TITUS
Johannes Fischart, Geschichtsklitterung
Part No. 580
Previous part

Paragraph: 6      Zum viertenmal sprang er freies fusses, dem Roß vber den Kopff, trehet sich herumb wie ein Topff, flugs sprang er nach des Pferds Ohren, erwischt sie, vnd vbergab sich also daß er auff den lincken daumen kam, vnnd auch wie vor im Rädlin herumb fuhr wie ein Windmül, schmiß zugleich darauff mit der rechten flachen hand auff den mitteln Sattel, daß es im Thal widerhallet, vnnd nam ein solchen Schwang, daß er im Sattel wie ein Fraw zusitzen kam, doch nicht wie ein Hundsruckerin, dann dieselben sitzen grattelig wann sie zu Acker fahren, vnd schadet jhnen nichts am bruntzen. Darnach schwang er den rechten Fuß allgemach vber den bogen, vnnd setzt sich wie ein anderer Reutter auff das hindertheil, allda jm ein Nestel zersprang. Aber, sprach er, es ist besser, daß ich mich inn den Sattel schraub, dann darneben zusitzen ist jedem erlaubt : setzt darauff beide daumen strack für sich, vbergab den arß inn die höhe vber den kopff, also daß er recht zusitzen inn Sattel kam : Folgends inn eim Lufftsprung11 erhub er sich wider mit gantzem leib inn die höhe, hupfft geschrenckt mit den füssen auff den zwen Sattelbogen hin vnnd wider, wie die Hörbauckener mit den händen Trommen schlagen : Page: 451   dann mit den füssen hab ichs noch nicht gesehen : Darnach bezog er ein Laut an den Zähen die Waden hinauff, vnnd schlug auff den Zitterigen arßbacken vber dem Sternen, darauß ein schöner thon vnd geruch folget. Vnd nach diesem allem, erstund er wider mit zugethanen füssen inn den Sattel, rädelt wol hundertmal herumb, wie ein Habergeiß, die händ kreutzweiß außstreckend, daß eim das gesicht darob vergieng, vnnd vnter des rufft er grell vnnd hell. Hui Teuffel, ich muß verrasen, hui Astarot, Belial, ich vertob, halten mich, hui Teuffel halten, hey halten den Schelmen, hui Beelebub12, Leuiathan.

Next part


This text is part of the TITUS edition of Johannes Fischart, Geschichtsklitterung.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.