TITUS
Edda
Part No. 20
Previous part

Song: Sd. 
Strophe: 0 
(SIGRDRÍFOMÁL)


Verse: 1    Sigurðr reið up á Hindarfiall oc stefndi suðr til
Verse: 2    Fraclanz. Á fiallino sá hann liós mikit, svá sem eldr
Verse: 3    brynni, oc liómaði af til himins. Enn er hann kom at, þá
Verse: 4    stóð þar scialdborg oc up ór merki. Sigurðr gecc í scialdborgina
Verse: 5    oc sá, at þar lá maðr oc svaf með ǫllom hervápnom.
Verse: 6    Hann tóc fyrst hiálminn af hǫfði hánom. Þá sá hann,
Verse: 7    at þat var kona. Brynian var fǫst, sem hon væri holdgróin.
Verse: 8    Þá reist hann með Gram frá hǫfuðsmátt bryniona
Verse: 9    í gognom niðr, oc svá út í gognom báðar ermar. Þá tóc
Verse: 10    hann brynio af henni; enn hon vacnaði, oc settiz hon up
Verse: 11    oc sá Sigurð oc mælti:


Cod.reg. Cop. p. 63


Strophe: 1 
Verse: 1    "Hvat beit brynio, hví brá ec svefni?
Verse: 2    hverr feldi af mér fǫlvar nauðir?"

Verse: 3    Hann svaraði:
Verse: 4    "Sigmundar burr, sleit fyr scǫmmo
Verse: 5    hrafns hrælundir hiorr Sigurðar."

Strophe: 2 
Verse: 1    "Lengi ec svaf, lengi ec sofnuð var,
Verse: 2    lǫng ero lýða læ;
Verse: 3    Óðinn því veldr, er ec eigi máttac
Verse: 4    bregða blunnstǫfom."
Verse: 5    Sigurðr settiz niðr oc spyrr hana nafns. Hon tóc þá
Verse: 6    horn, fult miaðar, oc gaf hánom minnisveig.

Strophe: 3 
Verse: 1    "Heill dagr, heilir dags synir,
Verse: 2    heil nótt oc nipt!
Verse: 3    óreiðom augom lítið ocr þinig,
Verse: 4    oc gefit sitiondom sigr!

Strophe: 4 
Verse: 1    Heilir æsir, heilar ásynior,
Verse: 2    heil siá in fiolnýta fold!
Verse: 3    mál oc manvit gefit ocr mærom tveim
Verse: 4    oc læcnishendr, meðan lifom!"

Verse: 5    Hon nefndiz Sigrdrífa oc var valkyria. Hon sagði,
Verse: 6    at tveir konungar bǫrðuz; hét annarr Hiálm-Gunnarr,
Verse: 7    hann var þá gamall oc inn mesti hermaðr, oc hafði
Verse: 8    Óðinn hánom sigri heitið; enn

Verse: 9    "annar hét Agnarr, Auðo bróðir,
Verse: 10    er vætr engi vildi þiggia."

Verse: 11    Sigrdrífa feldi Hiálm-Gunnar í orrostonni. Enn Óðinn
Verse: 12    stacc hana svefnþorni í hefnd þess oc qvað hana aldri
Verse: 13    scyldo síðan sigr vega í orrosto oc qvað hana giptaz
Verse: 14    scyldo. "Enn ec sagðac hánom, at ec strengðac heit þar
Verse: 15    í mót at giptaz ǫngom þeim manni, er hroðaz kynni."
Verse: 16    Hann segir oc biðr hana kenna sér speki, ef hon vissi
Verse: 17    tíðindi ór ǫllom heimom.

Verse: 18    Sigrdrífa qvað:
Strophe: 5 
Verse: 1    "Biór fori ec þér, brynþings apaldr,
Verse: 2    magni blandinn oc megintíri;
Verse: 3    fullr er hann lióða oc lícnstafa,
Verse: 4    góðra galdra oc gamanrúna.

Strophe: 6 
Verse: 1    Sigrúnar þú scalt kunna, ef þú vilt sigr hafa,
Verse: 2    oc rísta á hialti hiors,
Verse: 3    sumar á véttrimom, sumar á valbǫstom,
Verse: 4    oc nefna tysvar Tý.

Strophe: 7 
Verse: 1    Ǫlrúnar scaltu kunna, ei þú vill, annars qvæn
Verse: 2    vélit þic í trygð, ef þú trúir;
Verse: 3    á horni scal þær rísta oc á handar baki
Verse: 4    oc merkia á nagli Nauð.

