TITUS
Edda
Part No. 8
Previous part

Song: Hym. 
Strophe: 1 
(HYMISQVIÐA)


Verse: 1    Ár valtívar veiðar námo,
Verse: 2    oc sumblsamir, áðr saðir yrði;
Verse: 3    hristo teina oc á hlaut sá,
Verse: 4    fundo þeir at Ægis ørkost hvera.

Strophe: 2 
Verse: 1    Sat bergbúi, barnteitr, fyrir,
Verse: 2    mioc glícr megi miscorblinda;
Verse: 3    leit í augo Yggs barn í þrá:
Verse: 4    "Þú scalt ásom opt sumbl gora."

Strophe: 3 
Verse: 1    Ǫnn fecc iotni orðbæginn halr,
Verse: 2    hugði at hefndom hann næst við goð;
Verse: 3    bað hann Sifiar ver sér fora hver,
Verse: 4    "þannz ek ǫllom ǫl yðr of heita."

Strophe: 4 
Verse: 1    Né þat mátto mærir tívar
Verse: 2    oc ginregin of geta hvergi,
Verse: 3    unz af trygðom Týr Hlórriða
Verse: 4    ástráð mikit einom sagði:

Strophe: 5 
Verse: 1    "Býr fyr austan Élivága
Verse: 2    hundvíss Hymir, at himins enda;
Verse: 3    á minn faðir, móðugr, ketil,
Verse: 4    rúmbrugðinn hver, rastar diúpan."

Strophe: 6 
Verse: 1    "Veiztu, ef þiggiom þann lǫgvelli?"
Verse: 2    "Ef, vinr, vélar við gorvom til."

Strophe: 7 
Verse: 1    Fóro driúgom dag þann fram,
Verse: 2    Ásgarði frá, unz til Egils qvómo.
Verse: 3    Hirði hann hafra horngǫfgasta,
Verse: 4    hurfo at hǫllo, er Hymir átti.

Strophe: 8 
Verse: 1    Mǫgr fann ǫmmo, mioc leiða sér,
Verse: 2    hafði hǫfða hundruð nío.
Verse: 3    Enn ǫnnor gecc, algullin, fram,
Verse: 4    brúnhvít, bera biórveig syni:

Strophe: 9 
Verse: 1    "Áttniðr iotna, ec viliac ycr,
Verse: 2    hugfulla tvá, und hvera setia.
Verse: 3    Er minn frí mǫrgo sinni
Verse: 4    gløggr við gesti, gorr illz hugar."

Strophe: 10 
Verse: 1    Enn váscapaðr varð síðbúinn,
Verse: 2    harðráðr Hymir, heim af veiðom.
Verse: 3    Gecc inn í sal, glumðo ioclar,
Verse: 4    var karls, er kom, kinnscógr frørinn.

Strophe: 11 
Verse: 1    "Ver þú heill, Hymir, í hugom góðom!
Verse: 2    nú er sonr kominn til sala þinna,
Verse: 3    sá er við vættom af vegi lǫngom.
Verse: 4    Fylgir hánom Hróðrs andscoti,
Verse: 5    vinr verliða, Véorr heitir sá.

Strophe: 12 
Verse: 1    Séðu, hvar sitia und salar gafli,
Verse: 2    svá forða sér, stendr súl fyrir."
Verse: 3    Sundr stǫcc súla fyr sión iotuns,
Verse: 4    enn áðr í tvau áss brotnaði.

Strophe: 13 
Verse: 1    Stucco átta, enn einn af þeim,
Verse: 2    hverr harðsleginn, heill af þolli.
Verse: 3    Fram gengo þeir, enn forn iotunn
Verse: 4    siónom leiddi sinn annscota.

Strophe: 14 
Verse: 1    Sagðit hánom hugr vel, þá er hann sá
Verse: 2    gýgiar groti á gólf kominn.
Verse: 3    Þar vóro þiórar þrír of tecnir,
Verse: 4    bað senn iotunn sióða ganga.

Strophe: 15 
Verse: 1    Hvern léto þeir hǫfði scemra
Verse: 2    oc á seyði síðan báro.
Verse: 3    Át Sifiar verr, áðr sofa gengi,
Verse: 4    einn með ǫllo øxn tvá Hymis.

Strophe: 16 
Verse: 1    Þótti három Hrungnis spialla
Verse: 2    verðr Hlórriða vel fullmikill.
Verse: 3    "Munom at apni ǫðrom verða
Verse: 4    við veiðimat vér þrír lifa."

Strophe: 17 
Verse: 1    Véorr qvaz vilia á vág róa,
Verse: 2    ef ballr iotunn beitor gæfi.
Verse: 3    "Hverfðu til hiarðar, ef þú hug trúir,
Verse: 4    briótr berg-Dana, beitor sokia!

Strophe: 18 
Verse: 1    Þess vænti ec, at þér myni
Verse: 2    ǫgn af oxa auðfeng vera."
Verse: 3    Sveinn sýsliga sveif til scógar,
Verse: 4    þar er uxi stóð, alsvartr, fyrir.

Strophe: 19 
Verse: 1    Braut af þióri þurs ráðbani
Verse: 2    hátún ofan horna tveggia.
Verse: 3    "Verc þiccia þín verri myclo,
Verse: 4    kióla valdi, enn þú kyrr sitir."

