TITUS Texts: Johannes Fischart, Geschichtsklitterung

TITUS
Johannes Fischart, Geschichtsklitterung
Part No. 509

Paragraph: 13 Inn mitteler Nacht, ehe sie sich zur ruh begaben, giengen sie zuvor an das lufftigste ort, welchs offen vnnd frey stund, des Himmels wesen vnnd enderung zubeschauwen, vnnd da gaben sie acht auff die Planeten, Cometen,¹⁴⁹ Figuren, leger, gelegenheit, Aspect, ansehen, Oppositzen, vnd conjunctionen des Gestirns. Darauff recapitulirt, vnnd vberschlug er kurtzlich auff Pythagorische weiß mit seinem Lehrweiser alles was er die gantze Tagzeit durch gelesen, gesehen, erfahren, gehört, gethan vnnd vernommen hat.¹⁵⁰ Ja er trutiniert sich auch, vnnd legt sein Leben vnnd wandel desselben Tags auff die Wag des Vergilischen 'Vir bonus & sapiens, &c.' Wann du dich legst zu süsser rhu, vnnd dir wöllen gehn die augen zu, So denck zuvor ein jede nacht, Wie du den tag habst hingebracht vnd was daselbst weiter folgt.

This text is part of the TITUS edition of Johannes Fischart, Geschichtsklitterung.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.