hiá þeim systrom siau,
Verse: 8    oc hafða ec geð þeira alt oc gaman.
Verse: 9    Hvað vanntu þá meðan, Þórr?"

Verse: 10    Þórr qvað:
Strophe: 19 
Verse: 1    "Ec drap Þiaza, inn þrúðmóðga iotun,
Verse: 2    upp ec varp augom Allvalda sonar
Verse: 3    á þann inn heiða himin;
Verse: 4    þau ero merki mest minna verca,
Verse: 5    þau er allir menn síðan um sé.
Verse: 6    Hvat vanntu meðan, Hárbarðr?"

Verse: 7    Hárbarðr qvað:
Strophe: 20 
Verse: 1    "Miclar manvélar ec hafða við myrcriðor,
Verse: 2    þá er ec vélta þær frá verom;
Verse: 3    harðan iotun ec hugða Hlébarð vera,
Verse: 4    gaf hann mér gambantein,
Verse: 5    enn ec vélta hann ór viti."

Verse: 6    Þórr qvað:
Strophe: 21 
Verse: 1    "Illom huga launaðir þú þá góðar giafar."
Verse: 2    Hárbarðr quað:
Strophe: 22 
Verse: 1    "Þat hefir eic, er af annarri scefr,
Verse: 2    um sic er hverr í slíco.
Verse: 3    Hvat vanntu meðan, Þórr?"

Verse: 4    Þórr qvað:
Strophe: 23 
Verse: 1    "Ec var austr oc iotna barðag,
Verse: 2    brúðir bǫlvísar, er til biargs gengo;
Verse: 3    mikil myndi ætt iotna, ef allir lifði,
Verse: 4    vætr myndi manna undir miðgarði.
Verse: 5    Hvat vanntu meðan, Hárbarðr?"

Verse: 6    Hárbarðr qvað:
Strophe: 24 
Verse: 1    "Var ec á Vallandi oc vígom fylgðag,
Verse: 2    atta ec iofrom, enn aldri sættac;
Verse: 3    Óðinn á iarla, þá er í val falla,
Verse: 4    enn Þórr á þræla kyn."

Verse: 5    Þórr qvað:
Strophe: 25 
Verse: 1    "Óiafnt scipta er þú myndir með ásom liði,
Verse: 2    ef þú ættir vilgi mikils vald."

Verse: 3    Hárbarðr qvað:
Strophe: 26 
Verse: 1    "Þórr á afl orit, enn ecci hiarta;
Verse: 2    af hrozlo oc hugbleyði þér var í hanzca troðit,
Verse: 3    oc þóttisca þú þá Þórr vera;
Verse: 4    hvárki þú þá þorðir fyr hrozlo þinni
Verse: 5    hniósa né físa, svá at Fialarr heyrði."

Verse: 6    Þórr qvað:
Strophe: 27 
Verse: 1    "Hárbarðr inn ragi, ec mynda þic í hel drepa,
Verse: 2    ef ec mætta seilaz um sund."

Verse: 3    Hárbarðr qvað:
Strophe: 28 
Verse: 1    "Hvat scyldir þú um sund seilaz, er sakir ro allz
Verse: 2    ǫngar?
Verse: 3    Hvat vanntu þá, Þórr?"

Verse: 4    Þórr qvað:
Strophe: 29 
Verse: 1    "Ec var austr oc ána varðac,
Verse: 2    þá er mic sótto þeir Svárangs synir;
Verse: 3    grióti þeir mic bǫrðo, gagni urðo þeir þó lítt
Verse: 4    fegnir;
Verse: 5    þó urðo þeir mic fyrri friðar at biðia.
Verse: 6    Hvat vanntu þá meðan, Harbárðr?"

Verse: 7    Hárbarðr qvað:
Strophe: 30 
Verse: 1    "Ec var austr oc við einhveria domðac,
Verse: 2    léc ec við ina línhvíto oc launþing háðac,
Verse: 3    gladdac ina gullbiorto, gamni mær unði."

Verse: 4    Þórr qvað:
Strophe: 31 
Verse: 1    "Góð átto þær mankynni þar þá."

Verse: 2    Hárbarðr qvað:
Strophe: 32 
Verse: 1    "Liðs þíns væra ec þá þurfi, Þórr,
Verse: 2    at ec helda þeiri inni línhvíto mey."

Verse: 3    Þórr qvað:
Strophe: 33 
Verse: 1    "Ec mynda þér þat veita, ef ec viðr of komiz."

Verse: 2    Hárbarðr qvað:
Strophe: 34 
Verse: 1    "Ec mynda þér þá trúa, nema þú mic í trygð
Verse: 2    véltir."

Verse: 3    Þórr qvað:
Strophe: 35 
Verse: 1    "Emcat ec sá hælbítr sem húðscór forn á vár."

Verse: 2    Hárbarðr qvað:
Strophe: 36 
Verse: 1    "Hvat vanntu meðan, Þórr?"

Verse: 2    Þórr qvað:
Strophe: 37 
Verse: 1    "Brúðir berserkia barðac í Hléseyio;
Verse: 2    þær hǫfðo verst unnit, vélta þióð alla."