Strophe: 20 
Verse: 1    Bað hlunngota hafra dróttinn
Verse: 2    áttrunn apa útarr fora;
Verse: 3    enn sá iotunn sína talði
Verse: 4    litla fýsi at róa lengra.

Strophe: 21 
Verse: 1    Dró morr Hymir, móðugr, hvali
Verse: 2    einn á ongli up senn tvá:
Verse: 3    enn aptr í scut Óðni sifiaðr,
Verse: 4    Véorr, við vélar vað gorði sér.

Strophe: 22 
Verse: 1    Egndi á ǫngul, sá er ǫldom bergr,
Verse: 2    orms einbani, uxa hǫfði;
Verse: 3    gein við ǫngli, sú er goð fiá,
Verse: 4    umgiorð neðan allra landa.

Strophe: 23 
Verse: 1    Dró diarfliga dáðraccr Þórr
Verse: 2    orm eitrfán upp at borði;
Verse: 3    hamri kníði háfiall scarar,
Verse: 4    ofliótt, ofan úlfs hnitbróður.

Strophe: 24 
Verse: 1    Hreingálcn hlumðo, enn hǫlcn þuto,
Verse: 2    fór in forna fold ǫll saman.
Verse: 3    Søcþiz síðan sá fiscr í mar.

Strophe: 25 
Verse: 1    Óteitr iotunn, er þeir aptr rero,
Verse: 2    svá at ár Hymir ecci mælti;
Verse: 3    veifði hann roði veðrs annars til:

Strophe: 26 
Verse: 1    "Mundo um vinna verc hálft við mic,
Verse: 2    at þú heim hvali haf til boiar
Verse: 3    eða flotbrúsa festir occarn."

Strophe: 27 
Verse: 1    Gecc Hlórriði, greip á stafni,
Verse: 2    vatt með austri up lǫgfáki;
Verse: 3    einn með árom oc með austscoto
Verse: 4    bar hann til boiar brimsvín iotuns
Verse: 5    oc holtriða hver í gegnom.

Strophe: 28 
Verse: 1    Oc enn iotunn um afrendi,
Verse: 2    þrágirni vanr, við Þór senti;
Verse: 3    qvaðat mann ramman, þótt róa kynni
Verse: 4    krǫpturligan, nema kálc bryti.

Strophe: 29 
Verse: 1    Enn Hlórriði, er at hǫndom kom,
Verse: 2    brát lét bresta brattstein gleri;
Verse: 3    sló hann sitiandi súlor í gognom;
Verse: 4    báro þó heilan fyr Hymi síðan.

Strophe: 30 
Verse: 1    Unz þat in fríða frilla kendi,
Verse: 2    ástráð mikit, eitt, er vissi:
Verse: 3    "Drep við haus Hymis! hann er harðari,
Verse: 4    kostmóðs iotuns, kálki hveriom."

Strophe: 31 
Verse: 1    Harðr reis á kné, hafra dróttinn,
Verse: 2    forðiz allra í ásmegin;
Verse: 3    heill var karli hiálmstofn ofan,
Verse: 4    enn vínferill, valr, rifnaði.

Strophe: 32 
Verse: 1    "Mǫrg veit ec mæti mér gengin frá,
Verse: 2    er ec kálki sé ýr kniám hrundit."
Verse: 3    Karl orð um qvað: "knácat ec segia
Verse: 4    aptr ævagi, þú ert, ǫlðr, of heitt.

Strophe: 33 
Verse: 1    Þat er til kostar, ef koma mættið
Verse: 2    út ór óro ǫlkiól hofi."
Verse: 3    Týr leitaði tysvar hrora,
Verse: 4    stóð at hváro hverr kyrr fyrir.

Strophe: 34 
Verse: 1    Faðir Móða fecc á þremi,
Verse: 2    oc í gegnom steig gólf niðr í sal;
Verse: 3    hóf sér á hǫfuð up hver Sifiar verr,
Verse: 4    enn á hælom hringar scullo.

Strophe: 35 
Verse: 1    Fóro lengi, áðr líta nam
Verse: 2    aptr Óðins sonr eino sinni;
Verse: 3    sá hann ór hreysom með Hymi austan
Verse: 4    fólcdrót fara, fiolhǫfðaða.

Strophe: 36 
Verse: 1    Hóf hann sér af herðom hver standanda,
Verse: 2    veifði hann Miollni, morðgiornom, fram,
Verse: 3    oc hraunhvala hann alla drap.

Strophe: 37 
Verse: 1    Fóroð lengi, áðr liggia nam
Verse: 2    hafr Hlórriða hálfdauðr fyrir;
Verse: 3    var scirr scǫculs scaccr á banni,
Verse: 4    enn því inn lævísi Loki um olli.

Strophe: 38 
Verse: 1    Enn ér heyrt hafið - hverr kann um þat
Verse: 2    goðmálugra gørr at scilia -,
Verse: 3    hver af hraunbúa hann laun um fecc,
Verse: 4    er hann bæði galt born sín fyrir.

Strophe: 39 
Verse: 1    Þróttǫflugr kom á þing goða,
Verse: 2    oc hafði hver, þannz Hymir átti;
Verse: 3    enn véar hverian vel scolo drecca
Verse: 4    ǫlðr at Ægis eitt hǫrmeitið.




Next part


This text is part of the TITUS edition of Edda.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.