TITUS
Johannes Fischart, Geschichtsklitterung
Part No. 604
Previous part

Paragraph: 4      Gleichwol wann jhr wißt, warumb ein Aff, wa er inn eim Hauß ist, allzeit verspott, geuexirt vnd geübt wird, wie ein Nußbaum, Esel vnnd Weib, welche stäts wölln getrescht sein, vnd wie ein schalcksnarr vngeübt kein freud macht, so werd jr auch verstehn, warumb die Mönch inn der Welt von jung vnd alten gescheuet werden. Der Aff hütet nit des Hauses wie der Hund, er zeicht nicht im Pflug wie ein Ochß, er tregt weder Woll noch Milch wie das Schaf, ist weder zureuten noch zufahren wie das Pferd, tregt weder Holtz zur Kuchen, noch Korn zur Mülen wie ein Esel : sein gröst thun ist, alles bescheissen vnd verderben, den kopff mit den Leusen hinwerffen, schmatzen vnd im Plosen hindern kratzen, darumb wird er von allen verspott, gestossen vnnd geschlagen. Also auch ein Mönch (doch die müsige tropffen verstanden, sampt eim grossen Register mit Predighandtierer) der ackert nicht wie der Baursman, beschützt nicht Land vnd Leut wie ein Kriegsmann, heilt nicht die Krancken wie ein Artzet, lehrt das Volck nicht auff Canceln vnnd in Schulen wie ein rechtschaffener Prediger vnnd Schulmeister, hilfft keim zum rechten wie ein Jurist, füret einer Statt oder Landschafft nicht allerley nötige bekömmliche waren zu wie ein Kauffman : sonder et cetera, jhr versteht mich, er zeigt12 nur stäts die blotte blatt, dann er ist vmbs maul dahinden glatt. Küß Affenfutt, so hebst kein Schwantz auff : oder versteht jhrs nicht. So leset das Simiacum.13 Secht da habt jhr die vrsach, warumb sie von allen wie Kautzen vnd Eulen gescheuet werden. 'Sed Pauper vbique iacet'. Page of re-edition: 371  Ich hab noch andere Schaaf, die muß man auch inn disen Notstall bringen, sie werden mir sonst vor grossem Theologischem stoltz auß dem Digel springen : das macht sie sitzen inn Rosen wie Page: 481   ein Katz im Bauchloch : Sind Affenschwäntz, sind Kühoden, sie wollens sein vnnd wöllens nicht sein : Gleichwol hört bei dem Affen ein Aeffisch geheimnuß : Warumb die Affen den Vulcanum sollen erzogen haben? Da rathen zu jr Flagelloflegellanten : Errahten jrs nicht, so seits wartend im Gegenflegel. Aber zu vnsern verklaußten, vnd verklaustrierten brüdern wider.

Next part


This text is part of the TITUS edition of Johannes Fischart, Geschichtsklitterung.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.