Strophe: 8 
Verse: 1    Full scal signa oc við fári siá
Verse: 2    oc verpa lauki í lǫg:
Verse: 3    þá ec þat veit, at þér verðr aldri
Verse: 4    meinblandinn mioðr.

Strophe: 9 
Verse: 1    Biargrúnar scaltu kunna, ef þú biarga vilt
Verse: 2    oc leysa kind frá konom;
Verse: 3    á lófa þær scal rísta oc of liðo spenna
Verse: 4    oc biðia þá dísir duga.

Strophe: 10 
Verse: 1    Brimrúnar scaltu gera, ef þú vilt borgit hafa
Verse: 2    á sundi seglmǫrom;
Verse: 3    á stafni scal rísta oc á stiórnar blaði
Verse: 4    oc leggia eld í ár;
Verse: 5    era svá brattr breki né svá blár unnir,
Verse: 6    þó kømztu heill af hafi.

Strophe: 11 
Verse: 1    Limrúnar scaltu kunna, ef þú vilt læcnir vera
Verse: 2    oc kunna sár at siá;
Verse: 3    á berki scal þær rísta oc á baðmi viðar.
Verse: 4    þeim er lúta austr limar.

Strophe: 12 
Verse: 1    Málrúnar scaltu kunna, ef þú vilt, at mangi þér
Verse: 2    heiptom gialdi harm;
Verse: 3    þær um vindr, þær um vefr,
Verse: 4    þær um setr allar saman,
Verse: 5    á því þingi, er þióðir scolo
Verse: 6    í fulla dóma fara.

Strophe: 13 
Verse: 1    Hugrúnar scaltu kunna, ef þú vilt hveriom vera
Verse: 2    geðsvinnari guma;
Verse: 3    þær of réð, þær of reist,
Verse: 4    þær um hugði Hroptr,
Verse: 5    af þeim legi, er lekið hafði
Verse: 6    ór hausi Heiddraupnis
Verse: 7    oc ór horni Hoddrofnis.

Strophe: 14 
Verse: 1    Á biargi stóð með Brimis eggiar,
Verse: 2    hafði sér á hǫfði hiálm.
Verse: 3    Þá mælti Míms hǫfuð
Verse: 4    fróðlict iþ fyrsta orð,
Verse: 5    oc sagði sanna stafi.

Strophe: 15 
Verse: 1    Á scildi qvað ristnar, þeim er stendr fyr scínanda goði,
Verse: 2    á eyra Árvacrs oc á Alsvinnz hófi,
Verse: 3    á því hvéli, er snýz undir reið Rungnis,
Verse: 4    á Sleipnis tǫnnom oc á sleða fiotrom,

Strophe: 16 
Verse: 1    á biarnar hrammi oc á Braga tungo,
Verse: 2    á úlfs klóm oc á arnar nefi,
Verse: 3    á blóðgom vængiom oc á brúar sporði,
Verse: 4    á lausnar lófa oc á lícnar spori,

Strophe: 17 
Verse: 1    á gleri oc á gulli oc á gumna heillom,
Verse: 2    í víni oc virtri oc vilisessi,
Verse: 3    á Gungnis oddi oc á Grana briósti,
Verse: 4    á nornar nagli oc á nefi uglo.

Strophe: 18 
Verse: 1    Allar vóro af scafnar, þær er vóro á ristnar,
Verse: 2    oc hverfðar við inn helga mioð,
Verse: 3    oc sendar á víða vega.
Verse: 4    Þær ro með ásom, þær ro með álfom,
Verse: 5    sumar með vísom vǫnom,
Verse: 6    sumar hafa mennzcir menn.

Strophe: 19 
Verse: 1    Þat ero bócrúnar, þat ero biargrúnar.
Verse: 2    oc allar ǫlrúnar,
Verse: 3    oc mætar meginrúnar,
Verse: 4    hveim er þær kná óviltar oc óspiltar
Verse: 5    sér at heillom hafa;
Verse: 6    nióttu, ef þú namt,
Verse: 7    unz riúfaz regin.

Strophe: 20 
Verse: 1    Nú scaltu kiósa, allz þér er kostr um boðinn,
Verse: 2    hvassa vápna hlynr;
Verse: 3    sǫgn eða þǫgn hafðu þér siálfr í hug!
Verse: 4    ǫll ero mein of metin."

Strophe: 21 
Verse: 1    "Munca ec floia, þótt mic feigan vitir,
Verse: 2    emca ec með bleyði borinn;
Verse: 3    ástráð þín ec vil ǫll hafa,
Verse: 4    svá lengi sem ec lifi."

