TITUS Texts: Johannes Fischart, Geschichtsklitterung

TITUS
Johannes Fischart, Geschichtsklitterung
Part No. 494

Paragraph: 30 Wan¹⁰⁴ er dann nun genug gespielet, gerasselt, gefesselt, gekesselt, vnd die zeit verrammelt hett, da wolt sich auch nun in alle weg gebüren, ein weil zu bausen auß der Krausen, des¹⁰⁵ waren nach seiner ordenlichen Diæt Eilff Seidle für den Mann. Dann ich laß den passieren, welcher eins Sitzens so viel saufft als er wigt. Gleich auff das bancketlin, war ein feine banck sampt dem banckpfulwen vnd sonst ein Faulbettlin zur Hand, darauff streckt er sich banckethierlich vnnd zierlich, vnd schlieff ein zwo oder trey stunden dahin, nicht daß er eim ein böß wort hett geben. Als er widerumb erwacht, schüttelt er ein wenig die Ohren, als hett der Hund Enten im Wasser geholet : Mitler weil trug man jhm frischen Wein auff, da soff er meh als vor nie darauff.

This text is part of the TITUS edition of Johannes Fischart, Geschichtsklitterung.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.