TITUS
Edda
Part No. 9
Previous part

Song: Ls. 
Strophe: Æ 
(Frá Ægi oc goðom.)


Verse: 1    Ægir, er ǫðro nafni hét Gymir, hann hafði búit ásom
Verse: 2    ǫl, þá er hann hafði fengit ketil inn micla, sem nú er sagt.
Verse: 3    Til þeirar veizlo kom Óðinn oc Frigg, kona hans. Þórr
Verse: 4    kom eigi, þvíat hann var í austrvegi. Sif var þar, kona
Verse: 5    Þórs, Bragi oc Iðunn, kona hans. Týr var þar, hann
Verse: 6    var einhendr. Fenrisúlfr sleit hǫnd af hánom, þá er
Verse: 7    hann var bundinn. Þar var Niorðr oc kona hans, Scaði,
Verse: 8    Freyr oc Freyia, Víðarr, son Óðins. Loki var þar, oc
Verse: 9    þiónustomenn Freys, Byggvir oc Beyla. Mart var þar
Verse: 10    ása oc álfa. Ægir átti tvá þiónustomenn, Fimafengr oc
Verse: 11    Eldir. Þar var lýsigull haft fyrir eldzliós. Siálft barsc
Verse: 12    þar ǫl. Þar var griðastaðr mikill. Menn lofoðo mioc,
Verse: 13    hverso góðir þiónustomenn Ægis vóro. Loki mátti eigi
Verse: 14    heyra þat, oc drap hann Fimafeng. Þá scóco æsir scioldo
Verse: 15    sína oc opþo at Loca, oc elto hann braut til scógar, enn
Verse: 16    þeir fóro at drecca.
Verse: 17    Loki hvarf aptr oc hitti úti Eldi. Loki qvaddi hann:


Strophe: 0 
Verse: 1    (LOCASENNA.)

Strophe: 1 
Verse: 1    "Segðu þat, Eldir, svá at þú einugi
Verse: 2    feti gangir framarr:
Verse: 3    hvat hér inni hafa at ǫlmálom
Verse: 4    sigtíva synir?"

Verse: 5    Eldir qvað:
Strophe: 2 
Verse: 1    "Of vápn sín doma oc um vígrisni sína
Verse: 2    sigtíva synir;
Verse: 3    ása oc álfa, er hér inni ero,
Verse: 4    mangi er þér í orði vinr."

Verse: 5    Loki qvað:
Strophe: 3 
Verse: 1    "Inn scal ganga Ægis hallir í,
Verse: 2    á þat sumbl at siá;
Verse: 3    ioll oc áfo fori ec ása sonom,
Verse: 4    oc blend ec þeim svá meini mioð."

Verse: 5    Eldir qvað:
Strophe: 4 
Verse: 1    "Veiztu, ef þú inn gengr Ægis hallir í,
Verse: 2    á þat sumbl at siá,
Verse: 3    hrópi oc rógi ef þú eyss á holl regin:
Verse: 4    á þér muno þau þerra þat."

Verse: 5    Loki qvað:
Strophe: 5 
Verse: 1    "Veiztu þat, Eldir, ef við einir scolom
Verse: 2    sáryrðom sacaz:
Verse: 3    auðigr verða mun ec í andsvorom,
Verse: 4    ef þú mælir til mart."

Verse: 5    Síðan gecc Loki inn í hǫllina. Enn er þeir sá, er fyrir
Verse: 6    vóro, hverr inn var kominn, þǫgnoðo þeir allir.

Verse: 7    Loki qvað:
Strophe: 6 
Verse: 1    "Þyrstr ec kom þessar hallar til,
Verse: 2    Loptr, um langan veg,
Verse: 3    áso at biðia, at mér einn gefi
Verse: 4    mæran drycc miaðar.

Strophe: 7 
Verse: 1    Hví þegit ér svá, þrungin goð,
Verse: 2    at þér mæla né megoð?
Verse: 3    sessa oc staði velið mér sumbli at,
Verse: 4    eða heitið mic heðan!"

