TITUS
Johannes Fischart, Geschichtsklitterung
Part No. 508
Previous part

Paragraph: 12      Wan er also nun die zeit hat zugebracht, vnd sich getrocknet, geriben, gewischt138 gefrischt, vnd die Kleider geendert, zettelt er allgemach wider heim, nam den Weg durch etliche lustige Wisen oder andere krautbare Oerter, da hat er sein Gesprech von Feldbaulichen Sachen, von des Liebalti Meyerhof, erfragt der Bienen Policei vnd Regiment, erwog, wie Stigelius an eim jeden kräutlin Gottes fürsehung, besichtiget, vnd ersuchet etliche Bäum vnd Kräuter, die heut etwas zweifels haben, vnd hielt sie gegen der Alten Bücher, die dauon geschriben139, als Theophrast, Dioscorid, Marin, Plinius, Nicander, Macer vnd Galen : trugen auch der140 simplicien hand voll141 zu hauß : welcher ein junger Knab, Rhizotomus genant, von Würtzburg bürtig, warten mußt mit142 Hackengraben, Schaufelen,143 Sichelen, Karstlen, Rattenkloen, Spaden, Hebzapffen, Jetthauen, Grabstickeln, Eggezincken, Gerthauen, Hippen, Pickeln, ZänGäblin, Gerteln, Bindmessern, Hagmessern, Häplin, Raupenhecklin Page: 357   vnnd anderm Gartnerszeug, wol zuarborisieren, vnd zuherbieren, zupflantzen, zubeltzen, zuversetzen, zuschripffen, zujetten vnd den bäumen zuschneutzen, zubeschneiden, zupfrupffen, zuschröten. So bald sie nun heim kamen, erholten vnnd sinnschöpfften sie etlichs was zuvor gelesen war worden, alleweil man das essen zurichtet, vnnd sassen damit zu Tisch. Hie solt jhr mercken, daß er sich von dieser Disciplin auch vber Tisch bessert : Dann seine Mal waren nüchtern, mäßig vnnd sparsam, sintenmal er der Speiß nur genoß den widerspennigen aufflauff des Magens zustillen : aber das Nachtmal war gemeinlich etwas flüssiger vnd weitleuffiger :144 vnd also solls sein : darumb haben die Alten das Nachtessen allein für ein recht Mal gehalten, den Mittagjmbiß zu acht Vhren nur für ein Morgensupp : daher kompts daß man sagt : Ein Abend ist frölicher dann vier Morgen. Was auch der Troß anderer vieler vngehöfelter vnerbeutelter vnd schüpiger Artzet in der Sophisten Werckstatt abgerollet vnnd gewalblochet im gegentheil halten vnd rhaten. Vnter des man nun aß, ward die Lection zum Morgenjmbiß angefangen, vnnd als lang es jhenen145 gefellig vollzogen. Die vberige zeit ward mit guten146 gelehrten vnnd nutzlichen reden zugebracht. Nach dem nun der Tisch auffgehaben, vnnd Gott vmb seine Gaben danck gesagt gewesen, da fieng Page of re-edition: 277  man widerumb an Musickartlich zusingen, auff zugestimpten Instrumenten zuspilen, 'quatuor, trium', Muteten, Vilanellen, etc. oder die147 kleine kurtzweilchen auff Karten, Würffeln vnd Prettspiel vorzunemmen : Vnd dabei bleiben149 sie mit grossem lust vnnd gutgeschirrig, vnnd übten sich zuzeiten biß sie die stund zuschlaffen scheidet. Bei weilen besuchten sie gelehrte belesene Page: 358   Leut, wolgeschickte Versamlungen, 'Historicos, Poëtas', die einen vnsterblich machen können, entweders Jambisch oder Heroisch, Dann 'Carmen amat quisquis carmine digna gerit' : Wer Lobswürdig kan thun vnd beweisen, der liebet die so einen können loben vnd preisen. Oder sie besprachten Leut, welche frembde Länder gesehen hatten.

Next part


This text is part of the TITUS edition of Johannes Fischart, Geschichtsklitterung.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.