TITUS
Edda
Part No. 10
Previous part

Song: Thrk. 
Strophe: 1 
(ÞRYMSQVIÐA.)


Verse: 1    Reiðr var þá Vingþórr, er hann vacnaði
Verse: 2    - oc síns hamars um sacnaði;
Verse: 3    scegg nam at hrista, scǫr nam at dýia,
Verse: 4    réð Iarðar burr um at þreifaz.

Strophe: 2 
Verse: 1    Oc hann þat orða allz fyrst um qvað:
Verse: 2    "Heyrðu nú, Loki, hvat ec nú mæli,
Verse: 3    er eigi veit iarðar hvergi
Verse: 4    né uphimins: áss er stolinn hamri."

Strophe: 3 
Verse: 1    Gengo þeir fagra Freyio túna,
Verse: 2    oc hann þat orða allz fyrst um qvað:
Verse: 3    "Muntu mér, Freyia, fiaðrhams liá,
Verse: 4    ef ec minn hamar mættac hitta?"

Verse: 5    Freyia qvað:
Strophe: 4 
Verse: 1    "Þó mynda ec gefa þér, þótt ór gulli væri,
Verse: 2    oc þó selia, at væri ór silfri."

Strophe: 5 
Verse: 1    Fló þá Loki, fiaðrhamr dunði,
Verse: 2    unz fyr útan kom ása garða
Verse: 3    oc fyr innan kom iotna heima.

Strophe: 6 
Verse: 1    Þrymr sat á haugi, þursa dróttinn,
Verse: 2    greyiom sínom gullbǫnd snøri
Verse: 3    oc mǫrom sínom mǫn iafnaði.

Verse: 4    Þrymr qvað:
Strophe: 7 
Verse: 1    "Hvat er með ásom, hvat er með álfom?
Verse: 2    hví ertu einn kominn í iotunheima?"
Verse: 3    "Illt er með ásom, illt er með álfom,
Verse: 4    hefir þú Hlórriða hamar um fólginn?"

Strophe: 8 
Verse: 1    "Ec hefi Hlórriða hamar um fólginn,
Verse: 2    átta rǫstom fyr iorð neðan;
Verse: 3    hann engi maðr aptr um heimtir,
Verse: 4    nema fori mér Freyio at qvæn."

Strophe: 9 
Verse: 1    Fló þá Loki, fiaðrhamr dunði,
Verse: 2    unz fyr útan kom iotna heima
Verse: 3    oc fyr innan kom ása garða;
Verse: 4    motti hann Þór miðra garða,
Verse: 5    oc þat hann orða allz fyrst um qvað:

Strophe: 10 
Verse: 1    "Hefir þú erindi sem erfiði?
Verse: 2    segðu á lopti lǫng tíðindi!
Verse: 3    opt sitianda sǫgor um fallaz,
Verse: 4    oc liggiandi lygi um bellir."

Strophe: 11 
Verse: 1    "Hefi ec erfiði oc ørindi:
Verse: 2    Þrymr hefir þinn hamar, þursa dróttinn;
Verse: 3    hann engi maðr aptr um heimtir,
Verse: 4    nema hánom fori Freyio at qván."

Strophe: 12 
Verse: 1    Ganga þeir fagra Freyio at hitta,
Verse: 2    oc hann þat orða allz fyrst um qvað:
Verse: 3    "Bittu þic, Freyia, brúðar líni!
Verse: 4    við scolom aca tvau í iotunheima."

Strophe: 13 
Verse: 1    Reið varð þá Freyia oc fnásaði,
Verse: 2    allr ása salr undir bifðiz,
Verse: 3    stǫcc þat iþ micla men Brísinga:
Verse: 4    "Mic veiztu verða vergiarnasta,
Verse: 5    ef ec ec með þér í iotunheima."

Strophe: 14 
Verse: 1    Senn vóro æsir allir á þingi,
Verse: 2    oc ásynior allar á máli,
Verse: 3    oc um þat réðo ríkir tívar,
Verse: 4    hvé þeir Hlórriða hamar um sotti.

Strophe: 15 
Verse: 1    Þá qvað þat Heimdallr, hvítastr ása -
Verse: 2    vissi hann vel fram, sem vanir aðrir -:
Verse: 3    "Bindo vér Þór þá brúðar líni,
Verse: 4    hafi hann iþ micla men Brísinga!

Strophe: 16 
Verse: 1    Látom und hánom hrynia lucla
Verse: 2    oc qvennváðir um kné falla,
Verse: 3    enn á briósti breiða steina,
Verse: 4    oc hagliga um hǫfuð typpom!"