Verse: 3    Hárbarðr qvað:
Strophe: 38 
Verse: 1    "Klæki vanntu þá, Þórr, er þú á konom barðir."

Verse: 2    Þórr qvað:
Strophe: 39 
Verse: 1    "Vargynior vóro þær, enn varla konor,
Verse: 2    sceldo scip mitt, er ec scorðat hafðac,
Verse: 3    ogðo mér iárnlurki, enn elto Þiálfa.
Verse: 4    Hvat vanntu meðan, Hárbarðr?"

Verse: 5    Hárbarðr qvað:
Strophe: 40 
Verse: 1    "Ec varc í hernom, er hingat gorðiz
Verse: 2    gnæfa gunnfana, geir at rióða."

Verse: 3    Þórr qvað:
Strophe: 41 
Verse: 1    "Þess viltu nú geta, er þú fórt oss ólubann at bióða."

Verse: 2    Hárbarðr qvað:
Strophe: 42 
Verse: 1    "Bota scal þér þat þá munda baugi,
Verse: 2    sem iafnendr unno, þeir er ocr vilia sætta."

Verse: 3    Þórr qvað:
Strophe: 43 
Verse: 1    "Hvar namtu þessi in hnofiligo orð,
Verse: 2    er ec heyrða aldregi hnofiligri?"

Verse: 3    Hárbarðr qvað:
Strophe: 44 
Verse: 1    "Nam ec at mǫnnom þeim inom aldronom, er búa í
Verse: 2    heimis scógom."

Verse: 3    Þórr qvað:
Strophe: 45 
Verse: 1    "Þó gefr þú gott nafn dysiom, er þú kallar þat heimis
Verse: 2    scóga."

Verse: 3    Hárbarðr qvað:
Strophe: 46 
Verse: 1    "Svá domi ec um slíct far."

Verse: 2    Þórr qvað:
Strophe: 47 
Verse: 1    "Orðkringi þín mun þér illa koma,
Verse: 2    ef ec ræð á vág at vaða;
Verse: 3    úlfi hæra hygg ec at þú opa munir,
Verse: 4    ef þú hlýtr af hamri hǫgg."

Verse: 5    Hárbarðr qvað:
Strophe: 48 
Verse: 1    "Sif á hó heima, hans mundo fund vilia,
Verse: 2    þann muntu þrec drýgia, þat er þér scyldara."

Verse: 3    Þórr qvað:
Strophe: 49 
Verse: 1    "Mælir þú at munnz ráði, svá at mér scyldi verst
Verse: 2    þiccia,
Verse: 3    halr inn hugblauði, hygg ec, at þú liúgir."

Verse: 4    Hárbarðr qvað:
Strophe: 50 
Verse: 1    "Satt hygg ec mic segia, seinn ertu at for þinni;
Verse: 2    langt myndir þú nú kominn, Þórr, ef þú litom forir."

Verse: 3    Þórr qvað:
Strophe: 51 
Verse: 1    "Hárbarðr inn ragi, heldr hefir þú nú mic
Verse: 2    dvalðan."

Verse: 3    Hárbarðr qvað:
Strophe: 52 
Verse: 1    "Ása-Þórs hugða ec aldregi mundo
Verse: 2    glepia féhirði farar."

Verse: 3    Þórr qvað:
Strophe: 53 
Verse: 1    "Ráð mun ec þér nú ráða: ró þú hingat bátinom,
Verse: 2    hættom hotingi, hittu fǫður Magna!"

Verse: 3    Hárbarðr qvað:
Strophe: 54 
Verse: 1    "Farðu firr sundi! þér scal fars synia."

Verse: 2    Þórr qvað:
Strophe: 55 
Verse: 1    "Vísa þú mér nú leiðina, allz þú vill mic eigi um
Verse: 2    váginn feria."

Verse: 3    Hárbarðr qvað:
Strophe: 56 
Verse: 1    "Lítið er synia, langt er at fara;
Verse: 2    stund er til stoccsins, ǫnnor til steinsins,
Verse: 3    haltu svá til vinstra vegsins, unz þú hittir
Verse: 4    Verland;
Verse: 5    þar mun Fiorgyn hitta Þór, son sinn,
Verse: 6    oc mun hon kenna hánom áttunga brautir til Óðins
Verse: 7    landa."

Verse: 8    Þórr qvað:
Strophe: 57 
Verse: 1    "Mun ec taca þangat í dag?"

Verse: 2    Hárbarðr qvað:
Strophe: 58 
Verse: 1    "Taca við víl oc erfiði at upverandi sólo,
Verse: 2    er ec get þána."

Verse: 3    Þórr qvað:
Strophe: 59 
Verse: 1    "Scamt mun nú mál occat vera, allz þú mér scotingo
Verse: 2    einni svarar;
Verse: 3    launa mun ec þér farsynion, ef við finnomc í
Verse: 4    sinn annat."

Verse: 5    Hárbarðr qvað:
Strophe: 60 
Verse: 1    "Farðu nú, þars þic hafi allan gramir!"




Next part


This text is part of the TITUS edition of Edda.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.