TITUS
Edda
Part No. 19
Previous part

Song: Fm. 
Strophe: 0 
(FÁFNISMÁL)


Verse: 1    Heim fór Sigurðr til Hiálprecs. Þá eggiaði Reginn
Verse: 2    Sigurð til at vega Fáfni. Sigurðr oc Reginn fóro up á
Verse: 3    Gnitaheiði oc hitto þar slóð Fáfnis, þá er hann screið til
Verse: 4    vatz. Þar gorði Sigurðr grǫf micla á veginom, oc gecc
Verse: 5    Sigurðr þar í. Enn er Fáfnir screið af gullino, blés hann
Verse: 6    eitri, oc hraut þat fyr ofan hǫfuð Sigurði. Enn er Fáfnir
Verse: 7    screið yfir grǫfna, þá lagði Sigurðr hann með sverði til
Verse: 8    hiarta. Fáfnir hristi sic oc barði hǫfði oc sporði. Sigurðr
Verse: 9    hlióp ór grǫfinni, oc sá þá hvárr annan. Fáfnir qvað:


Verse: 10    Frá dauða Fáfnis.

Strophe: 1 
Verse: 1    "Sveinn oc sveinn, hveriom ertu sveini um borinn,
Verse: 2    hverra ertu manna mǫgr?
Verse: 3    er þú á Fáfni rautt þinn inn frána mæki:
Verse: 4    stǫndomc til hiarta hiorr."

Verse: 5    Sigurðr dulði nafns síns, fyr því at þat var trúa
Verse: 6    þeira í fornescio, at orð feigs mannz mætti mikit, ef hann
Verse: 7    bǫlvaði óvin sínom með nafni. Hann qvað:

Strophe: 2 
Verse: 1    "Gǫfuct dýr ec heiti, enn ec gengit hefc
Verse: 2    inn móðurlausi mǫgr;
Verse: 3    fǫður ec ácca, sem fira synir,
Verse: 4    geng ec æ einn saman."

Strophe: 3 
Verse: 1    "Veiztu, ef fǫður né áttað, sem fira synir,
Verse: 2    af hverio vartu undri alinn?"

Strophe: 4 
Verse: 1    "Ætterni mitt qveð ec þér ókunnict vera
Verse: 2    oc mic siálfan iþ sama;
Verse: 3    Sigurðr ec heiti, Sigmundr hét minn faðir,
Verse: 4    er hefc þic vápnom vegit."

Strophe: 5 
Verse: 1    "Hverr þic hvatti, hví hvetiaz lézt,
Verse: 2    míno fiorvi at fara?
Verse: 3    inn fráneygi sveinn, þú áttir fǫður bitran,
Verse: 4    áburno sciór á sceið."

Strophe: 6 
Verse: 1    "Hugr mic hvatti, hendr mér fulltýðo
Verse: 2    oc minn inn hvassi hiorr;
Verse: 3    fár er hvatr, er hrøðaz tecr,
Verse: 4    ef í barnæsco er blauðr."

Strophe: 7 
Verse: 1    "Veit ec, ef þú vaxa næðir fyr þinna vina briósti,
Verse: 2    sæi maðr þic vreiðan vega;
Verse: 3    nú ertu haptr oc hernuminn,
Verse: 4    æ qveða bandingia bifaz."

Strophe: 8 
Verse: 1    "Því bregðr þú nú mér, Fáfnir, at til fiarri siác
Verse: 2    mínom feðr munom;
Verse: 3    eigi em ec haptr, þótt ec væra hernumi,
Verse: 4    þú fannt, at ec lauss lifi."

Strophe: 9 
Verse: 1    "Heiptyrði ein telr þú þér í hvívetna,
Verse: 2    enn ec þér satt eitt segic:
Verse: 3    iþ gialla gull oc iþ glóðrauða fé,
Verse: 4    þér verða þeir baugar at bana."

