TITUS
Alexanderroman (Johann Hartlieb)
Part No. 80
Previous part

Chapter: 109  
Paragraph: 80  
Alexander schreibt Briefe an seine Hauptleute und an Darius

Line: 2170   Wie Allexander vmb gewand hindersich schraib. LXXX


Line: 2171     Als Alexander den brief Dario dem kunig gesanntt hett, da beraitt er sein heer
Line: 2172     vnd schraib allenn seinen hawbttlewtten in soleicher mass: 'Alexander gepewtt
Line: 2173     allen seinen haubttlewtten vnd allem seinem volck große frewde. Ich wil vnd
Line: 2174     schaff, daz ewr yegleicher auss yedem seinem ambt mier von stundt anuercziechen
Line: 2175     beraytt tawßentt par schuech vnd senndentt die in anthyochiam von
Line: 2176     ewren lannden syria, capadocia, cecilia, pamphylia, arabia vnd allen vmbligenden
Line: 2177     lannden vnd sendet damitt allew hewtt von thyeren, die ir gehabenn
Line: 2178     mugett vnd berayttett die schnel auf vnd senndett mier die auch in anthyochiam,
Line: 2179     daz ich meinen rittern alle dinge beraytt vinde vnd samett vil kchämel,
Line: 2180     daz sy alles wol getragen mugen pyss zu dem wazzer ewfrattes vnd fuertt mitt
Line: 2181     ewch alles, daz ewch nott sey vnd lebtt in frewdenn'. Zu der czeitt hett kunig
Line: 2182     Darius gar ein getrewen mann, der was ain fuerst vil volckes vnd sein namenn
Line: 2183     was Hostadius. Der schraib dem kunig Dario ain soleichenn brief: 'Dem großmoͮchttigen
Line: 2184     kunig Dario empewt ich langwerende frowde. Ich soltt ewr großen
Line: 2185     mayestatt soleichs nichtt schreiben, aber ich mag daz nichtt gelaßenn, wann ich
Line: 2186     hab es gesechen. Ewr durchlewchttigckaytt sol wißenn, daz zwenn die grosten
Line: 2187     fuersten tode sindt vnnd ich pin vast wundt, so ist Chaachs auch todtleichen
Line: 2188     gewundett vnd ist geflochen, nyemandt wayss, wohyn. All mochttig fuersten
Line: 2189     in deinem lanndt hie vor habenn sich ergebenn an Alexandrum vnd er hatt sy
Line: 2190     all gar kostleich begabtt mitt kchayßerleichen lannden vnd gaben, presenntten
Line: 2191     vnd vnsagleiche reichaitt. Die mochttigen statt metriades, die hatt er auss
Line: 2192     geprantt vnd den tempel gar czerstorett'.




Next part


This text is part of the TITUS edition of Alexanderroman (Johann Hartlieb).

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.