Strophe: 22 
Verse: 1    "Þat ræð ec þér iþ fyrsta, at þú við frondr þína
Verse: 2    vammalauss verir;
Verse: 3    síðr þú hefnir, þótt þeir sacar gori,
Verse: 4    þat qveða dauðom duga.

Strophe: 23 
Verse: 1    Þat ræð ec þér annat, at þú eið né sverir,
Verse: 2    nema þann er saðr sé;
Verse: 3    grimmir símar ganga at trygðrofi,
Verse: 4    armr er vára vargr.

Strophe: 24 
Verse: 1    Þat ræð ec þér þriðia, at þú þingi á
Verse: 2    deilit við heimsca hali;
Verse: 3    þvíat ósviðr maðr lætr opt qveðin
Verse: 4    verri orð, enn viti.

Strophe: 25 
Verse: 1    Alt er vant, ef þú við þegir;
Verse: 2    þá þiccir þú með bleyði borinn
Verse: 3    eða sǫnno sagðr;
Verse: 4    hættr er heimisqviðr,
Verse: 5    nema sér góðan geti.
Verse: 6    Annars dags láttu hans ǫndo farit
Verse: 7    oc launa svá lýðom lygi!

Strophe: 26 
Verse: 1    Þat ræð ec þér it fiórða, ef býr fordæða,
Verse: 2    vammafull, á vegi:
Verse: 3    ganga er betra, enn gista sé,
Verse: 4    þótt þic nótt um nemi.

Strophe: 27 
Verse: 1    Forniósnar augo þurfo fira synir,
Verse: 2    hvars scolo vreiðir vega;
Verse: 3    opt bǫlvísar konor sitia brauto nær,
Verse: 4    þær er deyfa sverð oc sefa.

Strophe: 28 
Verse: 1    Þat ræð ec þér it fimta, þóttu fagrar sér
Verse: 2    brúðir becciom á:
Verse: 3    sifia silfr látaðu þínom svefni ráða,
Verse: 4    teygiattu þér at kossi konor!

Strophe: 29 
Verse: 1    Þat ræð ec þér it sétta, þótt með seggiom fari
Verse: 2    ǫlðrmál til ǫfug:
Verse: 3    druccinn deila scalattu við dólgviðo,
Verse: 4    margan stelr vín viti.

Strophe: 30 
Verse: 1    Sǫngr oc ǫl hefr seggiom verit
Verse: 2    mǫrgom at móðtrega,
Verse: 3    sumom at bana, sumom at bǫlstǫfom;
Verse: 4    fiolð er, þat er tregr fira.

Strophe: 31 
Verse: 1    Þat ræð ec þér it siaunda, ef þú sacar deilir
Verse: 2    við hugfulla hali:
Verse: 3    beriaz er betra, enn brenna sé
Verse: 4    inni auðstǫfom.

Strophe: 32 
Verse: 1    Þat ræð ec þér it átta, at þú scalt við illo siá
Verse: 2    oc firraz flærðarstafi;
Verse: 3    mey þú teygiat né mannz kono,
Verse: 4    né eggia ofgamans!

Strophe: 33 
Verse: 1    Þat ræð ec þér it níunda, at þú nám biargir,
Verse: 2    hvars þú á foldo finnr,
Verse: 3    hvárz ero sóttdauðir eða ero sædauðir
Verse: 4    eða ero vápndauðir verar.

Strophe: 34 
Verse: 1    Laug scal gora, þeim er liðnir ero,
Verse: 2    þvá hendr oc hǫfuð,
Verse: 3    kemba oc þerra, áðr í kisto fari,
Verse: 4    oc biðia sælan sofa.

Strophe: 35 
Verse: 1    Þat ræð ec þér it tíunda, at þú trúir aldri
Verse: 2    várom vargdropa,
Verse: 3    hvárstu ert bróður bani,
Verse: 4    eða hafir þú feldan fǫður:
Verse: 5    úlfr er í ungom syni, "
Verse: 6    þótt sé hann gulli gladdr.

Strophe: 36 
Verse: 1    Sacar oc heiptir hyggiat svefngar vera,
Verse: 2    né harm in heldr;
Verse: 3    vitz oc vápna vant er iofri at fá,
Verse: 4    þeim er scal fremstr með firom.

Strophe: 37 
Verse: 1    Þat ræð ec þér it ellipta, at þú við illo sér
Verse: 2    hvern veg at vinom.
Verse: 3    Langt líf þicciomcac lofðungs vita,
Verse: 4    rǫmm ero róg of risin."




Next part


This text is part of the TITUS edition of Edda.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.