TITUS
Johannes Fischart, Geschichtsklitterung
Part No. 452
Previous part

Paragraph: 9      Aber das best war, das diser alt Huster kecklich inn offentlicher versamlung vnnd audientz zu den Maturin, inn der Sorbon gehalten, noch einmal seine Würst vnnd Hosen fordert. Die jhm doch gleich Peremptorie worden abgeschlagen34, weil35 er sie vom Herren Garkantenvoll36 einmal für alle mal hat empfangen37, laut der Information darüber auffgericht. Dagegen repliciert er, das solchs wer von Gratis her vnd auß des fremden Herrn Gnädiger Freigabe : durch Page of re-edition: 237  welche sie darumb nit jhres verheissens weren relevirt vnnd entschlagen. Diß vnangesehen, ward jhm zur antwort, daß er sich eines billichen vernüg, vnnd nit ein Bettlermeitlin, noch diß von jhnen gewärtig sey. Was : billich, sagt Janotus Latzmat, billichkeit38 gilt doch nit hierinn : jhr schelmische Bößwicht, 'vel dic' Ertzverrähter, 'ex nunc prout ex tunc', jr seit nicht eins Sautrecks werd : vff dem Herrgots boden sind nicht ärgere lauren als jr seyt. Ich weiß es nur zu wol, Ich kenn euch, wer euch kent der kauft euch nicht. Nicht hincket vor dem Lamen : Ich hab solche Büberey auch mit euch getriben : Ich kan dem Dib die händ im Sack erwischen. Beim Heiligen Miltz, ich will bei dem König euch die Page: 306   strey machen, vnnd alle die arglistige bubenstück, die jhr hierin kocht39 vnnd Prüttelt,40 entdecken : Vnd da wett ich daß ich aussetzig werd, wann er euch nit alle laßt lebendig 'de facto' verprennen, als Florentzer, Verräter, Ketzer vnnd verführer, als aller Tugend vnnd Gottsfeind : Jr Gottsdieb vnd Gottverräter, 'wͤ saluo iure addendi', Mit vorbehalt solche Titul zu bessern vnnd zumehren. Auff solche wort rufften sie all 'Blasphemauit', vnd stelten darüber ärtickul wider jhne. Er zu seim theyl vnerschrocken citirt sie 'ad instantiam', vnnd setzt jhnen einen tag. Inn summa der Proceß ward von dem hoffgericht vnnd Parlament angenommen, da hangt es noch. Die Magistri nostri gelobten jhre Röck nit eh außzubürsten, noch jhre Läuß ab zusträlen, hingegen Janot Mattlatz sampt seim anhang die Nasen noch den Arß nicht ehe zuwischen, es sey dan durch einen endlichen spruch entscheiden41. Von disem gelübd an,42 sind sie biß auff den heutigen Tag Lausige vnd Rotzige Vnfläter gepliben : dann das Dollosisch Kammergericht hatt noch nit alle allegaten vnnd probaten inn 'defectum', vnnd 'passus dubios' recht ergrabelet, vnnd erstrabelt. Das vrteil soll auff neheste Griechische Calendas, das ist, auff der Juden Christag, vnnd der Genffer Liechtmeß43 außgesprochen werden. Wie jhr dann wißt daß44 dise Rechtsklügler mehr als die natur künnen, vnnd wider jhre eigene articuln thun. Dann die artickel der Parisischen schul,45 darauß die Parlement ersetzt werden, lauten46, Gott47 allein könn vnendliche sachen machen : Die Natur mach nichts vnabsterblich : Sondern allem dem sie ein anfang gibt, dem geb48 sie auch ein endschafft : Page of re-edition: 238  'Nam49 omnia orta cadunt. &c.' Hingegen50 dise Daukauer, Muckenkauer, Kamelschlucker, Häuserschlucker, Goldvernagelte Zungen, die recht Page: 307   sprechen, nicht recht thun, Halßstürtzer guter wörter inn Parim vom Puteo, die Liebhaber der Rubricpfenning, der Hern 'de Auricuria &51 de Terra rubea' : Vnd sonst Jacobs von Beutingarus : Vnnd Saturnische Weisenfresser, machen die Proceß vnnd rechtfertigung52 bey jhnen anhängig, vnnd nimmer abhängig noch abgängig, sondern jhe mehr zugängig vnnd verlängig, vnendlich vnd vnabsterblich. Damit sie deß Spartanischen Chilons spruch, der im Delphischen Tempel zu53 gedechtnuß geheiliget stund, bestettiget haben, welcher laut, die54 Armseligkeit sey deß processes vnnd Rechtfertigens55 gefertin vnd ehgemal56, vnnd alle Rechtfertiger seyen armselig oder werdens57. Dann viel eh erlangt ein end solcher hinderstelliger Gäul leben58, als das Recht welchs sie fürgeben : Was hilffts als dann, wann der kopff ab ist, daß man den Hut halt? vnnd daß man den außgeloffenen Wein mit mäl auff trocknet, wie der Türck vor Siget die Pfützen mit wollsecken. Gemalte vögel sind wol gewiß zuschissen, aber nit zugeniesen. Was gehst auff steltzen, daß der stümpff schonst, vnd fällst gar in treck. Meinst die Leut seyen Katzen, weil sie Haar am Bauch haben?



Next part


This text is part of the TITUS edition of Johannes Fischart, Geschichtsklitterung.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.