Verse: 5    Bragi qvað:
Strophe: 8 
Verse: 1    "Sessa oc staði velia þér sumbli at
Verse: 2    æsir aldregi,
Verse: 3    þvíat æsir vito, hveim þeir alda scolo
Verse: 4    gambansumbl um geta."

Verse: 5    Loki qvað:
Strophe: 9 
Verse: 1    "Mantu þat, Óðinn, er við í árdaga
Verse: 2    blendom blóði saman;
Verse: 3    ǫlvi bergia léztu eigi mundo,
Verse: 4    nema ocr væri báðom borit."

Verse: 5    Óðinn qvað:
Strophe: 10 
Verse: 1    "Rístu þá, Víðarr, oc lát úlfs fǫður
Verse: 2    sitia sumbli at,
Verse: 3    síðr oss Loki qveði lastastǫfom
Verse: 4    Ægis hǫllo í."

Verse: 5    Þá stóð Víðarr up oc scencti Loca. Enn áðr hann drycci,
Verse: 6    qvaddi hann ásona:
Strophe: 11 
Verse: 1    "Heilir æsir, heilar ásynior
Verse: 2    oc ǫll ginnheilog goð!
Verse: 3    nema sá einn áss, er innar sitr,
Verse: 4    Bragi, becciom á."

Verse: 5    Bragi qvað:
Strophe: 12 
Verse: 1    "Mar oc mæki gef ec þér míns fiár,
Verse: 2    oc botir þér svá baugi Bragi,
Verse: 3    síðr þú ásom ǫfund um gialdir,
Verse: 4    gremðu eigi goð at þér!"

Verse: 5    Loki qvað:
Strophe: 13 
Verse: 1    "Iós oc armbauga mundu æ vera
Verse: 2    beggia vanr, Bragi;
Verse: 3    ása oc álfa, er hér inni ero,
Verse: 4    þú ert við víg varastr
Verse: 5    oc sciarrastr við scot."

Verse: 6    Bragi qvað:
Strophe: 14 
Verse: 1    "Veit ec, ef fyr útan værac, svá sem fyr innan emc
Verse: 2    Ægis hǫll um kominn,
Verse: 3    hǫfuð þitt bæra ec í hendi mér,
Verse: 4    lít ec þér þat fyr lygi."

Verse: 5    Loki qvað:
Strophe: 15 
Verse: 1    "Sniallr ertu í sessi, scalattu svá gora,
Verse: 2    Bragi, beccscrautuðr;
Verse: 3    vega þú gacc, ef þú vreiðr sér,
Verse: 4    hyggz vætr hvatr fyrir."

Verse: 5    Iðunn qvað:
Strophe: 16 
Verse: 1    "Bið ec, Bragi, barna sifiar duga
Verse: 2    oc allra óscmaga,
Verse: 3    at þú Loca qveðira lastastǫfom
Verse: 4    Ægis hǫllo í."

Verse: 5    Loki qvað:
Strophe: 17 
Verse: 1    "Þegiðu, Iðunn! þic qveð ec allra qvenna
Verse: 2    vergiarnasta vera,
Verse: 3    síztu arma þína lagðir, ítrþvegna,
Verse: 4    um þinn bróðurbana."

Verse: 5    Iðunn qvað:
Strophe: 18 
Verse: 1    "Loca ec qveðca lastastǫfom
Verse: 2    Ægis hǫllo í;
Verse: 3    Braga ec kyrri, biórreifan,
Verse: 4    vilcat ec, at iþ vreiðir vegiz."

Verse: 5    Gefion qvað:
Strophe: 19 
Verse: 1    "Hví iþ æsir tveir scoloð inni hér
Verse: 2    sáryrðom sacaz?
Verse: 3    Lopzci þat veit, at hann leikinn er
Verse: 4    oc hann fiorgvall friá."