Strophe: 10 
Verse: 1    "Fé ráða scal fyrða hverr
Verse: 2    æ til ins eina dags,
Verse: 3    þvíat eino sinni scal alda hverr
Verse: 4    fara til heliar heðan."

Strophe: 11 
Verse: 1    "Norna dóm þú munt fyr nesiom hafa
Verse: 2    oc ósvinnz apa;
Verse: 3    í vatni þú drucnar, ef í vindi ror:
Verse: 4    alt er feigs forað."

Strophe: 12 
Verse: 1    "Segðu mér, Fáfnir, allz þic fróðan qveða
Verse: 2    oc vel mart vita:
Verse: 3    hveriar ro þær nornir, er nauðgǫnglar ro
Verse: 4    oc kiósa moðr frá mǫgom?"

Strophe: 13 
Verse: 1    "Sundrbornar mioc segi ec at nornir sé,
Verse: 2    eigoð þær ætt saman;
Verse: 3    sumar ero áskungar, sumar álfkungar,
Verse: 4    sumar dotr Dvalins."

Strophe: 14 
Verse: 1    "Segðu mér þat, Fáfnir, allz þic fróðan qveða
Verse: 2    oc vel mart vita:
Verse: 3    hvé sá hólmr heitir, er blanda hiorlegi
Verse: 4    Surtr oc æsir saman?"

Strophe: 15 
Verse: 1    "Óscópnir hann heitir, enn þar ǫll scolo
Verse: 2    geirom leica goð;
Verse: 3    Bilrǫst brotnar, er þeir á brot fara,
Verse: 4    oc svima í móðo marir.

Strophe: 16 
Verse: 1    Ægishiálm bar ec um alda sonom,
Verse: 2    meðan ec um meniom lág;
Verse: 3    einn rammari hugðomc ǫllom vera,
Verse: 4    fannca ec marga mǫgo."

Strophe: 17 
Verse: 1    "Ægishiálmr bergr einugi,
Verse: 2    hvars scolo vreiðir vega;
Verse: 3    þá þat finnr, er með fleirom kømr,
Verse: 4    at engi er einna hvatastr."

Strophe: 18 
Verse: 1    "Eitri ec fnæsta, er ec á arfi lá
Verse: 2    miclom míns fǫður."

Strophe: 19 
Verse: 1    "Inn fráni ormr, þú gorðir fræs micla
Verse: 2    oc gazt harðan hug;
Verse: 3    heipt at meiri verðr hǫlða sonom,
Verse: 4    at þann hiálm hafi."

Strophe: 20 
Verse: 1    "Ræð ec þér nú, Sigurðr, enn þú ráð nemir
Verse: 2    oc ríð heim heðan!
Verse: 3    it gialla gull oc it glóðrauða fé,
Verse: 4    þér verða þeir baugar at bana."

Strophe: 21 
Verse: 1    "Ráð er þér ráðit, enn ec ríða mun til þess gullz,
Verse: 2    er í lyngvi liggr;
Verse: 3    enn þú, Fáfnir, ligg í fiorbrotom,
Verse: 4    þar er þic Hel hafi!"

Strophe: 22 
Verse: 1    "Reginn mic réð, hann þic ráða mun,
Verse: 2    hann mun ocr verða báðom at bana;
Verse: 3    fior sitt láta hygg ec at Fáfnir myni,
Verse: 4    þitt varð nú meira megin."

Verse: 5    Reginn var á brot horfinn, meðan Sigurðr vá Fáfni,
Verse: 6    oc kom þá aptr, er Sigurðr strauc blóð af sverðino.

Verse: 7    Reginn qvað:
Strophe: 23 
Verse: 1    "Heill þú nú, Sigurðr! nú hefir þú sigr vegit
Verse: 2    oc Fáfni um farið;
Verse: 3    manna þeira, er mold troða,
Verse: 4    þic qveð ec óblauðastan alinn."

