TITUS
Johannes Fischart, Geschichtsklitterung
Part No. 349
Previous part

Paragraph: 5      Sein Zän steifft, wetzt vnd spitzt er mit5 negeln, Holtzsolen6, Pantoffelholtz7, dem8 topff, mit eim Niderländischen Nonne : mit9 schletterlen, mit10 Puppen, diß waren sein eingefaßte vnnd angehenckte Wolffszän zum zanen vnd zännen, vnd sein Tattelkern für fallen : wäschet sein händ inn11 der Suppen, malt die Wend mit dem Muß, strelt sich mit dem Glaß, saß zwischen zwen Stülen nider, neben den schemel mit seim zarten ärßlin auff den harten boden, deckt sich mit eim beschissenen Sack, wischt sich mit treck, tranck weil er die suppen aß, wie ein Page: 247   anderer närrischer Schwab, steckt alles ins maul, reicht vil eher die linck dann12 die recht : Dann solchs ist, wie Meister Barthel Erbsenschütz, Superintendens zu Superbingen, im Buch, Von eins sanftdonnerenden Predigers lincken fuß auff der Cantzel, vnd seim rechten Aug in der Rahtstuben schreibet, ein anzeigung der Erbsündlichen art, eher krums dann schlechts zuthun : er dautzt jederman, wolt nit A. sagen, auff daß er nicht müß B. sagen, stammelt im betten, aber sehr fertig fluchet, vnnd schalt es vngestammelt, neigt daß Amen im mitteln Vattervnser, trehet daß Hütlein herumb, wurf daß Hütlein in die lufft nach dem Weihen, aß daß Fleisch ohn Brot, griff inn heissen Brei, verbrent die Finger im Liecht, biß vnd lachet, lachet vnd biß : hett zwen böse Zän, der ein aß gern Weißbrot, der ander Lebkuchen : war fromm, biß nieman im schlaff, küßt die Rhut, doch nit gern, spie offt ins Becken, forcht den Kemmetfeger, den Hudelump, vnd den Mann mit dem Sack, forcht man steck jhn wie der Mönch den Käß darein, schiß vor feißte, thet ins Bett, vnd bestrich sich damit im Antlitz, seicht gegen der Sonnen, wind vnnd wand daß Zümpelin, sauget am Leilachzipffel, verbarg sich im Wasser vor dem Regen, zucket den Kopff vnd stieß jn ans13 brett, schlug nach der hand vnnd traff die Wand, schlug vnd bauet im kalten, bließ in die kalt Milch, traumet krauß im holen, stieß jhm Wurtz vnd Zucker auß Steinen, bettet14 daß Affenpaternoster, kehrt zu seinen Hämmeln : Munter dich auff Kindstreck : trieb die Säu wider vmb zum Häu, schlug den Hund vor dem Wild15, spannt daß Roß hinder den Wagen, aß die Lebkuchenleut, haßt den Schulsack wie schön er gemalt war, gleich wie die Meidlin vngern spinnen, wie hüpsch man auch die Kunckeln Page: 248   mal, geiget auff den Nußschalen, pfiff Page of re-edition: 192  auff eim Stecken, kriegt hinder dem Ofen, hett die windeln16 am gesäß kleben, war naß hinder den Oren, daß Hembd lag jm neher als der Rock, kratzt sich wa jn nicht biß, zog die Würm spannenlang auß der Nasen, vmbfaßt viel vnd hielt wenig, aß daß weiß Brot am ersten, setzt den Bauren auff den Edelman, vom Pferd zum Esel : war sauber, schiß kein Leimen : hett dann ein Bachofen gessen : schiß ins bruch vnnd aß zu nacht, weint kein Gold, liß Nacht vnd Tag werden, beschlug die Häuschrecken, macht der Lauß Steltzen, macht Schiff auß Papir, bawet Muckenhäußlin, vnnd bließ sie selbst vmb, brach den Mucken die Köpff ab, riß jhnen die füß auß, steckt sie an einen höltzin spiß, wie die Weiber die Flöh an die Nadeln, stach den Vögeln, wie der Spartanisch König, die Augen auß, nit auß grewlicheit, sonder wie die Kinder nach den Kindlin inn den augen stupffen, trehet die kögel vmb : saß daß Hänlin im Korb, so wolts herauß, war es draussen, so wolts hinein : was er sah begert er, was er begert daß erweint er : war gar sauber, was er schiß ließ er ligen, vnd sah es alsdann an, wie ein Gaul, der den Karren hat vmbgeworffen : war aber darneben vnsicher, schiß im schlaff, wie die Bäurin, die mit dem hindern in die Milch bliß : ließ die Lerch in der hand fliegen vnd griff nach eim fligenden Storcken, schlug daß17 hund Wölflein für ein18 Wolff, sauget am hemd, kützelt sich selbs zu lachen, dient wol in die Kuchen19, macht den Göttern Garben von Stro : acht sich keins glantzes, wischt den hindern ans hütlin : vnd aß küchlein auß dem Hafen : was ein Krautschütz, wann er ins kraut schiß : biß auff ein federkengel, damit jhm die rut nit weh thet, vnd weint doch, daß jm die rotzkengel auß beiden Naßlöchern ins gefreß hiengen, Page: 249   vnd vor ängsten die stinckenden Kegel entgiengen? wann er ins Bett seicht, sagt er es hett jm geträumt, wie