Verse: 5    Loki qvað:
Strophe: 20 
Verse: 1    "Þegi þú, Gefion! þess mun ec nú geta,
Verse: 2    er þic glapþi at geði:
Verse: 3    sveinn inn hvíti, er þér sigli gaf,
Verse: 4    oc þú lagðir lær yfir."

Verse: 5    Óðinn:
Strophe: 21 
Verse: 1    "Orr ertu, Loki, oc ørviti,
Verse: 2    er þú fær þér Gefion at gremi,
Verse: 3    þvíat aldar ørlǫg hygg ec at hon ǫll um viti
Verse: 4    iafngorla sem ec."

Verse: 5    Loki qvað:
Strophe: 22 
Verse: 1    "Þegi þú, Óðinn! þú kunnir aldregi
Verse: 2    deila víg með verom;
Verse: 3    opt þú gaft, þeim er þú gefa scyldira,
Verse: 4    inom slævorom, sigr."

Verse: 5    Óðinn qvað:
Strophe: 23 
Verse: 1    "Veiztu, ef ec gaf, þeim er ec gefa né scylda,
Verse: 2    inom slævorom, sigr:
Verse: 3    átta vetr vartu fyr iorð neðan
Verse: 4    kýr mólcandi oc kona,
Verse: 5    oc hefir þú þar born borit,
Verse: 6    oc hugða ec þat args aðal."

Verse: 7    Loki qvað:
Strophe: 24 
Verse: 1    "Enn þic síða kóðo Sámseyo í,
Verse: 2    oc draptu á vétt sem vǫlor;
Verse: 3    vitca líki fórtu verþióð yfir,
Verse: 4    oc hugða ec þat args aðal."

Verse: 5    Frigg qvað:
Strophe: 25 
Verse: 1    "Ørlǫgom ycrom scylit aldregi
Verse: 2    segia seggiom frá,
Verse: 3    hvat iþ æsir tveir drýgðot í árdaga;
Verse: 4    firriz æ forn rǫc firar."

Verse: 5    Loki qvað:
Strophe: 26 
Verse: 1    "Þegi þú, Frigg! þú ert Fiorgyns mær
Verse: 2    oc hefir æ vergiorn verið,
Verse: 3    er þá Véa oc Vilia léztu þér, Viðris qvæn,
Verse: 4    báða í baðm um tekit."

Verse: 5    Frigg qvað:
Strophe: 27 
Verse: 1    "Veiztu, ef ec inni ættac Ægis hǫllom í
Verse: 2    Baldri lícan bur,
Verse: 3    út þú né kvomir frá ása sonom,
Verse: 4    oc væri þá at þér vreiðom vegit."

Verse: 5    Loki qvað:
Strophe: 28 
Verse: 1    "Enn vill þú, Frigg, at ec fleiri telia
Verse: 2    mína meinstafi:
Verse: 3    ec því ræð, er þú ríða sérat
Verse: 4    síðan Baldr at sǫlom."

Verse: 5    Freyia qvað:
Strophe: 29 
Verse: 1    "Orr ertu, Loki, er þú yðra telr
Verse: 2    lióta leiðstafi;
Verse: 3    ørlǫg Frigg hugg ec at ǫll viti,
Verse: 4    þótt hon siálfgi segi."

Verse: 5    Loki qvað:
Strophe: 30 
Verse: 1    "Þegi þú, Freyia! þic kann ec fullgerva,
Verse: 2    era þér vamma vant;
Verse: 3    ása oc álfa, er hér inni ero,
Verse: 4    hverr hefir þinn hór verið."

Verse: 5    Freyia qvað:
Strophe: 31 
Verse: 1    "Flá er þér tunga, hugg ec at þér fremr myni
Verse: 2    ógott um gala;
Verse: 3    reiðir ro þér æsir oc ásynior,
Verse: 4    hryggr muntu heim fara."