Strophe: 24 
Verse: 1    "Þat er óvíst at vita, þá er komom allir saman,
Verse: 2    sigtíva synir,
Verse: 3    hverr óblauðastr er alinn;
Verse: 4    margr er sá hvatr, er hior né rýfr
Verse: 5    annars brióstom í."

Strophe: 25 
Verse: 1    "Glaðr ertu nú, Sigurðr, oc gagni feginn,
Verse: 2    er þú þerrir Gram á grasi;
Verse: 3    bróður minn hefir þú beniaðan,
Verse: 4    oc veld ec þó siálfr sumo."

Strophe: 26 
Verse: 1    "Þú því rétt, er ec ríða scyldac
Verse: 2    heilog fioll hinig;
Verse: 3    fé oc fiorvi réði sá inn fráni ormr,
Verse: 4    nema þú frýðir mér hvatz hugar."

Verse: 5    Þá gecc Reginn at Fáfni oc scar hiarta ór hánom
Verse: 6    með sverði, er Riðill heitir, oc þá dracc hann blóð ór
Verse: 7    undinni eptir.

Strophe: 27 
Verse: 1    "Sittu nú, Sigurðr, enn ec mun sofa ganga,
Verse: 2    oc halt Fáfnis hiarta við funa!
Verse: 3    eiscǫld ec vil etinn láta
Verse: 4    eptir þenna dreyra drycc."

Verse: 5    Sigurðr qvað:
Strophe: 28 
Verse: 1    "Fiarri þú gect, meðan ec á Fáfni rauþc
Verse: 2    minn inn hvassa hior;
Verse: 3    afli míno atta ec við orms megin,
Verse: 4    meðan þú í lyngvi látt."

Verse: 5    Reginn qvað:
Strophe: 29 
Verse: 1    "Lengi liggia létir þú þann lyngvi í,
Verse: 2    inn aldna iotun,
Verse: 3    ef þú sverðz né nytir, þess er ec siálfr gorða,
Verse: 4    oc þíns ins hvassa hiors."

Verse: 5    Sigurðr qvað:
Strophe: 30 
Verse: 1    "Hugr er betri, enn sé hiors megin,
Verse: 2    hvars vreiðir scolo vega;
Verse: 3    þvíat hvatan mann ec sé harliga vega
Verse: 4    með slævo sverði sigr.

Strophe: 31 
Verse: 1    Hvǫtom er betra, enn sé óhvǫtom,
Verse: 2    í hildileic hafaz;
Verse: 3    glǫðom er betra, enn sé glúpnanda,
Verse: 4    hvat sem at hendi kømr."

Verse: 5    Sigurðr tóc Fáfnis hiarta oc steicþi á teini. Er hann
Verse: 6    hugði, at fullsteict væri, oc freyddi sveitinn ór hiartano,
Verse: 7    þá tóc hann á fingri sínom oc scyniaði, hvárt fullsteict
Verse: 8    væri. Hann brann oc brá fingrinom í munn sér. Enn er
Verse: 9    hiartblóð Fáfnis kom á tungo hánom, oc scilði hann fuglsrǫdd.
Verse: 10    Hann heyrði, at igðor klǫcoðo á hrísino. Igðan qvað:

Strophe: 32 
Verse: 1    "Þar sitr Sigurðr, sveita stoccinn,
Verse: 2    Fáfnis hiarta við funa steikir;
Verse: 3    spacr þotti mér spillir bauga.,
Verse: 4    ef hann fiorsega fránan æti."

Strophe: 33 
Verse: 1    "Þar liggr Reginn, ræðr um við sic,
Verse: 2    vill tæla mǫg, þann er trúir hánom;
Verse: 3    berr af reiði rǫng orð saman,
Verse: 4    vill bǫlva smiðr bróður heina."

Strophe: 34 
Verse: 1    "Hǫfði scemra láti hann inn hára þul
Verse: 2    fara til heliar heðan!
Verse: 3    ǫllo gulli þá kná hann einn ráða,
Verse: 4    fiolð, því er und Fáfni lá."