Strophe: 17 
Verse: 1    Þá qvað þat Þórr, þrúðugr áss:
Verse: 2    "Mic muno æsir argan kalla,
Verse: 3    ef ec bindaz læt brúðar líni."

Strophe: 18 
Verse: 1    Þá qvað þat Loki, Laufeyiar sonr:
Verse: 2    "Þegi þú, Þórr, þeira orða!
Verse: 3    þegar muno iotnar ásgarð búa,
Verse: 4    nema þú þinn hamar þér um heimtir."

Strophe: 19 
Verse: 1    Bundo þeir Þór þá brúðar líni
Verse: 2    oc ino micla meni Brísinga,
Verse: 3    léto und hánom hrynia lucla
Verse: 4    oc qvennváðir um kné falla,
Verse: 5    enn á briósti breiða steina,
Verse: 6    oc hagliga um hǫfuð typþo.

Strophe: 20 
Verse: 1    Þá kvað Loki, Laufeyiar sonr:
Verse: 2    "Mun ec oc með þér ambót vera,
Verse: 3    við scolom aca tvau í iotunheima."

Strophe: 21 
Verse: 1    Senn vóro hafrar heim um recnir,
Verse: 2    scyndir at scǫclom, scyldo vel renna;
Verse: 3    biorg brotnoðo, brann iorð loga,
Verse: 4    óc Óðins sonr í iotunheima.

Strophe: 22 
Verse: 1    Þá qvað þat Þrymr, þursa dróttinn:
Verse: 2    "Standit up, iotnar, oc stráið becci!
Verse: 3    nú forið mér Freyio at qván,
Verse: 4    Niarðar dóttur, ór Nóatúnom!

Strophe: 23 
Verse: 1    Ganga hér at garði gullhyrnðar kýr,
Verse: 2    øxn alsvartir, iotni at gamni;
Verse: 3    fiolð á ec meiðma, fiolð á ec menia,
Verse: 4    einnar mér Freyio ávant þiccir."

Strophe: 24 
Verse: 1    Var þar at qveldi um komið snimma,
Verse: 2    oc fyr iotna ǫl fram borit;
Verse: 3    einn át oxa, átta laxa,
Verse: 4    krásir allar, þær er konor scyldo,
Verse: 5    dracc Sifiar verr sáld þriú miaðar.

Strophe: 25 
Verse: 1    Þá qvað þat Þrymr, þursa dróttinn:
Verse: 2    "Hvar sáttu brúðir bíta hvassara?
Verse: 3    sáca ec brúðir bíta in breiðara,
Verse: 4    né inn meira mioð mey um drecca."

Strophe: 26 
Verse: 1    Sat in alsnotra ambót fyrir,
Verse: 2    er orð um fann við iotuns máli:
Verse: 3    "Át vætr Freyia átta nóttom,
Verse: 4    svá var hon óðfús í iotunheima."

Strophe: 27 
Verse: 1    Laut und líno, lysti at kyssa,
Verse: 2    enn hann útan stǫcc endlangan sal:
Verse: 3    "Hví ero ǫndótt augo Freyio?
Verse: 4    þicci mér ór augom eldr of brenna."

Strophe: 28 
Verse: 1    Sat in alsnotra ambót fyrir,
Verse: 2    er orð um fann við iotuns máli:
Verse: 3    "Svaf vætr Freyia átta nóttom,
Verse: 4    svá var hon óðfús í iotunheima."

Strophe: 29 
Verse: 1    Inn kom in arma iotna systir,
Verse: 2    hin er brúðfiár biðia þorði:
Verse: 3    "Láttu þér af hǫndom hringa rauða,
Verse: 4    ef þú ǫðlaz vill ástir mínar,
Verse: 5    ástir mínar, alla hylli."

Strophe: 30 
Verse: 1    Þá qvað þat Þrymr, þursa dróttinn:
Verse: 2    "Berið inn hamar, brúði at vígia,
Verse: 3    leggit Miollni í meyiar kné,
Verse: 4    vígit ocr saman Várar hendi!"

Strophe: 31 
Verse: 1    Hló Hlórriða hugr í briósti,
Verse: 2    er harðhugaðr hamar um þecþi;
Verse: 3    Þrym drap hann fyrstan, þursa dróttin,
Verse: 4    oc ætt iotuns alla lamði.

Strophe: 32 
Verse: 1    Drap hann ina ǫldno iotna systor,
Verse: 2    hin er brúðfiár of beðit hafði;
Verse: 3    hon scell um hlaut fyr scillinga,
Verse: 4    enn hǫgg hamars fyr hringa fiolð.

Verse: 5    Svá kom Óðins sonr endr at hamri.




Next part


This text is part of the TITUS edition of Edda.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.