Verse: 5    Loki qvað:
Strophe: 32 
Verse: 1    "Þegi þú, Freyia! þú ert fordæða
Verse: 2    oc meini blandin mioc,
Verse: 3    síztic at broðr þínom stóðo blíð regin,
Verse: 4    oc mundir þú þá, Freyia, frata."

Verse: 5    Niorðr qvað:
Strophe: 33 
Verse: 1    "Þat er válítit, þótt sér varðir vers fái,
Verse: 2    hós eða hvárs;
Verse: 3    hitt er undr, er áss ragr er hér inn of kominn,
Verse: 4    oc hefir sá born of borit."

Verse: 5    Loki qvað:
Strophe: 34 
Verse: 1    "Þegi þú, Niorðr! þú vart austr heðan
Verse: 2    gíls um sendr at goðom;
Verse: 3    Hymis meyiar hǫfðo þic at hlandtrogi
Verse: 4    oc þér í munn migo."

Verse: 5    Niorðr qvað:
Strophe: 35 
Verse: 1    "Sú eromc lícn, er ec varc langt heðan
Verse: 2    gísl um sendr at goðom:
Verse: 3    þá ec mǫg gat, þann er mangi fiár,
Verse: 4    oc þiccir sá ása iaðarr."

Verse: 5    Loki qvað:
Strophe: 36 
Verse: 1    "Hættu nú, Niorðr, haf þú á hófi þic!
Verse: 2    munca ec því leyna lengr:
Verse: 3    við systor þinni gaztu slícan mǫg,
Verse: 4    oc era þó óno verr."

Verse: 5    Týr qvað:
Strophe: 37 
Verse: 1    "Freyr er beztr allra ballriða
Verse: 2    ása gǫrðom í;
Verse: 3    mey hann né grotir né mannz kono,
Verse: 4    oc leysir ór hǫptom hvern."

Verse: 5    Loki qvað:
Strophe: 38 
Verse: 1    "Þegi þú, Týr! þú kunnir aldregi
Verse: 2    bera tilt með tveim;
Verse: 3    handar innar hogri mun ec hinnar geta,
Verse: 4    er þér sleit Fenrir frá."

Verse: 5    Týr qvað:
Strophe: 39 
Verse: 1    "Handar em ec vanr, enn þú Hróðrsvitnis,
Verse: 2    bǫl er beggia þrá;
Verse: 3    úlfgi hefir oc vel, er í bǫndom scal
Verse: 4    bíða ragna rǫcrs."

Verse: 5    Loki qvað:
Strophe: 40 
Verse: 1    "Þegi þú, Týr! þat varð þinni kono,
Verse: 2    at hon átti mǫg við mér;
Verse: 3    ǫln né penning hafðir þú þess aldregi
Verse: 4    vanréttis, vesall."

Verse: 5    Freyr qvað:
Strophe: 41 
Verse: 1    "Úlf sé ec liggia árósi fyrir,
Verse: 2    unz riúfaz regin;
Verse: 3    því mundu næst, nema þú nú þegir,
Verse: 4    bundinn, bǫlvasmiðr."

Verse: 5    Loki qvað:
Strophe: 42 
Verse: 1    "Gulli keypta léztu Gymis dóttur
Verse: 2    oc seldir þitt svá sverð;
Verse: 3    enn er Muspellz synir ríða Myrcvið yfir,
Verse: 4    veizta þú þá, vesall, hvé þú vegr."

Verse: 5    Byggvir:
Strophe: 43 
Verse: 1    "Veiztu, ef ec øðli ættac sem Inguna-Freyr,
Verse: 2    oc svá sællict setr,
Verse: 3    mergi smæra mølða ec þá meinkráco
Verse: 4    oc lemða alla í liðo."

Verse: 5    Loki qvað:
Strophe: 44 
Verse: 1    "Hvat er þat iþ litla, er ec þat lǫggra séc,
Verse: 2    oc snapvíst snapir?
Verse: 3    at eyrom Freys munðu æ vera
Verse: 4    oc und qvernom klaca."