er an der wand stünd, vnd wässerlet, oder es sey jm der bruntzscherben ins Bett gefallen : ließ daß Magnificat zur Metten singen, vnnd befand es mächtig gut, fraß Köl vnd schiß Mangolt, wie die Geisen spotten, fressen Kraut vnd scheissen Bonen, er kant20 die Mucken in der Milch, schabt daß Papir, mördelet daß Pergamen, gewan es zu fuß, schoß nach der Geisen oder den Geissennesteln, macht die zech ohn seinen Wirt, schlug in den posch, vnd fieng kein Vogel, meynt der Himmel hang voll Geigen, glaubet Page of re-edition: 193  gefartzt sey geschworen, geschissen sey gemalt, gebrent sey gebissen, treck sey Rötelstein, daß Messer beiß, die Wolcken weren Woll oder blumentolter, daß Gewülck Spinnwepp oder Schinhüt, der Schnee Mäl, die Schlosen Zuckererbsen, die Wasserblasen Laternen, neben dem stecken gegangen sey geritten, man schöpff die Kinder auß dem Bronnen, wann es fall, es fall21 noch eins vom Himmel, Rotz auff dem Brot schmack22 wie Honig, die Katz eß dz Messer, daß Holtz schneid Eisen, wie der Römer Scharsach den Wetzstein, vnd die Mauß die Feihel nagt : stelt sich als ein Esel, auff daß er Kleien hett, aß gebrants für gebraten, Stockfisch für kraut, meint ein Beltz dient für ein schuß, ein Harnisch für die kält, ließ Bonen Erbsen23 sein, macht auß seiner faust ein hamer, fing die Kränch im ersten sprung, schalt den Weihen ein Hünerdieb vnd stal jm keins : rufft vnnd lobt den storcken, daß er jm vbers jar rote schu bringe, aß die biren vngeschelt, die Fisch vnergränt, erwischt daß schwerest für daß best, wie Keysers Sigmunds Hofman die Bleigefüllt Büchs für gulden, that auch wie deß Keisers Roß, welchs im wasser stallet, gab wo vor war, schiß zum grösten hauffen, seichet Page: 250   inn den Badzuber, meynt was glitzet24 daß sey Gold, vnnd beschiß offt die Finger dran, wie der Pfaff an deß Eulenspigels Erb : ließ daß Vögelin sorgen, holt sein Brot beim Becken, nam ein schnellfetzlin für ein Nuß, gab ein Nuß vmb ein Pfeiff, ja gab ein Esel vmb ein Peif25, gieng auff vier füssen, macht sich zu eim Roß daß er Habern eß, trug sein Hand am Arm, schob es alles vnter der Nasen ein, fand daß Maul finsterling, warff ein Ey nach eim Spatzen, meynt wann jn hungert die Frösch murreten im Bauch : sein Bauch hett kein Oren, liß nit mit jm tädingen, wann ers hat so aß er, hat ers nit, so tranck er dafür, wan er den Kessel an sah so durst jn, ließ die Würm spießlang von sich26 kriechen,27 ohn verzuckerten Wurmsamen, er danckt fürs Weysel vnd durst jn noch : er wolt daß man von rincken zu rincken vnnd glidsweiß den Pantzer flick, sah dem geschenckten Gaul allzeit ins Maul, sprang vom28 Hanen zum Esel, setzt vnter zwey grüne ein zeitigen, vnter zwey dörre ein grünen, vnter zwey zeitige ein vnzeitigen : nach deß Bodini Geometrischer proportz : daß macht sein Red hieng an einander wie ein kett von Kühtreck, maß, wie König Cyrus, dem langen ein Page of re-edition: 194  langen, dem kurtzen ein kurtzen Mantel an, macht von Erden ein Grub, besah den Wölffen die Zän, besah sie im Mon, bließ kein Muß, verbrant daß Maul, sah den Wolff deß Mons, sah im Mon ein Männlin daß Holtz gestolen hett : macht ein tugend auß der Noht, Macht ein Supp von solchem Brot : wann die Wolcken fallen, hofft er alle Lerchen auffzufahen : Noht brach bei jm eisen, daß kont er mit scheissen beweisen, er verzett29 es eh ers zum Stülchen bracht, daß wann der weg gen Rom also wer gepflestert gewesen, ein Hund jhn wol het finden können : brüntzelt nit, man schlug jhm dann Page: 251   ans Zümplin, vnd pfiff jhm wie den Pferden darzu : sagt alles was er wußt, that als was jn gelust, glaubet alles was er hört, hört alles was man böses lehret30, gab als was er hat, nam alls was er begert, was man jm zeigt wolt es haben, bekömmert sich eben so klein vmb die geschabene als die beschorene, sagt vom fernigen Schnee, wie ers vom Großvatter Hackeleback gehört hat, meynt wann man jhn new anthat es wer Sontag, meynt Sant Claus reut auff eim Esel herumb vnd scheiß31 jm sein Schu voll Lebkuchen : biß den Leusen die köpff ab, gleich wie der im Flöhatz den Weibern mit den Flöhen rhatet32, fieng Mucken mit dem Maul, vnd die Flöh in den Ohren.

Next part


This text is part of the TITUS edition of Johannes Fischart, Geschichtsklitterung.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.