Strophe: 35 
Verse: 1    "Horscr þotti mér, ef hafa kynni
Verse: 2    ástráð mikit yðvar systra;
Verse: 3    hygði hann um sic oc Hugin gleddi;
Verse: 4    þar er mér úlfs vón, er ec eyro séc."

Strophe: 36 
Verse: 1    "Erat svá horscr hildimeiðr,
Verse: 2    sem ec hers iaðar hyggia myndac,
Verse: 3    ef hann bróður lætr á brot komaz,
Verse: 4    enn hann ǫðrom hefr aldrs of syniat."

Strophe: 37 
Verse: 1    "Mioc er ósviðr, ef hann enn sparir
Verse: 2    fiánda inn fólcscá,
Verse: 3    þar er Reginn liggr, er hann ráðinn hefr;
Verse: 4    kannat hann við slíco at siá."

Strophe: 38 
Verse: 1    "Hǫfði scemra láti hann þann inn hrímkalda iotun
Verse: 2    oc af baugom búa;
Verse: 3    þá mundu fiár, þess er Fáfnir réð,
Verse: 4    einvaldi vera."

Strophe: 39 
Verse: 1    "Verðra svá ríc scǫp, at Reginn scyli
Verse: 2    mitt banorð bera;
Verse: 3    þvíat þeir báðir broðr scolo brálliga
Verse: 4    fara til Heliar heðan."

Verse: 5    Sigurðr hió hǫfuð af Regin, oc þá át hann Fáfnis hiarta
Verse: 6    oc dracc blóð þeira beggia, Regins oc Fáfnis. Þá heyrði
Verse: 7    Sigurðr, hvar igðor mælto:

Strophe: 40 
Verse: 1    "Bitt þú, Sigurðr, bauga rauða,
Verse: 2    era konunglict qvíða mǫrgo;
Verse: 3    mey veit ec eina, myclo fegrsta,
Verse: 4    gulli godda, ef þú geta mættir.

Strophe: 41 
Verse: 1    Liggia til Giúca gronar brautir,
Verse: 2    fram vísa scǫp fólclíðondom;
Verse: 3    þar hefir dýrr konungr dóttur alna,
Verse: 4    þá mundu, Sigurðr, mundi kaupa.

Strophe: 42 
Verse: 1    Salr er á há Hindarfialli,
Verse: 2    allr er hann útan eldi sveipinn;
Verse: 3    þann hafa horscr halir um gorvan
Verse: 4    ór ódøccom agnar lióma.

Strophe: 43 
Verse: 1    Veit ec á fialli fólcvitr sofa,
Verse: 2    oc leicr yfir lindar váði;
Verse: 3    Yggr stacc þorni: aðra feldi
Verse: 4    hǫr-Gefn hali, enn hafa vildi.

Strophe: 44 
Verse: 1    Knáttu, mǫgr, siá mey und hiálmi,
Verse: 2    þá er frá vígi Vingscorni reið;
Verse: 3    máat Sigrdrífa svefni bregða,
Verse: 4    scioldunga niðr, fyr scǫpom norna."

Verse: 5    Sigurðr reið eptir slóð Fáfnis til bolis hans oc fann
Verse: 6    þat opit, oc hurðir af iárni oc gætti; af iárni vóro oc allir
Verse: 7    timbrstoccar í húsino, enn grafit í iorð niðr. Þar fann
Verse: 8    Sigurðr stórmikit gull oc fyldi þar tvær kistor. Þar tóc
Verse: 9    hann ægishiálm oc gullbrynio oc sverðit Hrotta oc marga
Verse: 10    dýrgripi oc klyfiaði þar með Grana. Enn hestrinn vildi
Verse: 11    eigi fram ganga, fyrr enn Sigurðr steig á bac hánom.




Next part


This text is part of the TITUS edition of Edda.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.