Verse: 5    Byggvir qvað:
Strophe: 45 
Verse: 1    "Byggvir ec heiti, enn mic bráðan qveða
Verse: 2    goð ǫll oc gumar;
Verse: 3    því em ec hér hróðugr, at drecca Hroptz megir
Verse: 4    allir ǫl saman."

Verse: 5    Loki qvað:
Strophe: 46 
Verse: 1    "Þegi þú, Byggvir! þú kunnir aldregi
Verse: 2    deila með mǫnnom mat;
Verse: 3    oc þic í fletz strá finna né mátto,
Verse: 4    þá er vágo verar."

Verse: 5    Heimdallr qvað:
Strophe: 47 
Verse: 1    "Ǫlr ertu, Loki, svá at þú er ørviti,
Verse: 2    hví né lezcaðu, Loki?
Verse: 3    þvíat ofdryccia veldr alda hveim,
Verse: 4    er sína mælgi né manað."

Verse: 5    Loki qvað:
Strophe: 48 
Verse: 1    "Þegi þú, Heimdallr! þér var í árdaga
Verse: 2    iþ lióta líf um lagit;
Verse: 3    aurgo baki þú munt æ vera
Verse: 4    oc vaca vorðr goða."

Verse: 5    Skaði qvað:
Strophe: 49 
Verse: 1    "Létt er þér, Loki, munattu lengi svá
Verse: 2    leica lausom hala;
Verse: 3    þvíat þic á hiorvi scolo ins hrímkalda magar
Verse: 4    gornom binda goð."

Verse: 5    Loki qvað:
Strophe: 50 
Verse: 1    "Veiztu, ef mic á hiorvi scolo ins hrímkalda magar
Verse: 2    gornom binda goð:
Verse: 3    fyrstr oc øfstr var ec at fiorlagi,
Verse: 4    þars vér á Þiaza þrifom."

Verse: 5    Skaði qvað:
Strophe: 51 
Verse: 1    "Veiztu, ef fyrstr oc øfstr vartu at fiorlagi,
Verse: 2    þá er ér á Þiaza þrifoð:
Verse: 3    frá mínom véom oc vǫngom scolo
Verse: 4    þér æ kǫld ráð koma."

Verse: 5    Loki qvað:
Strophe: 52 
Verse: 1    "Léttari í málom vartu við Laufeyiar son,
Verse: 2    þá er þú léz mér á beð þinn boðit;
Verse: 3    getið verðr oss slícs, ef vér gorva scolom
Verse: 4    telia vǫmmin vár."

Verse: 5    Þá gecc Sif fram oc byrlaði Loca í hrímkálki mioð
Verse: 6    oc mælti:

Strophe: 53 
Verse: 1    "Heill ver þú nú, Loki, oc tac við hrímkálki,
Verse: 2    fullom forns miaðar,
Verse: 3    heldr þú hana eina látir með ása sonom
Verse: 4    vammalausa vera."

Verse: 5    Hann tóc við horni ok dracc af:

Strophe: 54 
Verse: 1    "Ein þú værir, ef þú svá værir,
Verse: 2    vor oc grǫm at veri;
Verse: 3    einn ec veit, svá at ec vita þicciomc,
Verse: 4    hór oc af Hlórriða,
Verse: 5    oc var þat sá inn lævísi Loki."

Verse: 6    Beyla qvað:
Strophe: 55 
Verse: 1    "Fioll ǫll sciálfa, hygg ec á for vera
Verse: 2    heiman Hlórriða;
Verse: 3    hann ræðr ró, þeim er rogir hér
Verse: 4    goð ǫll oc guma."

Verse: 5    Loki qvað:
Strophe: 56 
Verse: 1    "Þegi þú, Beyla! þú ert Byggvis qvæn,
Verse: 2    oc meini blandin mioc;
Verse: 3    ókynian meira koma með ása sonom,
Verse: 4    ǫll ertu, deigia, dritin."

Verse: 5    Þá kom Þórr at oc qvað:
Strophe: 57 
Verse: 1    "Þegi þú, rǫg vættr! þér scal minn þrúðhamarr,
Verse: 2    Miollnir, mál fyrnema;
Verse: 3    herða klett drep ec þér hálsi af,
Verse: 4    oc verðr þá þíno fiorvi um farit.

Verse: 5    Loki qvað:
Strophe: 58 
Verse: 1    "Iarðar burr er hér nú inn kominn;
Verse: 2    hví þrasir þú svá, Þórr?
Verse: 3    enn þá þorir þú ecci, er þú scalt við úlfinn vega,
Verse: 4    oc svelgr hann allan Sigfǫður."

Verse: 5    Þórr qvað:
Strophe: 59 
Verse: 1    "Þegi þú, rǫg vættr! þér scal minn þrúðhamarr,
Verse: 2    Miollnir, mál fyrnema;
Verse: 3    upp ec þér verp oc á austrvega,
Verse: 4    síðan þic mangi sér."

Verse: 5    Loki qvað:
Strophe: 60 
Verse: 1    "Austrforom þínom scaltu aldregi
Verse: 2    segia seggiom frá,
Verse: 3    sízt í hanzca þumlungi hnúcþir þú, einheri,
Verse: 4    oc þóttisca þú þá Þórr vera."

Verse: 5    Þórr qvað:
Strophe: 61 
Verse: 1    "Þegi þú, rǫg vættr! þér scal minn þrúðhamarr,
Verse: 2    Miollnir, mál fyrnema;
Verse: 3    hendi inni hogri drep ec þic Hrungnis bana,
Verse: 4    svá at þér brotnar beina hvat."

Verse: 5    Loki qvað:
Strophe: 62 
Verse: 1    "Lifa ætla ec mér langan aldr,
Verse: 2    þóttu hotir hamri mér;
Verse: 3    scarpar álar þótto þér Scrýmis vera,
Verse: 4    oc máttira þú þá nesti ná,
Verse: 5    oc svaltz þú þá hungri heill."

Verse: 6    Þórr qvað:
Strophe: 63 
Verse: 1    "Þegi þú, rǫg vættr! þér scal minn þrúðhamarr,
Verse: 2    Miollnir, mál fyrnema;
Verse: 3    Hrungnis bani mun þér í hel koma,
Verse: 4    fyr nágrindr neðan."

Verse: 5    Loki qvað:
Strophe: 64 
Verse: 1    "Qvað ec fyr ásom, qvað ec fyr ása sonom,
Verse: 2    þatz mic hvatti hugr;
Verse: 3    enn fyr þér einom mun ec út ganga,
Verse: 4    þvíat ec veit, at þú vegr.

Strophe: 65 
Verse: 1    Ǫl gorðir þú, Ægir, enn þú aldri munt
Verse: 2    síðan sumbl um gora;
Verse: 3    eiga þín ǫll, er hér inni er,
Verse: 4    leiki yfir logi,
Verse: 5    oc brenni þér á baki!"

Strophe: L. 
Verse: 1    Frá Loca.

Verse: 2    Enn eptir þetta falz Loki í Fránangrsforsi í lax líki.
Verse: 3    Þar tóco æsir hann. Hann var bundinn með þǫrmom
Verse: 4    sonar Nara. Enn Narfi, sonr hans, varð at vargi. Scaði
Verse: 5    tóc eitrorm oc festi up yfir annlit Loca. Draup þar ór
Verse: 6    eitr. Sigyn, kona Loca, sat þar oc helt munnlaug undir
Verse: 7    eitriþ. Enn er munnlaugin var full, bar hon út eitriþ;
Verse: 8    enn meðan draup eitriþ á Loca. Þá kiptiz hann svá hart
Verse: 9    við, at þaðan af scalf iorð ǫll; þat ero nú kallaðir
Verse: 10    landsciálptar.




Next part


This text is part of the TITUS edition of Edda.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.